Rehab Da Ne Ene Ikpea Nẹhe Ne Dọ Baba Otọ Ọsi Jẹriko

Ẹghe nin ene ikpea eva ọsi ibhokhan Izrẹl nan je ne dọ baba otọ ọsi Jẹriko fẹghe ki rẹ sẹbhi enin, ele da debhi uwa ọsi okhuo ọkpa natiọle Rehab a. Ojie ọsi Jẹriko da họn ghe ele ribhi enin, bhiriọ, ọle da je eyokhọnlẹn ha khian uwa ọsi Rehab. Rehab da ne ene ikpea he bhi okhun uwa nọnsọle, yẹ dia ene eyokhọnlẹn diọbhi uwedẹ ọbhebhe. Ọle da taman ene ikpea ne dọ baba ọne otọ fẹghe yọle: ‘Mẹn dẹ rẹkpa bha ranmhude mẹn lẹnmhin ghe Jehova ne bha dia, sẹyẹ, bha dẹ khọn ọne otọ nan miotọ. Huẹan, bha ve nin mẹn ghe ibha i da fuẹn azagba-uwa nọnsẹmhẹn an.’

Ele da taman Rehab yọle: ‘Emhin i da sunu ji ọria soso bhi azagba-uwa nọnsẹ.’ Ele da yẹ yọle: ‘Diẹn iri nọn gian bhi windo nọnsẹ, bhiriọ, a i da re obọ so ọria soso bhi azagba-uwa nọnsẹ.’

Rehab da rẹkpa ene ikpea ne dọ baba ọne otọ fẹghe rẹ re ukpiri na windo nọnsọle huẹnre. Ele da nẹgbe dọ nẹko bhi eji oke ye. Ele da gbe ikpẹdẹ ea bhi enin ele kuẹ fikie bu Joshua. Bhiriọ, ibhokhan Izrẹl da fan ẹdẹ Jọdan ra, yẹ muegbe rẹ re ọne otọ kiẹn ọsele. Jẹriko hi agbaẹbho ọhẹnhẹn nin ele khọn miotọ. Jehova da taman ele nin ele khian nẹga ọne agbaẹbho osukpa bhi ikpẹdẹ ehan. Sokpan, bhi ukpẹdẹ nọnzi ihinlọn ele da khian nẹga ọle bhi igba ihinlọn. Ele ki lu ọnin fo, ene ohẹn da khue akala nọnsele, sẹyẹ, ene eyokhọnlẹn da manman reso. Bhiriọ, ogbe ọsi ọne agbaẹbho da siẹn sotọ sẹsẹsẹ! Sokpan, uwa ọsi Rehab bha dunmhun an arẹmiẹn ọne ogbe a bọn ọlẹn mun. Rehab bi azagba-uwa nọnsọle da miuhọnmhọn ranmhude ọle mun udu nyan Jehova.