14 REHAB
Ọle Da Fikekegbe Ẹbho Nesọle Yẹ Sun Rẹkhan Jehova
OKHUO ọkpa ribhọ natiọle Rehab, agbilẹ ọle khin. Ọle da ha nyẹnlẹn bhi uwa nọn ribhi ogbe ọsi Jẹriko. Ọle sabọ na bhi windo nọnsọle ghe ole, yẹ daghe eran kẹkẹ bi ebi ovuẹn rẹ ha zẹ yẹ. (Deut. 34:3) Ọkpakinọn, ẹbho nin ọle daghe bhi ẹkẹ ọne agbaẹbho i zẹwẹ ghọnghọn, ofẹn da wo ha mun ele. Ibhokhan Jẹriko lẹnmhin ghe Jehova dẹ rẹkpa ibhokhan Izrẹl rẹ fuẹn agbaẹbho nọnsele a. Ọnan mhẹn ele bhi egbe!
Ibhokhan Izrẹl da mun agọ sikẹ agbaẹbho ọsi Jẹriko. Ikpe egbọ eva ne gbera ọkuẹsẹ ọne ẹghe nan, Jehova ka hinmhin ẹbho nesọle, bhi ẹghe nin ọle rẹ fuẹn Fero bi eyokhọnlẹn nesọle a bhi Okpẹdẹ Nọn Gian. Ọkuẹsẹ ibhokhan Izrẹl mun agọ nẹga agbaẹbho ọsi Jẹriko, Jehova da rẹkpa ele rẹ khọn ijie ọsi Saihọn bi Ọg miotọ. Emhin ọhan-ilo wo khọnan ranmude ibhokhan Izrẹl i yi eyokhọnlẹn, ẹkẹ ẹgbo ele da ha zozo khian bhi ọne ẹghe nan. Bhi ejayenan nian, ele bu Jẹriko vade, ranmhude Jehova guanọ nin ọle re oya nin ele bhi emhin ebe nin ele lu!
Rehab lẹn ghe ẹbho nesọle manman wo lu emhin ebe. Ọle tobọle bhọ bha yẹ khia, ranmhude, ilọnmhọn agbilẹ ọle ha lu. Edandan i ribhọ ghe ọle wo ha guanọ nin ọle fidenọ yẹ ha nyẹn iẹnlẹn esili. Ebi ọle luẹle rẹji Jehova bha re ọfẹn ọlẹn ha mun ọlẹn, sokpan ọ da re ikhuaẹloghe nanlẹn. Ọle lẹnmhin ghe, Jehova wo gbega ẹbho nesọle yẹ re ekpẹn nin ele lu emhin. Ọle bha diabe ene osẹ nin ẹbho ha ga bhi otọ Kenan. Ọnan zẹle nin ọle da ha guanọ nin ọle sikẹ Osẹnobulua nin Jehova, ranmhude ọle wo lu emhin ne gbale ẹghe rebhe.
Bhi asọn ọkpa, eriọbhe eva da vae bhi uwa ọsi Rehab. Ele da ha guanọ eje ele ha wẹ. Ranmhude ọria nọn gbẹlokotọ Rehab khin, ọle da wo lẹn ghe, ibhokhan Izrẹl ne dọ baba agbaẹbho nọnsele fẹghe ene eriọbhe khin. Ọ i yi Rehab ọkpa lẹn ebi ene ẹbho nan dọ lu, ojie ọsi Jẹriko yẹ wo lẹn. Bhiriọ, ọle da je ikpia nesọle ha khian uwa ọsi Rehab, ele da taman Rehab ghe nin ọle ne ene ikpia dagbare. Ọ da khẹke nin Rehab zẹ ebi ọle ha lu nọn ha fi iẹnlẹn nọnsọle denọ. Ọle dẹ be deba ẹbho nesọle, la ọle dẹ deba ẹbho nesi Jehova?
Rehab da re izebhudu man, ọle da deba ibo nọnsi Jehova. Ọle da ne ene ikpia ne dọ baba ọne otọ fẹghe he bhi okhun uwa nọnsọle, yẹ taman ene ikpia nin ojie je re ghe ene eriọbhe kpanọ fo. Ene ikpia nin ojie je re ki kpanọ, ọle da bu ene ibhokhan Izrẹl bhi okhun uwa, yẹ taman ele ebezẹle nin ọle da hinmhin ele. Ọle da taman ele ghe, ọle lẹnmhin ghe Jehova dẹ mun ọne otọ nin ele. Rehab da ha mhọn urẹọbhọ da Osẹnobulua ọsi ibhokhan Izrẹl! Ọle da tẹmhọn nọn re izebhudu nin ene ikpia. Ọle da ji ele lẹn ghe: Ẹbho ne nyẹnlẹn bhi Jẹriko manman wo mun ofẹn ibhokhan Izrẹl. Ọle da bhii ele nin ele gbega azagba-uwa nọnsọle bhi ẹghe nin Jehova ha rẹ noo ele rẹ dunmhun agbaẹbho nọnsele a.
Be agbilẹ rẹ sabọ fikekegbe ẹbho nesọle yẹ, yẹ zobọ bhi ilọnmhọn oghẹ?
Rehab da hinmhin ene ikpia ne dọ baba otọ Jẹriko fẹghe. Ene ikpia da yẹ daghe ọle ghe Rehab mhọn urẹọbhọ da Jehova. Ele da ka nin ele rẹ lu ebi ọle taman ele. Rehab bi azagba-uwa nọnsọle dẹ miuhọnmhọn. Ene ikpia eva da taman Rehab ghe nin ọle hẹi taman ọria soso ghe ele vae bhi isọle. Ele da yẹ taman ọlẹn ghe, nin ọle diẹn uri nọn gian ọbhi windo nọnsọle, sẹyẹ, nin ọle bi azagba-uwa nọnsọle debhi ẹkẹ uwa a bhi ẹghe nan ha rẹ ha fuẹn agbaẹbho nọnsele a. Rehab ha lu ebi ene ikpia taman ọlẹn, ọle bi azagba-uwa nọnsọle ki miuhọnmhọn.
Rehab da diẹn uri ọbhi windo nọnsọle beji ene ikpia ha da sabọ noo ọle rẹ nẹgbe sibhi ọne agbaẹbho re. Ọle da lu ebi ene ikpia taman ọlẹn tee. Ọle da diẹn uri nọn gian ọbhi windo nọnsọle, ne azagba-uwa nọnsọle ọbhi ẹkẹ uwa. Sẹyẹ, ọle bha taman ọria soso ghe eria sẹbhi uwa nọnsọle. Izebhudu Rehab wo rẹman, ranmhude, ẹbho bhi ọne agbaẹbho ha lẹn ebi ọle lu, uu ọle ha miẹn bhọ. Ẹghe nin Rehab rẹ lẹn ghe Jehova hi ọnọn lu ọle nin Ẹdẹ Jọdan hẹi yẹ nẹ beji ibhokhan Izrẹl ha da gbera, Rehab bha ha mhọn edandan ghe si emhin nọn gbale ọle zẹ rẹ lu. Ofẹn wo manman ha mun ibhokhan Jẹriko bhi ẹghe nin ibhokhan Izrẹl rẹ ri ikpẹdẹ ihinlọn khian nẹga ọne agbaẹbho. Bhi ọkike ọle, bhi ukpẹdẹ nọnzi ihinlọn, bhi ẹghe nin ene ohẹn rẹ khue akala nọnsele, bi bhi ẹghe nin ibhokhan Izrẹl rẹ reso, Rehab bi azagba-uwa nọnsọle da mun egbe mhọnlẹn bhi ẹkẹ uwa, beji ọne ogbe rẹ ha de dunmhun an. Rehab bi azagba-uwa nọnsọle da miuhọnmhọn.
Ọnan ki sunu fo, ene ikpia ne dọ baba ọne otọ fẹghe da ne Rehab bi azagba-uwa nọnsọle dagbare. Uwa nọnsọle ọkpa bha dunmhun an bhi ọne ogbe. Beji Joshua tale, Rehab bi azagba-uwa nọnsọle da miuhọnmhọn. Akizẹbue, Rehab da deba ibhokhan Izrẹl ha nyẹnlẹn kugbe. Obhokhan Izrẹl ọle bọ. Ele da yẹ ha mhọn imọn. Ikpe ne bunbun ki gbera, Jesu Kristi da na bhi ulin-uwa ọsi Boaz vae, nin ọmọn nọnsi Rehab. Jesu Kristi hi ọnọn ki sẹ re izebhudu man nẹ bhi ọne otọ nan. (Mat. 1:5, 16) Jehova da wo manman nan erọnmhọn nin Rehab bhi izebhudu bi urẹọbhọ nin ọle ha mhọnlẹn.
Tie ọne okha bhi Baibo:
Joshua 2:1-24; 5:1; 6:14-25
Inọnta
Uwedẹ nela Rehab rẹ re izebhudu man?
Manman Guanọ Otọle
1. Be iẹnlẹn ọsi Rehab diayẹ bhi ẹghe nin ọle rẹ ha ribhi Jẹriko? (w13 11/1 12 ¶4–13 ¶1)
2. Be mhan rẹ lẹn yẹ ghe ene ikpia ne dọ baba otọ Jẹriko fẹghe, ọ i yi nin ele rẹ ne Rehab nowẹ zẹle nin ele da diọbhi uwa nọnsọle? (it “Agbilẹ” ¶16)
3. Bezẹle nin ekhun ọsi ebi a kọle natiọle flax da ha ribhi okhun uwa ọsi Rehab? Be a re ọle lu? (it “Flax” ¶2-4) 1
Thanks for your interest in my photos/Moment Open via Getty Images
Ifoto 1: Ugbo flax
4. Bezẹle nọn i da yi emhin ebe nin Rehab rẹ hiẹ ene ikpia nin ojie je re? (w04 12/1 9 ¶1) 2
Ifoto 2
Ria Eria Nyan Emhin Nin Uwẹ Luẹle
Bezẹle nin ọ da khẹke nin Rehab ha mhọn izebhudu rẹ ne obọ sibhi ẹmhọn igboghẹ re, yẹ deba ibhokhan Izrẹl ha ga Jehova? Be ẹbho nin mhan man ele Baibo ha miẹn luẹ bhi ijiẹmhin nọnsọle?
Baibo taman mhan ghe nin man hẹi ha bha ohoghe, ọkpakinọn ẹgheso, eghian mhan ki ha sua mhan ọbhọ nin mhan rẹ taman ele emhin nọn bha khẹke nin ele lẹn rẹji ibhio mhan nin mhan ko ga. Bhi idia nọn sẹriọ, be mhan ha sabọ miẹn luẹ bhi ijẹmhin ọsi Rehab? (Prov. 11:13; Eccl. 3:7; Ẹfẹ. 4:25) 3
Ifoto 3
Ifoto 3
Uwedẹ ọbhebhe nela uwẹ ha rẹ sabọ re egbe khọkhọ Rehab bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Rehab le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Be okha ọsi Rehab man mhan le rẹji ebi mhan ha rẹ miuhọnmhọn yẹ bhi ukpẹdẹ nọnsi Jehova nọn vade?
“Ejela Ọkhẹke Nin Uwẹ Ha Ye Sade Ọkpẹnlẹn Vae?” (w09 5/15 6-8)
Noo ifoto nan rẹ gbokha ne ribhi Baibo rẹ rẹkpa imọn nesẹ rẹ daghe ebi emhin rẹ sunu yẹ bhi ẹghe ọsi Rehab.