Joshua Bi Ibhokhan Gibiọn

A da wo ha tẹmhọn ebe sunu ji Jẹriko bhi agbaẹbho rebhe bhi otọ Kenan. Bhiriọ, ene ijie ọsi ene agbaẹbho rebhe da sikoko nin ele rẹ dọ khọn ibhokhan Izrẹl. Sokpan, ibhokhan Gibiọn bha deba ele. Be ele ki lu yẹ? Ele da muno ukpọn ne fafa yọ, yẹ bu Joshua. Ele da taman ọlẹn yọle: ‘Agbaẹbho nọn manman ree mhan na vae. Mhan wo họn ẹmhọn Jehova bi emhin rebhe nin ọle lu nin ibha bhi otọ Ijipt bi otọ Moab. Ve nin mhan ghe uwẹ i da gbono mhan an, ghe, uwẹ dẹ re mhan kiẹn eguọmhandia nesẹ.’

Joshua da rẹọbhi ebi ele tale yẹ ve ghe ọle i da gbono ele a. Ikpẹdẹ ea ki gbera, ọle da dọ kere ghe agbaẹbho ọsi Kenan ele na vae. Ọ bha ree bhi eji ele ye. Joshua da ki nọọn ibhokhan Gibiọn yọle: ‘Bezẹle nin bha da bha ohoghe man mhan?’ Ele da wanniẹn ọlẹn yọle: ‘Ranmhude ofẹn mun mhan! Mhan lẹnmhin ghe Jehova nin Osẹnobulua nọnsẹbha, ọle hi ọnọn khọn nin ibha. Huẹan, hẹi gbono mhan an.’ Joshua da mun ive nin ọle ve sẹ, ọle bha gene gbono ele a.

Ọ bha buegbe, ijie isẹn ọsi ibhokhan Kenan bi eyokhọnlẹn nesele da yọle ghe ele dẹ gbono ibhokhan Gibiọn an. Bhiriọ, Joshua bi eyokhọnlẹn nesọle da re ukpasọn ọkpa khian bu ibhokhan Gibiọn dọ hinmhin ele. Ẹdẹ ki wo we, ele da munhẹn ha nin ibhokhan Kenan khọn. Ene ibhokhan Kenan da nẹgbe. Eji ọ hi ki rẹ khin nin ele nẹ diọ i, Jehova da ha muno udede esia gbono ele. Joshua da ki bhii Jehova nin ọle lu ọle nin ovuẹn wo ha zẹ. Sokpan, bezẹle nin ọle da bhii Jehova nin Ọle lu ọle nin oẹnlẹn hẹi defia beji a miẹn ghe emhin nọn sẹ inian bha sẹ ka sunu khẹ? Ranmhude, Joshua wo mun udu nyan Jehova. Ọne ovuẹn da wo ha zẹ bhi ọne ukpẹdẹ nin rebhe, rẹ dọ sẹbhi ẹghe nin ibhokhan Izrẹl rẹ khọn ene ijie ọsi Kenan bi eyokhọnlẹn nọnsele miotọ.