IRehabu Rẹọbhi Jehova

Nan man wẹ imhan ribhi Jẹriko, bhi otọ iKena, eji ẹbho bha da rẹọbhi iJehova. Enan okhuo ọkpa natiọle iRehabu da nyẹnlẹn.

Ẹghe nọnle rẹ ha yi ọmanmhẹn, ọle da họn okha ebi Mozisi rẹ waa okpẹdẹ ye eva yẹ, rẹ ne ibhokhin Izrẹl sibhi otọ iJipti re, bi ebi Jehova rẹ miẹnkpa ele rẹ khọn eghian ele miẹn otọ yẹ. Ejayenan nian, ọle họn ghe Izrẹl mun okhọn bu iJẹriko.

Ọsemuan ọkpa, ibhokhin Izrẹl eva da la babo otọ iJẹriko fẹghe. Eda vae bhi isi Rehabu, ọda miẹn ele ọbhi egbe. Ọsasọn, ojie ọsi Jẹriko da họn ebabi otọ di ughe re, ghe ele ribhi isi iRehabu. Ọnin ojie da ji eria ne dọ mune ele re. IRehabu da nele nẹko bhi ukokhun uwa nọnsọle. Ọda taman enin eria nin Ojie je vae: ‘Enin ikpea ne babi otọ gene sẹbhi enan, sokpan, ọkẹ ele rẹ kpanọ fo. Bha wo ha khian nian, bha dẹ sabọ khui ele mun.’ Uwẹ lẹn ebezẹle nin iRehabu da ne enin ebabi otọ nan nẹko?— Ranmude ọle mhọn urẹbhọ da iJehova, bi ọle yẹ lẹn ghe iJehova dẹ ri otọ iKena nin Izrẹl.

Ọkuẹsẹ enin ebabi otọ sibhi isi Rehabu re, ele da vi ive nanlẹn, yọle ghe, ọle bi azagba-uwa nọnsi abale dẹ miẹnfan, ẹghe nin iJẹriko arẹ fuẹan. Uwẹ lẹn ebi ele taman iRehabu nọn lu?— Eda taman lẹn: ‘Re ọnin ukpiri nọn jian nan, re ọle rọ bhi iwindo nọnsẹ. Uwẹ ha gene luọ le, ọrebhe ne ribhi uwa nọnsẹ ki miẹn anin.’ IRehabu da lu iriọ tee. Uwẹ lẹn ebe ki sunu?—

Ikpẹdẹ eso ki gbera, ibhokhin Izrẹl da khian nẹga iJẹriko. Ele da khian nẹga iJẹriko osukpa bhi ukpẹdẹ bhi ikpẹdẹ ehan. Ele bha so. Ukpẹdẹ nọnzi ihinlọn, eda khian nẹga ọle igba ihinlọn, ele kuẹ rie so. IJehova da siẹn enin uwa rebhe sotọ. Ọnin uwa nan da re ukpiri nọn jian rọ bhi windo, ọkpa ki mudia. Uwẹ daghọle bhi foto?— IRehabu bi azagba-uwa nọnsọle da miẹn uhọnmhọn.

Bebhọ uwẹ ki miẹn luẹ bhi okha nọnsi iRehabu?— IRehabu rẹọbhi Jehova ranmhude emhin ọhan-ilo nọnle lẹnmhin Jehova sẹ lu. Emhin ọhan-ilo nọnsi Jehova uwẹ yẹ luẹ. Uwẹ be ki mhọn urẹọbhọ da iJehova beji Rehabu a mhọnlẹn?— Mhan lẹnmhin ghe uwẹ mhọnmhin.