Ọta Nin Eria Ne Tie Ebe Nesẹmhan Nọọn

Ẹghela ene agbaẹbho ha rẹ ha yọle, “mhan mhọn ọfure bi ogbaga?”

Beji mhan ka luẹ bhi “Ọta Nin Eria Ne Tie Ebe Nesẹmhan Nọọn” bhi Ọne Ọkhẹughea ọkpa nan la re dagbare, Jehova dẹ kẹ re “ebi ọle guanọ” ọbhi ẹkẹ ọkhọle ọsi “ene ikhuan igbe” (ọnin hi, ugbẹloghe rebhe ọsi ene agbaẹbho). “Ebi ọle guanọ” nin ọle ha re ọbhi ọkhọle nọnsele hi, nin ele rẹ mun ahu bi ugbẹloghe nọnsele ọbhi obọ ọsi “elanmhẹn ẹwẹ nọn gian”—ọnin hi, United Nations. Ọne elanmhẹn ẹwẹ nan a yẹ tiọle “amanzẹ ọsi ọne elanmhẹn ẹwẹ.” (Arẹm. 13:​14, 15; 17:​3, 16, 17) Ene “ikhuan igbe” bi ọne elanmhẹn ẹwẹ nan mun ahu nan, dẹ dunmhun oga ohoghe rebhe a bhi ọne otọ agbọn nan. Ọkpakinọn, ẹghela ene agbaẹbho ha rẹ ha yọle ghe, “mhan mhọn ọfure bi ogbaga”?b Jehova ha be re “ebi ọle guanọ” ọbhi ọkhọle nọnsele fo ele ha da ta iriọ? La ọkuẹsẹ Jehova re “ebi ọle guanọ” ọbhi ọkhọle nọnsele ele ha da ta iriọ?—1 Tẹsẹ. 5:3.

Mhan bha lẹn ọne ẹghe tee nin ene agbaẹbho ha rẹ munhẹn ha yọle, “mhan mhọn ọfure bi ogbaga.” Imhan ha lẹn ebi emhin rebhe ha rẹ sunu yẹ, mhan i da sabọ ha babegbe. Ọnan zẹle nin Jesu da taman edibo nesọle bhi igba ne bunbun ghe, nin ele “ha babegbe.” (Mat. 24:42; 25:13; 26:41) Bhi ejayenan nian, bha ji mhan manman gbẹlokotọ fẹ ọta akhasẹ nin Pọl nin odibo tẹmhọnlẹn ghe, bhi ilẹta nin ọle gbẹn ji agbotu nọn ribhi Tẹsẹlonaika.

Pọl da yọle: “Bhi ọne ẹghe nin ẹbho ha rẹ ha yọle, “Mhan mhọn ọfure bi ogbaga!” ugbekhuelo ki re osukpa bu ele re.” (1 Tẹsẹ. 5:​2, 3) Ebe nesẹmhan ki ha gbotọ ene ọta nan nin Pọl tẹmhọnlẹn fanọan, ele da yọle: Ọkuẹsẹ ekpokpo nọn khua munhẹn, bhi ẹghe nan ha rẹ dunmhun Babilọn Nọn Khua a fo, nọn yi, oga ohoghe rebhe ne ribhi ọne otọ agbọn nan, ẹghenin ẹbho ha rẹ munhẹn ha yọle, “mhan mhọn ọfure bi ogbaga.” Ebe nesẹmhan da yẹ yọle ghe, ẹbho ha munhẹn ha so ghe, “mhan mhọn ọfure bi ogbaga”, ọnin mhan ha rẹ lẹn ghe, ekpokpo nọn khua dẹ kẹ munhẹn.

Ọkpakinọn, ebi a kie gua otọle kere rẹman ghe, uwedẹ ebhebhe yẹ ribhọ nin mhan ha rẹ kie sabọ lẹn otọ ebi Pọl tẹmhọnlẹn. Asabọmiẹn ghe, ẹghe nan ha rẹ dunmhun oga ohoghe rebhe a fo bhi ọne otọ agbọn nan rebhe, ọle ẹbho ha rẹ munhẹn ha yọle ghe, ele “mhọn ọfure bi ogbaga”. Bezẹle nin mhan da ta iriọ? Ji mhan fẹ emhin eso ghe ne zẹle.

Be okhọnlẹn nan khọn bhi ọne otọ agbọn nan rebhe rẹ rẹtẹ oga ohoghe yẹ? Rẹji “ọne agbilẹ nọn khua,” nọn yi, Babilọn Nọn Khua, Baibo da yọle: “Aranlẹn ọsi ọrebhe nan gbono a bhi ọne otọ nan ri ọle bhi obọ.” (Arẹm. 17:​1, 5; 18:24) Rẹ na otọ ha de, ọle oga ohoghe mọn da ha sua ẹbho ọbhọ rẹ ha khọnlẹn bhi ọne otọ agbọn nan rebhe. Ọle hi ọnọn yẹ si ọle nin ẹbho da ha gbono ẹbho ne bunbun an. Bhiriọ, oga ohoghe zẹle nin ẹbho da khọnlẹn yẹ gbugbele. Ọle i khu ọbhi ọfure. Asabọmiẹn ghe ẹghe nan ha rẹ dunmhun oga ohoghe a fo, ẹghenin ene agbaẹbho ha rẹ ha yọle ghe, “mhan mhọn ọfure bi ogbaga.” Ọkpakinọn, mhan bha manman lẹn si iriọ emhin ha rẹ gene sunu.

Be ha ki sunu sade ene agbaẹbho munhẹn ha yọle, “mhan mhọn ọfure bi ogbaga”? Pọl yọle: “Ugbekhuelo ki re osukpa bu ele re.” (1 Tẹsẹ. 5:3) Study note nọn talọ nyan ọne ulọnlẹn nan bhi urolo ebo yọle ghe, ‘ebi Pọl ha tẹmhọn ọlẹn hi, ẹghe i da ha ribhọ nin ene agbaẹbho hiehie sade ele tale fo ghe, “mhan mhọn ọfure bi ogbaga”. Osukpa ugbekhuelo ha rẹ wo bu ele re. Ele i da sabọ nẹ.’ Ahamiẹn ghe, ẹghe nan ha rẹ dunmhun oga ohoghe rebhe a fo ene agbaẹbho ha rẹ munhẹn ha yọle ghe ele “mhọn ọfure bi ogbaga”, ugbekhuelo ki wo re osukpa bu ele rebhe re.

Be ẹbho nesi Jehova ha rẹ lu emhin yẹ sade ene emhin nan rebhe nan tẹmhọnlẹn munhẹn ha sunu? Pọl yọle: “Ranmhude bha iribhi ebiuki, ọne ukpẹdẹ nin ida mun bha ikenegbe, bọsi oyi nin ẹdẹ we kere.” (1 Tẹsẹ. 5:4) Ria ọne ẹmhọn nan ghe: Ahamiẹn ghe, ẹghe nin a ha rẹ dunmhun oga ohoghe rebhe a fo ene agbaẹbho ha rẹ munhẹn ha yọle, “mhan mhọn ọfure bi ogbaga”, ọ ki rẹkpa ẹbho nesi Jehova rebhe rẹ lẹn ghe, a dẹ kẹ dunmhun ene agbaẹbho rebhe a. Sokpan rẹji ene agbaẹbho, ele ki ha riale ghe ele mhọn ofure bi ogbaga. Ele i da re ẹlo ọbhọ ghe a dẹ kẹ gbono ele a. Ọkpakinọn, ugbekhuelo nọnsele dẹ re osukpa bu ele re bọsi oyi.

Emhin nela mhan ha sabọ mun ọkhọle i ghe ọ dẹ sunu? Bhi ẹghe nọn bha yẹ ree gbe, “ene ikhuan igbe” bi ọne elanmhẹn ẹwẹ nan mun ahu bi ugbẹloghe nan, dẹ dunmhun oga ohoghe rebhe a sẹsẹsẹ. Ọnan ekpokpo nọn khua ha rẹ munhẹn. Mhan lẹnmhin ghe, ẹghe ribhọ nin ene agbaẹbho ha rẹ ha yọle ghe, ele “mhọn ọfure bi ogbaga”. Ọkpakinọn, ẹghela ọnan ha rẹ sunu? Mhan sẹ wo tẹmhọn emhin eva ne ha sabọ rẹkpa mhan rẹ lẹn ẹghe nọn ha rẹ sunu. Ọhẹnhẹn, asabọmiẹn Jehova ha re ọle bhi ọkhọle ọsi ene agbaẹbho fo nin ele rẹ mun ahu bi ugbẹloghe nọnsele nin ọne elanmhẹn ẹwẹ, la ọkuẹsẹ Jehova re ọle bhi ọkhọle nọnsele, ene agbaẹbho ha rẹ munhẹn ha yọle, “mhan mhọn ọfure bi ogbaga.” Ọzeva, asabọmiẹn ẹghe nin ene agbaẹbho ha rẹ dunmhun Babilọn Nọn Khua a fo sẹsẹsẹ, ẹghenin ele ha rẹ munhẹn ha yọle ghe ele “mhọn ọfure bi ogbaga.” Beji a miẹn ghe mhan bha lẹn ebi ene emhin nan rebhe ha rẹ sunu yẹ, ọkhẹke nin mhan ziengbe mundia khẹ ẹghe nin ele ha rẹ sunu, yẹ re ẹlo nọnsẹmhan daghe ọle. Ahamiẹn ọta akhasẹ ne ribhi Baibo munsẹ fo, la ele munhẹn ha munsẹ, ọle a rẹ manman lẹn otọ ọle nọnsẹn.—Fẹ Jọni 12:16 ghe.

Ebe lu uhọnmhọn-emhin nẹ rẹji mhan bhi ejayenan nian hi, nin mhan rẹ ha ria ẹmhọn ebi mhan ha rẹ sabọ ha sun rẹkhan Osẹnobulua yẹ, ọ i yi nin mhan rẹ ha ria ẹmhọn ẹghe nin ene agbaẹbho ha rẹ ha so yọle ghe ele “mhọn ọfure bi ogbaga.” Ọkhẹke nin mhan wo “ha babegbe, mhan ha yẹ ji ẹwanlẹn gba nin mhan,” beji a ha da miẹn ghe mhan ki sabọ muegbe ọbhi otọ khẹ emhin nọn hi ki rẹ khin nọn ha sunu.—1 Tẹsẹ. 5:6.