Ọta Nin Eria Ne Tie Ebe Nesẹmhan Nọọn
Emhin nela ‘Jehova guanọ’, nin ọle ha re ọbhi ọkhọle ọsi ene agbaẹbho bhi ẹghe nọn bha yẹ ree gbe nian?
Rẹji ebi ekpokpo nọn khua ha rẹ munhẹn yẹ, Arẹman 17:16, 17 da yọle: “Ọne elanmhẹn ẹwẹ bi ene ikhuan igbe nin uwẹ daghe, dẹ he ọne agbilẹ. Ele ki banọn ọlẹn an, yẹ zanzan ọlẹn an. Ele ki le efun nọnsọle yẹ re eranlẹn tuẹ ọle a sẹsẹsẹ. Osẹnobulua re ọle ele bhi ọkhọle, nin ele rẹ lu ebi ọle guanọ. Ọnin bhọ yẹ hi emhin ọkpa nin ele mhọn bhi ọkhọle, nọn re ele mun ugbẹloghe nọnsele ọbhi obọ ọsi ọne elanmhẹn ẹwẹ.” Bhi ẹghe nikhẹ, ebe nesẹmhan da yọle ghe, “ebi [Jehova] guanọ” nin ọle ha re ọbhi ọkhọle ọsi ene agbaẹbho hi, nin ele rẹ dunmhun oga ohoghe a.
Ọkpakinọn, ọkhẹke nan fi ọne iman-emhin nan denọ. “Ebi [Jehova] guanọ” nin ọle ha re ọbhi ọkhọle ọsi ene agbaẹbho hi, nin ele rẹ “mun ugbẹloghe nọnsele ọbhi obọ ọsi ọne elanmhẹn ẹwẹ.” Nin mhan rẹ lẹn ebi ọnan ha rẹ sabọ sunu yẹ, bha ji mhan zilo nyan inọnta ne ribhi otọ ọle.
Hela a tẹmhọnlẹn bhi ọne ọta-akhasẹ? “Ọne agbilẹ,” ọle a yẹ tiọle “Babilọn Nọn Khua.” Ebi ọle mundia nan hi, oga ohoghe rebhe ne ribhi ọne otọ nan. Ọne “elanmhẹn ẹwẹ nọn gian” mundia nin United Nations, nan ka rẹ ha tiọle League of Nations. Ukpe 1919, ọle a ka mun ọlẹn gbọ, beji a ha da sabọ re ọle re ọfure re bhi ọne agbọn nan rebhe. (Arẹm. 17:3-5) Ene “ikhuanlẹn igbe” mundia nin ugbẹloghe rebhe ne robọkpa ọne elanmhẹn ẹwẹ.
Be ọne agbilẹ bi ọne elanmhẹn ẹwẹ nọn gian rẹ ne egbe lu emhin yẹ? Ọ reele nin ọne agbilẹ mọn da “dotua ọbhi uke” ọne elanmhẹn ẹwẹ. Ọnan rẹman ghe, ọne agbilẹ re iyobọ nanlẹn, yẹ noo ọle rẹ lu ebi ọle guanọ.
Be ha sunu ji ọne agbilẹ? Ọne elanmhẹn ẹwẹ bi ene ikhuanlẹn igbe ne rẹkpa ọle “dẹ he ọne agbilẹ,” rẹ sẹbhọ ghe, ele ki re ohu miẹn ọlẹn emhin rebhe nin ọle mhọn, yẹ rẹman ọrebhe ghe ọria ọbe ọle khin. Sẹyẹ, ele ki dunmhun ọlẹn an sotọ sẹsẹsẹ, beji Jehova tale tee. (Arẹm. 17:1; 18:8) A ha ki dunmhun ọlẹn an fo, a i yẹ da ha miẹn oga ohoghe. Ọkpakinọn, ọkuẹsẹ ọne ẹghe nin, Jehova dẹ lu ọle nin ene agbaẹbho lu emhin nọn bha sẹ ka sunu khẹ rẹ na otọ ha de.
Be bhọ hi ọne emhin nin Jehova ha re ene agbaẹbho lu? Ọle dẹ re “ebi ọle guanọ” ọbhi ọkhọle ọsi ene ikhuanlẹn igbe. Ọnin hi, nin ele rẹ “mun ahu nọnsele, bi ugbẹloghe nọnsele bhi obọ ọsi ọne elanmhẹn ẹwẹ,” nọn yi United Nations. (Arẹm. 17:13) Ria ebi ọnan mundia nan. Ene ugbẹloghe nan rebhe dẹ be tobele zẹ rẹ mun ahu nọnsele bi ugbẹloghe nọnsele ọbhi obọ ọsi ọne elanmhẹn ẹwẹ? Eye! Ọne ọta-akhasẹ rẹman ghe, Osẹnobulua tobọle hi ọnọn ha re ele lu iriọ. (Prov. 21:1; fẹ Isaiah 44:28.) Ọ i yi khere-khere ọnan ha rẹ sunu, osukpa ọ ha rẹ wo sunu. Ọ ha ki sunu fo, ọne elanmhẹn ẹwẹ ki dunmhun oga ohoghe rebhe ne ribhi ọne otọ nan an sẹsẹsẹ, beji Jehova tale tee.
Emhin nela mhan ha sabọ rẹ ẹlo ọi ghe, ọ dẹ sunu bhi ẹghe odalo? Ọ bha khẹke nin mhan ha riale ghe mhan dẹ họn bhi niuz ghe, ene gbẹloghe manman ha robọkpa United Nations. Emhin nin mhan da ha khẹ nọn sunu hi: Osukpa, Jehova ki re ọle ọbhi ọkhọle ọsi ene agbaẹbho rẹ mun ahu nọnsele nin ọne elanmhẹn ẹwẹ. Ọnan ha sunu, mhan ki lẹn ghe, ekpokpo nọn khua dẹ kẹ munhẹn. Ọkuẹsẹ ẹghenin, “bha ji mhan ha babegbe, mhan ha yẹ ji ẹwanlẹn gba nin mhan” ranmhude, emhin dẹ kẹ re osukpa fidenọ!—1 Tẹsẹ. 5:6.