Re Egbe Khọkhọ Obedaya Nọn Wo Ha Mun Ofẹn Jehova

Obedaya hi ọnọn ha gbẹloghe azagba-uwa ọsi Ehab nin Ojie. Ehab da wo re otọ nin ẹbho rẹ ha ga Bel bhi otọ Izrẹl. Sokpan ranmhude ghe, ọria nọn wo ha mun ofẹn Jehova Obedaya ha khin rẹ nabhi egbe obhokhan ha vade, ọle bha ka deba ha ga ene Bel nan. (1 Ki. 18:​1-13) Ẹghe nin Jezibẹl nin Esọn rẹ yọle nan gbono akhasẹ ọsi Jehova rebhe a, ọ da wo khẹke nin Obedaya rẹman ghe ọria nọn mhọn izebhudu ọle khin, yẹ lu emhin rẹ rẹkpa akhasẹ nesi Jehova. Be ọle ki lu yẹ? Ọle da ne akhase ne bun sẹbhi 100 nẹko, yẹ ha ne ebale ji ele bhi ghe nin ukhunmhun rẹ manman ha fi! Udede okhẹnan ọnan wo ha khin rẹji Obedaya. Ene emhin kẹkẹ nin Obedaya lu dẹ wo manman nọghọ ọle, ranmhude, ọle i da ha guanọ nin ene akhasẹ ohoghe kẹkẹ ne ga Ehab nin Ojie bi Jezibẹl ne Esọn miẹn ọle mun.—1 Ki. 18:19

Be mhan ha sabọ miẹn luẹ bhi obọ Obedaya? Arẹmiẹn ghe Obedaya wo ha mun ofẹn Ehab, Osẹnobulua ọle mun ofẹn ọle nẹ. Ọnan da wo re ọle mun iẹnlẹn nọnsọle ọbhi okhẹnan yẹ dọ rẹkpa ibhio ọle. Ahamiẹn a mun idobolo ọbhi iwẹnna itẹmhọn Osẹnobulua nin mhan lu bhi eji mhan da nyẹnlẹn, mhan dẹ yẹ sabọ rẹman ghe Osẹnobulua mhan mun ofẹn ọlẹn nẹ. Ọnan dẹ rẹkpa mhan rẹ sabọ ha mhọn one izebhudu rẹ re iyobọ nin ibhio mhan nin ikpea bi ikhuo ne kuẹlo da ọkakale.