Ele Da Rẹkpa Egbe Bhi Ẹghe Ọnọghọ

NAOMI wo manman kuẹlo da ọkakale bhi iẹnlẹn. Ẹghe nin ukhunmhun rẹ ha fi bhi otọ Izrẹl, ọdọ naomi da ne azagba-uwa nọnsọle sibhi Bẹtlẹhẹm re ha khian otọ Moab. Ẹdọkpa, ọdọ Naomi da yu. Ọle da fi imikpia eva ọle bhi otọ bhi agbaẹbho nọn i yi ọsele. Ene imọn da wanre yẹ re okhuo bhi otọ Moab. Ene ikhuo nan i ga Jehova. Ebe sẹbhi ikpe igbe ki gbera, Naomi da gbo kuẹlo da ọkakale ọbhebhe: Imikpia eva nesọle da yu! Ele veva bha ha mhọn ọmọn ọkuẹsẹ ele yu. Bhi ejayenan nian, ọ i yẹ yi ọdọ ọle ọkpa yu. Imọn nesọle veva da yẹ yu. Sẹyẹ, ọle bha ha mhọn eyẹ soso.

Naomi da ha riale ghe ọ bha yẹ khẹke nin ọle debhi Moab a. Bhiriọ, ọle da zẹ nin ọle rẹ kie fikie diọbhi uwa nọnsọle bhi Bẹtlẹhẹm. Asabọmiẹn ọne okhian nan dẹ re ọle uzana ọkpa ọkuẹsẹ ọle sabọ sẹbhọ. Rut bi Ọpa a tie ene ikhuo nin imọn nesi Naomi re bhi amhẹn. Ele veva da rẹkhan Naomi ha khian Bẹtlẹhẹm. Ọkpakinọn, Naomi bha guanọ nin ele zẹ agbaẹbho la azagba-uwa nọnsele obọ rẹkhan ọlẹn. Asabọmiẹn, ọle da ha riale ghe ele ha rẹkhan ọlẹn ha khian otọ ọsi Izrẹl, ele i da yẹ miẹn ọdọ bọ la biẹ imọn nọnsele. Bhiriọ, ọle da taman Rut bi Ọpa nin ele fikie ha bu azagba-uwa nọnsele. Ranmhude Naomi mhọn izebhudu, ọle da wo muegbe nin ọle ọkpa rẹ khian ọne okhian nan. Arẹmiẹn Ọpa wo ha viẹ, ọle da fikie ha khian uwa. Rut yẹ ha viẹ, ọkpakinọn ọle da sẹyẹ rẹkhan Naomi.

Rut da taman Naomi yọle: “Hẹi yẹ bhii mẹn nin mẹn zẹ uwẹ obọ, . . . eji ọ hi ki rẹ khin nin uwẹ khian, enin mẹn ha yẹ diọ. Eji ọ hi ki rẹ khin nin uwẹ ha da nowẹ, enin mẹn ha da yẹ gbe asọn. Ẹbho nesẹ ki kiẹn ẹbho nesẹmhẹn. Osẹ nọnsẹ ki yẹ kiẹn Osẹ nọnsẹmhẹn. Eji uwẹ ha da yu mẹn ha da yu, enin a ha da yẹ rẹ mẹn tọ.” Ranmhude asun-rẹkhan bi izebhudu nin Rut ha mhọnlen, ọle da zẹ nin ọle rẹ re Jehova kiẹn Osẹnobulua nọnsọle.

Bhiriọ, Rut da zẹ azagba-uwa nọnsọle obọ, ọle da fikekegbe uwedẹ nin agbaẹbho nọnsọle rẹ lu emhin, bi ẹbọ nin ele ga bhi otọ Moab. Ọle da rẹkhan Naomi ha khian otọ Izrẹl. Ẹghe nin ele ki rẹ sẹbhi Bẹtlẹhẹm, ọ da wo han ikhuo eso ilo rẹ daghe ebi Naomi ki diayẹ. Ọle da taman ene ikhuo ghe akhiẹ ọle ki ye, ghe, Jehova miẹn ọlẹn emhin rebhe nin ọle mhọn. Asabọmiẹn ọta nin Naomi ta ba Rut bhi egbe, ranmhude, ọle zẹ emhin rebhe obọ rẹkhan Naomi. Ọkpakinọn, Baibo bha taman mhan si ọta nin Naomi tale khọ Rut bhi ẹkẹ la re ọle ha van. Rut da munhẹn ha koko ebale nin ẹbho fikẹre bhi ugbo, beji ọle bi Naomi ha da miẹn ebale ha le.

Okpia ọkpa ribhọ natiọle Boaz. Ọmọn nọnsi Rehab ọle khin. Ọle wo manman fe, yẹ ha mhọn otọ ne bunbun bhi ọne agbaẹbho. Okpia nọn mhẹn ọle yẹ khin. Ọle da kere ghe Rut wo wẹnna kaka bhi ugbo nọnsọle. Bhiriọ, ọle da nọọn ẹbho ọria nela Rut khin. Ọle da lẹn kere ghe Rut wo re ọkhọle rebhe rẹ rẹkpa Naomi. Ọle da gẹn Rut bhi uwedẹ nin ọle rẹ mun udu nyan Jehova, ghe, Osẹnobulua dẹ gbẹloghe ọle bi Naomi. Ọle da ha guanọ nin ọle gbega Rut. Bhiriọ, ọle da taman ikpia nesọle nin ele hẹi re obọ so ọle.

Bhi ọne ukpasọn nin, Rut da taman Naomi ebi Boaz rẹ rẹkpa ọle yẹ. Bhiriọ, Naomi da wo manman ha ghọnghọn. Naomi da ha riale ghe asabọmiẹn Boaz dẹ re Rut bhi amhẹn. Azagba-uwa ọsi Ẹlimẹlẹk nin ọdọ Naomi, ọle Boaz na vae. Sẹyẹ, Osẹnobulua re uhi ọbhi otọ nọn ha rẹkpa ikhuo bii Rut nin ọdọ ele yu. Okhuo nin ọdọ ọle yu, mhọn ọne isẹhoa nin ọle rẹ bọ ọdọ ọbhebhe bhi azagba-uwa nin ọdọ ọle nọn yu na vae. Bhiriọ, ọne okhuo ha biẹ ọmokpia, elin ọsi ọdọ ọle nọn yu i yẹ da yulua. Sẹyẹ, emhin uku nọn khẹke ọne azagba-uwa ki sẹyẹ ha ribhọ. (Deut. 25:​5, 6) Be Naomi ki lu yẹ?

Naomi da taman Rut emhin nọn khẹke nin ọle lu. Arẹmiẹn ebi Naomi taman ọlẹn nin ọle lu bha manman mun ọlẹn ẹlo kore, sẹyẹ, ọ dẹ re ofẹn ha mun ọlẹn, Rut da ka nin ọle rẹ lu ọle. Ebi ki lo, Rut da ha khian eji a da gbe emhin ugbo. Enin ene ikpia ne wẹnna bhi ugbo da kẹ wẹ. Ọle da fẹkẹ khian diọbhi eji Boaz da nowẹ. Ọle da si ukpọn nin Boaz rẹ gue oẹ okhun, yẹ nowẹ bhi oẹ nọnsọle. Boaz ki riọ bhi owe, Rut da fẹkẹ ye ọle re ebi uhi nọnsi Osẹnobulua tale. Ọle da yẹ nọọn ọlẹn si ọle dẹ ka re ọle bhi amhẹn. Asabọmiẹn ọne okpia nan nọn fuẹkẹ da kere ghe ofẹn mun Rut. Boaz da gẹn Rut bhi izebhudu nin ọle rẹman bi oyẹẹ nọn ibeghe nin ọle mhọn da Jehova bi azagba-uwa nọnsọle. Bhiriọ, ọle da ka nin ọle rẹ re ọle bhi amhẹn. Sokpan, ọ da khẹke nin ọle fẹghe si ọle dẹ gene sabọ lu ọnan.

Bhi ukpẹdẹ nọn rẹkhan ọlẹn, Boaz da bu ene ewanlẹn ne ribhi Bẹtlẹhẹm yẹ lu emhin rebhe beji uhi tale. Ọle da re Rut bhi amhẹn. Akizẹbue, Rut da biẹ ọmokpia nan ha tiọle Obẹd. Naomi wo manman hoẹmhọn ọne eyẹ nọnsọle nan. Ulin-uwa ọsi Obẹd, ọle Devid nin Ojie na vae. Sẹyẹ ikpe ne bunbun ki gbera, Mezaya da yẹ nabhi ọne ulin-uwa vae! (Mat. 1:​5, 6, 16) Jehova da wo manman nan erọnmhọn nin Naomi bi Rut bhi izebhudu nin ele rẹman!

Tie ọne okha bhi Baibo:

• Ruth 1:1–4:22

Inọnta:

Uwedẹ nela Naomi bi Rut rẹ re izebhudu man?

1. 2. Be mhan rẹ lẹn yẹ ghe ọ i yi nin Rut rẹ ne Boaz nowẹ zẹle nin ọle da bu ọle bhi ọne ukpasọn nin? (ia 47 ¶17-18)

   Ewannniẹn nọnsẹ

2. 3. Boaz da tie Rut “ọmọn nọnsẹmhẹn.” Be ọnan man mhan le rẹji Boaz? (Ruth 2:8; w16.11 3)

   Ewannniẹn nọnsẹ

3. 4. Bezẹle nin Boaz da muegbe nin ọle rẹ re Rut bhi amhẹn? Bezẹle nin ọria nọn rẹ khẹke nin ọle re Rut bhi amhẹn bha da ka re Rut? (w23.03 14) 2

   Ewannniẹn nọnsẹ

   

Ria Eria Nyan Emhin Nin Uwẹ Luẹle

• Ahamiẹn ẹmhọn igho nyọn mhan bhi egbe, bezẹle nọn da khẹke nin mhan re egbe khọkhọ Rut bhi uwedẹ nin ọle rẹ ha wẹnna kaka yẹ ha gbe ekhuẹnmhẹn? 3

  Ewannniẹn nọnsẹ

  

• Ẹghe nin Naomi rẹ ha lu akhiẹ, Rut da wo ha ko ọle udu re. Be mhan miẹn luẹ bhi obọ Naomi rẹji nan rẹ ha miẹn urẹkpa ọsi ẹbho ọbhi egbe? Be mhan miẹn luẹ bhi obọ Rut rẹji nan rẹ ha re ikoudure nin ẹbho ebhebhe?

  Ewannniẹn nọnsẹ

• Uwedẹ ọbhebhe nela uwẹ ha rẹ sabọ re egbe khọkhọ Naomi bi Rut bhi izebhudu nin ele rẹman?

  Ewannniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewannniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewannniẹn nọnsẹ

• Be mẹn ha nọọn Naomi bi Rut le sade a riọ ele kpanọ bhi uu?

  Ewannniẹn nọnsẹ

Sẹyẹ Fẹ Ene Emhin Nan Ghe

Be mhan ha sabọ miẹn luẹ bhi ebe ọsi Rut, rẹji oyẹẹ nọn ibeghe? Be mhan ha rẹ sabọ ha re obọ rẹkhan ene emhin nin mhan luẹ bhọ yẹ?

“Bha Ji Mhan Sẹyẹ Ha Re Ahoẹmhọn-egbe Nọn Ibeghe Man Egbe” (w21.11 8-13)

Noo ifoto ne gbe okha ne ribhi Baibo rẹ rẹkpa azagba-uwa nọnsẹ rẹ daghe ebi okha ọsi Naomi bi Rut rẹ sunu yẹ.

“Ọmọẹ Ọsaje Rut Khin” (ijwis uhọnmhọn-ọta 12)