Jesu Da Re Ebale Nin Ẹbho Ne Bunbun Le

Ọkuẹsẹ a lu Anagbera ọsi ukpe 32 C.E., etuegbe nesi Jesu da fikiere bhi iwẹnna itẹmhọn Osẹnobulua nin ele yo. Egbe da wo lọ ele. Bhiriọ, ele bi Jesu da nabhi okọ diọbhi Bẹtseada, nin ele dọ koahua. Ọkpakinọn, ọ ki kẹ khere nin ele rẹ sẹbhi eji ọne okọ ha da mundia, Jesu da daghe ọle ghe usun ẹbho rẹkhan ele. Arẹmiẹn Jesu guanọ nin ọle bi etuegbe nesọle ọkpa ko ha ribhi ọsele, ọle da yẹ miẹn ene ẹbho ọbhi egbe. Ọle da re egbe daan ene khọnmhọn bhi ẹwẹ ele, yẹ munhẹn ha man ele emhin. Jesu da re uri-ẹdẹ rebhe rẹ man ele ẹmhọn Agbejele nọnsi Osẹnobulua. Ọ ki ribhi ọsemuan, etuegbe nesọle da bu ọle re yẹ taman ọlẹn yọle: ‘Ohanmhẹn ki dẹ ha gbe ene ẹbho. Ji ele da ha khian uwa beji ele ha da dọ guanọ ebale.’

Jesu da yọle: ‘Ọ bha khẹke nin ele ha khian uwa. Bha re ebale nin ele le.’ Ene etuegbe ki da nọọn ọlẹn yọle: ‘Uwẹ be guanọ nin mhan dọ dẹ ibrẹd ji ele?’ Filip nin ọkpa bhi ene etuegbe da yọle: ‘Aharẹmiẹn mhan manman mhọn igho, mhan bhọ i da miẹn ibrẹd dẹ nọn ha sẹ ene usun ẹbho nan le.’

Jesu da nọọn ele yọle: ‘Be ebale nọn ribhọ kpọnọ sẹ yẹ?’ Andru da wanniẹn ọlẹn yọle: ‘Ibrẹd isẹn bi ikuọkue ehẹn eva ribhọ. Ọnin i da miẹn eji ọ sẹle.’ Jesu ki da yọle: ‘Ne ene ibrẹd bi ene ehẹn re.’ Sẹyẹ, ọle da taman ene ẹbho nin ele re usun dotua. Ebe sẹbhi itue 50 da ha ribhi eso bhi ene usun, ebe sẹbhi itue 100 da yẹ ha ribhi eso. Jesu da ne ene ibrẹd bi ehẹn, khua ẹlo okhun, yẹ nan erọnmhọn. Ọle ki lu iriọ fo, ọle da mun ọne ebale nin etuegbe nesọle, ene etuegbe da gha ọne ebale nin ene ẹbho. Ene ikpea 5,000, ene ikhuo bi ene ibhokhan rebhe ne ribhi ẹwẹ ele, da le ebale rẹ sẹbhọ ghe ele da khọn. Ele ki le ebale fo, ene etuegbe da koko ebale ne kẹre kugbe beji a ha da miẹn ọ bha riia. Ọne ebale nọn kẹre da vuọn okhua 12! Emhin ọhan-ilo wo khọnan, ọ be yi iriọ?

Ọne emhin nan nin Jesu lu da wo manman ti ene ẹbho bhọ rẹ sẹbhọ ghe, ele da ha guanọ nin ele re Jesu kiẹn ojie. Ọkpakinọn, Jesu lẹnmhin ghe ẹghe nin Jehova rẹyi nin ọle rẹ kiẹn ojie bha sẹ sẹ. Bhiriọ, ọle da taman ene ẹbho nin ele ha khian uwa, sẹyẹ, ọle da taman etuegbe nesọle nin ele diọbhi obọ nọnzi eva ọsi Okpẹdẹ Ọsi Galili. Ene etuegbe ki nabhi okọ nọnsele fo, Jesu ọkpa da diọbhi uke oke. Bezẹle? Ranmhude ọle guanọ nin ọle re ọne ẹghe rẹ nan erọnmhọn ji Aba ọle. Ebi emhin hi ki rẹ bun Jesu bhi obọ sẹ yẹ, a i miẹn ghe ọle bha miẹn ẹghe rẹ nan erọnmhọn.