Jesu Da Khian Bhi Okhun Amẹn

Rẹ gbera ghe Jesu mhọn ọne ahu rẹ hinmhin ene khọnmhọn, riọ ene yu kpanọ bhi uu, ọle yẹ mhọn ọne ahu rẹ dia okpahoho bi amẹn. Beji Jesu nan erọnmhọn fo bhi uke oke, ọle da daghe ọle ghe okpahoho fi bhi Okpẹdẹ Ọsi Galili. Etuegbe nesọle da ha ribhi ẹkẹ okọ bhi ọne ẹdẹ, sẹyẹ, ele da ha dọnmhegbe rẹ dia ọne okọ ranmhude okpahoho nọn ha fi. Jesu da re oẹ ọkhọnkhan khian bu ele re bhi okhun ọne ẹdẹ. Ene etuegbe ki daghe ọle ghe ọria khian bhi okhun ọne ẹdẹ, ofẹn da manman ha mun ele. Ọkpakinọn, Jesu da taman ele yọle: ‘Imẹn nọn. Bha hẹi ji ofẹn mun bha.’

Pita da yọle: ‘Ebeanlẹn mẹn, ahamiẹn uwẹ gene nọn, taman mẹn nin mẹn khian bu uwẹ re.’ Jesu da taman Pita yọle: ‘Khian bu mẹn re.’ Beji ọne okpahoho rẹ fi, Pita da huẹnre bhi ọne okọ, yẹ re oẹ khian bu Jesu bhi okhun ọne ẹdẹ. Ọkpakinọn, beji Pita rẹ ha sikẹ Jesu, ọle da ha ghe ọne okpahoho nọn ha fi, bhiriọ, ofẹn da munhẹn ha mun ọlẹn. Ranmhude ọnan, ọle da ha gberuẹ bhi ọne amẹn. Bhiriọ, ọle da reso yọle: ‘Ebeanlẹn mẹn, hinmhin mẹn!’ Jesu da mun ọlẹn obọ mhọn, yẹ taman ọlẹn yọle: ‘Bezẹle nin uwẹ da ha mhọn edandan? Urẹọbhọ nọnsẹ ki bho?’

Jesu bi Pita da nabhi ọne okọ. Osukpa, ijerebhe da wo lọre; ọne okpahoho bha yẹ ha fi. Uwẹ dẹ be sabọ re ọkhọle muno ebi egbe ha dia ene etuegbe yẹ bhi ọne ẹghe nan? Ele da yọle: “Ọmọn nọnsi Osẹnobulua uwẹ gene khin.”

Ọ i yi ọne ẹghe nan ọkpa Jesu rẹ mun okpahoho. Bhi ẹghe ọbhebhe, beji Jesu bi ene etuegbe rẹ gua okọ khian ije ọbhebhe bhi ọne okpẹdẹ, Jesu da dọ ha wẹ bhi ikeke ọne okọ. Beji ọle rẹ wẹ, okpahoho da munhẹn ha fi. Amẹn da ha fi nabhi ẹkẹ ọne okọ, rẹ sẹbhọ ghe amẹn da vuọn ọlẹn. Ene etuegbe da riọ Jesu bhi owe, yẹ ha so yọle: ‘Ọman-emhin, uu mhan ye riọ! Rẹkpa mhan!’ Jesu da kpanọ yẹ taman ọne okpẹdẹ yọle: “Ọ mhẹn riọ! Dobọ i!” Osukpa, ọne ahoho bha yẹ ha fi, ọne okpẹdẹ da wo lọre. Jesu ki da nọọn ene etuegbe yọle: ‘Urẹọbhọ nọnsẹbha ki bho?’ Ele da ki ha taman egbele yọle: “Ahoho bi okpẹdẹ bhọ hẹnmhọn nanlẹn.” Ọnan da rẹkpa ene etuegbe rẹ lẹn ghe, ele ha re ọkhọle rebhe mun udu nyan Jesu, ọ bha khẹke nin ele ji emhin soso re ofẹn ha mun ele.