Ebale Emuan Nin Jesu Le Kike

Ukpe-ukpe ibhokhan Ju rẹ lu iluemhin ọsi Anagbera. Ukpẹdẹ nọnzi 14 bhi uki ọsi Naisan, ele da lu ọle. Nin ele rẹ ha yere ebi Jehova rẹ miẹn ele fan yẹ bhi igbọn nan ha re ele lu bhi otọ Ijipt, yẹ ne ele re bhi ọne otọ nan ve nin ele, zẹle nin ele da lu ọle. Bhi ukpe 33 C.E., Jesu bi etuegbe nesọle da lu iluemhin ọsi Anagbera bhi ugha ọkpa bhi Jerusalẹm. Ele ki le ebale fo, Jesu da yọle: ‘Ọkpa bhi ẹwẹ bha dẹ mun mẹn khiẹn.’ Ọnan da wo han ene etuegbe ilo. Bhiriọ, ele da nọọn Jesu yọle: ‘Họla bhi ẹwẹ mhan ha lu ọle?’ Jesu da yọle: ‘Okpea nin mẹn ha re ọne ibrẹd nan nan, ọle nọn.’ Ọle ki ta ọnin fo, ọle da re obhi ibrẹd khere nin Judas Iskarọt. Ẹjẹje, Judas da kpanọ sibhi ọne ugha re.

Jesu ki da nan erọnmhọn, khuẹnẹn ibrẹd eso a, yẹ gha ọle nin ene etuegbe ne ki kẹre. Ọle da yọle: ‘Bha le ọne ibrẹd nan. Egbe nọnsẹmhẹn nin mẹn ha rẹ zọese nin bha ọ mundia nan.’ Ọle ki lu ọnin fo, ọle da nan erọnmhọn ọbhi anyọn, yẹ gha ọle nin etuegbe nesọle. Ọle da taman ele yọle: ‘Bha wọn ọlẹn. Aranlẹn nọnsẹmhẹn nin mẹn ha gbekua nin eria beji a ha da sabọ re olukhọ nọnsele rẹhunmhan ele, ọle ọnan mundia nan. Mẹn ve nin bha ghe, bha dẹ deba mẹn gbẹloghe bọsi ojie bhi okhun. Bha ha lu ọnan ukpe-ukpe nin bha rẹ ha ye mẹn re.’ Ukpe-ukpe, edibo nesi Jesu yẹ wo si egbe koko bhi ukpẹdẹ nọn diẹn mun ọne ukpasọn nin. Ọne usikoko nan a ki tiọle, Ebale Emuan Ọsi Ebeanlẹn Mhan.

Ele ki le ọne ebale fo, etuegbe nesọle da ha gbugan ba ẹmhọn ọne khua okhun nẹ bhi ẹwẹ ele. Ọkpakinọn, Jesu da taman ele yọle: ‘Ọnọn khua okhun nẹ bhi ẹwẹ bha, ọle hi ọnọn ghe egbọle bii ọnọn khere nẹ, nọn bha sẹ emhin soso.’

Jesu da yẹ yọle, ‘Imọẹ mẹn bha khin. Imẹn taman bha emhin rebhe nin Aba mẹn guanọ nin mẹn taman bha. Bhi ẹghe nọn bha yẹ ree gbe nian, mẹn dẹ fikie bu Aba mẹn bhi okhun. Mẹn dẹ zẹ bha obọ. Ọrebhe dẹ lẹn ghe edibo nesẹmhẹn bha khin ranmhude oyẹẹ nin bha rẹman egbe. Ọkhẹke nin bha hoẹmhọn egbe bha beji mẹn rẹ hoẹmhọn bha.’

Bhi ọkike ọle, Jesu da nan erọnmhọn ji Jehova nin ọle gbega edibo nesọle rebhe. Ọle da bhii Jehova nọn rẹkpa ele rẹ ha nyẹnlẹn kugbe bhi ọfure, sẹyẹ, nan kpe elin nọnsi Jehova khia. Ọle ki lu ọnin fo, ọle bi etuegbe nesọle da so illo rẹ gẹn Jehova. Ele ki so ọne illo fo, ele da dagbare. Ọne ẹghe nan ha rẹ mun Jesu da wo manman sire.