Jesu Da Man Edibo Nesọle Ebi A Rẹ Nan Erọnmhọn Yẹ

Emhin rebhe nin ene Farisi lu, nin ele rẹ re egbe man zẹle nin ele da lu ọle. Ẹghe nọn hi ki rẹ khin nin ele rẹ lu emhin esili nin ẹbho, nan ba daghe ele zẹle nin ele da lu ọle. Ele ki ha nan erọnmhọn bhi ogbakha beji ọrebhe ha da daghe ele. Ele ki luẹ erọnmhọn ne tantan ọbhi uhọnmhọn, yẹ ha nan ene erọnmhọn igba ne bunbun bhi sinagọg bi adesẹ ughe, beji ẹbho ha da ha họn ebi ele ta. Bhiriọ, ọ da wo han ene ẹbho ilo beji Jesu taman ele yọle: ‘Bha hẹi ha nan erọnmhọn beji ibhokhan Farisi rẹ nanlẹn. Ele riale ghe ene ọta ne bunbun nin ele ta bhi erọnmhọn dẹ ha ti Osẹnobulua bhọ. Ọkpakinọn, ọ i ti ọle bhọ. Bhi ẹmhọn erọnmhọn, uwẹ bi Jehova ọkpa ko nọn. Hẹi ha ta ọta ọkpa igba ne bunbun sade uwẹ nan erọnmhọn. Jehova guanọ nin uwẹ taman ọlẹn ebi emhin gene dia uwẹ yẹ bhi egbe.’

Jesu da yọle: ‘Inian bha ha rẹ ha nan erọnmhọn: “Aba mhan nọn ribhi okhun, ji ẹbho rebhe kpe elin nọnsẹ khia. Ji Agbejele nọnsẹ vae. Ji a ha lu iho nọnsẹ bhi ọne otọ nan beji a rẹ lu ọle bhi okhun.” ’ Jesu da yẹ taman ele ghe, nin ele ha bhii Jehova ebale ọsi ukpẹdẹ-ukpẹdẹ, nin ele ha bhii ọle nin ọle re emhin ebe nọnsele rẹhunmhan ele, bi emhin ebhebhe ne rẹtẹ ele.

Jesu da yọle: ‘Bha hẹi zobọ bhọ rẹ ha nan erọnmhọn. Bha wo ha bhii Jehova nin Aba bha nin ọle re emhin esili nin bha. Enebiọmọn guanọ nin ele ha re emhin esili nin imọn nọnsele. Ahamiẹn ọmọn nọnsẹ yọle nin uwẹ re ebale nanlẹn, uwẹ dẹ be mun udo nanlẹn? Ahamiẹn ọle yọle nin uwẹ re ehẹn nanlẹn, uwẹ dẹ be mun ẹnyẹn nanlẹn?’

Jesu ki ta ọnan fo, ọle da re otọ ebi ọle ha tẹmhọnlẹn man. Ọle da yọle: ‘Ahamiẹn ibha lẹn ebi a rẹ re emhin esili nin imọn nesẹbha yẹ, eka-eka ki hi Jehova nin Aba bha nọn ribhi okhun, ọle dẹ wo re ẹlinmhin nọn khiale nin bha. Ebi ọkhẹke nin uwẹ lu hi, nin uwẹ rẹ ha bhii ọle.’ Uwẹ be re obọ rẹkhan ọne adia nan nọnsi Jesu? Emhin nela uwẹ bhii Jehova le bhi erọnmhọn?