Jesu Da Kiẹn Mezaya

Ọ ki wo ree nian nin Jọni mọn da wewe ọle yọle: ‘Ọria nọn khua okhun nẹ mẹn vade.’ Ọ ki kẹ khere nin Jesu rẹ gba bhi ikpe 30, ọle da na bhi Galili ha khian Ẹdẹ Jọdan. Enin Jọni da ha re amẹn ne ẹbho. Jesu da ha guanọ nin Jọni re ọle mianmẹn. Ọkpakinọn, Jọni da yọle: ‘Ọ i yi mẹn ha re uwẹ mianmẹn, uwẹ hi ọnọn khẹke nọn re mẹn mianmẹn.’ Jesu ki da taman Jọni yọle: ‘Jehova guanọ nin uwẹ re mẹn mianmẹn.’ Bhiriọ, ele veva da nabhi Ẹdẹ Jọdan. Jọni da gbe Jesu ruẹ bhi ẹkẹ ọne ẹdẹ.

Jesu ki dagbare bhi ẹkẹ ọne amẹn, ọle da nan erọnmhọn. Bhi ọne ẹghenin tee, okhun da tuje a, ẹlinmhin nọn khiale nọnsi Osẹnobulua da vae bhi uki uhọnmhọn nọnsọle bii idulu. Jehova da na bhi okhun yọle: “Uwẹ hi Ọmọn nọnsẹmhẹn, ọne imẹn hoẹmhọnlẹn; nin ẹmhọn ọlẹn ti mẹn bhọ.”

Ọne ẹghe nan tee, ọle Jesu rẹ kiẹn Kristi, la Mezaya. Ọle ki dẹ sabọ mun iwẹnna nin Jehova je ọle nin ọle dọ lu bhi ọne otọ nan hẹn nian.

Beji Jesu mianmẹn fo, ọle da ha khian ojẹgbo. Ọle da gbe ikpẹdẹ 40 bhi enin. Ẹghe nin ọle ki rẹ dagbare bhi ẹkẹ ọne ojẹgbo, ọle da dọ miẹn Jọni. Beji Jesu rẹ ha khian sikẹ Jọni, Jọni da yọle: ‘Ọnan hi ọne ohuan nọnsi Osẹnobulua nọn ha re olukhọ sibhi ọne agbọn nan re.’ Jọni da ta ọnan nin ọle rẹ ji ẹbho lẹn ghe Jesu hi ọne Mezaya. Uwẹ be lẹn ebe sunu ji Jesu bhi ẹghe nin ọle rẹ ha ribhi ẹkẹ ojẹgbo? Bha ji mhan fẹ ọle ghe.