Jọni Da Hẹnhẹn Uwedẹ Ọbhi Otọ

Akhasẹ Jọni nin ọmọn ọsi Zẹkaraya bi Ẹlizabẹt ha khin beji ọle wanre. Jehova da noo Jọni rẹ ji ẹbho lẹn ghe Mezaya dẹ kẹ vae. Jọni bha dọ ha man emhin bhi uwa oga la ije kẹkẹ nin ẹbho da nyẹnlẹn, sokpan, ọle da dọ ha lu ọle bhi ojẹgbo. Ẹbho da ha na bhi Jerusalẹm bi Judia bu Jọni re, beji ele ha da dọ ka ọle ehọ. Ọle da ji ele lẹn ghe ahamiẹn ele guanọ nin ẹmhọn ele ha ti Osẹnobulua bhọ, ọkhẹke nin ele re obọ sibhi emhin ebe re. Beji ene ẹbho ka Jọni ehọ fo, ene bunbun bhi ẹwẹ ele da fidenọ. Bhiriọ, Jọni da re amẹn nin ele bhi Ẹdẹ Jọdan.

Jọni wo deobọre bhi iẹnlẹn. Ukpọn nan re ilọn ikẹtẹkẹtẹ lu, ọle Jọni ha yọ. Sẹyẹ, iriso bi amẹn-ẹlọn, ọle ebale nin ọle ha le. Ẹbho da ha ho nin ele lẹn ọria nin Jọni gene khin. Ibhokhan Farisi bi Sadusi ne tẹngbemun bhọ da yẹ bu ọle re. Jọni da taman ele yọle: ‘Ọkhẹke nin bha kiọya ọbhi olukhọ nọnsẹbha yẹ fidenọ. Bha hẹi ha riale ghe ibha mhẹn gbera ẹbho nekẹle ranmhude bha yọle ghe, imọn nesi Ebraham bha khin. Ọnan bha rẹman ghe imọn nesi Osẹnobulua bha khin.’

Ẹbho ne bunbun da ha bu Jọni re, yẹ nọọn ọlẹn yọle: ‘Be ọkhẹke nin mhan lu beji ẹmhọn mhan ha da ha ti Osẹnobulua bhọ?’ Jọni da taman ene ibhokhan Ju yọle: ‘Ahamiẹn ibha mhọn ukpọn eva, bha re ọkpa bhọ nin ọria nọn i mhọnlẹn.’ Uwẹ lẹn ebezẹle nin Jọni da ta ọnan? Ọle da ha guanọ nin edibo nesọle lẹn ghe, ọkhẹke nin ele hoẹmhọn ẹbho sade ele guanọ nin ẹmhọn ele ha ti Osẹnobulua bhọ.

Jọni da taman ene koko igho uhọnmhọn yọle: ‘Bha ha ta ẹmhọanta, sẹyẹ, bha hẹi ha mun ọria soso lu.’ Ọle da taman ene eyokhọnlẹn yọle: ‘Bha hẹi ha miẹn ẹbho igho bhi ikeke la ha bha ohoghe.’

Ene ohẹn bi ene Livai da yẹ bu Jọni re, yẹ ha nọọn ọlẹn yọle: ‘Họla uwẹ khin? Ọrebhe guanọ nin ele lẹn ọria nin uwẹ gene khin.’ Jọni da yọle: ‘Imẹn hi ọnọn so dagbare bhi ẹkẹ ojẹgbo. Imẹn hi ọnọn rẹkpa ẹbho rẹ bu Jehova re beji Ẹzaya ka ta ọbhi otọ.’

Emhin nin Jọni ha man ene ẹbho le da wo ha ti ele bhọ. Ene bunbun da ha riale si Jọni hi ọne Mezaya. Ọkpakinọn, ọle da taman ele yọle: ‘Ọria nọn kpọnọ nẹ mẹn vade. Imẹn bhọ bha sẹ ọnọn ha tan iri si ọle bhi ibata re. Amẹn mẹn da gbe bha ruẹ, ọkpakinọn, ọle dẹ gbe bha ruẹ bhi ẹlinmhin nọn khiale.’