Ojuu Da Dọnmhẹn Jesu

Ẹghe nin Jesu rẹ mianmẹn fo, ẹlinmhin nọn khiale da dia ọle diọbhi ojẹgbo. Ọle bha le ebale soso bhi ikpẹdẹ 40, sẹyẹ, ohanmhẹn da wo manman ha gbe ọle. Bhiriọ, Ojuu da vae dọ dọnmhẹn ọlẹn. Ọle da taman Jesu yọle: ‘Ahamiẹn Ọmọn nọnsi Osẹnobulua uwẹ gene khin, taman ene udo nan nin ele kiẹn ibrẹd.’ Ọkpakinọn, Jesu da noo Ebenọnkhiale rẹ wanniẹn ọlẹn. Ọle da yọle: ‘A gbẹn ọlẹn ọbhi otọ ghe, ọ i yi ebale ọkpa ọkhẹke nin ọria le rẹ sabọ ha nyẹnlẹn. Sokpan, ọ sẹyẹ khẹke nin ọle ha lu rẹkhan ẹmhọn nesi Jehova.’

Ọnan ki gbera, Ojuu da taman Jesu yọle: ‘Ahamiẹn Ọmọn nọnsi Osẹnobulua uwẹ gene khin, na okhun ọne uwa oga nan san fia. A gbẹn ọlẹn ọbhi otọ ghe, Osẹnobulua dẹ je ẹhi nesọle nin ele mun uwẹ mhọnlẹn.’ Jesu da gbo noo Ebenọnkhiale rẹ wanniẹn ọlẹn. Ọle da yọle: ‘A gbẹn ọlẹn ọbhi otọ ghe, nin ọria hẹi dọnmhẹn Jehova.’

Ọnan ki sunu fo, Esu da re ejele rebhe ọsi ọne agbọn nan, afe bi ua, bi uyi ọsi ọne agbọn nan man Jesu. Ọle da yọle: ‘Imẹn dẹ mun ene ejele nan rebhe bi uyi ne ribhọ nin uwẹ, sade uwẹ debhere ga mẹn osukpa ọkpa.’ Ọkpakinọn, Jesu da wanniẹn ọlẹn yọle: ‘Sibhi enan re Esu! A gbẹn ọlẹn ọbhi otọ ghe, Jehova ọkpa uwẹ ha ga.’

Bhiriọ, Ojuu da kpanọ. Ene ẹhi da vae, yẹ mun ebale nin Jesu le. Rẹ na bhi ọne ẹghenin ha khian, Jesu da wo ha wewe ẹmhọn Agbejele nọnsi Osẹnobulua. Ọnin hi iwẹnna nan yọle nin ọle dọ lu bhi ọne otọ nan. Ẹbho wo hoẹmhọn ebi Jesu ha man ele le, bhiriọ, ele da ha rẹkhan ọlẹn diọbhi eji ọ hi ki rẹ khin nin ọle diọ i.