Inọnta Nin Baibo Re Ewanniẹn Ọi / Ọnọghọ Nọn Ribhi Agbọn / Baibo Dẹ Be Sabọ Rẹkpa Uwẹ Sade Uwẹ Khọnmhọn Emianmhẹn Nọn Bha Ka Fo?
Ewanniẹn nin Baibo re ọbhọ
Ehe. Ẹmhọn eguọmhandia nesi Osẹnobulua nin egbe bha daan wo manman rẹtẹ ọle. Ẹghe nin Baibo rẹ tẹmhọn oguọmhandia ọkpa nọnsi Osẹnobulua, ọ da yọle: “Jehova dẹ gbẹloghe ọle bhi ẹghe nin egbe bha rẹ daan ọlẹn.” (Psalm 41:3) Ahamiẹn uwẹ khọnmhọn emianmhẹn nọn bha ka fo, ene emhin ea nan dẹ sabọ rẹkpa uwẹ rẹ ziẹngbe ọle:
Bhii Osẹnobulua nin ọle rẹkpa uwẹ rẹ ziẹngbe. Uwẹ ha lu ọnan, uwẹ dẹ sabọ miẹn “ọfure nọn na bhi obọ Osẹnobulua vae,” nọn ha re ọkhọle nọnsi uwẹ fure, yẹ re ahu nin uwẹ.—Philippians 4:6, 7.
Dọnmhegbe nin uwẹ rẹ ha ghọnghọn. Baibo da yọle: “Ikhunmhun esili, ọle ọkhọle nọn sọnyẹnmhẹn khin, ọkpakinọn, ọkhọle nan denyẹnyẹn re ahu fo ọria bhọ.” (Proverbs 17:22) Ha lu emhin nọn ha re uwẹ ha jiẹ ẹghe rebhe. Emhin nọn mhẹn bhi egbe nọn. Ọ dẹ rẹkpa uwẹ rẹ ha ghọnghọn.
Ha ziẹn ikhuaẹloghe nin uwẹ mhọn rẹji ẹghe odalo. Ahamiẹn uwẹ mhọn ikhuaẹloghe nọn ziẹnlẹn rẹji ẹghe odalo, ọ dẹ rẹkpa uwẹ rẹ ha ghọnghọn. (Romans 12:12) Baibo yọle ghe ẹghe vade nan ha da miẹn ghe ọria soso bha yẹ yọle: “Imẹn khọnmhọn.” (Isaiah 33:24) Ẹghenin, Osẹnobulua ki re ọkpẹnlẹn ọbhi emianmhẹn rebhe, rẹ sẹbhi emianmhẹn nan imiẹn ikhunmhun ọlẹn ẹlẹnan. Bhi ọsi Ijiẹmhin, Baibo bhọ da yọle: “Ji egbe nọnsọle mhọn-ose a gbera beji ọ dia bhi ẹghe obhokhan; Ji ahu nọnsọle fikie bu ọle re beji ọ ka ha ye bhi ẹghe usẹn.”—Job 33:25.
Yaman bhi ọnan: Arẹmiẹn ghe Esali Jehova rẹọbhọ ghe Osẹnobulua dẹ rẹkpa ele sade ele khọnmhọn, ele sẹyẹ gbẹloghe egbe. (Mark 2:17) Ọkpakinọn, mhan itaman ẹbho ikhunmhun nin ele ha rẹ gbẹloghe egbe. Ọdeọde ha tobọle zẹ ikhunmhun nin ọle ha rẹ gbẹloghe egbe.