ỌTA NIN ELASẸRE NỌỌN
Emhin Nela Ọkhẹke Nin Mẹn Lu Sade Mẹn Mianmẹn Fo?—Obọle 2: Sẹyẹ Wo Ha Ga Nọnsẹn
Baibo yọle ghe, “Jehova i da ji emhin nọn mhẹn soso da gbera ẹbho ne ga nọnsẹn.” (Psalm 84:11) Be a re ọle ta nan rẹ ha “ga nọnsẹn”? Ebi a re ọle ta hi, nin ọria rẹ ha nyẹnlẹn bhi uwedẹ nin ọle ha rẹ rẹman ghe ọle re obọ rẹkhan ive nin ọle ve ghe, ọle dẹ re iẹnlẹn nọnsọle rebhe rẹ ga Jehova. (Ecclesiastes 5:4, 5) Be ọria ha rẹ sabọ yẹ ha ga nọnsẹn yẹ sade ọle mianmẹn fo?
Ebi a ha zilo nyan bhi ọne uhọnmhọn-ọta nan hi,
Ha ziẹngbe ọnọghọ
Baibo nọn ha sabọ rẹkpa uwẹ: “Mhan dẹ miẹn edọnmhẹn ne bunbun mhan kuẹ sabọ nabhi Agbejele nọnsi Osẹnobulua.”—Iwẹnna 14:22.
Ebi a re ọle ta: Kristiẹn rebhe mhọn ọnọghọ kẹkẹ nin ele kuẹlo da. Eso bhi ẹwẹ mhan kuẹlo da ezuọzuọ la ekpokpo. Ranmhude Kristiẹn mhan khin zẹle nin mhan da miẹn ene emhin nan bhi egbe. Ọkpakinọn, ọnọghọ nekẹle bii, ẹmhọn igho la emianmhẹn rẹso eria rebhe.
Emhin nọn ha sabọ sunu: Idia nin mhan ye dẹ sabọ wo ha fidenọ. Ẹgheso, ọ ki wo fidenọ bhi uwedẹ nọn bha rẹ yẹẹ mhan. Baibo yọle ghe emhin ebe dẹ sabọ sunu ji ọria nọn hi ki rẹ khin, ọ yi Kristiẹn la ọ i yi Kristiẹn.—Ecclesiastes 9:11.
Ebi uwẹ ha sabọ lu: Beji a miẹn ghe uwẹ lẹnmhin ghe, uwẹ dẹ ha miẹn ọnọghọ bhi egbe, ọkhẹke nin uwẹ ha muegbe khẹ ọle. Ha ghe ẹghe ọnọghọ nin uwẹ ha miẹn bii isẹhoa nọn ha rẹkpa uwẹ rẹ ziẹn urẹọbhọ nin uwẹ mhọn da Jehova yẹ ha mun udu nyan ọlẹn. (Jemis 1:2, 3) Beji ẹghe ha rẹ ha khian, uwẹ ki sabọ ta ebi Pọl nin odibo tale nọn yọle: “Osẹnobulua hi ọnọn re ahu nin mẹn rẹ ziẹngbe bhi idia nọn hi ki rẹ khin nin mẹn da ke egbe imẹn re.”—Filipai 4:13.
OKHA NỌN GENE SUNU. “Ọ bha sẹ bue nin mẹn mianmẹn, ibhio mẹn nin ikpea da de sibhi agbotu re, aba mẹn bi inẹn mẹn da ha khọnmhọn, imẹn da yẹ ha khọnmhọn, Ọ ha rẹ wo lẹkhẹ nin mẹn rẹ yele a ive nin mẹn ve nin Jehova ghe, mẹn dẹ ha mun oga nọnsọle kalo bhi iẹnlẹn nọnsẹmhẹn. Ọrẹyiriọ, ive nin mẹn ve, nin mẹn rẹ re egbe guẹ nin Jehova rẹkpa mẹn rẹ ziẹngbe ene ọnọghọ nin mẹn miẹn bhi egbe.”—Karen.
Ebi uwẹ ha rẹ lu ọle yẹ: Luẹ ẹmhọn Josẹf. Uwẹ dẹ miẹn okha nọnsọle tie bhi Genesis uhọnmhọnlẹn 37 bi 39 rẹ sẹbhi 41. Zilo nyan ene inọnta nan: Ọkakale nela Josẹf miẹn bhi egbe nin ọle bha man kọ i? Be ọle rẹ ziẹngbe ele yẹ? Be Jehova rẹ rẹkpa ọle yẹ?
Emhin ebhebhe ne ha sabọ rẹkpa uwẹ
Tie:
“How Can I Deal With Tragedy?” (Be Imẹn Ha Lu Yẹ Sade Emhin Ebe Sunu Ji Mẹn?)
“How Resilient Am I?” (Mẹn Be Sabọ Ziẹngbe Emhin?)
“How to Deal With Change” (Ebi Uwẹ Ha Lu Yẹ Sade Emhin Fidenọ Bhi Iẹnlẹn Nọnsẹ)
Danlod:
Ha khọn edọnmhẹn miotọ
Baibo nọn ha sabọ rẹkpa uwẹ: “Emhin ne yẹẹ ọria, ele kiẹn ufi rẹji ọle. Ene emhin nan kiẹn edọnmhẹn rẹji ọle.”—Jemis 1:14.
Ebi a re ọle ta: Ẹgheso, emhin nin egbe nọnsẹmhan guanọ ki ha ghọn mhan rẹ lu, ahamiẹn mhan bha re ẹwanlẹn, ọne emhin dẹ sabọ re imhan lu ebe bha gba.
Emhin nọn ha sabọ sunu: Aharẹmiẹn uwẹ mianmẹn fo, “emhin nin egbe guanọ” ki yẹ ha ghọn uwẹ rẹ lu. (2 Pita 2:18) Ọ sabọ rẹ ha ghọn uwẹ rẹ ne ọria nowẹ aharẹmiẹn uwẹ bha sẹ bọ ọle bhi ọdọ la re ọle bhi amhẹn.
Ebi uwẹ ha sabọ lu: Muegbe ọbhi otọ nian, ọkuẹsẹ ọne edọnmhẹn vae, beji a ha da miẹn ghe, ebi egbe nọnsẹ guanọ i da mun uwẹ ọbhi ẹmhọn. Yere ghe, Jesu yọle: “Ọria iribhọ nọn ha sabọ ga ebeanlẹn eva.” (Matiu 6:24) Uwẹ dẹ sabọ zẹ ọnọn ha yi ebeanlẹn nọnsẹ. Zẹ Jehova nọn ha yi Ebeanlẹn nọnsẹ. Ebi emhin nọn i mhẹn nin egbe nọnsẹ guanọ hi ki rẹ ghọn uwẹ sẹ yẹ, uwẹ dẹ sabọ zẹ nin uwẹ rẹ mun egbe uwẹ mhọnlẹn, nin uwẹ hẹi lu ọle.—Galesha 5:16.
Ebi uwẹ ha rẹ lu ọle yẹ: Lẹn eji uwẹ da lu nọnsẹn bi eji uwẹ da wẹghẹ. Zẹ imọẹ ne ha rẹkpa uwẹ ha mhọn ikpẹ esili. Rẹban ẹbho, ije kẹkẹ, bi idia ne ha re ọle nọghọ uwẹ rẹ lu ebe gbale.—Psalm 26:4, 5.
Emhin ebhebhe ne ha sabọ rẹkpa uwẹ
Tie:
“How Can I Resist Temptation?” (Be Imẹn Ha Rẹ Sabọ Re Egbe Nẹ Nin Edọnmhẹn Yẹ?)
“How Can I Keep My Mind Off Sex?” (Be Imẹn Ha Rẹ Sabọ Re Ẹmhọn Inegbenowẹ Sibhi Ọkhọle Re Yẹ?)
“How to Resist Peer Pressure” (Be Imẹn Ha Lu Yẹ Sade Ibo Mẹn Sua Imẹn Ọbhọ Rẹ Lu Ebe Bha Gba?)
Ha ziẹn ọhubhudu nin uwẹ mhọnlẹn
Baibo nọn ha sabọ rẹkpa uwẹ: “Sẹyẹ ha wẹnna kaka . . . rẹ sẹbhi ọkpẹnlẹn. . . . Hẹi ha mhọn ọdinbhẹlo.”—Hibru 6:11, 12.
Ebi a re ọle ta: Ọria nọn i mun ọkhọle ọbhi iwẹnna, ọle kẹ mhọn ọdinbhẹlo.
Emhin nọn ha sabọ sunu: Asabọmiẹn ghe uwẹ wo ha ghọnghọn yẹ mhọn ọhubhudu ẹghe nin uwẹ rẹ mianmẹn fo. Uwẹ da wo manman hoẹmhọn Jehova. Asabọmiẹn ghe ahakizẹbue, ọ ki ha nọghọ uwẹ rẹ ha hẹnmhọn nin Jehova bhi emhin rebhe. Ọnin dẹ sabọ re egbe lọ uwẹ yẹ re ọle miẹn ghe uwẹ bha yẹ ha mhọn ọhubhudu nin uwẹ ka mhọn khẹ.— Galesha 5:7.
Ebi uwẹ ha sabọ lu: Sẹyẹ wo ha lu emhin ne mhẹn aharẹmiẹn ghe, ọ i ribhi ọkhọle nọnsẹ rẹ lu iriọ. (1 Kọrint 9:27) Ejayenan nian, sẹyẹ wo ha luẹ ẹmhọn Aba ẹ nin Jehova, ha nan erọnmhọn ji ọle ẹghe rebhe beji uwẹ ha da sabọ ha sikẹ ọle. Sẹyẹ, ha deba ẹbho ne hoẹmhọn Jehova muobọ.
Ebi uwẹ ha rẹ lu ọle yẹ: Hẹi yele a ghe Jehova wo manman hoẹmhọn uwẹ, sẹyẹ, ọle muegbe nin ọle rẹ rẹkpa uwẹ. Hẹi ha riale ghe ẹkẹ uwẹ khọ ọle sade uwẹ bha ha mhọn ọhubhudu bhi ẹgheso. Baibo yọle: “Ọle re ahu nin ene egbe lọle, yẹ re ahu nọn gbale nin ene imhọn ahu.” (Isaiah 40:29) Ọle dẹ re ahu nin uwẹ rẹ kie ha mhọn ọhubhudu.
Emhin ebhebhe ne ha sabọ rẹkpa uwẹ
Tie:
“Young Ones—Keep Working Out Your Own Salvation” (Ene Ibhokhan—Bha Wẹnna Kaka Nin Ibha Da Sabọ Miẹn Egbe Ibha Fan)
“How Can I Make Worship of God Enjoyable?” (Be Imẹn Ha Rẹ Sabọ Ha Sọnyẹnmhẹn Yẹ Bhi Oga Nin Mẹn Re Ji Jehova?)
Ghe:
Ebi mhan luẹle: Uwẹ a ha ga Jehova nọnsẹn, uwẹ ki ha re ọkhọle nọnsọle ghọnghọn! (Proverbs 27:11) Ọle ki ha ghọnghọn ghe uwẹ zẹ nin uwẹ rẹ ha ribhi ibo nọnsọle, sẹyẹ, ọle ki ne emhin ne khẹke nin uwẹ rẹ sabọ khọn ọnọghọ nọn hi ki rẹ khin nin Esu rẹ dọnmhẹn uwẹ.