EPRE 13-19, 2026
ILLO 52 Osẹnobulua Mhan Ki Nyẹnlẹn Nan
Ebi Imianmẹn Mundia Nan Bi Ebezẹle Nọn Da Khẹke Nin Mhan Mianmẹn
“Ibha dọ re ẹbho kiẹn edibo . . . , ibha ha re amẹn nin ele.”—MAT. 28:19.
EBI A HA LUẸ BHỌ
Bhi ọne uhọnmhọn-ọta nan, mhan dẹ zilo nyan ebi imianmẹn mundia nan, ebezẹle nọn da khẹke nin mhan mianmẹn bi ebi a rẹ lu ọle yẹ.
1. Be rẹman ghe iman-emhin kpataki ẹmhọn imianmẹn khin bhi Baibo?
Ọ MANMAN wo re mhan ghọnghọn sade ẹbho nin mhan man ele Baibo mianmẹn. Eghọnghọn nọn sẹnian Kristiẹn bhi ore nin ọhẹnhẹn yẹ ha mhọnlẹn bhi ẹghe nin ẹbho rẹ mianmẹn bhi Pẹnticọst 33 C.E. Bhi ọne ẹghe nan, Pita nin odibo da re ọta man nọn rẹman ebezẹle nọn da khẹke nin ẹbho mianmẹn. (Iwẹn. 2:38, 40, 41) Akizẹbue, Pọl nin odibo da gbẹn yọle ghe “ẹmhọn imianmẹn” deba “ene emhin ọhẹnhẹn nọn khẹke nin mhan luẹ rẹji Kristi.” (Hib. 6:1, 2) Bhiriọ, ọkpa bhi emhin ọhẹnhẹn nin mhan ka luẹ bhi Baibo, ọle ẹmhọn imianmẹn khin. Ọkpakinọn, ọkhẹke nin mhan manman yẹ lẹn otọ ọle nọnsẹn. Bezẹle?
2. Bezẹle nọn da khẹke nin mhan manman lẹn otọ ebi imianmẹn mundia nan?
2 Beji ayotọ nọn ziẹnlẹn rẹ manman mun uwa mhọn nọnsẹn, iriọ urẹọbhọ nọnsẹmhan ha rẹ yẹ manman deziẹn, sade mhan manman lẹn otọ ebi imianmẹn mundia nan. Aharẹmiẹn ọ rele nin mhan mianmẹn, la mhan muegbe nin mhan rẹ mianmẹn, ọ yẹ khẹke nin mhan manman lẹn otọ ebi imianmẹn mundia nan. Bhi ọne uhọnmhọn-ọta nan, mhan dẹ re ewanniẹn bhi ene inọnta nan: Be bhọ imianmẹn mundia nan? Be a rẹ re ọria mianmẹn yẹ? Bezẹle nin mhan da mianmẹn bhi elin ọsi Aba, ọsi ọne Ọmọn, bi ọsi Elinmhin nọn khiale?
EBI IMIANMẸN NỌNSẸ MUNDIA NAN
3. Ahamiẹn ọria mianmẹn, be bhọ ọle rẹman ẹbho?
3 Ọria ha mianmẹn, ọ ki rẹman ọrebhe ghe ọle miẹn ẹmhọanta nin ọle luẹle rẹji Jehova bi Ọmọn nọnsọle ọbhi egbe, yẹ fi iẹnlẹn nọnsọle denọ beji ọle ha da sabọ ha ga Jehova. Sẹyẹ, ọ ki rẹman ghe, ọle rẹọbhọ ghe Jesu Osẹnobulua rẹ miẹn mhan fan. Rẹ deba ọnin, ọ ki yẹ rẹman ghe, ọle ve nin Jehova bhi erọnmhọn ghe ọle dẹ re iẹnlẹn nọnsọle rebhe rẹ lu iho nesi Jehova, yẹ ha ga ọle bhi agbotu nọnsọle. Ahamiẹn uwẹ ve nin Jehova ghe uwẹ dẹ re iẹnlẹn nọnsẹ ga ọle, yẹ mianmẹn, ọ rẹman ghe uwẹ ribhi odẹ nọn khian iẹnlẹn ọsi ighegheghe.
4. Be nan rẹ gbe ọria ruẹ bhi amẹn yẹ mun ọlẹn dagbare mundia nan? (Yẹ fẹ ifoto ghe.)
4 Ebi a re ọle ta nin ọria rẹ mianmẹn hi, nan rẹ gbe ọria ruẹ bhi amẹn yẹ mun ọlẹn dagbare,a bọsi ghe a re ọle tọ, sẹyẹ, a da riọ ọle kpanọ. (Fẹ Kolose 2:12 ghe.) Ọria ha mianmẹn, ọ rẹman ghe ọle fi emhin ne bunbun denọ bhi iẹnlẹn nọnsọle. Be ọ rẹ yi iriọ yẹ? A ha gbe ọria ruẹ bhi amẹn, ọ rẹman ghe ọle re ọkpẹnlẹn bhi uwedẹ nin ọle ka rẹ ha nyẹnlẹn khẹ, sẹyẹ, a ha mun ọlẹn dagbare, ọ rẹman ghe ọle ki dẹ ha nyẹnlẹn iẹnlẹn ọsọgbọn. Sẹyẹ, ghe iho nesi Jehova ọle ha ki mun kalo bhi iẹnlẹn.
Ọria ha mianmẹn, ọ ki rẹman ghe ọle re ọkpẹnlẹn ọbhi uwedẹ nin ọle ka rẹ ha nyẹnlẹn khẹ. Ọ ki yẹ rẹman ghe ọle munhẹn ha nyẹn iẹnlẹn esili yẹ lu iho nọnsi Osẹnobulua (Fẹ uduọle nọnzi 4 ghe)
5. Be emhin kẹkẹ nin uwẹ ha lu rẹ sabọ sẹ ọria nọn ha mianmẹn rẹ diabe iwẹnna nin Noa lu rẹ sabọ bọn okọ yẹ? (1 Pita 3:18-21)
5 Tie 1 Pita 3:18-21. Mhan dẹ sabọ re emhin kẹkẹ nin mhan ha lu, beji mhan ha da sabọ sẹ ọria nọn ha mianmẹn, rẹ khọkhọ iwẹnna kẹkẹ nin Noah lu rẹ sabọ bọn okọ nin Jehova yọle nin ọle bọn. Ahamiẹn uwẹ wo la munhẹn ha luẹ Baibo, ọ dẹ sabọ dia uwẹ bhi egbe ghe, emhin kẹkẹ nin uwẹ ha lu rẹ sabọ sẹ ọria nọn ha mianmẹn kpọnọ nẹ uwẹ gbe, beji ọ dia rẹji Noa bhi udede okọ nin ọle bọn. Ọ be gene khẹke nin uwẹ lu ene emhin rebhe ne khẹke nin uwẹ lu beji uwẹ ha da sabọ mianmẹn? Ehe. Bezẹle nin mhan da ta iriọ? Ria ẹmhọn Noa ghe, Osẹnobulua tobọle taman Noa ebi ọle ha rẹ bọn ọne okọ yẹ. Ọ da yẹ khẹke nin Noa re obọ rẹkhan ebi Jehova yọle nin ọle rẹ bọn ọlẹn yẹ, beji a ha da miẹn ghe, ọle bi azagba-uwa nọnsọle ki miẹn uhọnmhọn bhi ẹghe ọne okpamẹn. Ranmhude urẹọbhọ nin Noa ha mhọnlẹn bi uwedẹ nin Jehova rẹ rẹkpa ọle, Noa da sabọ bọn ọne okọ tee beji Jehova rẹ taman ọlẹn. Bọsi Noa, uwẹ dẹ yẹ sabọ lu “emhin rebhe [nin] Osẹnobulua taman [uwẹ].”—Gen. 6:22.
6. Be bhọ Pita ha tẹmhọnlẹn bhi ẹghe nin ọle rẹ yọle ghe imianmẹn “miẹn ibha fan?”
6 Bhi ulọnlẹn nọnzi 21, Pita nin odibo da gbẹn yọle ghe imianmẹn “wo ha miẹn ibha fan.” Bhi ọsi ẹmhọanta, ọria gheghe mianmẹn bha rẹman ghe ọle ki dẹ miẹn iẹnlẹn ọsi ighegheghe. La ghe, imianmẹn ọkpa emhin nọn khẹke nin ọle lu, nọn ha re Osẹnobulua rẹhunmhan emhin ebe nesọle. Izọese nọnsi Jesu ọkpa ha zẹ Osẹnobulua rẹhunmhan emhin ebe nesẹmhan. (1 Jọni 1:7) Ọrẹyiriọ, ọ wo manman khẹke nin mhan mianmẹn, ranmhude Jehova hi ọnọn yọle nin mhan lu iriọ. Mhan ha lu iriọ, ọ ki rẹman ghe imhan bhii Osẹnobulua “nin ọle re ọkhọle nọn khiale nin mhan”. Ọ dẹ wo manman re Jehova ha ghọnghọn rẹ rẹhunmhan emhin ebe nọnsẹ ranmhude izọese nọnsi Jesu. Ọle ha lu iriọ, ọ ki rẹman ghe ‘imianmẹn miẹn uwẹ fan’. Ebi ọnan mundia nan hi, imianmẹn tuje uwedẹ a nin uwẹ rẹ sabọ miẹn iẹnlẹn ọsi ighegheghe.
EBI A RẸ RE ỌRIA MIANMẸN YẸ
7. Be ọkhẹke nan rẹ ha re amẹn nin ẹbho yẹ?
7 Baibo ji mhan lẹn ghe nin ọria rẹ sabọ mianmẹn, a dẹ gbe ọle ruẹ bhi ẹkẹ amẹn. Sokpan, ọ bha manman gbotọle fanọan rẹji ebi mhan ha rẹ gene lu ọle yẹ tee. Ọrẹyiriọ, Baibo yẹ rẹkpa mhan rẹ lẹn ebi ọ khẹke nin mhan lu sade mhan ho nin mhan mianmẹn. Bhi ọsi ijiẹmhin, adia ne ribhi Baibo hi ebe rẹkpa ẹbho ne ho nin ele mianmẹn rẹ lẹn ebi ele ha rẹ muegbe yẹ ọkuẹsẹ ele mianmẹn. Ọ yẹ rẹkpa ibhio mhan ne ghe ẹbho ne ha mianmẹn rẹ lẹn ebi ele ha rẹ lu emhin yẹ bhi ọne ẹghe nin. (1 Kọr. 14:40; 1 Tim. 2:9) Ẹlẹnan nian, ọkpa bhi ene ewanlẹn bhi agbotu hi ọnọn re amẹn nin ẹbho. Ọ bha khẹke nin mhan ranmhude ọnan ha ghe ọne ọwanlẹn bii okpọria bhi agbotu. (1 Kọr. 1:14, 15) Aharẹmiẹn ẹbho ne bunbun daghe ọle ẹghe nin ọria ha rẹ mianmẹn la ikpeta ẹbho ọkpa daghe ọle, ọnin i yi ẹmhọn hiehie. Ọria ha mianmẹn fo, ọle mianmẹn fo.—Iwẹn. 8:36.
8. Inọnta nela a nọọn ẹbho le sade ele ha mianmẹn? Bezẹle? (Iwẹnna 2:38-42) (Yẹ fẹ ifoto ghe.)
8 Baibo yọle ghe nin mhan ha re unun nọnsẹmhan “wewe ebi [mhan] rẹọ i beji [mhan] ha da miẹn umiẹnfan.” (Rom 10:9, 10) Emhin nọn wo khẹke nin mhan lu khọnan, manman nọn bhi ọne ukpẹdẹ tee nin mhan ha mianmẹn, ranmhude, imianmẹn hi ebe ha tuje uwedẹ a nin mhan rẹ sabọ miẹn umiẹnfan. Ọnan zẹle nan da nọọn ẹbho ne ho nin ele mianmẹn inọnta eva ọkuẹsẹ ele mianmẹn. Inọnta nin ọhẹnhẹn hi, “Uwẹ be fidenọ bhi olukhọ nọnsẹ, re egbe guẹ nin Jehova, yẹ rẹọbhọ ghe rẹ na bhi obọ Jesu kristi, ọle Jehova ha rẹ re umiẹnfan nin mhan?” Inọnta nọn sẹnian rẹkpa ọria nọn họ nin ọle mianmẹn rẹ lẹn si ọle gene lu emhin rebhe nọn khẹke nin ọle lu beji ọle ha da sabọ sẹ ọria nọn ha mianmẹn. Ọta nọn diabe ọnan Pita nin odibo yẹ tẹmhọnlẹn bhi ẹghe Pẹnticọst, beji ọle ha taman ọrebhe nin ele fidenọ yẹ mianmẹn. Inọnta nọnzi eva hi, “Uwẹ be lẹn ghe, ọne imianmẹn nan dẹ re uwẹ kiẹn ọkpa bhi Esali Jehova, yẹ deba agbotu nọnsi Jehova?” Ọne inọnta nan rẹkpa ọria nọn ho nin ọle mianmẹn rẹ lẹn ebi ọkhẹke nin ọle lu. Ọnin hi, nin ọle rẹ ha re obọ rẹkhan adia rebhe nin agbotu nọnsi Jehova re nin mhan, bi nin ọle rẹ ha deba ibhio ọle nin ikpea bi ikhuo ga Jehova bhi agbotu. Emhin nọn sẹnian ẹbho ne mianmẹn bhi ẹghe Pẹnticọst yẹ lu bhi ore nin ọhẹnhẹn beji ele mianmẹn fo. (Tie Iwẹnna 2:38-42.) Ọrebhe ne re ọkhọle rebhe yọle ehe rẹji ene inọnta nan veva dẹ sabọ mianmẹn.
Ọria ha mianmẹn, ọ ki rẹman ghe ọle re unun nọnsọle rẹ “wewe ebi ọle rẹọ i beji ọle ha da miẹn umiẹnfan” (Fẹ uduọle nọnzi 8 ghe)d
9. Emhin nela ọkhẹke nin mhan lu beji ẹmhọn mhan ha da ha ti Osẹnobulua bhọ?
9 Ọkuẹsẹ uwẹ munhẹn ha luẹ ẹmhọanta, asabọmiẹn uwẹ wo ha nyẹn iẹnlẹn esili rẹ sẹbhọ ghe, uwẹ bha ha lu emhin ebe ne kakale soso. Asabọmiẹn aba bi inẹn ne ga Jehova bẹẹ uwẹ wanre, yẹ rẹkpa uwẹ rẹ hoẹmhọn Jehova. Ọrẹyiriọ, ọ be khẹke nin uwẹ fidenọ yẹ mianmẹn beji ẹmhọn uwẹ ha da ha ti Osẹnobulua bhọ? Ehe. Uwedẹ nọn hi ki rẹ khin nin mhan rẹ wanre, ọkhẹke nin mhan yere ghe ọrebhe bhi ẹwẹ mhan le emhin ebe bhi uku, nọn si mhan ree bhi eji Osẹnobulua ye. (Ps. 51:5) Beji mhan ha rẹ manman dọ ha lẹn Jehova, ọkhẹke nin mhan zẹ rẹ mun iho nọnsọle kalo bhi iẹnlẹn. Mhan ha yẹ kiẹgbe ọbhi emhin ebe nin mhan ka ha lu bhi ẹghe nọn gbera, yẹ zobọ bhọ rẹ ha lu ọle. Rẹ deba ọnin, ọkhẹke nin mhan munhẹn ha lu emhin nọn ha ti Osẹnobulua nin Aba mhan nọn ribhi okhun bhọ. Mhan ha lu iriọ, mhan ki sabọ sẹ ọria nọn ha mianmẹn.—Iwẹn. 3:19.
10. Ahamiẹn uwẹ ka mianmẹn khẹ bhi otuẹ nin uwẹ ka ha yo, be ọkhẹke nin uwẹ lu yẹ?
10 Aharẹmiẹn uwẹ ka mianmẹn khẹ bhi otuẹ nin uwẹ ka ha yo, ọ yẹ khẹke nin uwẹ kie mianmien rẹ sabọ kiẹn ọkpa bhi ẹwẹ Esali Jehova. Bezẹle? Ranmhude bhi otuẹ nin uwẹ ka ha yo, uwẹ bha manman lẹn ẹmhọanta rẹji Jehova bi Jesu Kristi nọnsẹn. Aharẹmiẹn uwẹ re egbe guẹ nin Jehova bhi erọnmhọn bhi otuẹ nin uwẹ ka ha yo, ebi uwẹ ve ghe uwẹ dẹ lu nanlẹn bha rẹman ghe uwẹ gene lẹn iho nọnsi Osẹnobulua nọnsẹn. Ẹghe nin Pọl nin odibo rẹ miẹn ikpea eso bhi Ephesus ne ka mianmẹn arẹmiẹn ele bha lẹn ẹmhọanta rẹji Jesu, ọle da mhanmhanlẹn nin ele rẹ kie mianmẹn.b (Iwẹn. 19:1-5) Iriọ yẹ nọn ẹlẹnan. Ọria nin Jehova ghe bii ọria nọn gene mianmẹn hi, ọria nọn gene lẹn iman-emhin nesi Jehova nọnsẹn, nọn yẹ lẹn ebi Jehova guanọ bhi obọ ọle.
“ELIN ỌSI ỌNE ABA, ỌSI ỌNE ỌMỌN, BI ỌSI ẸLINMHIN NỌN KHIALE”
11. Be a re ọle ta nan rẹ mianmẹn bhi “elin ọsi ọne aba, ọsi ọne ọmọn, bi ọsi ẹlinmhin nọn khiale”? (Matiu 28:18-20)
11 Jesu yọle ghe nan re amẹn nin ẹbho bhi “elin ọsi ọne Aba, ọsi ọne Ọmọn, bi ọsi ẹlinmhin nọn khiale.” (Tie Matiu 28:18-20.) Be ọle re ọnan ta? Bhi Baibo, ebi a kẹ re ọne ukpọta “elin” rẹ tẹmhọnlẹn hi, ebi a lẹn ọria i. Ọ dẹ yẹ sabọ mundia nin ihe nin ọria ye bi ahu nin ọle mhọnlẹn. Bhiriọ, ebi a re ọle ta nin ọria rẹ mianmẹn bhi elin nọnsi Jehova bi Jesu hi, nin ọria rẹ lẹn ghe Jehova bi Jesu mhọn ọne ahu rẹ taman ọlẹn ebi ọle ha lu, sẹyẹ, ghe ele ọkhẹke nin ele lu iriọ. Rẹ deba ọnin, nin oṛia rẹ mianmẹn bhi elin ọsi ẹlinmhin nọn khiale mundia nin, nin ọle rẹ ji ẹlinmhin nọn khiale ha dia ọle bhi iẹnlẹn. Ji mhan fẹghe ebi mhan ha rẹ sabọ gene lu iriọ yẹ.
12. Be nan rẹ mianmẹn bhi elin ọsi ọne Aba mundia nan? (Arẹman 4:11) (Yẹ fẹ ene ifoto ghe.)
12 Nin ọria rẹ mianman bhi elin ọsi ọne Aba. Nin ọria rẹ miẹnmẹn bhi elin ọsi ọne Aba mundia nin, nin ọria rẹ rẹọbhọ ghe Jehova hi Aba mhan nọn ribhi okhun, nọn re iẹnlẹn nin mhan. Ọle hi Osẹnobulua nọn kọ okhun nẹ nọn Man emhin rebhe. (Tie Arẹman 4:11.) Ọ yẹ khẹke nin mhan rẹọbhọ ghe ọle họn erọnmhọn nọnsẹmhan. Mhan ha yẹ ha noo elin nọnsọle bhi erọnmhọn, yẹ tẹmhọn ọle man ẹbho. (Ps. 65:2) Ọkpakinọn, emhin ọbhebhe yẹ ribhọ rẹji ebi nan rẹ mianmẹn bhi elin nọnsi ọne Aba mundia nan. Ẹbho nin Pita ha ne zilo bhi ẹghe Pẹnticọst wo lẹn Jehova. Ọkpakinọn, ọ da khẹke nin ele lẹn sẹbhọ ghe ranmhude izọese nọnsi Jesu zẹle nin Jehova ha da re iẹnlẹn ọsi ighegheghe nin mhan.—Rom 5:8.
Ahamiẹn uwẹ mianmẹn fo, sẹyẹ wo ha lu ebi ọne Aba bi ọne Ọmọn yọle nin uwẹ ha lu. Uwẹ ha yẹ ji ẹlinmhin nọn khiale ha dia uwẹ bhi iẹnlẹn (Fẹ uduọle nọnzi 12 ghe)
13. Be nan rẹ mianmẹn bhi elin ọsi ọne Ọmọn mundia nan? (Yẹ fẹ ifoto ghe.)
13 Nin ọria rẹ mianmẹn bhi elin ọsi ọne Ọmọn. Ebi ọnan mundia nan hi, nin mhan rẹ rẹọbhọ ghe Jesu hi ukpọmọn ọkpa sẹsẹ nọnsi Osẹnobulua. Ọ yẹ khẹke nin mhan rẹọbhọ ghe ọle hi “ọne uwedẹ,” nọn rẹkpa mhan rẹ sabọ deba Osẹnobulua ha mhọn ikolu. (Jọni 14:6) Ebi ọ yẹ mundia nan hi, nin mhan rẹ rẹọbhọ ghe Jesu hi ọnọn dọ yu nin mhan beji mhan ha da sabọ miẹn iẹnlẹn ọsi ighegheghe. Ọnan zẹle nọn da ghọn mhan rẹ ha re obọ rẹkhan ijiẹmhin nọnsi Jesu bhi iẹnlẹn nọnsẹmhan rebhe, ghe ọ i yi bhi ukpẹdẹ nin mhan ha mianmẹn ọkpa. (1 Jọni 2:6) Ọle yẹ zẹ nin mhan da re ọyaya tẹmhọn Osẹnobulua bọsi Jesu. Mhan i ji emhin soso de mhan idobolo. (Luk 4:43) Ọle yẹ zẹ nin mhan da ziẹngbe ekpokpo nọn hi ki rẹ khin nin mhan miẹn, ranmhude nin mhan rẹ sun rẹkhan Osẹnobulua. (2 Tim. 3:12) Mhan yẹ wo mun ekpẹn nin Jesu nọn yi “ebeanlẹn ọsi agbotu.” Ọnan zẹle nin mhan da re obọ rẹkhan adia nin mhan miẹn bhi obọ ibhio mhan nin Jesu re mundia ne ha gbẹloghe agbotu.—Ẹfẹ. 4:8, 11, 12; 5:23.
Uwẹ ha mianmẹn fo, hẹi zobọ bhọ rẹ ha hẹnmhọn nin ọne Ọmọn (Fẹ uduọle nọnzi 13 ghe)
14. (a) Be nan rẹ mianmẹn bhi elin ọsi ẹlinmhin nọn khiale mundia nan? (Yẹ fẹ ifoto ghe.) (b) Uwedẹ ebhebhe nela enan zẹle rẹ mianmẹn? (Fẹ ọne ẹkpẹti ghe nọn yọle, “Uwedẹ Ebhebhe Nela Enanzẹle Rẹ Mianmẹn?”)
14 Nin ọria rẹ mianmẹn bhi elin ọsi ẹlinmhin nọn khiale. Ebi ọnan mundia nan hi, nin mhan rẹ rẹọbhi ẹmhọanta nin mhan luẹle rẹji ẹlinmhin nọn khiale. Ahu nin Osẹnobulua rẹ lu iwẹnna nesọle, ọle ẹlinmhin nọn khiale khin, ọ i yi ọria, sẹyẹ, ọ bha deba bhi itue ea ribhi Osẹnobulua ọkpa nin ekhẹn otuẹ tẹmhọnlẹn. Mhan lẹn sẹbhọ ghe, ẹlinmhin nọn khiale Jehova noo rẹ rẹkpa akhasẹ nesọle rẹ lẹn ebi ele ha ta, bi ẹbho ne gbẹn Baibo rẹ lẹn ebi ele ha gbẹn ọbhi otọ. (2 Pita 1:20, 21) Ọnan zẹle nin mhan da dọnmhegbe rẹ rẹban emhin ebe nọn kaka nọn hi ki rẹ khin nọn ha sabọ re mhan miẹn ghe, mhan bha yẹ ha mhọn ẹlinmhin nọn khiale, la nọn ha sabọ re agbotu bha yẹ ha mhọn ẹlinmhin nọn khiale.—Ẹfẹ. 4:30.
Uwẹ ha mianmẹn fo, wo ji ẹlinmhin nọn khiale ha dia uwẹ bhi iẹnlẹn (Fẹ uduọle nọnzi 14 ghe))
15. Emhin nela ọkhẹke nin mhan ha lu?
15 Ahamiẹn uwẹ mianmẹn fo, wo ha yere ebezẹle nin imianmẹn da yi emhin kpataki.c Uwẹ ha yẹ ha re obọ rẹkhan ive nin uwẹ ve nin Jehova bhi ẹghe nin uwẹ rẹ re egbe guẹ nanlẹn, bi bhi ẹghe nin uwẹ rẹ mianmẹn. Ọkpakinọn, ahamiẹn ghe uwẹ bha sẹ mianmẹn kii? Emhin be ribhọ nọn si uwẹ re ikeke rẹ lu iriọ? Bhi uhọnmhọn-ọta nọn ki sẹ ọle bhi egbe, mhan dẹ zilo nyan ebi uwẹ ha sabọ lu nin uwẹ da sabọ khọn ebe si uwẹ re ikeke rẹ mianmẹn.
ILLO 161 Iho Nọnsẹ Ti Mẹn Bhọ
a Ukpọta Grik natiọle ba’pti-sma nan zẹdu ọle diọbhi “imianmẹn” mundia nin, “nan rẹ mun emhin ọbhi ẹkẹ emhin,” la “gbe emhin ruẹ bhi ẹkẹ emhin.” Bhiriọ, nan rẹ re amẹn nin ọria mundia nin nan rẹ gbe ọle ruẹ bhi ẹkẹ amẹn, la mun ọle ọbhi ẹkẹ amẹn, ọ i yi nan rẹ gheghe fianmhẹn amẹn nyan ọlẹn beji otuẹ eso lu.
b Ene ikpea ne ribhi Ẹfẹsọs da yọle ghe ele mianmẹn bhi imianmẹn nin Jọni lu. (Iwẹn. 19:3) Bhi ẹghe nin Jọni nọn gbe ẹbho ruẹ bhi amẹn rẹ ha lu iwẹnna itẹmhọn Osẹnobulua, ọle da taman ọrebhe ne gbobọra uhi nin Jehova na bhi obọ Mozis gbe ghe, nin ele fidenọ yẹ mianmẹn. Bhiriọ, Jọni da re amẹn nin ẹbho ne gene fidenọ. (Mak 1:4, 5) Ọkpakinọn, bhi ẹghe nan ki rẹ re ọkpẹnlẹn ọbhi Uhi ọsi Mozis fo, Jehova bha yẹ ha miẹn imianmẹn nin Jọni lu ọbhi egbe. Rẹ na bhi ọne ẹghe nin ha vade, “imianmẹn ọkpa” nọn ha sabọ tuje uwedẹ a nin ọria rẹ miẹn iẹnlẹn ọsi ẹdẹdẹmhẹndẹ Jehova ki ha miẹn ọbhi egbe.—Ẹfẹ. 4:5.
c Fẹ ọne uhọnmhọn-ọta ghe nọn yọle “Be Hi Imianmẹn?” bhi obọ natiọle “Bible Questions Answered” bhi jw.org bi JW Library®
d EMHIN NAN RẸMAN BHI IFOTO: Ẹbho ne ho nin ele mianmẹn kpanọ mundia bhi usikoko, beji ele ha da re unun nọnsele rẹ wewe ebi ele rẹọ i.