Wo Ha Wẹnna Ọbhọ Beji Uwẹ Ha Da Sabọ Mianmẹn

1. (a) Be imianmẹn rẹ rẹkpa mhan yẹ? (b) Be mhan ha zilo nyan bhi ọne uhọnmhọn-ọta nan?

UWẸ be sẹ re egbe guẹ nin Jehova yẹ mianmẹn? Ahamiẹn uwẹ lu iriọ, ọ rẹman ghe uwẹ guanọ nin Osẹnobulua rẹkpa uwẹ rẹ ha mhọn ọkhọle nọn khiale. (1 Pita 3:21) Nin uwẹ rẹ mianmẹn, ijiẹmhin esili uwẹ wo re ọbhi oto nin ẹbho ne bha sẹ mianmẹn bhi agbotu nin uwẹ ye. Emhin nọn gbale uwẹ wo zẹ rẹ lu, nin uwẹ rẹ re egbe guẹ Jehova, yẹ mianmẹn! Ọkpakinọn, a ha ki miẹn uwẹ bha sẹ mianmẹn kii? Edandan i ribhọ ghe uwẹ wo hoẹmhọn Jehova, sẹyẹ, uwẹ guano nin uwẹ lu iho nọnsọle. Ọkhẹke nin uwẹ mianmẹn beji a ha da miẹn ghe, Osẹnobulua ki sabọ rẹhunmhan emhin ebe nesẹ, yẹ re ẹlo esili ha ghe ẹ. (Iwẹn. 2:​38-40) Ọkpakinọn, ọ dẹ sabọ ha nọghọ uwẹ rẹ zẹ ghe uwẹ ho nin uwẹ mianmẹn. Bhi idia nọn sẹnian, be ha sabọ rẹkpa ẹ? Bhi ọne uhọnmhọn-ọta nan mhan dẹ zilo nyan (1) ebezẹle nin ẹbho da siegbe re ikeke rẹ mianmẹn, (2) ebezẹle nọn da khẹke nin uwẹ ha mhọnlẹn bhi ọkhọle ghe ọkpẹnlẹn ọsi ọne agbọn nan sire, bi (3) elele nin uwẹ ha miẹn bhọ sade uwẹ bha riia ẹghe a rẹ mianmẹn.

EBEZẸLE NIN ẸBHO ESO DA SIEGBE RE IKEKE

2. Bezẹle nin ẹbho eso da siegbe re ikeke rẹ mianmẹn?

² Ẹbho eso wo siegbe re ikeke rẹ mianmẹn ranmhude ofẹn nọn mun ele. Bhi ọsi ijiẹmhin, arẹmiẹn ọ ghọn ele rẹ ga Jehova, ele wo mun ofẹn ghe ele i da sabọ lu emhin rebhe nọn khẹke nin ele lu rẹ sabọ ha ga Jehova nọnsẹn. Ahamiẹn iriọ emhin dia uwẹ bhi egbe, dọ guanọ ulọnlẹn eso fẹghe bhi Baibo ne ha sabọ rẹkpa uwẹ re rẹọbhọ ghe, Jehova i guanọ nọn gba nin uwẹ fo, ọkuẹsẹ uwẹ sabọ ga ọle, ne ha yẹ sabọ rẹkpa uwẹ rẹ rẹọbhọ ghe eka nin uwẹ lu rẹ ha ga Jehova manman ti ọle bhọ. (Ps. 103:​13, 14; Kol. 3:23) Ahamiẹn uwẹ mun ofẹn ghe a dẹ kpokpo uwẹ sade uwẹ mianmẹn fo, bhii Jehova nin ọle rẹkpa uwẹ rẹ ha mhọn izebhudu, nin ọria ọkpa bhi ẹwẹ ẹbho ne gbe nọnsi psalm ha mhọnlẹn. Ọne izebhudu nan nin ọle ha mhọnlẹn zẹle nin ọle da yọle: “Jehova ri mẹn bhi ikeke; ofẹn ida ha mun mẹn. Be ọria ha sabọ lu mẹn yẹ?”—Ps. 118:6.

3. Emhin ọbhebhe nela ha sabọ re ẹbho ha siegbe re ikeke rẹ mianmẹn? (Yẹ fẹ ifoto nọn ribhi odalo ọle ghe.)

³ Emhin ọbhebhe nọn zẹle nin ẹbho eso da siegbe re ikeke rẹ mianmẹn hi, ele riale ghe ele bha lẹn Baibo sẹ. Sokpan, ọ be khẹke nin ọria lẹn emhin rebhe bhi Baibo fo ọkuẹsẹ ọle mianmẹn? Eye. Ji mhan fẹ ijiẹmhin ọkpa ghe bhi Baibo. Bhi ọsasọn ọkpa beji a mun Sailas bi Pọl ọbhi ighan, Jehova da lu ọle nin ọne ighan mun lueghe rẹ sẹbhọ ghe, odẹ da tuje a nin ele dagbare. Pọl ki da noo ọne isẹhoa nan rẹ tẹmhọn Osenobulua man ọria nọn gbẹloghe onighan bi azagba-uwa nọnsọle. Asabọmiẹn ọnọn gbẹloghe onighan wo rẹọbhọ ghe, Osẹnobulua lu ọle nin ọne emhin ọhan-ilo nan da sunu. Ele da wo luẹ emhin ne bunbun bhi ọne ukpasọn nin. Ọnan da wo re ọne okpea bi azagba-uwa nọnsọle re ẹjẹje mianmẹn. (Iwẹn. 16:​25-33) Bhi ọsi ẹmhọanta, uwẹ dẹ sabọ mianmẹn sade uwẹ lẹn Jehova, hoẹmhọn ọlẹn, yẹ re ọkhọle rebhe ha ga ọle, bi sade uwẹ luẹ emhin eso bhi Baibo ne khẹke, yẹ fidenọ bhi emhin ebe nesẹ. Rẹ deba ọnin, uwẹ ki muegbe rẹ ha nyẹnlẹn rẹkhan uwedẹ nesi Jehova.—Mak 12:30.

4. Emhin eso nela ẹbho ria ẹmhọnlẹn nọn zẹle nin ele da siegbe re ikeke rẹ mianmẹn? (Yẹ fẹ ifoto ghe.)

⁴ Emhin ọbhebhe nọn zẹle nin ẹbho eso da siegbe re ikeke rẹ mianmẹn hi, nin ele rẹ ha ria ẹmhọn emhin nin ele ha fikekegbe. Bhi ọsi ẹmhọanta, emhin ẹwanlẹn nọn nin ọria rẹ re ẹghe ọbhi otọ rẹ ria eria nyan ebi emhin nin ọle zẹle rẹ lu ha rẹ rẹso ọle yẹ. (Luk 14:​27-30) Ẹbho eso wo kpokpo egbe ba emhin kẹkẹ nin ele ha fikekegbe beji ele ha da sabọ ha ga Jehova. Ọnan hi ebe sunu ji okhuo ọkpa natiọle Candace. Ẹghe nin ọle rẹ ha ribhi obhokhan, ọle da luẹ ebe khẹke nin ọle lu, beji ọle ha da sabọ ha lu ebe ti Jehova bhọ. Ọkpakinọn, ọle bha re obọ rẹkhan ebi ọle luẹ. Beji ọle ki wanre, a da kie munhẹn ha man ọle Baibo. Ọle da yọle: “Imẹn lẹn emhin ne khẹke nin mẹn lu rẹ sabọ ha ga Jehova. Ọkpakinọn, ranmhude emhin kẹkẹ nin mẹn rẹ ha sọnyẹnmhẹn bhi ọne agbọn nan nin mẹn ha lu, ọ da re mẹn ha siegbe re ikeke rẹ lu emhin ne khẹke nin mẹn lu nin Jehova. Mẹn lẹnmhin ghe, ọ i da lẹkhẹ nin mẹn rẹ fikekegbe emhin kẹkẹ nin mẹn lu bhi ẹkẹ ọne agbọn nan.” Eso yẹ wo kpokpo egbe ghe, ele i da sabọ nyẹnlẹn bhi uwedẹ nọn khẹke nin Kristiẹn rẹ ha nyẹnlẹn sade ele mianmẹn fo. Ele mun ofẹn ghe ele dẹ sabọ lu emhin ebe nọn kaka, nọn ha zẹ a re ele sibhi agbotu re. Ahamiẹn emhin ne sẹnian yẹ re uwẹ kpokpo egbe, be ha sabọ rẹkpa uwẹ?

5. Emhin nela ọkhẹke nin uwẹ denọ ẹlo ọi sade uwẹ siegbe re ikeke rẹ mianmẹn? (Matiu 13:​44-46)

⁵ Ahamiẹn mhan guanọ nin mhan dẹ emhin, ọ i yi ebi ọne emhin ghan sẹ yẹ ọkpa mhan ria ẹmhọnlẹn, mhan yẹ wo ria ẹmhọn ebi ọ mhẹn sẹ yẹ. Ahamiẹn ọne emhin manman mhẹn, mhan i da ria eka igho nọn ha gbe mhan le, ẹjẹje mhan ha rẹ wo dẹ ọle. Iriọ yẹ nọn, ahamiẹn uwẹ siegbe re ikeke rẹ mianmẹn, wo denọ ẹlo ọbhi ebe imianmẹn ha rẹ rẹkpa uwẹ yẹ rẹ deba Jehova ha mhọn ikolu nọn ziẹnlẹn. Ọ i yi emhin kẹkẹ nin uwẹ ha fikekegbe ọkpa ọkhẹke nin uwẹ ha ria ẹmhọnlẹn. Jesu da noo arẹkhọkhọ rẹ re otọ ọne ẹmhọn nan man nọnsẹn. (Tie Matiu 13:​44-46.) Bhi ene arẹkhọkhọ veva, Jesu da tẹmhọn okpea ọkpa nọn wo re eghọnghọn khiẹn emhin nin ọle mhọnlẹn, beji ọle ha da sabọ dẹ emhin nọn ghanlẹn nin ọle miẹn. Uwẹ yẹ wo miẹn emhin kpataki nọn ghanlẹn, ọne emhin hi, ẹmhọanta nin uwẹ luẹle rẹji Agbejele nọnsi Osẹnobulua. Ahamiẹn uwẹ riale si ọ be gene khẹke nin uwẹ ha nyẹnlẹn rẹkhan ọne ẹmhọanta nin uwẹ luẹle, re ẹghe ọbhi otọ rẹ ria eria nyan ene arẹkhọkhọ eva nin Jesu nolo. Uwẹ sabọ rẹ nọọn egbe ẹ yọle: ‘Imẹn be gene rẹọbhọ ghe, emhin nọn ghanlẹn ọne ẹmhọanta nin mẹn luẹ khin? Ikolu nin mẹn bi Jehova ko mhọnlẹn, ikhuaẹloghe nin ọle re nin mẹn, bi ibhio mẹn bhi ọne otọ agbọn nan rebhe be ghan bhi ẹlo nọnsẹmhẹn?’ Ewanniẹn nin uwẹ re ọbhi ene inọnta nan, dẹ rẹkpa uwẹ rẹ lẹn ebi uwe ha lu yẹ beji uwẹ ha da sabọ zẹ rẹ mianmẹn.

6. Be ha rẹkpa uwẹ rẹ sabọ ha re obọ rẹkhan ebi uwẹ luẹle?

⁶ Bhi arẹkhọkhọ ọsi ọria nọn kọ emhin nin Jesu tẹmhọnlẹn, Jesu da rẹman ghe, ẹbho eso ne họn ẹmhọn Osẹnobulua i da lu rẹkhan ebi ele họn. Jesu da yẹ yọle ghe ẹbho eso ne mhọn “ọkhọle nọn mhẹn,” ne họn ẹmhọn ọne Agbejele dẹ re obọ rẹkhan ebi ele luẹle. (Luk 8:​5-15) Ahamiẹn uwẹ kpokpo egbe ghe uwẹ bha lẹn si uwẹ dẹ sabọ re obọ rẹkhan ebi uwẹ luẹ, hẹi ji egbe lọ uwẹ rẹ ha dọnmhegbe beji uwẹ ha da sabọ mianmẹn. Ha mhọnlẹn bhi ọkhọle ghe, Osẹnobulua dẹ rẹkpa uwẹ rẹ sabọ ha re obọ rẹkhan adia nesọle. Bhii Jehova nin ọle rẹkpa uwẹ rẹ hoẹmhọn ẹmhọanta nin uwẹ luẹle, yẹ sabọ ha re obọ rẹkhan ọlẹn.—Ezek. 18:31; 36:26.

7-8. Bezẹle nọn da nọghọ usẹn eso rẹ lu re alo beji ele ha da sabọ mianmẹn? (Yẹ fẹ ifoto ghe.)

⁷ Ranmhude ghe usẹn eso ne hoẹmhọn kaehọ ebi ẹbho taman ele, ele bha sabọ ha lu re alo beji ele ha da sabọ mianmẹn. Bhi ọsi ijiẹmhin, ahamiẹn ẹbho ne man emhin bhi isiku re ibhude nin ẹbho nin ele man ele emhin, ele ki ha taman ele ghe nin ele ha lu emhin bhi uwedẹ nin ẹbho bhi ọne agbọn nan rẹ lu emhin, arẹmiẹn ene uwẹdẹ nan kẹkẹ i ti Jehova bhọ. Ọkpakinọn, uwẹ ha re obọ rẹkhan ibhude ne sẹnian, ọ dẹ sabọ si ọbalọ ji uwẹ bhi iẹnlẹn. (Ps. 1:​1, 2; Prov. 7:​1-5) Uwẹ dẹ sabọ re egbe nẹ bhi emhin ne sẹnian, sade uwẹ re egbe khọkhọ oria ọkpa nọn deba gbẹn ebe ọsi Psalm bhi ọta nin ọle taman Jehova, bhi ẹghe nin ọle rẹ yọle: “Ranmhude mẹn ria eria nyan ayere nesi uwẹ, mẹn dọ lẹn otọ emhin gbera ene man mẹn emhin.”—Ps. 119:99.

⁸ A gua otọle kere ghe, enebiọmọn eso ne ga Jehova re ọle nọghọ imọn nesele rẹ mianmẹn, sokpan, ele bha lẹn ghe ele gene lu iriọ. Uwedẹ nin ele rẹ lu ọnan hi, ele ki ha sua ọmọn nọnsele ọbhọ rẹ mun ẹmhọn isiku bi iwẹnna kalo bhi iẹnlẹn. La ele sabọ rẹ yelea rẹ ha taman imọn nọnsele nin ele ha mhọn emhanmhan nọn ha re ele manman sikẹ Jehova. Uwẹ be riale ghe ene biẹ uwẹ dẹ sabọ rẹkpa uwẹ rẹ lu re alo beji uwẹ ha da sabọ mianmẹn? Ahamiẹn iriọ nọn, ne ele zilo ọle. Ha mhọnlẹn bhi ọkhọle ghe, eka ukpe nin uwẹ ye i da sabọ si uwẹ re ikeke rẹ deba Jehova ha mhọn ikolu nọn ziẹnlẹn.—Prov. 20:11.

9. Bezẹle nin ẹbho eso da mundia fo ọkuẹsẹ ele mianmẹn?

⁹ Ibhio mhan eso ribhọ ne sẹ ọnọn ha mianmẹn, ọkpakinọn, ele bha ka mianmẹn, ranmhude nin ele rẹ mundia ha khẹ ọria nin ele guanọ nin ele ko mianmẹn ẹdọkpa. Bhi ọsi ijiẹmhin, ele sabọ rẹ zẹ ghe, ele ho nin ele mianmẹn bhi ọne ukpẹdẹ tee nin ọmọẹ ele la ọria bhi azagba-uwa nọnsele ho nin ọle mianmẹn. Bhi ọsi ẹmhọanta, ọ bha dọbe sade uwẹ zẹ rẹ deba ọria nin uwẹ hoẹmhọn mianmẹn ẹdọkpa. Ọkpakinọn, ọ be khẹke nin uwẹ riia ẹghe a rẹ mianmẹn ranmhude ghe uwẹ guanọ nin uwẹ bi ọria nin uwẹ hoẹmhọnlẹn ko mianmẹn kugbe? Yere ghe, ọria bha ha ribhi eji uwẹ ye bhi ẹghe nin uwẹ rẹ re egbe guẹ nin Osẹnobulua. Uwẹ tobuwẹ re egbe guẹ nanlẹn. Bhiriọ, hẹi mundia ha khẹ ọria ọkuẹsẹ uwẹ mianmẹn.—Rom 14:12.

YERE GHE ỌKPẸNLẸN ỌSI ỌNE AGBỌN NAN SIRE

10. Bezẹle nin ẹbho eso da siegbe re ikeke rẹ lu re alo?

¹⁰ Emhin ọbhebhe nọn zẹle nin ẹbho eso da siegbe re ikeke rẹ lu re alo yẹ mianmẹn hi, ele riale ghe ọkpẹnlẹn ọsi ọne agbọn nan bha sẹ sire. Sokpan, iria-eria nọn sẹnian bha gba. Ranmhude Jesu sekha nin edibo nesọle yọle: “Bha yẹ wo muegbe ọbhi otọ, ranmhude ẹghe nin ibha bha re ẹlo ọi, ọle Ọmọn nọnsi okpea ha rẹ vae.”—Luk 12:40.

11. Beji mhan ha rẹ manman dọ ha lẹn Jehova, be uhi nesọle ha sabọ dia mhan yẹ bhi egbe beji a gbẹn ọbhi Psalm 119:60?

¹¹ Ọkhẹke nin mhan ranmhude oyẹẹ nin mhan mhọn da Jehova ha re egbe guẹ nanlẹn. Beji mhan ha rẹ manman dọ ha lẹn Osẹnobulua, iriọ mhan ha rẹ manman ha hoẹmhọn uhi nesọle, yẹ ha re obọ rẹkhan ọlẹn bhi iẹnlẹn. (Tie Psalm 119:60.) Jemis nin odibo da ta emhin kpataki ọbhebhe nọn zẹle nọn da khẹke nin mhan jẹje ha re obọ rẹkhan uhi nesi Jehova. Ọle da yọle ghe, ọria soso bhi ẹwẹ mhan bha lẹn ebe ha sunu ewiẹ. Asabọmiẹn imhan bhọ i da yẹ miẹn isẹhoa rẹ lu emhin ne gbale bhi iẹnlẹn. Ọnan zẹle nọn khẹke nin mhan dọnmhegbe lu emhin nin Jehova guanọ nin mhan lu nian.—Jem. 4:​13-17.

12. Be mhan ha sabọ miẹn luẹ bhi arẹkhọkhọ ọsi ọria nọn mun ugbo nin Jesu tẹmọnlẹn?

¹² Ria ẹmhọn arẹkhọkhọ ọsi ọria nọn mun ugbo nin Jesu tẹmhọnlẹn ghe. Jesu da yọle ghe, ẹbho ne re uriagogo ọkpa wẹnna bi ẹbho ne re ukpẹdẹ rebhe wẹnna, igho ọkpa a ha ha ele le. Bezẹle nin ẹbho ne re uriagogo ọkpa wẹnna bha da kẹ mun iwẹnna nọnsele hẹn? Ele da yọle: “Ranmhude imhan bha miẹn ọnọn re imhan bhi iwẹnna.” Ọ i yi ranmhude ghe, ene ẹbho nan i sabọ wẹnna zẹle nin ele bha da kẹ mun iwẹnna nọnsele hẹn. Ranmhude ele bha miẹn ọnọn tie ele nin ele dọ wẹnna zẹle nin ele bha da kẹ munhẹn. Ẹghe nan ki rẹ tie ele nin ele dọ wẹnna, ele da wo jẹje deba bhi ọne iwẹnna. (Mat. 20:​1-16) Ẹlẹnan nian, Jesu tie mhan nin mhan dọ kiẹn odibo nọnsọle, yẹ ha wewe ẹmhọn Agbejele nọnsi Osẹnobulua. Bhiriọ, ọkhẹke nin mhan jẹje munhẹn ha lu ọne iwẹnna nan rẹ na bhi ẹghe nin mhan rẹ họn ẹmhọn ọne iwẹnna.

13. Be mhan miẹn luẹ bhi ijiẹmhin ọsi amhẹn Lọt?

¹³ Ahamiẹn ọria bha jẹje lu emhin ne khẹke nian beji ọle ha da sabọ lu re alo yẹ mianmẹn, ọ dẹ sabọ manman nọghọ ọle rẹ lu iriọ beji ẹghe ha rẹ ha khian. Jesu lẹnmhin ghe emhin nọn sẹnian dẹ sabọ sunu. Ọnan zẹle nin ọle da sekha nin edibo nesọle yọle: “Ye ebe sunu ji amhẹn Lọt re.” (Luk 17:​31-35) Arẹmiẹn amhẹn Lọt lẹnmhin ghe, Osẹnobulua dẹ kẹ dunmhun Sodọm bi Gomora a, ọle bha ka re ọkhọle sibhi emhin nin ọle fiya bhi ọne agbaẹbho re. (Gen. 19:​23-26) Ijiẹmhin nọnsọle rẹkpa mhan rẹ lẹn ghe, ọ mhọn eji Jehova ha ziẹngbe sẹ nin ẹbho rẹ fidenọ. Ẹghe nin ọle rẹyi ha sẹ, ẹbho i da yẹ miẹn ọne isẹhoa rẹ fidenọ.—Luk 13:​24, 25.

14. Bezẹle nọn da khẹke nin uwẹ ha gbẹlokotọ bhi ebi akhasẹ ne ribhi Baibo rẹ ha munsẹ yẹ?

¹⁴ Emhin kẹkẹ ne sunu bhi ọne agbọn nan ẹlẹnan rẹman ghe, ọta akhasẹ ne ribhi Baibo wo ha munsẹ. Aharẹmien ghe eso bhi ene emhin nan i sunu bhi eji uwẹ da nyẹnlẹn, ọ yẹ khẹke nin uwẹ jẹje lu re alo yẹ mianmẹn, beji uwẹ rẹ daghe ọle ghe, emhin kẹkẹ nin Baibo tẹmhọnlẹn gene ha sunu bhi eje kẹkẹ bhi ọne otọ agbọn nan rebhe. Ji mhan fẹ ebi Pita nin odibo taman Kristiẹn bhi ore nin ọhẹnhẹn. Ọle da yọle nin ele “ji ẹwanlẹn gba nin [ele]” ranmhude, “ọkpẹnlẹn ọsi emhin rebhe sire.” (1 Pita 4:7) Ọ diabe ghe ọkpẹnlẹn ọsi Jerusalẹm bi uwa oga nọn ribhọ ọle ha re ọne ukpọta “Ọkpẹnlẹn” bhi ọne ulọnlẹn nan rẹ tẹmhọnlẹn. Ene Kristiẹn nin Pita yọle nin ele nẹ sibhi Jerusalẹm re i da ha ribhi Jerusalẹm bhi ẹghe nan ha rẹ dunmhun ọlẹn an. (1 Pita 1:1) Ọkpakinọn, ele ha daghe ebi ọta akhasẹ nan khale rẹji Jerusalẹm rẹ munsẹ yẹ, ọ dẹ rẹkpa ele rẹ rẹọbhọ ghe ive rebhe nekẹle nesi Osẹnobulua dẹ munsẹ. Iriọ yẹ nọn, beji uwẹ ha rẹ ha daghe ọle ghe akhasẹ kẹkẹ nin Baibo tẹmhọnlẹn gene ha munsẹ, ọ ki rẹkpa uwẹ rẹ jẹje lu re alo yẹ mianmẹn.

15. Be mhan ha rẹ muegbe ọbhi otọ khẹ ukpẹdẹ nọnsi Jehova yẹ? (2 Pita 3:​10-13)

¹⁵ Bhi ilẹta nọnzi eva nin Pita gbẹn, ọle da rẹkpa mhan rẹ lẹn ebi mhan ha rẹ sabọ ha muegbe khẹ “ukpẹdẹ nọnsi Jehova” yẹ. Bhi ẹghe nin ole rẹ gbẹn ọne ilẹta, ukpẹdẹ nọnsi Jehova yẹ wo rẹẹ bhi ẹlo ọsi ene Kristiẹn ne ha nyẹnlẹn bhi ore nin ọhẹnhẹn. Ọrẹyiriọ, ọle da yẹ taman ele nin ele “mun ọkhọle” ọbhi ukpẹdẹ nọnsi Jehova. (Tie 2 Pita 3:​10-13) Mhan dẹ rẹman ghe mhan mun ọkhọle bhi ukpẹdẹ nọnsi Jehova sade mhan muegbe khẹ ọle, yẹ ha guanọ nin ọne ukpẹdẹ vae. Uwedẹ nin mhan ha rẹ sabọ rẹman ghe mhan guanọ nin ukpẹdẹ nọnsi Jehova vae hi, sade mhan “nyẹn iẹnlẹn nọn khiale, . . . yẹ ha lu emhin ne ha rẹman ghe, ọkhọle rebhe [mhan] rẹ ga Osẹnobulua.” Ria ẹmhọn ebi ọ ha rẹ manman ha ti Jehova bhọ yẹ sade ọle daghe ọle ghe, uwẹ “lu emhin ne ha rẹman ghe, ọkhọle rebhe [uwẹ] rẹ ga [ọle]”! Ọ dẹ wo manman re Jehova ha ghọnghọn sade uwẹ re gbe guẹ nanlẹn yẹ mianmẹn.

ELELE NIN UWẸ HA MIẸN BHỌ SADE UWẸ BHA RIIA ẸGHE A RẸ MIANMẸN

16. Ẹghela ọkhẹke nin uwẹ rẹ jẹje lu re alo yẹ mianmẹn? (2 Kọrint 6:​1, 2) (Yẹ fẹ ene ifoto ghe.)

¹⁶ Ọne ẹghe nan ọkhẹke nin uwẹ rẹ lu re alo yẹ mianmẹn. (Tie 2 Kọrint 6:​1, 2.) Okpea ọkpa nin obhokhan Ẹtiopia nin Filip miẹn wo lẹn ghe, emhin nọn khẹke nọn nin ọle rẹ jẹje mianmẹn. Ẹghe nin ọle ki rẹ luẹ ẹmhọanta yẹ miẹn ẹdẹ nin ọle ha da sabọ mianmẹn, ọle bha yọle: ‘Ọkhẹke nin mẹn ka luẹ ba ẹmhọanta nin luẹle fo ọkuẹsẹ mẹn mianmẹn. Imẹn dẹ kie miẹn ẹdẹ ọbhebhe bhi odalo nin mẹn ha da mianmẹn.’ Sokpan, ọle da taman Filip yọle: “Be ki mun mẹn mhọn nian nin mẹn hẹi mianmẹn?” (Iwẹn. 8:​26, 27, 35-39) Ijiẹmhin esili wo khọnan! Ẹghe nin obokhan Ẹtiopia ki rẹ mianmẹn fo, “ọle da ki ghọnghọn ha khian uwa.”

17. Emhin nela ọkhẹke nin mhan ha mhọn bhi ọkhọle?

¹⁷ Ahamiẹn uwẹ siegbe re ikeke rẹ mianmẹn, ha mhọnlẹn bhi ọkhole ghe Jehova guanọ nin ọle rẹkpa uwẹ beji a ha da miẹn ghe, ibha veva ki sabọ ha yi imọẹ. (Rom 2:4) Ọle dẹ sabọ rẹkpa uwẹ rẹ rẹban ofẹnmunmhin, emhin nọn hi ki rẹ khin nọn re uwẹ kpokpo egbe, la ebi ẹbho taman uwẹ nọn zẹle nin uwẹ da siegbe re ikeke rẹ lu re alo yẹ mianmẹn. Ahamiẹn uwẹ re egbe guẹ nin Jehova yẹ mianmẹn, uwẹ ki sabọ ha mhọn eghọnghọn nin ọria ha sabọ miẹn, ranmhude nin ọle rẹ ga Jehova. Sẹyẹ, uwẹ i da yẹ ha ghe emhin nin uwẹ fikekegbe bii emhin soso. (Fil. 3:​8, 13) Ọkpakinọn, “emhin nọn ribhi odalo” uwẹ ha ki ha denọ ẹlo ọi, ọnin hi, ẹghe nin ive kẹkẹ nin Jehova vele rẹji ẹbho ne re egbe guẹ nanlẹn yẹ mianmẹn ha rẹ munsẹ.—Iwẹn. 3:19.