Ebe Ha Rẹkpa Mhan Rẹ Ha Tan Ọkhọle A Man Jehova Bhi Erọnmhọn

1-2. (a) Emhin nela ha sabọ re ọle ha nọghọ mhan rẹ tan ọkhọle a man Jehova bhi erọnmhọn? (b) Be mhan rẹ lẹn yẹ ghe Jehova ka mhan ehọ?

Ọ BE dia uwẹ bhi egbe ghe emhin ọkpa uwẹ wo taman Jehova bhi erọnmhọn ẹghe rebhe, ghe uwẹ i sabọ tan ọkhọle a man ọlẹn nọnsẹn? Ọ ha yi iriọ, ọ i yi uwẹ ọkpa sẹ ka kuẹlo da emhin nọn sẹnian khẹ. Ranmhude ghe mhan mhọn emhin ne bunbun nin mhan lu bhi iẹnlẹn, ọ dẹ sabọ rẹ mhan ha re otua-otua nan erọnmhọn ji Jehova. La asabọmiẹn mhan riale ghe mhan bha sẹ ọnọn ha ne Jehova talọ zẹle, nin ọ da nọghọ mhan rẹ ha taman ọlẹn ebi emhin gene dia mhan yẹ bhi egbe.

² Baibo ji mhan lẹn ghe, ọ i yi ebi erọnmhọn nọnsẹmhan tan sẹ yẹ lu uhọnmhọn-emhin rẹji Jehova. Ebe lu uhọnmhọn-emhin rẹji ọle hi, nin mhan rẹ ha re idegbere tan ọkhọle a man ọlẹn bhi erọnmhọn. Ọle họn “erọnmhọn ọsi ene mhọn ẹkẹ-omẹnhiẹn.” (Ps. 10:17) Emhin rebhe nin mhan taman ọlẹn ọle kaehọ ọle, ranmhude ẹmhọn mhan wo manman rẹtẹ ọle.—Ps. 139:​1-3.

3. Inọnta nela mhan ha zilo nyan bhi ọne uhọnmhọn-ọta nan?

³ Mhan sabọ rẹ nọọn egbe mhan ene inọnta nan: Bezẹle nọn bha da khẹke nin ofẹn ha mun mhan rẹ ha nan erọnmhọn ji Jehova? Be mhan ha rẹ sabọ ha nan erọnmhọn yẹ nọn ha rẹkpa mhan rẹ ha sikẹ Jehova? Ahamiẹn mhan ria eria nyan erọnmhọn kẹkẹ nin eguọmhandia nesi Jehova nanlẹn, nan gbẹn ọbhi Baibo, be ọ ha rẹ rẹkpa mhan rẹ sabọ ha nan erọnmhọn ji Jehova nọnsẹn yẹ? Be mhan ha lu yẹ sade mhan kpokpo egbe rẹ sẹbhọ ghe mhan bha lẹn ebi mhan ha rẹ nan erọnmhọn ji Jehova yẹ? Bha ji mhan fẹ ewanniẹn rẹji ene inọnta nan ghe.

HẸI JI OFẸN HA MUN UWẸ RẸ HA NAN ERỌNMHỌN JI JEHOVA

4. Be ha sabọ rẹkpa mhan beji a ha da miẹn ofẹn bha ha mun mhan rẹ ha tan ọkhọle a man Jehova bhi erọnmhọn? (Psalm 119:145)

⁴ Ahamiẹn mhan mhọnlẹn bhi ọkhọle ghe ọmọẹ ọsaje Jehova khin, nọn ho nin emhin kiọnlẹn nin mhan bhi iẹnlẹn, ọnan ki rẹkpa mhan rẹ re ọkhọle rebhe ha nan erọnmhọn ji Jehova. Ẹlo nọn sẹnian ọria nọn gbẹn ebe ọsi Psalm 119 rẹ ha ghe Jehova. Ọle wo ha kuẹlo da ọkakale bhi iẹnlẹn. Ẹbho eso da mun ohoghe gbe ọle. (Ps. 119:​23, 69, 78) Rẹ deba ọnin, ọle da yẹ wo ha ne olukhọ nọn ri ọle bhi egbe dan. (Ps. 119:5) Arẹmiẹn ene emhin nan rebhe sunu ji ọle, ọle bha ji ofẹn ha mun ọlẹn rẹ ha tan ọkhọle a man Jehova bhi erọnmhọn.—Tie Psalm 119:145.

5. Bezẹle nọn bha da khẹke nin mhan ji emhin soso rẹ mhan miẹn ghe, mhan bha yẹ ha nan erọnmhọn ji Jehova? Re ijiẹmhin ọbhọ.

⁵ Jehova guanọ nin eria nan miẹn ghe ele lu emhin-ebe nọn manman kaka yẹ ha nan erọnmhọn ji ọle. (Isa. 55:​6, 7) Bhiriọ, ọ bha khẹke nin mhan ji emhin soso rẹ mhan miẹn ghe mhan bha yẹ ha nan erọnmhọn ji Jehova. Bhi ọsi ijiẹmhin, ji a man yọle ghe ọria khian eji ọle bha sẹ ka yo khẹ. Ọkpakinọn, beji ọle rẹ khian ọle da bibi odẹ. Sokpan, ẹbho ne nyẹnlẹn bhi eji ọle sẹ khian sẹ dẹ sabọ rẹkpa ọle rẹ lẹn eji ọle khian. Ọle dẹ be ranmhude ghe ọle bibi odẹ re ẹkhọ ha lu ọle rẹ taman ọkpa bhi ene ẹbho nin ele man ọlẹn odẹ? Hiehie! Iriọ yẹ nọn. Ahamiẹn ghe mhan bibi odẹ, la mhan dobọ ẹgheso, ọ bha khẹke nin mhan ji ofẹn ha mun mhan rẹ ha ta emhin rebhe man Jehova bhi erọnmhọn.—Ps. 119:​25, 176.

EBI MHAN HA RẸ HA NAN ERỌNMHỌN YẸ NỌN HA RẸKPA MHAN RẸ HA SIKẸ JEHOVA

6-7. Emhin nela ha rẹkpa mhan rẹ sabọ ha tan ọkhọle a man Jehova bhi erọnmhọn? Re ijiẹmhin ọbhọ. (Yẹ fẹ ebi a gbẹn ọbhi ọtọle ghe.)

⁶ Ahamiẹn mhan tan ọkhọle a man Jehova beji mhan rẹ taman ọlẹn ebi emhin dia mhan yẹ bhi egbe, ọ ki rẹkpa mhan rẹ manman ha sikẹ ọle. Bhiriọ, be mhan ha lu beji mhan ha da sabọ ha re ọkhọle rebhe nan erọnmhọn ji Jehova nọnsẹn?

⁷ Ha ria eria nyan ikpẹ esili nesi Jehova.a Ahamiẹn mhan ria eria nyan ikpẹ esili nesi Jehova, ọ ki rẹkpa mhan rẹ manman ha tan ọkhọle a man ọlẹn bhi erọnmhọn. (Ps. 145:​8, 9, 18) Fẹ ijiẹmhin ọsi obhio mhan natiọle Kristine ghe. Aba ọle wo ha re obọ oya mun ọlẹn. Ọle da yọle: “Nin mẹn rẹ ha ne Jehova talọ bii Aba mẹn bha lẹkhẹ nin mẹn. Mẹn da ha riale ghe Jehova dẹ fikekegbe mẹn ranmhude idobọ nesẹmhẹn.” Emhin nela ki rẹkpa ọle? Ọle da yẹ yọle: “Mẹn da manman ria eria nyan ahoẹmhọn-egbe nọn i beghe nọnsi Jehova. Ọnan da rẹkpa mẹn rẹ rẹọbhọ ghe ọle hoẹmhọn mẹn. Mẹn lẹnmhin ghe ọle i da fikekegbe mẹn. Aharẹmiẹn mẹn de, ọle dẹ mun mẹn kpanọ. Ọnan hi emhin nọn rẹkpa mẹn rẹ sabọ ha tan ọkhọle a man ọlẹn bhi emhin rebhe.”

8-9. Elele nela mhan ha miẹn bhọ sade mhan ka re obhi ẹghe khere rẹ ria eria nyan ebi mhan ha ta, ọkuẹsẹ mhan nan erọnmhọn ji Jehova? Re ijiẹmhin ọbhọ.

⁸ Ria ẹmhọn ebi uwẹ ha taman Jehova bhi erọnmhọn. Ọkuẹsẹ uwẹ munhẹn ha nan erọnmhọn, uwẹ sabọ rẹ nọọn egbe uwẹ inọnta eso. Bhi ọsi ijiẹmhin: ‘Ọkakale nela mẹn kuẹlo da nian? Ọria be ribhọ nọn khẹke nin mẹn rẹhunmhan? Mẹn be kuẹlo da edọnmhẹn nin mẹn guanọ nin Jehova rẹkpa mẹn rẹ khọn miotọ?’ (2 Ki. 19:​15-19) Mhan dẹ yẹ sabọ re obọ rẹkhan ijiẹmhin nin Jesu re ọbhi otọ rẹji ebi a rẹ nan erọnmhọn yẹ, sade mhan ria eria nyan ebi mhan ha sabọ taman Jehova bhi erọnmhọn rẹji elin Nọnsọle, Agbejele Nọnsọle, bi iho Nọnsọle.—Mat. 6:​9, 10.

⁹ Ẹghe nin obhio mhan nin okhuo natiọle Aliska rẹ dọ lẹn kere ghe ọdọ ọle khọnmhọn emianmhẹn Kansa bhi ẹrere, ọ da wo ha nọghọ ọle rẹ ha nan erọnmhọn. Ọle da yọle: “Ọnan da wo manman rẹso mẹn rẹ sẹbhọ ghe, mẹn bha yẹ sabọ manman ha ria eria nọnsẹn. Mẹn bha lẹn ebi mẹn ha rẹ ha nan erọnmhọn ji Jehova yẹ.” Emhin nela ki rẹkpa ọle? Ọle da yọle: “Ọkuẹsẹ mẹn nan erọnmhọn, mẹn ka re obhi ẹghe khere rẹ ria eria nyan ebi mẹn ho nin mẹn ta bhi erọnmhọn. Ọnan da wo rẹkpa mẹn beji a ha da miẹn ghe mẹn bha ha tẹmhọn egbe mẹn la ọdọ mẹn ọkpa man Jehova bhi erọnmhọn. Ẹghe nọn hi ki rẹ khin nin mẹn rẹ lu ọnan, mẹn ki wo sabọ de ọkhọle re yẹ lẹn emhin kẹkẹ nin mẹn ha taman Jehova bhi erọnmhọn.”

10. Bezẹle nọn da khẹke nin mhan re ẹghe nọn tanlẹn ha nan erọnmhọn ji Jehova? (Yẹ fẹ ene ifoto ghe.)

¹⁰ Hẹi ha re otua-otua nan erọnmhọn ji Jehova. Ẹmhọanta nọn ghe, obhi erọnmhọn khere nin mhan nanlẹn dẹ sabọ rẹ mhan sikẹ Jehova. Ọkpakinọn, ahamiẹn ghe mhan nan erọnmhọn nọn tanlẹn ji Jehova, ọ ki re isẹhoa nin mhan rẹ sabọ ta emhin rebhe nin mhan mhọn bhi ọkhọle man ọlẹn.b Ọdọ Aliska natiọle Elijah da yọle: “Mẹn dọnmhegbe rẹ ha nan erọnmhọn igba ne bunbun bhi ukpẹdẹ. Nin mẹn rẹ ha nan erọnmhọn nọn tanlẹn ji Jehova, ọ wo rẹ mẹn manman dọ sikẹ ọle. Osẹ nọn mhọn iziẹngbe, nọn muegbe nin ọle rẹ ka mẹn ehọ Jehova khin. Bhiriọ, ọ bha khẹke nin mẹn wo re otua-otua ha nan erọnmhọn ji ọle.” Dọnmhẹn ọnan fẹghe: Guanọ ẹghe, la eji uwẹ ha da sabọ nan erọnmhọn nin emhin soso i da de uwẹ idobolo. Ji ọ ha yi eji uwẹ ha da sabọ nan erọnmhọn nọn tanlẹn ji Jehova. Uwẹ sabọ yẹ rẹ nanlẹn dagbare.

RIA ERIA NYAN ERỌNMHỌN NAN GBẸN ỌBHI BAIBO

11. Elele nela mhan ha miẹn sade mhan ria eria nyan erọnmhọn nin eguọmhandia nesi Jehova nanlẹn, nan gbẹn ọbhi Baibo? (Yẹ fẹ ọne ẹkpẹti ghe nọn yọle, “Iriọ Emhin Be Dia Uwẹ Bhi Egbe Beji Ọ Dia Ele Bhi Egbe?”)

¹¹ Uwẹ dẹ yẹ sabọ miẹn emhin luẹ bhi erọnmhọn bi illo kẹkẹ nan gbẹn ọbhi Baibo. Beji uwẹ ha rẹ ha luẹ uwedẹ nin eguọmhandia nesi Jehova rẹ ha tan ọkhọle a man Jehova yẹ, ọ ki yẹ rẹkpa uwẹ rẹ ha tan ọkhọle a man Jehova bhi erọnmhọn. Uwẹ dẹ yẹ sabọ miẹn ikpọta eso nin ele noo, nin uwẹ ha yẹ sabọ noo bhi erọnmhọn nọnsẹ. Asabọmiẹn uwẹ dẹ yẹ miẹn erọnmhọn nin eguọmhandia nesi Osẹnobulua ne ha ribhi idia nin uwẹ ye nanlẹn.

12. Inọnta nela mhan ha sabọ nọọn egbe mhan le sade mhan ria eria nyan erọnmhọn nin eguọmhandia nesi Osẹnobulua nanlẹn, nan gbẹn ọbhi Baibo?

¹² Beji uwẹ rẹ fẹ ene erọnmhọn ghe nan gbẹn ọbhi Baibo, nọọn egbe ẹ ene inọnta nan: ‘Họla ta ene ọta nan? Idia nela ọle ha ye? Iriọ emhin be dia mẹn bhi egbe beji ọle tẹmhọnlẹn bhi ọne erọnmhọn nan? Emhin nela mẹn ha sabọ miẹn luẹ bhi erọnmhọn nin ọle nanlẹn?’ Uwẹ sabọ rẹ dọ gua-otọ ene inọnta nan fẹghe beji uwẹ ha da sabọ miẹn ewanniẹn rẹji ele. Ọ i yi ẹghe uwẹ riia sade uwẹ lu iriọ. Bha ji mhan fẹ ijiẹmhin eso ghe.

13. Emhin ọkpa nela mhan miẹn luẹ bhi erọnmhọn nin Hana nanlẹn? (1 Samuel 1:​10, 11) (Yẹ fẹ ifoto nọn ribhi odalo ọle ghe.)

¹³ Tie 1 Samuel 1:​10, 11. Ọkakale eva Hana ha kuẹlo da bhi iẹnlẹn bhi ẹghe nin ọle rẹ nan ọne erọnmhọn nan. Agan ọle ha khin, sẹyẹ, ọzeva-ọle da ha re iẹnlẹn nọghọ ọle ranmhude nin ọle bha rẹ miẹn ọmọn biẹ. (1 Sam. 1:​4-7) Ahamiẹn uwẹ kuẹlo da ọkakale nọn bha ka siegbe kie, be uwẹ ha miẹn luẹ bhi erọnmhọn nin Hana nanlẹn? Hana da re ẹghe nọn tanlẹn rẹ nan erọnmhọn ji Jehova. Bhiriọ, ọle da miẹn ikoudure beji ọle nan ọne erọnmhọn fo. (1 Sam. 1:​12, 18) Mhan dẹ yẹ miẹn ikoudure sade mhan “Mun ihẹ [nọnsẹmhan] fi nin Jehova” bhi erọnmhọn beji mhan rẹ tan ọkhọle a man ọlẹn.—Ps. 55:22.

14. (a) Emhin ọbhebhe nela mhan miẹn luẹ bhi ijiẹmhin ọsi Hana? (b) Be ọ ha rẹ sabọ rẹkpa mhan yẹ sade mhan ria eria nyan erọnmhọn nan gbẹn ọbhi Baibo? (Fẹ ebi a gbẹn ọbhi otọle ghe.)

¹⁴ Ikpe eso ki gbera nin Hana biẹ Samuẹl, ọle da re ọle ji Ẹlai nin Ojohẹn. (1 Sam. 1:​24-28) Bhi erọnmhọn nin Hana nanlẹn, ọle da ta ọta nọn rẹman ghe, ọle rẹọbhọ ghe Jehova dẹ wo ha gbega eguọmhandia nesọle, yẹ rẹkpa ele.c (1 Sam. 2:​1, 8, 9) Asabọmiẹn ọkakale nin Hana ha kuẹlo da bhi uwa bha sẹ fo, ọrẹyiriọ, ọle da yẹ wo ha denọ ẹlo ọbhi erọnmhọn kẹkẹ nin ọle sẹ miẹn bhi obọ Jehova. Be mhan miẹn luẹ bhi ọnan? Mhan dẹ sabọ ha ziẹngbe ọkakale nọn hi ki rẹ khin nin mhan kuẹlo da, sade mhan denọ ẹlo ọbhi uwedẹ kẹkẹ nin Jehova sẹ rẹ rẹkpa mhan.

15. Be mhan miẹn luẹ bhi erọnmhọn nin Jerimaya nan ji Jehova? (Jeremiah 12:1)

¹⁵ Tie Jeremiah 12:1. Ẹghe ribhọ nin Jerimaya nin akhasẹ rẹ wo ha kpokpo egbe ba uwedẹ nin emhin rẹ ha kiọnlẹn nin eria ọbe. Rẹ deba ọnin, egbe da yẹ wo lọ ọle ranmhude uwedẹ nin Ibhokhan Izrẹl rẹ ha nanlẹn lu emhin. (Jer. 20:​7, 8) Inian emhin yẹ dia mhan bhi egbe sade mhan daghe emhin kiọnlẹn nin eria ọbe, la a bha lu mhan nọnsẹn. Jerimaya da taman Jehova ebi emhin dia ọle yẹ bhi egbe, ọkpakinọn, ọle bha ha yọle ghe Jehova lu emhin bhi uwedẹ nọn bha gba. Jerimaya da wo rẹọbhọ ghe, Jehova dẹ wo ha lu emhin bhi uwedẹ nọn gbale, beji ọle daghe uwedẹ nin Jehova rẹ re oya nin ene Ibhokhan Izrẹl le. (Jer. 32:19) Mhan dẹ yẹ sabọ taman Jehova ebi emhin dia mhan yẹ bhi egbe sade a bha lu mhan nọnsẹn. Sẹyẹ, rẹọbhọ ghe, ẹghe nin ọle rẹyi ha sẹ, ọle dẹ re emhin rebhe khian nọnsẹn.

16. Be mhan miẹn luẹ bhi erọnmhọn nin Obhokhan Livai nanlẹn? (Psalm 42:​1-4) (Yẹ fẹ ene ifoto ghe.)

¹⁶ Tie Psalm 42:​1-4. Obhokhan Livai ọkpa nọn bha miẹn ọne isẹhoa rẹ deba Ibhokhan Izrẹl ha ga bhi uwa oga gbẹn ọne ulọnlẹn nan. Ebi ọle gbẹn da rẹman ebi emhin dia ọle yẹ bhi egbe. Emhin sabọ rẹ re iriọ dia mhan bhi egbe sade mhan bha sabọ dagbare bhi uwa ranmhude emianmhẹn, la a mun mhan khue ọbhi ighan ranmhude urẹọbhọ nọnsẹmhan. Ẹgheso, mhan sabọ rẹ ha ghọnghọn. Bhi ẹghe ebhebhe, mhan sabọ rẹ ha lu akhiẹ. Ọnọn hi ki rẹ khin, ọ dẹ ha mhẹn nin mhan rẹ ha taman Jehova ebi emhin dia mhan yẹ bhi egbe. Ọnan dẹ rẹkpa mhan rẹ ha ghe idia nọnsẹmhan bhi uwedẹ nọn khẹke, yẹ rẹkpa mhan rẹ ye emhin ne lu uhọnmhọn-emhin re. Bhi ọsi ijiẹmhin, ọne Obhokhan Livai lẹn sẹbhọ ghe, ọle mhọn isẹhoa kẹkẹ nin ọle rẹ ha gẹn Jehova. (Ps. 42:5) Ọle da yẹ ria eria nyan ebi Jehova rẹ ha gbẹloghe ọle yẹ. (Ps. 42:8) Ahamiẹn mhan tan ọkhọle a man Jehova bhi erọnmhọn, ọ dẹ rẹkpa mhan rẹ lẹn ebezẹle nin emhin da dia mhan riọ, yẹ rẹkpa mhan rẹ ha mhọn ọfure. Ọ dẹ yẹ re ọne ahu nin mhan rẹ ha ziẹngbe.

17. (a) Be mhan ha sabọ miẹn luẹ bhi erọnmhọn nin Jona nin akhasẹ nan? (Jonah 2:​1, 2) (b) Be ọta eso nan noo bhi ebe ọsi Psalm ha rẹ rẹkpa mhan yẹ sade mhan kuẹlo da ọkakale? (Fẹ ebi a gbẹn ọbhi otọle ghe.)

¹⁷ Tie Jonah 2:​1, 2. Bhi ẹghe nin Jona nin akhasẹ rẹ ha ribhi ẹkẹ ọsi udede ehẹn, ẹghenin ọle rẹ nan ọne erọnmhọn nan. Arẹmiẹn Jona mhọn akan-ehọ da Jehova, ọle da yẹ rẹọbhọ ghe Jehova dẹ ka ọle ehọ sade ọle nan erọnmhọn ji ọle. Bhi ọne erọnmhọn nin Jona nanlẹn, ọle da wo noo ene ikpọta nan gbẹn ọbhi ebe ọsi Psalm.d Ọle wo lẹn ene ulọnlẹn nan nọnsẹn. Nin ọle rẹ ha ria eria nyan ene ulọnlẹn nan, ọ da rẹkpa ọle rẹ manman rẹọbhọ ghe Jehova dẹ wo ha rẹkpa ọle. Iriọ yẹ nọn. Ahamiẹn mhan lẹn ulọnlẹn eso bhi Baibo ọbhi uhọnmhọn, ele dẹ sabọ ko mhan udu re sade mhan ribhi ọkakale. Ele dẹ yẹ rẹkpa mhan rẹ lẹn ebi mhan ha sabọ bhii Jehova le bhi erọnmhọn.

WO MANMAN HA SIKẸ JEHOVA BHI ERỌNMHỌN

18-19. Ahamiẹn ẹgheso mhan bha lẹn ebi mhan ha taman Jehova bhi erọnmhọn, ikoudure nela Rom 8:​26, 27 re nin mhan? Re ijiẹmhin ọbhọ.

¹⁸ Tie Rom 8:​26, 27. Ẹgheso, mhan sabọ wo rẹ ha kpokpo egbe rẹ sẹbhọ ghe, mhan bha lẹn ebi mhan ha rẹ taman Jehova yẹ ebi emhin dia mhan yẹ bhi egbe. Ọkpakinọn, mhan mhọn urẹkpa. Mhan ha ribhi idia nọn sẹriọ, ẹlinmhin nọn khiale nọnsi Osẹnobulua ki “bhii” nin mhan. Be ọ rẹ yi iriọ yẹ? Jehova da noo ẹlinmhin nọn khiale nọnsọle rẹ rẹkpa eria rẹ gbẹn erọnmhọn kẹkẹ ọbhi otọ bhi Baibo. Ahamiẹn mhan bha sabọ ta ebi emhin dia mhan yẹ bhi egbe man Jehova bhi erọnmhọn, Jehova sabọ rẹ miẹn ọne erọnmhọn nan gbẹn ọbhi otọ bhi Baibo ọbhi egbe bọsi ghe, imhan nan ọne erọnmhọn. Ọle ki yẹ wanniẹn ọlẹn.

¹⁹ Ọnan hi emhin nọn rẹkpa obhio mhan nin okhuo natiọle Yelena nọn nyẹnlẹn bhi Russia. A da mun ọlẹn khue ranmhude nin ọle rẹ ha nan erọnmhọn, yẹ tie Baibo. Ranmhude ene emhin nan ne sunu ji Yelena, ọ da wo ha nọghọ ọle rẹ ha nan erọnmhọn. Ọle da yọle: “Imẹn da yere ghe, ahamiẹn mẹn kpokpo egbe rẹ sẹbhọ ghe mẹn bha lẹn ebi mẹn ha taman Jehova bhi erọnmhọn, Jehova dẹ miẹn erọnmhọn nin eguọmhandia nesọle bhi ẹghe ẹdẹlẹ . . . nan ọbhi egbe bọsi ghe imẹn nan ọne erọnmhọn. Ọle ki yẹ wanniẹn ọlẹn nin mẹn. . . . Ọnan hi emhin nọn wo ha ko mẹn udu re bhi ẹghe ọkakale nan rebhe nin mẹn kuẹlo da bhi iẹnlẹn.”

20. Ahamiẹn emhin kpokpo mhan bhi ọkhọle, be mhan ha rẹ sabọ muegbe ọkhọle nọnsẹmhan ọbhi otọ yẹ ọkuẹsẹ mhan nan erọnmhọn?

²⁰ Ahamiẹn mhan kpokpo egbe, ọ sabọ rẹ ha nọghọ mhan rẹ denọ ọkhọle ọbhi erọnmhọn nin mhan nan. Nin mhan rẹ sabọ muegbe ọkhọle nọnsẹmhan ọbhi otọ ọkuẹsẹ mhan nan erọnmhọn, mhan sabọ rẹ dọ kaehọ rẹkọdi ọsi erọnmhọn eso nan gbẹn ọbhi ebe ọsi Psalm. Mhan sabọ yẹ rẹ gbẹn ebi emhin dia mhan yẹ bhi egbe ọbhi otọ beji Devid nin Ojie lu. (Ps. 18, 34, 142) Bhi ọsi ẹmhọanta, uhi soso i ribhọ nan gbẹn ọbhi otọ rẹji ebi mhan ha rẹ ha muegbe ọbhi otọ yẹ ọkuẹsẹ mhan nan erọnmhọn. (Ps. 141:2) Lu ọne uwẹ lẹn ghe ọ dẹ wẹnna nin uwẹ.

21. Bezẹle nọn da khẹke nin mhan re ọkhọle rebhe ha nan erọnmhọn ji Jehova?

²¹ Ọ manman wo rẹ mhan ghọnghọn rẹ lẹn ghe Jehova lẹn ebi emhin dia mhan yẹ bhi egbe ọkuẹsẹ mhan taman ọlẹn. (Ps. 139:4) Ọrẹyiriọ, ọ re Jehova ghọnghọn sade mhan taman ọlẹn ebi emhin dia mhan yẹ bhi egbe. Bhiriọ, hẹi ha siegbe re ikeke rẹ ha nan erọnmhọn ji Aba uwẹ nọn ribhi okhun. Uwẹ sabọ rẹ dọ luẹ emhin bhi erọnmhọn nan gbẹn ọbhi otọ bhi Baibo. Ha tan ọkhọle a man Jehova bhi erọnmhọn. Ji ọle lẹn ẹghe nin uwẹ rẹ ghọnghọn bi ẹghe nin uwẹ rẹ ribhi akhiẹ. Beji a miẹn ọmọẹ esili nọnsẹ Jehova khin, ọle dẹ wo ha rẹkpa uwẹ!