Hẹi Yele A Rẹ Ha Nan Erọnmhọn Ji Ẹbho

1. Be mhan rẹ lẹn yẹ ghe emhin kpataki erọnmhọn khin rẹji Jehova?

ẸSELE nọn na obọ Osẹnobulua vae erọnmhọn khin. Ria ẹmhọn ọnan ghe, Jehova mun ẹsọn kẹkẹ nin ene ẹhi ne ribhi okhun. (Ps. 91:11) Ọle da yẹ mun ẹsọn kpataki nin Jesu nin Ọmọn nọnsọle. (Mat. 28:18) Ọkpakinọn, Jehova be mun ọne ẹsọn nin ọria rẹ ha kaehọ erọnmhọn nọnsẹmhan? Eye. Jehova ọkpa sẹsẹ tobọle miẹn ọne ẹsọn nan. Jehova nọn yi “Ọnọn họn erọnmhọn” tobọle kaehọ erọnmhọn nesẹmhan.—Ps. 65:2.

2. Ijiẹmhin nela Pọl nin odibo re ọbhi otọ rẹji nan rẹ ha nan erọnmhọn ji ẹbho nekẹle?

² Ẹmhọanta nọn ghe mhan mhọn ọne isẹhoa rẹ ha taman Jehova emhin rebhe ne lu uhọnmhọn-emhin rẹji mhan, ọkpakinọn, ọ yẹ khẹke nin mhan ha nan erọnmhọn ji ẹbho. Emhin nin Pọl nin odibo lu khọnan. Bhi ọsi ijiẹmhin, bhi ilẹta nin Pọl gbẹn ji agbotu nọn ha ribhi Ẹfẹsọs, ọle da yọle: “Mẹn da wo ha bhii ji bha ẹghe rebhe.” (Ẹfẹ. 1:16) Pọl yẹ nan erọnmhọn ji ọdeọde bhi ẹwẹ ele. Bhi ọsi ijiẹmhin, ọle da taman Timoti yọle: “Mẹn khuẹnmhẹn Osẹnobulua, . . . Asọn bi odanmhẹn mẹn rẹ ye uwẹ re bhi erọnmhọn.” (2 Tim. 1:3) Pọl yẹ wo ha mhọn emhin kẹkẹ ne ha kpokpo ọle bhi ọkhọle nọn khẹke nin ọle bhii Jehova le. (2 Kọr. 11:23; 12:​7, 8) Ọrẹyiriọ, ọle da sẹyẹ ha nan erọnmhọn ji ẹbho.

3. Bezẹle nin mhan da yele a rẹ ha nan erọnmhọn ji ẹbho nekẹle?

³ Ẹgheso, mhan sabọ rẹ yele a rẹ nan erọnmhọn ji ẹbho. Bezẹle? Obhio mhan nin okhuo natiọle Sabrinaa da ta emhin ọkpa nọn zẹle. Ọle da yọle: “Mhan wo mhọn emhin ne bunbun nin mhan lu bhi iẹnlẹn. Ranmhude ọkakale kẹkẹ nin mhan kuẹlo da bhi iẹnlẹn, ọ dẹ sabọ rẹ mhan miẹn ghe, ẹmhọn egbe mhan ọkpa mhan taman Jehova bhi erọnmhọn.” Emhin nọn sẹnian be sẹ sunu ji uwẹ khẹ? Ahamiẹn iriọ nọn, ọne uhọnmhọn-ọta nan dẹ sabọ rẹkpa uwẹ. Ọ dẹ (1) gbotọle fanọan ebezẹle nin ọ da khẹke nin mhan ha nan erọnmhọn ji ẹbho, bi (2) ebi mhan ha rẹ sabọ ha lu iriọ yẹ.

EBEZẸLE NỌN DA KHẸKE NIN MHAN HA NAN ERỌNMHỌN JI ẸBHO

4-5. Be erọnmhọn nin mhan nan nin ẹbho ha rẹ sabọ wẹnna nin ele yẹ? (Jemis 5:16)

⁴ Erọnmhọn nin mhan nan ji ẹbho dẹ sabọ wẹnna nin ele. (Tie Jemis 5:16.) Erọnmhọn nin mhan nan ji ẹbho dẹ be sabọ gene rẹkpa ele? Ehe, ọ dẹ sabọ. Fẹ ebi Jesu taman Pita arẹmiẹn ọle lẹnmhin ghe Pita dẹ kẹ fikekegbe ọle. Ọle da yọle: “Imẹn manman nan erọnmhọn ji Osẹnobulua nọn rẹkpa ẹ nin urẹọbhọ nọnsẹ hẹi wẹghẹ a.” (Luk 22:32) Pọl yẹ lẹn ghe ahamiẹn mhan nan erọnmhọn ji ẹbho, ọ dẹ sabọ fi idia nọnsele denọ. Bhi ẹghe nan rẹ mun ọlẹn ọbhi ighan bhi Rom arẹmiẹn ọle bha lu emhin soso, ọle da gbẹn ji Filẹmọn yọle: “Mẹn mhọnlẹn bhi ọkhọle ghe a dẹ kẹ fan imẹn fia bhi ighan, ranmhude erọnmhọn nin bha wo ha nan ji mẹn.” (Filẹ. 22; fẹ study note nọn mhọn uhọnmhọn-ọta nọn yọle, “for I am hoping that through your prayers” ghe bhi ebo.) Ọnan hi ebe gene sunu. A da fan Pọl fia bhi ighan, sẹyẹ, ọle da fikie dọ ha lu iwẹnna itẹmhọn Osẹnobulua nin ọle ha lu.

⁵ Bhi ọsi ẹmhọanta, ọnan bha rẹman ghe Jehova dẹ wo ha lu emhin rebhe nin mhan taman ọlẹn. Ọle lẹn ebe eguọmhandia nesọle bhii ọle bhi erọnmhọn. Ọle yẹ zẹ rẹ lu ebi ele guanọ nin ele ẹgheso. Ahamiẹn mhan mhọn ọnan bhi ọkhọle, ọ dẹ rẹkpa mhan rẹ re ọkhọle rebhe ha nan erọnmhọn ji Jehova, yẹ zẹ emhin rebhe obọ nanlẹn.—Ps. 37:5.

6. Be nan rẹ ha nan erọnmhọn ji ẹbho ha rẹ rẹso mhan yẹ? (1 Pita 3:8)

⁶ Mhan ha nan erọnmhọn ji ẹbho, ọ dẹ rẹkpa mhan rẹ ha mhọn “ẹkẹ-ẹjẹjẹ.” (Tie 1 Pita 3:8.) Nan rẹ ha mhọn ẹkẹ-ẹjẹjẹ mundia nin, nin ọria rẹ ha gbẹlokotọ bhi ọkakale kẹkẹ nin ọria ebhebhe kuẹlo da, bi nin ọle yẹ rẹ ha mhọn ọne ọkhọle rẹ rẹkpa ọne ọria. (Mak 1:​40, 41) Ọwanlẹn ọkpa bhi agbotu natiọle Michael da yọle: “Ẹghe nọn hi ki rẹ khin nin mẹn rẹ bhii Jehova nin ọle rẹkpa ẹbho bhi ebi ele guanọ, ọnan ki wo rẹkpa mẹn rẹ lẹn otọ ebi ele kuẹlo da. Sẹyẹ, ọ rẹkpa mẹn rẹ manman dọ hoẹmhọn ele, yẹ sikẹ ele aharẹmiẹn ghe ele bha lẹn.” Ọwanlẹn ọkpa natiọle Richard da yẹ tẹmhọn elele ọbhebhe nan miẹn sade a nan erọnmhọn ji ẹbho. Ọle da yọle: “Ahamiẹn mhan nan erọnmhọn ji ọria, ọ ki re ọne ọhubhudu nin mhan rẹ lu emhin nọn ha rẹkpa ọne ọria.” Ọle da yẹ yọle: “Ahamiẹn mhan re iyobọ nin ọria nin mhan nan erọnmhọn nan, ọ ki diabe ghe mhan rẹkpa re ewanniẹn ọbhi erọnmhọn nin mhan nan ji ọle.”

7. Ahamiẹn mhan nan erọnmhọn nin ẹbho, be ọ ha rẹ rẹkpa mhan rẹ re ẹlo nọn khẹke ha ghe ọkakale nin mhan kuẹlo da yẹ? (Filipai 2:​3, 4) (Yẹ fẹ ene ifoto ghe.)

⁷ Ahamiẹn mhan nan erọnmhọn ji ẹbho, ọ rẹkpa mhan rẹ re ẹlo nọn khẹke ha ghe ọkakale nin mhan kuẹlo da. (Tie Filipai 2:​3, 4.) Imhan rebhe wo kuẹlo da ọkakale ẹlẹnan, ranmhude Esu hi ọnọn gbẹloghe ọne agbọn nan. (1 Jọni 5:19; Arẹm. 12:12) Ahamiẹn ghe mhan dọnmhegbe rẹ ha nan erọnmhọn ji ẹbho ne kuẹlo da ekpokpo ẹghe rebhe, ọ ki rẹkpa mhan rẹ ha yere ghe, “ibhio [mhan] ne ribhi otọ agbọn rebhe yẹ wo ha kuẹlo da ekpokpo ne sẹ inian.” (1 Pita 5:9) Obhio mhan ọkpa natiọle Katherine nọn lu iwẹnna ọkanẹfan da yọle: “Nan rẹ ha nan erọnmhọn ji ẹbho rẹkpa mẹn rẹ yere ghe ẹbho nekẹle yẹ kuẹlo da ọkakale. Ọnan hi ebe rẹkpa mẹn beji a ha da miẹn ghe, mẹn bha ha denọ ẹlo ọbhi ọkakale nin mẹn kuẹlo da gbe.”

HA NAN ERỌNMHỌN NIN IBHIO MHAN REBHE

8. Ẹbho nela mhan ha sabọ nan erọnmhọn je?

⁸ Ẹbho nela mhan ha sabọ nan erọnmhọn je? Mhan dẹ sabọ nan erọnmhọn ji ẹbho ne bunbun. Bhi ọsi ijiẹmhin, ẹbho bii ene khọnmhọn, elasẹre ne kuẹlo da ekpokpo bhi isiku, la ene ki dọmanlẹn. Ibhio mhan ne bunbun wo kuẹlo da ekpokpo bhi obọ azagba-uwa nọnsele, la ene gbẹloghe. (Mat. 10:​18, 36; Iwẹn. 12:5) Ibhio mhan eso nẹgbe sibhi uwa nọnsele re ranmhude ozughu nọn sunu bhi agbaẹbho nin ele ye. Eso kuẹlo da emhin idunmhunre. Asabọmiẹn mhan bha sẹ ka miẹn ene ibhio mhan nan khẹ. Ahamiẹn mhan nan erọnmhọn nin ẹbho ne sẹ inian, ọ rẹman ghe mhan re obọ rẹkhan ẹmhọn nin Jesu tale bhi ẹghe nin ọle rẹ yọle, “bha hoẹmhọn egbe bha.”—Jọni 13:34.

9. Bezẹle nọn da khẹke nin mhan ha nan erọnmhọn ji ibhio mhan ne sun agbotu bi ikhuo ele?

⁹ Mhan dẹ yẹ sabọ nan erọnmhọn nin ibhio mhan nin Jehova noo rẹ sun agbotu. Ene ibhio mhan nan hi, Otu Nọn Sun Oga, Otu Nọn Sun IBẹtẹ, ene ewanlẹn ne ribhi Bẹtẹ, ọfẹotughe, ene ewanlẹn ne ribhi agbotu bi ene zẹ sikẹ ene ewanlẹn. Ene ibhio mhan nan mhọn ọkakale kẹkẹ nin ele kuẹlo da beji ele rẹ wẹnna kaka rẹ rẹkpa mhan bhi agbotu. (2 Kọr. 12:15) Bhi ọsi ijiẹmhin, ọfẹotughe ọkpa natiọle Mark da yọle: “Ọkakale ọkpa nin mẹn kuẹlo da hi, nin eji mẹn ye rẹ ree bhi eji ene biẹ mẹn ne ki dọmanlẹn ye. Ele wo mhọn emianmhẹn nin ele ne daan. Arẹmiẹn obhio mẹn nin okhuo bi ọdọ ọle gbẹloghe ele, ọ yẹ wo ba mẹn bhi egbe ghe mẹn i ribhi eji ele ye beji mẹn ha da sabọ rẹkpa ele.” Aharẹmiẹn mhan lẹn ebi ene ibhio mhan nan kuẹlo da la mhan bha lẹn, ọkhẹke nin mhan wo ha nan erọnmhọn nin ele. (1 Tẹsẹ. 5:​12, 13) Ọ yẹ khẹke nin mhan ha nan erọnmhọn nin ikhuo ene ibhio mhan nan, ranmhude iyobọ nin ele re nin ọdọ ele hi ebe rẹkpa ele rẹ sabọ ha lu iwẹnna nọnsele.

10-11. Ahamiẹn mhan nan erọnmhọn nin ibhio mhan rebhe ne kuẹlo da ọkakale, ọ be ti Jehova bhọ? Gbotọle fanọan.

¹⁰ Beji mhan sẹ luẹ, ọkhẹke nin mhan ha bhii Jehova nin ọle rẹkpa ibhio mhan rebhe ne mhọn ọkakale nin ele ye. Bhi ọsi ijiẹmhin, aharẹmiẹn mhan i mhọn ọria soso bhi ọkhọle nin mhan ha sounun bhi elin ọlẹn bhi erọnmhọn, mhan dẹ sabọ bhii Jehova nin ọle rẹkpa ọrebhe ne ribhi ighan, la mhan bhii ọle nin ọle re ikoudure nin ẹbho nin ọria nin ele hoẹmhọnlẹn yu. Ọwanlẹn ọkpa natiọle Donald da yọle: “Mhan wo mhọn ibhio mhan nin ikpea bi ikhuo ne wo kuẹlo da ọkakale ne bunbun rẹ sẹbhọ ghe, mhan ha nan erọnmhọn ẹgheso, mhan ki bhii Jehova nin ọle rẹkpa ọrebhe aharẹmiẹn mhan bha lẹn elin nọnsele.”

¹¹ Erọnmhọn ne sẹriọ be ti Jehova bhọ? Ehe, ọ wo ti ọle bhọ! Bhi ọsi ẹmhọanta, mhan bha lẹn emhin kẹkẹ nin ibhio mhan guanọ. Bhiriọ, emhin nọn khẹke nọn nin mhan rẹ bhii Jehova nin ọle ne emhin nin ọrebhe guanọ nin ele. (Jọni 17:20; Ẹfẹ. 6:18) Mhan ha nan erọnmhọn ne sẹnian nin ibhio mhan, ọ rẹman ghe mhan “hoẹmhọn ibhio [mhan] rebhe nin [mhan] ko ga.”—1 Pita 2:17.

EBI ỌKHẸKE NIN MHAN LU SADE MHAN NAN ERỌNMHỌN JI ỌRIA

12. Ahamiẹn mhan gbẹlokotọ, be ọ ha rẹ rẹkpa mhan yẹ sade mhan nan erọnmhọn ji ibhio mhan?

¹² Ha gbẹlokotọ. Rẹ gbera nin mhan rẹ ha bhii Jehova nin ọle rẹkpa ọrebhe bhi ebi ele guanọ, ọ yẹ khẹke nin mhan ha sounun bhi elin ele bhi erọnmhọn. Ọria be ribhi agbotu nọnsẹ nọn ne emianmhẹn nọn manman kaka dan? Ọlasẹre be ribhọ nin egbe lọle ranmhude ekpokpo nin ọle kuẹlo da bhi isiku? Ọ be nọghọ aba la inẹn nin ọle ọkpa rẹ “ha dia [ọmọn nọnsọle] ọbhi uwedẹ nọnsi Jehova”? (Ẹfẹ. 6:4) Ahamiẹn mhan gbẹlokotọ beji mhan ha da sabọ lẹn ibhio mhan ne kuẹlo da ọkakale, ọ ki rẹkpa mhan rẹ manman dọ hoẹmhọn ele, yẹ ji ẹmhọn ele da rẹtẹ mhan. Bhiriọ ọ ki ha ghọn mhan rẹ ha nan erọnmhọn ji ele.b—Rom 12:15.

13. Be mhan ha rẹ sabọ nan erọnmhọn nin ẹbho yẹ nin mhan bha sẹ ka miẹn khẹ?

¹³ Ahamiẹn uwẹ nan erọnmhọn ji ẹbho, dọnmhegbe nin uwẹ rẹ sounun bhi elin nọnsele. Uwẹ dẹ yẹ sabọ lu iriọ ji ẹbho nin uwẹ bhọ bha sẹ ka miẹn khẹ. Bhi ọsi ijiẹmhin, ria ẹmhọn ibhio mhan ne ribhi ighan bhi agbaẹbho ọsi Crimea, Eritrea, Russia, bi Singapore. Uwẹ dẹ sabọ miẹn elin ọsi ene ibhio mhan nan bhi bhi jw.org.c Ọfẹotughe ọkpa natiọle Brian da yọle: “Mẹn dọ kere ghe mẹn ha gbẹn elin ọsi ibhio mhan nan munọ ọbhi ighan bhi otọ, yẹ tie ọle dagbare, ọ rẹkpa mẹn rẹ ye ele re, yẹ sounun bhi elin nọnsele sade mẹn nan erọnmhọn.”

14-15. Ahamiẹn mhan nan erọnmhọn ji ibhio mhan, be mhan ha rẹ sabọ lẹn ebi mhan ha taman Jehova bhi erọnmhọn yẹ?

¹⁴ Sounun bhi emhin nin uwẹ ho nin Jehova lu nin ọne ọria nin uwẹ nan erọnmhọn nan. Michael nin mhan ka tẹmhọnlẹn da yọle: “Mẹn ha tie okha ọsi ibhio mhan nan munọ ọbhi ighan, nan gbẹn ọbhi otọ bhi jw.org, mẹn ki wo ha ria ẹmhọn ebi mẹn ha rẹ lu yẹ sade imẹn ribhi idia nin ele ye nọn. Mẹn lẹnmhin ghe mẹn dẹ wo ha ria ẹmhọn okhuo mẹn, mẹn ki wo ha dọnmhegbe beji a ha da miẹn ghe ọle miẹn ebi ọle ha rẹ ha gbẹloghe egbe. Ọnan hi ebe rẹkpa mẹn rẹ sabọ lẹn ebi mẹn ha taman Jehova bhi erọnmhọn rẹji ibhio mhan nin ikpea nan munọ bhi ighan, ne mhọn ikhuo bhi uwa.”—Hib. 13:3.

¹⁵ Ahamiẹn mhan ria ẹmhọn ebi emhin ha sabọ ha dia ibhio mhan bhi egbe yẹ nan muno ọbhi ighan ẹghe rebhe, ọ ki rẹkpa mhan rẹ lẹn ebi mhan ha taman Jehova yẹ bhi erọnmhọn rẹji ele. Bhi ọsi ijiẹmhin, mhan dẹ sabọ bhii Jehova nin ọle lu ọle beji a ha da miẹn, ene gbẹloghe onighan ki ha mhọn ifuẹkẹ da ibhio mhan. Mhan dẹ yẹ sabọ bhii Jehova nin ene gbẹloghe re otọ nin ibhio mhan rẹ sabọ ha ga ọle. (1 Tim. 2:​1, 2) Sẹyẹ, mhan dẹ yẹ sabọ bhii Jehova nin ọle ji ijiẹmhin esili ọsi obhio mhan nan mun ọbhi ighan re ikoudure nin ibhio mhan ne ribhi agbotu nin ọle ye, la ghe nin ijiẹmhin esili nọnsọle re ẹbho ne i ga Jehova dọ ha luẹ ẹmhọn ọlẹn. (1 Pita 2:12) Mhan dẹ yẹ sabọ lu emhin nọn sẹriọ sade mhan nan erọnmhọn nin ibhio mhan ne kuẹlo da ọkakale kẹkẹ. Mhan dẹ sabọ rẹman ghe mhan “manman hoẹmhọn egbe” sade mhan gbẹlokotọ bhi egbe ibhio mhan, sounun bhi elin nọnsele, yẹ tẹmhọn ebi mhan ho nin Jehova lu nin ele bhi erọnmhọn.—1 Tẹsẹ. 3:12.

HA MHỌN IDEGBERE SADE UWẸ NAN ERỌNMHỌN

16. Be mhan ha rẹ sabọ rẹman yẹ ghe mhan mhọn idegbere sade mhan nan erọnmhọn? (Matiu 6:8)

¹⁶ Beji mhan sẹ luẹ, erọnmhọn nin mhan nan nin ibhio mhan dẹ sabọ rẹkpa ele bhi ọkakale nin ele ye. Ọkpakinọn, ọkhẹke nin mhan ha mhọn idegbere, yẹ mun udu nyan Jehova sade mhan rẹ nan erọnmhọn. Ahamiẹn mhan nan erọnmhọn, ọkhẹke nin mhan yere ghe Jehova bhọ ki ka lẹn ebi mhan ho nin mhan taman ọlẹn fo ọkuẹsẹ mhan tale dagbare. Bhiriọ, ọ bha khẹke nin mhan ha riale ghe mhan dẹ sabọ taman Jehova ebi ọle ha rẹ re ọne ẹmhọn khian yẹ. Jehova bhọ lẹn fo ebi eguọmhandia nesọle guanọ ọkuẹsẹ ele tobele bhọ lẹn, la ọkuẹsẹ mhan lẹn. (Tie Matiu 6:8.) Beji a miẹn Jehova lẹn fo, bezẹle nọn da khẹke nin mhan yẹ ha nan erọnmhọn ji ẹbho? Rẹ deba emhin kẹkẹ ne zẹle nan tẹmhọnlẹn bhi ọne uhọnmhọn-ọta nan, emhin nọn yẹ khẹke nin ẹbho ne hoẹmhọn egbe ele ha lu nọn. Oyẹẹ rẹ mhan nan erọnmhọn nin egbe. Ọ ti Jehova bhọ rẹ daghe ọle ghe, eguọmhandia nesọle re oyẹẹ man egbe beji ọle rẹ re oyẹẹ man ele.

17-18. Ijiẹmhin nela mhan ha rẹ sabọ tẹmhọn ebezẹle nọn da khẹke nin mhan ha nan erọnmhọn ji ibhio mhan?

¹⁷ Ahamiẹn mhan bhii Jehova nin ọle rẹkpa ibhio mhan, asabọmiẹn idia nin ele ye i da fidenọ. Ọkpakinọn, nin mhan rẹ nan erọnmhọn ji ele rẹman ghe mhan hoẹmhọn ele, sẹyẹ, ọ ti Jehova bhọ. Ji mhan re ijiẹmhin ọbhọ. Ria ẹmhọn aba nọn mhọn imọn eva, okpea bi okhuo. Ọne okpea nọn ribhọ da ha khọnmhọn. Ọne okhuo nọn ribhọ da bhii aba ọle yọle: “Huẹan rẹkpa obhio mẹn, egbe bha dan ọlẹn!” Bhi ọsi ẹmhọanta, aba ọle bhọ ka gbẹloghe ọne ọmọn fo. Ọle hoẹmhọn ọmọn nọnsọle, sẹyẹ, ọle wo gbẹloghe ọle nọnsẹn. Ọkpakinọn, nin ọle rẹ họn ghe ọmokhuo nọnsọle yọle nin ọle rẹkpa obhio ọle nin okpea, edandan i ribhọ ghe ọ dẹ wo re ọne aba ha ghọnghọn rẹ lẹn ghe ọmokhuo nọnsọle hoẹmhọn obhio ọle nin okpea.

¹⁸ Ọnan bhọ hi emhin nin Jehova yọle nin mhan ha lu, nin mhan ha ji ẹmhọn ibhio mhan da rẹtẹ mhan, mhan ha yẹ ha nan erọnmhọn ji egbe. Mhan ha lu iriọ, ọ ki rẹman ghe ẹmhọn ibhio mhan rẹtẹ mhan. Sẹyẹ, Jehova daghe ọne emhin nan nin mhan lu. (2 Tẹsẹ. 1:3; Hib. 6:10) Beji mhan dọ luẹ kere, erọnmhọn nin mhan nan nin ibhio mhan dẹ sabọ fi idia nọnsele denọ ẹgheso. Bhiriọ, bha ji mhan wo ha yere rẹ ha nan erọnmhọn nin egbe.