Muegbe Nin Uwẹ Rẹ Rẹkpa Ẹbho Ne Ho Nin Ele Lẹn Ẹmhọn Osẹnobulua

1. Be ọ dia ẹbho eso bhi egbe yẹ sade mhan dọ tẹmhọn Osẹnobulua man ele? (Iwẹn. 13:​47, 48; 16:​14, 15)

ẸBHO ne bunbun bhi ore nin ọhẹnhẹn wo miẹn ẹmhọanta ọbhi egbe bhi ẹghe ọhẹnhẹn nin ele rẹ lue ẹmhọanta. (Tie Iwẹnna 13:​47, 48; 16:​14, 15.) Iriọ yẹ nọn ẹlẹnan. Ahamiẹn ẹbho eso họn ẹmhọn Osẹnobulua bhi ọsi ọhẹnhẹn, ele ki wo ha ghọnghọn. Eso ne bhọ bha rẹ ka re ehọ ọbhi ẹmhọn Agbejele nin mhan wewe man ele, sabọ rẹ dọ miẹn ẹmhọanta ọbhi egbe sade akizẹbue. Be mhan ha lu yẹ sade mhan miẹn ẹbho ne muegbe nin ele rẹ luẹ ẹmhọanta?

2. Be iwẹnna itẹmhọn Osẹnobulua nin mhan lu rẹ diabe ọsi ọmugbo yẹ?

² Ji mhan fẹ ọne arẹkhọkhọ nan ghe. Mhan dẹ sabọ re iwẹnna itẹmhọn Osẹnobulua nin mhan lu rẹ khọkhọ iwẹnna nin ọmugbo lu. Ahamiẹn emhin eso nin ọmugbo kọle bhi ugbo bholo, ọle ki rọ ene bholo ne ribhọ sibhọre, yẹ ha gbẹloghe ene bha sẹ bho. Ọle i da wo fi ene bha sẹ bholọ ehọ a. Iriọ yẹ nọn. Ahamiẹn mhan miẹn ọria nọn muegbe nin ọle rẹ miẹn ẹmhọanta nin mhan taman ọlẹn ọbhi egbe, ọkhẹke nin mhan jẹje rẹkpa ọle rẹ kiẹn odibo nọnsi Kristi. Ọkpakinọn, rẹji ẹbho ne bha sẹ muegbe nin ele rẹ miẹn ẹmhọanta ọbhi egbe, ọ bha khẹke nin mhan fi ele ehọ a. Mhan dẹ wo ha rẹkpa ele rẹ daghe ebezẹle nọn da khẹke nin ele dọ luẹ ẹmhọn Osẹnobulua. (Jọni 4:​35, 36) Ẹwanlẹn mhan ha noo nọn ha rẹkpa mhan rẹ lẹn uwedẹ nọn khẹke nin mhan rẹ ne ẹbho ne ka mhan ehọ talọ. Bhi ọne uhọnmhọn-ọta nan, mhan dẹ zilo nyan emhin nin mhan ha lu rẹ sabọ rẹkpa ẹbho ne muegbe nin ele rẹ luẹ ẹmhọanta, sade mhan ne ele zilo bhi ọsi ọhẹnhẹn. Mhan dẹ yẹ zilo nyan ebi mhan ha rẹ sabọ rẹkpa ẹbho ne sẹ inian rẹ ha lu re alo yẹ.

EBI MHAN HA RẸ SABỌ RẸKPA ẸBHO NE MUEGBE NIN ELE RẸ LUẸ ẸMHỌANTA YẸ

3. Be mhan ha lu yẹ sade mhan miẹn ẹbho ne muegbe nin ele rẹ luẹ ẹmhọn Osẹnobulua? (1 Kọrint 9:26)

³ Ahamiẹn mhan miẹn ẹbho ne muegbe nin ele rẹ luẹ ẹmhọanta bhi agọ nin mhan da tẹmhọn Osẹnobulua, ọkhẹke nin mhan jẹje rẹkpa ele rẹ luẹ ẹmhọn Jehova, yẹ munhẹn ha sikẹ ọle. Bhi ẹghe ọhẹnhẹn nin mhan ha rẹ ne ele zilo, ọ bha khẹke nin mhan ria ẹghe a rẹ munhẹn ha man ele Baibo, yẹ tie ele vae bhi ikolo oga nesẹmhan.—Tie 1 Kọrint 9:26.

4. Gbe okha ọsi ọria nọn wo muegbe rẹ luẹ Baibo ẹjẹje.

⁴ Munhẹn ha man ọlẹn Baibo. Ẹbho eso nin mhan tẹmhọn Osẹnobulua man, manman wo muegbe nin ele rẹ munhẹn ha luẹ Baibo ẹjẹje. Bhi ọsi ijiẹmhin, bhi ẹdẹ Tọzde ọkpa, okhuo ọkpa bhi Canada da bu ibhio mhan bhi eji ele da re ebe wa, dọ re brokiọ natiọle Sọnyẹnmhẹn bhi Ighegheghe! bhi enin. Ọne obhio mhan nin okhuo da ji ọle lẹn ghe, mhan yẹ man ẹbho Baibo bhi ọsọhẹ. Ọne okhuo da muegbe nin ọle rẹ gene luẹ Baibo, yẹ re nọmba nọnsọle nin ọne obhio mhan. Akizẹbue, ọne okhuo da gbẹn ebe ji obhio mhan bhi foni yẹ nọọn ọlẹn ẹdẹ nin ele ha munhẹn ha luẹ Baibo. Beji obhio mhan ki taman ọlẹn ghe ọle dẹ vae bhi ẹdẹ uzana, ọne okhuo da nọọn ọlẹn yọle: “Uwẹ dẹ be sabọ vae akhọ? Mẹn i mhọn emhin soso nin mẹn lu bhi obọ.” Ele da gene ko luẹ Baibo kugbe bhi ẹdẹ Fraide. Ọne okhuo da yo ikolo oga bhi ọsi ọhẹnhẹn bhi ọne uzana nin, yẹ munhẹn ha lu re alo bhi uwedẹ oriọn.

5. Be mhan ha rẹ noo ẹwanlẹn yẹ sade mhan ho nin mhan munhẹn ha man ọria Baibo? (Yẹ fẹ ene ifoto ghe.)

⁵ Bhi ọsi ẹmhọanta, ọ i yi ọrebhe ne ka mhan ehọ bhi iwẹnna itẹmhọn Osẹnobulua ha wo muegbe nin ele rẹ jẹje munhẹn ha luẹ Baibo beji ọne okhuo nan lu. Asabọmiẹn ọ dẹ re ẹghe ọkuẹsẹ eso munhẹn ha luẹ Baibo. Ọkhẹke nin mhan re uhọnmhọn-ọta nọn yẹẹ ọne ọria rẹ ka munhẹn nanlẹn zilo. Ahamiẹn mhan rẹọbhọ ghe, ọne ọria dẹ miẹn ẹmhọanta ọbhi egbe bhi ẹghe nọn khẹke, yẹ wo ha ji ẹmhọn ọlẹn da rẹtẹ mhan, asabomiẹn ọle dẹ ka rẹ luẹ Baibo bhi ẹghe nọn bha ree gbe. Ahamiẹn mhan ho nin mhan munhẹn ha man ọlẹn Baibo, be bhọ mhan ha sabọ ta rẹ munhẹn? Bha ji mhan fẹ ebi ibhio mhan nin ikpea bi ikhuo eso ne wo guẹ rẹ munhẹn ha man ọria Baibo tale rẹji ọne ẹmhọn nan.

6. Be mhan ha sabọ taman ọria nọn ha rẹkpa ọle rẹ lẹn ghe, emhin nọn mhẹn nọn nin ọle rẹ luẹ Baibo?

⁶ Ene ibhio mhan nan da yọle ghe, ahamiẹn ọria ho nin ọle munhẹn ha man ọria Baibo bhi agbaẹbho eso, ọ bha khẹke nin ele ha noo ikpọta bii, “Mẹn ho nin mẹn munhẹn ha man uwẹ Baibo” la “mhan man ẹbho Baibo.” Ọkpakinọn, ele da yọle ghe ọta nọn mhẹn nẹ nin ọria ha sabọ ta hi, nan rẹ yọle ghe, “Ji mhan ko zilo bhi Baibo,” “mhan deba ẹbho luẹ Baibo,” la “ji mhan ko luẹ Baibo kugbe.” Ahamiẹn uwẹ ho nin ọne ọria kie ne uwẹ zilo ẹdẹ ọbhebhe, uwẹ sabọ rẹ taman ọlẹn yọle, “Emhin ọhan-ilo wo nọn ghe Baibo sabọ re ewanniẹn ọbhi inọnta kpataki ne kpokpo mhan bhi iẹnlẹn” la “Baibo i gheghe yi ebe nan noo bhi oga, ọ yẹ rẹkpa mhan rẹ lẹn emhin nọn khẹke rẹ lu bhi iẹnlẹn.” Uwẹ sabọ yẹ rẹ yọle: “Ọ i da gbe uwẹ ẹghe rẹ luẹ Baibo. Rẹ na bhi ihuẹnlo 10 rẹ sẹbhi ihuẹnlo 15 dẹ sẹ uwẹ rẹ luẹ emhin nọn ghanlẹn bhi Baibo.” Ọ bha khẹke nin mhan ha noo ọta bii, “ji mhan re ẹghe yi nin mhan rẹ ko dọ ha luẹ Baibo” la “mhan dọ ha man uwẹ Baibo uzana-uzana,” ranmhude, ọta ne sẹnian dẹ sabọ re ẹbho eso ha riale ghe, uwẹ ho nin uwẹ mun ele gba.

7. Ẹghela ẹghe ọhẹnhẹn nin ẹbho rẹ ka họn ẹmhọanta nọn ribhi Baibo? (1 Kọrint 14:​23-25)

⁷ Tie ọle vae bhi ikolo oga. Bhi ẹghe ọsi Pọl nin odibo, ọ diabe ghe ẹghe nin ẹbho eso rẹ yo ikolo oga bhi ọsi ọhẹnhẹn ele rẹ họn ẹmhọanta. (Tie 1 Kọrint 14:​23-25.) Iriọ sẹyẹ nọn ẹlẹnan. Ẹghe nin ẹbho eso rẹ vae bhi ikolo oga bhi ọsi ọhẹnhẹn, ẹghenin ele rẹ munhẹn ha lu re alo. Ẹghela ọ rẹ khẹke nin mhan tie ele vae bhi ikolo oga? Bhi iluẹmhin nọnzi 10 bhi ebe natiọle Sọnyẹnmhẹn bhi Ighegheghe!, a da tẹmhọn ebi mhan ha rẹ sabọ ha tie ẹbho vae bhi ikolo oga yẹ. Ọkpakinọn, ọ bha khẹke nin mhan mundia sẹbhi ẹghe nin mhan ha rẹ luẹ ọne ebe sẹbhi ọne iluẹmhin nin, ọkuẹsẹ mhan munhẹn ha tie ẹbho vae bhi ikolo oga. Bhi ẹghe ọhẹnhẹn nin bha ha rẹ zilo, tie ọne ọria vae bhi ikolo oga nan ha do bhi ọne uzana nin. Nin uwẹ rẹ sabọ lu ọnan, uwẹ sabọ rẹ tẹmhọn uhọnmhọn-ọta ọsi ogbakha nan ha rẹman bhi ọne uzana nin man ọlẹn, la ebe ọkhẹughe nan ha luẹ bhi ọne ikolo.

8. Emhin nela ọkhẹke nin mhan gbotọle fanọan man ọria nin mhan ho nin mhan tie vae bhi ikolo oga? (Isaiah 54:13)

⁸ Ahamiẹn uwẹ ho nin uwẹ tie ọria vae bhi ikolo oga, rẹkpa ọle rẹ lẹn ebi mhan rẹ do ikolo nesẹmhan yẹ. Bhi ẹghe ọkpa nin ọria nan man ọlẹn Baibo rẹ yo ikolo oga bhi ọsi ọhẹnhẹn, yẹ daghe ebi a rẹ ha lu iluẹmhin ọsi ebe Ọkhẹughe yẹ, ọle da nọọn obhio mhan nin okhuo nọn man ọle Baibo yọle: “Ọne ọria nọn lu iluẹmhin ọsi ebe ọkhẹughe be lẹn elin ọsi ọrebhe?” Ọne obhio mhan nin okhuo da ji ọle lẹn ghe, mhan dọnmhegbe rẹ lẹn elin ọsi ọrebhe bhi agbotu, beji mhan rẹ lẹn elin ọsi ọrebhe ne ribhi azagba-uwa nọnsẹmhan. Ọne ọria nan man ọlẹn Baibo ki da taman ọne obhio mhan yọle ghe, ọ i yi ọrebhe lẹn elin ọsi ọrebhe bhi otuẹ nin ọle yo. Ọkhẹke nin mhan ha gbotọ ebi mhan rẹ do ikolo oga nesẹmhan yẹ fanọan man ẹbho ne bha lẹn ebi mhan rẹ lu ọle yẹ. (Tie Isaiah 54:13.) Ebezẹle nin mhan da si koko do ikolo oga hi, nin mhan rẹ dọ ga Jehova yẹ luẹ emhin bhi obọ ọle, bi nin mhan rẹ ha re izebhudu nin egbe. (Hib. 2:12; 10:​24, 25) Ranmhude ọnan, mhan lu emhin rẹkhan emhanmhan bhi ikolo oga nesẹmhan. Ọ i yi ebi mhan kere agbọn lu mhan re obọ rẹkhan bhi ikolo oga nesẹmhan. (1 Kọr. 14:40) Uwedẹ nan rẹ bọn eji mhan da do ikolo oga nesẹmhan manman wo re ọle lẹkhẹ nin mhan rẹ luẹ emhin bhi enin. Beji a miẹn ghe mhan i deba bhi ẹmhọn ahinmhin-ibo, mhan i tẹmhọnlẹn, sẹyẹ, mhan i gbugan bhi ẹmhọn nọn rẹtẹ ele. Ọ dẹ yẹ wo ha mhẹn nin uwẹ rẹ re ividio natiọle Be Sunu bhi Kindọn Họọ? man ọne ọria nin uwẹ man ọlẹn Baibo, ọkuẹsẹ ọle vae bhi ikolo oga. Uwẹ ha lu iriọ, ọ ki rẹkpa ọle rẹ muegbe khẹ emhin nin ọle ha kere bhi ọne ikolo oga.

9-10. Ahamiẹn ghe uwẹ ho nin uwẹ tie ọria vae bhi ikolo oga, emhin nela uwẹ ha lu rẹ rẹkpa ọle rẹ lẹn ghe mhan i sua ẹbho ọbhọ rẹ kiẹn ọkpa bhi Esali Jehova, la re ewanniẹn ọbhi inọnta? (Yẹ fẹ ifoto ghe.)

⁹ Ebezẹle nin eso da siegbe re ikeke rẹ vae bhi ikolo oga nesẹmhan hi, ranmhude ele riale ghe mhan dẹ yọle nin ele dọ kiẹn ọkpa bhi Esali Jehova. Rẹkpa ọne ọria rẹ lẹn ghe, ọ ti mhan bhọ sade ẹbho dọ rẹnẹ tuẹ mhan. Sokpan, mhan i sua ele ọbhọ rẹ kiẹn ọkpa bhi Esali Jehova, la re ewanniẹn ọbhi inọnta bhi ikolo oga. Ọrebhe bhi azagba-uwa dẹ sabọ vae, rẹ dọ sibhi ibhokhan. Bhi ikolo oga nesẹmhan, ọrebhe dotua luẹ emhin kugbe. Mhan i ne ibhokhan diọbhi ijebhebhe dọ ha luẹ ele emhin, ọkpakinọn, ene biẹ imọn bi imọn nesele ko dotua luẹ emhin kugbe. Ọnan dẹ sabọ rẹkpa enebiọmọn rẹ sabọ re ẹlo ọbhi imọn nesele bhi egbe, yẹ lẹn ebi a man ele le. (Deut. 31:12) Mhan i miẹn ẹbho igho bhi ikolo oga nesẹmhan. Ọkpakinọn, mhan re obọ rẹkhan ebi Jesu tale bhi ẹghe nin ọle rẹ yọle: “Ọsọhẹ a rẹ re nin ibha, ọsọhẹ ibha ha yẹ rẹ ha re nin ẹbho.” (Mat. 10:8) Uwẹ sabọ yẹ rẹ taman ọne ọria nin uwẹ tie vae bhi ikolo oga nesẹmhan ghe, ọ i yi oko ghe ọle dẹ yọ ukpọn nọn manman ghan vae bhi ikolo oga. Ranmhude ọkhọle nọnsẹmhan Osẹnobulua daghe, ọ i yi ukpọn nin mhan ne yọ.—1 Sam. 16:7.

¹⁰ Ahamiẹn ọne ọria gene vae bhi ikolo oga, lu eka nin uwẹ ha sabọ lu rẹ rẹkpa ọle rẹ de ọkhọle re. Dọnmhegbe rẹ re ọle dọ tuẹ ene ewanlẹn, bi ibhio mhan nekẹle ne ribhi agbotu. Ọle ha lẹn sẹbhọ ghe ẹbho bhi ikolo oga wo miẹn ọlẹn ọbhi egbe, ọnan dẹ sabọ re ọle vae ẹdẹ ọbhebhe. Ahamiẹn ọle i mhọn Baibo nin ọle ha sabọ noo bhi ikolo oga, uwẹ sabọ rẹ ha re ọsẹ man ọlẹn, yẹ man ọlẹn ebe a rẹ re ọle rẹkhan ọria nọn re ọta man yẹ.

EBI UWẸ HA RẸ SABỌ RẸKPA ỌRIA NIN UWẸ MUNHẸN HA MAN ỌLẸN BAIBO YẸ

11. Be uwẹ ha rẹ rẹman yẹ ghe, uwẹ lẹnmhin ghe ene uwẹ man ọlẹn Baibo mhọn ẹsọn kẹkẹ nin ele miẹn bhi obọ?

¹¹ Emhin nela ọkhẹke nin mhan ha mhọn bhi ọkhọle sade mhan man ọria Baibo? Lu emhin bhi uwedẹ nọn ha rẹman ghe uwẹ lẹnmhin ghe, ọne ọria mhọn ẹsọn nin ọle miẹn bhi obọ. Bhi ọsi ijiẹmhin, ahamiẹn ghe uwẹ bi ọne ọria ko mhanmhan ẹghe nin bha ha rẹ ko dọ luẹ Baibo, dọnmhegbe rẹ vae bhi ọne ẹghe nin bha mhanmhanlẹn tee, aharẹmiẹn ghe ẹbho i lu emhin rẹkhan ẹghe bhi agbaẹbho nin uwẹ ye. Rẹ deba ọnin, ọ dẹ ha mhẹn sade bha re obhi ẹghe khere rẹ luẹ emhin bhi ẹghe ọhẹnhẹn nin bha ha rẹ munhẹn. Ibhio mhan eso ne manman guẹ rẹ man ọria Baibo yọle ghe, a ha re obhi ẹghe khere man ọria Baibo ọle mhẹn nẹ, aharẹmiẹn ghe ọne ọria bha sẹ ho nin ọle zobọ bhi ọne iluẹmhin. Sẹyẹ, ọ bha khẹke nin mhan manman ha talọ gbe. Ọkhẹke nin mhan re ẹghe nin ọne ọria nin mhan man ọlẹn Baibo rẹ ha ta ebe ri ọle bhi ọkhọle.—Prov. 10:19.

12. Be mhan ha rẹ sabọ rẹkpa ọria nin mhan man ọlẹn Baibo yẹ, rẹ na bhi ẹghe nin mhan ha rẹ munhẹn ha man ọle Baibo?

¹² Rẹ na bhi ẹghe nin uwẹ ha rẹ munhẹn ha man ọria Baibo, rẹkpa ọle rẹ lẹn Jehova bi Jesu Kristi, yẹ hoẹmhọn ele. Nin uwẹ rẹ sabọ lu ọnan, ọkhẹke nin uwẹ re Ọta nọnsi Osẹnobulua rẹ ha man ele emhin, ọ i yi ebi uwẹ mhọn bhi ọkhọle la ebi uwẹ lẹn. (Iwẹn. 10:​25, 26) Pọl nin odibo wo re ijiẹmhin esili ọbhi otọ bhi ọne idia nan. Bhi ẹghe nin ọle rẹ ha man ẹbho emhin, ọle da wo ha tẹmhọn Jesu Kristi nọn vae dọ rẹkpa mhan rẹ lẹn ẹmhọn Osẹnobulua, yẹ hoẹmhọn ọlẹn. (1 Kọr. 2:​1, 2) Pọl da yẹ ji mhan lẹn ghe, emhin nọn khẹke nọn, nin mhan rẹ ha rẹkpa ẹbho nin mhan man ele Baibo rẹ daghe ebezẹle nọn da khẹke nin ele ha mhọn ikpẹ esili kẹkẹ, nan ha sabọ rẹ khọkhọ igolu, isiliva, bi udo ne ghanlẹn. (1 Kọr. 3:​11-15) Urẹọbhọ, ẹwanlẹn, ilẹn-otọ-emhin, bi nan rẹ ha mun ofẹn Jehova deba ikpẹ nin Pọl yọle nin ẹbho nan manlẹn Baibo ha mhọnlẹn. (Ps. 19:​9, 10; Prov. 3:​13-15; 1 Pita 1:7) Ọkhẹke nin mhan re egbe khọkhọ Pọl nin odibo bhi uwedẹ nin ọle rẹ ha man emhin. Uwẹ dẹ sabọ lu ọnan sade uwẹ rẹkpa ọne uwẹ man ọlẹn Baibo rẹ ha mhọn urẹọbhọ nọn ziẹnlẹn da Jehova, beji Pọl lu. Uwẹ ha yẹ rẹkpa ọle rẹ deba Jehova nin Aba ọle nọn ribhi okhun ha mhọn ikolu nọn ziẹnlẹn.—2 Kọr. 1:24.

13. Be mhan ha rẹ sabọ noo ẹwanlẹn, yẹ re iziẹngbe man yẹ sade mhan man ọria Baibo? (2 Kọrint 10:​4, 5) (Yẹ fẹ ifoto ghe.)

¹³ Ha mhọn iziẹngbe da ẹbho nin uwẹ manlẹn Baibo, uwẹ ha yẹ re ẹwanlẹn ha man ele emhin beji Jesu lu. Hẹi ha nọọn ọlẹn inọnta nọn ha re ẹkhọle ha lo ọle. Ahamiẹn ijeso ribhọ nọn nọghọ ọle rẹ manman lẹn otọle nọnsẹn, zẹ enin obọ fo, ibha ha diọbhi ọbhebhe. A ha ki zẹ bue, bha ha fikiere dọ luẹ ọnọn nọghọ ọle rẹ lẹn otọle. Hẹi ha sua ọle ọbhọ rẹ miẹn ebi uwẹ man ọle le ọbhi egbe. Re ẹghe nanlẹn rẹ tobọle ria eria nyan ebi bha luẹ, yẹ miẹn ọlẹn ọbhi egbe. (Jọni 16:12; Kol. 2:​6, 7) Baibo ji mhan lẹn ghe, inian iman-emhin ohoghe diabe “emhin ne fi ika mun otọ” nọn khẹke nan vuno sibhi otọ re. (Tie 2 Kọrint 10:​4, 5;) Ọ i da wo lẹkhẹ nin ọria nin uwẹ man ọlẹn Baibo rẹ ne emhin nin ọle mọn da rẹọ i sibhi ọkhọle re. Bhiriọ, ọkhẹke nin mhan rẹkpa ọle rẹ deba Jehova ha mhọn ikolu nọn ziẹnlẹn. Mhan ha lu iriọ, ọ ki lẹkhẹ nanlẹn rẹ sabọ ne emhin nin ọle ka rẹọ i sibhi ọkhọle re.—Ps. 91:9.

EBI MHAN HA RẸ SABỌ RẸKPA ẸBHO NE LA VAE BHI IKOLO OGA NESẸMHAN YẸ

14. Be ọkhẹke nin mhan rẹ ha ne ẹbho ne la vae bhi ikolo oga nesẹmhan lu emhin yẹ?

¹⁴ Jehova guanọ nin mhan ha re oyẹẹ ne ọrebhe lu emhin bhi eji ọ hi ki rẹ khin nin ele na vae, aharẹmiẹn ele mhọn igho la ele i mhọnlẹn, la uwedẹ nin ele rẹ lu emhin dikẹ bhi ọsẹmhan. (Jem. 2:1-4, 9) Bhiriọ, be mhan ha rẹ sabọ ha re oyẹẹ man ẹbho ne la vae bhi ikolo oga nesẹmhan yẹ?

15-16. Be mhan ha rẹ rẹkpa eria ne la vae bhi ikolo oga yẹ beji egbe ha da fu ele re?

¹⁵ Asabọmiẹn ebezẹle nin ẹbho eso da vae bhi ikolo oga nesẹmhan hi, nin ele dọ lẹn ebi mhan rẹ lu emhin yẹ, la ranmhude ọria taman ele nin ele vae. Ahamiẹn uwẹ daghe ọle ghe ọria ọgbọn vae bhi ikolo oga nesẹmhan, dọnmhegbe rẹ dọ tuẹ ọle. Re eghọnghọn gbe obokhian nanlẹn. Sokpan, hẹi lu ọle gbe nin uwẹ hẹi dọ ha re ẹkhọle lu ọle. Uwẹ sabọ taman ọlẹn nin ọle dọ deba uwẹ dotua. Guanọ Baibo la ebe nin mhan rẹ do ikolo re nin ele, la uwẹ ha re ọsẹ man ele sade a munhẹn ha do ikolo oga. Rẹ deba ọnin, dọnmhegbe lu eka nin uwẹ ha sabọ lu rẹ re ọkhọle nọnsele de re. Okpea ọkpa nọn rẹnẹ sẹbhi Kindọn Họọ nọnsẹmhan bhi ẹghe ọhẹnhẹn da taman obhio mhan nọn dọ gbe obokhian nanlẹn yọle ghe, unan ukpọn nin ọle re yọ wo re ẹkhọle lo ọle. Ọne obhio mhan da ta ọta man ọlẹn nọn re egbe fu ọle re, yẹ ji ọle lẹn ghe eria bii ọle Esali Jehova khin. Akizẹbue, ọne okpea da mianmẹn yẹ dọ kiẹn ọkpa bhi Esali Jehova. Ọle bha yele a ghẹdẹ ebi ọne obhio mhan nin rẹ nanlẹn lu emhin yẹ bhi ẹghe ọhẹnhẹn nin ọle rẹ vae bhi ikolo oga. Ọkpakinọn, ahamiẹn ghe mhan gbe obokhian nin ẹbho ne la vae bhi ikolo oga, ọkhẹke nin mhan mhọn ẹwanlẹn beji a ha da miẹn ghe, mhan bha dọ ha nọọn ele inọnta nọn ha re ẹkhọle ha lo ele, la inọnta ne bha khẹke.—1 Pita 4:15.

¹⁶ Uwedẹ ebhebhe nin mhan ha rẹ rẹkpa ẹbho ne vae bhi ikolo oga nesẹmhan rẹ sabọ de ọkhọle re hi, sade mhan re ekpẹn nin ele talọ. Sẹyẹ, ọkhẹke nin mhan re ekpẹn ha talọ ji ẹbho ne i ga Jehova bhi ewanniẹn nin mhan re ọbhi inọnta bhi ikolo oga, la bhi obọle nọnsẹmhan nin mhan rẹman bhi ikolo oga. Ọ bha khẹke nin mhan ta ọta nọn ha dua ele oẹ, la nọn ha re ele ha riale ghe mhan ghunmhun ele. (Tai. 2:8; 3:2) Bhi ọsi ijiẹmhin, mhan i da ha ta ọta nọn bha gba rẹji ebi ele rẹọ i. (2 Kọr. 6:3) Bhi idia nọn sẹnian, ọkhẹke nin ibhio mhan nin ikpea ne re ọta man manman mhọn ẹwanlẹn. Ọkhẹke nin ele gbe otọ ọta nin ele rẹman fanọan bhi uwedẹ nọn ha lẹkhẹ nin eria ne la vae bhi ikolo oga rẹ lẹn otọle nọnsẹn. Ele ha lu iriọ, ọ ki rẹman ghe ẹmhọn ene ẹbho nan ne la vae bhi ikolo oga rẹtẹ ele.

17. Emhin nela ọkhẹke nin mhan lu sade mhan miẹn ọria nọn muegbe nin ọle rẹ luẹ Baibo?

¹⁷ Beji ẹdẹ rẹ ha gbera, iriọ ọ rẹ khẹke nin mhan manman ha re egbe ọbhi iwẹnna itẹmhọn Osẹnobulua nin mhan lu. Beji mhan rẹ lu ọle, iriọ mhan rẹ miẹn ẹbho ne muegbe rẹ “miẹn iẹnlẹn ọsi ighegheghe.” (Iwẹn. 13:48) Ahamiẹn mhan miẹn ẹbho ne sẹnian, ọkhẹke nin mhan jẹje munhẹn ha man ele Baibo, yẹ tie ele vae bhi ikolo oga. Mhan ha lu iriọ, mhan ki rẹkpa ele rẹ munhẹn ha ribhi ‘odẹ nọn khian iẹnlẹn.’—Mat. 7:14.