Ebe Ha Rẹkpa Uwẹ Rẹ Guẹ Ebi A Rẹ Man Ẹmhin Nọnsẹn Yẹ Bhi Inẹbho

1. Emhin nela ọkhẹke nin mhan guẹ? Bezẹle? (2 Timoti 4:2) (Yẹ fẹ ifoto ghe.)

JESU da taman ene rẹkhan ọlẹn yọle: “Ibha dọ re ẹbho kiẹn edibo . . . , ibha ha man ele emhin beji ele ha da re obọ rẹkhan uhi rebhe nin imẹn gbe nin ibha.” (Mat. 28:​19, 20) Ọnan rẹman ghe, ọkhẹke nin Kristiẹn rebhe ha yi ene man emhin. Bhi ọsi ẹmhọanta, Jehova hi ọnọn si ọrebhe ne muegbe rẹ miẹn iẹnlẹn ọsi ighegheghe kẹgbe, sẹyẹ, ene ẹhi dia mhan bu ẹbho ne sẹriọ. (Iwẹn. 13:48; Jọni 6:44; Arẹm. 14:6) Ọrẹyiriọ, ọkhẹke nin mhan luẹ ebi mhan ha rẹ ha man ẹbho ẹmhọn Jehova yẹ. Ria ẹmhọn ijiẹmhin nin Pọl bi Banabas re ọbhi otọ ghe. Baibo yọle ghe, ẹghe nin ele rẹ tẹmhọn Osẹnobulua bhi sinagọg nọn ribhi Aikoniọm, ele da wo tale bhi uwedẹ nin “usun ẹbho ne bunbun ne yi ibhokhan Ju bi ibhokhan Grik da mhọn urẹọbhọ da Osẹnobulua.” (Iwẹn. 14:1) Edandan i ribhọ ghe, Pọl bi Banabas wo guẹ ebi a rẹ man enhin nọnsẹn yẹ. (Tie 2 Timoti 4:2.) Bhiriọ, ọkhẹke nin Kristiẹn rebhe luẹ ebi a rẹ man emhin nọnsẹn yẹ.

2. Bezẹle nin ibhio mhan eso da riale ghe ele i da sabọ guẹ ebi a rẹ man emhin nọnsẹn yẹ?

² Ibhio mhan eso riale ghe ele i da sabọ guẹ ebi a rẹ man emhin nọnsẹn yẹ ranmhude nin ele bha manman yo isiku, la ele i guẹ rẹ gbotọ emhin fanọan man ọria nọnsẹn. Ẹbho eso ribhọ nin Baibo tẹmhọnlẹn ne yẹ re iriọ ha ria eria. (Ex. 4:10; Jer. 1:6) Emhin ọbhebhe nọn zẹle nin ibhio mhan eso da riale ghe ele guẹ rẹ man emhin hi, ele i miẹn ẹbho nin ele man ele Baibo beji ibhio mhan nekẹle rẹ miẹn, sẹyẹ, ele riale ghe ele i mhọn isẹlobhiemhin bhi inẹbho bii ibhio mhan nekẹle. Bhi ọsi ẹmhọanta, ọ i yi ọrebhe nin mhan miẹn bhi inẹbho ha ka mhan ehọ. Sẹyẹ, ọ i yi sade ọria ka mhan ehọ la ọle bha ka mhan ehọ ha rẹman si mhan guẹ rẹ man emhin nọnsẹn. Beji mhan ka tẹmhọnlẹn, Jehova bi ẹhi nesọle hi ene rẹkpa mhan rẹ sabọ miẹn ẹbho nin mhan ha tẹmhọn Osẹnobulua man. Ọrẹyiriọ, ọkhẹke nin mhan lu eka nin mhan ha sabọ lu rẹ man ẹbho ẹmhọanta nọnsẹn beji ọ ha da si ele bhi ọkhọle. Bhi ọne uhọnmhọn-ọta nan, mhan dẹ luẹ emhin ea ne ha rẹkpa mhan rẹ sabọ guẹ ebi a rẹ man emhin nọnsẹn yẹ sade mhan ribhi inẹbho.

JI ẸMHỌN ẸBHO NIN UWẸ NE TALỌ RẸTẸ UWẸ

3. Bezẹle nin ẹbho da ha ka Jesu ehọ bhi ẹghe nin ọle rẹ ha man ele emhin?

³ Baibo yọle ghe, Jesu “lẹn ebe ri eria bhi ọkhọle.” (Jọni 2:25) Ọne ọta nan rẹman ghe, Jesu wo lẹn ebi ẹbho rẹ ria eria yẹ bi ebi ele mhọn bhi ọkhọle. Ranmhude ghe Jesu wo gene lẹn ebi ẹbho guanọ tee, ọle da sabọ noo ene emhin nin rẹ ne ele zilo bhi uwedẹ nọn ha da re so ele bhi ọkhọle. Jesu lẹnmhin ghe, ẹbho nin ọle ha ne zilo wo ha guanọ urẹkpa bi ikoudure, sokpan, ene mun okalo bhi oga bha rẹkpa ele. Ele da wo ha re iẹnlẹn ha nọghọ ele. (Mat. 9:36; 23:4) Bhiriọ, Jesu ki da rẹkpa ene ẹbho. Ọle da man ele emhin ne bunbun bhi Ọta Ogbakha Nin Ọle Ta bhi Uke Oke nọn rẹkpa ele bhi iẹnlẹn. Ẹbho ne bunbun da wo ka Jesu ẹho, ranmhude emhin ne rẹtẹ ele bhi iẹnlẹn Jesu rẹ ha ne ele zilo.

4. Be mhan ha rẹ sabọ rẹman yẹ ghe ẹmhọn ẹbho rẹtẹ mhan? (Yẹ fẹ ene ifoto ghe.)

⁴ Ahamiẹn mhan dọnmhegbe rẹ lẹn idia ọsi ẹbho nin mhan miẹn bhi inẹbho, ọ ki rẹman ghe mhan ji ẹmhọn ele da rẹtẹ mhan. Ọkhẹke nin mhan lẹn sẹ bhọ ghe, ọde-ọde nin mhan ne talọ bhi inẹbho mhọn ọnọghọ kẹkẹ bhi iẹnlẹn nin ele kuẹlo da bhi agbọn Esu nan. Ahamiẹn mhan mhọn ọnan bhi ọkhọle, ọ ki rẹkpa mhan rẹ sabọ rẹkpa ẹbho nin mhan miẹn bhi inẹbho. Bhi ọsi ijiẹmhin, niuz be ribhọ nọn wo la dagbare nin ẹbho tẹmhọnlẹn bhi agọ nin mhan da tẹmhọn Osẹnobulua? Enebiọmọn be kpokpo-egbe ghe emhin ne i mhẹn dẹ sunu ji imọn nesele bhi isiku? Ọ be nọghọ ẹbho rẹ miẹn iwẹnna bhi agọ nin uwẹ da tẹmhọn Osẹnobulua? Dọnmhegbe ria ẹmhọn ebi iẹnlẹn ha sabọ diayẹ rẹji ẹbho ne ribhi ọne agbọn nan ne bha lẹn ẹmhọn ive kẹkẹ nin Baibo tẹmhọnlẹn.—2 Tim. 3:1; Isa. 65:​13, 14.

5. Be Jesu rẹ dikẹ yẹ bhi ẹwẹ ibhokhan Farisi? (Matiu 11:​28-30)

⁵ Ranmhude uwedẹ nin Jesu rẹ ha ne ẹbho nin ọle ne talọ lu emhin, ele da wo dọ lẹn sẹbhọ ghe ẹmhọn ele wo manman rẹtẹ Jesu. Jesu bha diabe ekhẹn Farisi ne wo ha ghe eria ne nẹga ele bii eria ne bha se emhin soso, yẹ re obọ oya mun ele! (Mat. 23:13; Jọni 7:49) Ifuẹkẹ bi ekpẹn Jesu rẹ wo ha ne ẹbho lu emhin. Ọle wo ha “mhọn idegbere bi ẹkẹ nọn fu.” Ọnan zẹle nin ọle da sabọ ha yi ọria nọn guẹ rẹ man emhin nọnsẹn. (Tie Matiu 11:​28-30.) Ọ yẹ khẹke nin mhan re ekpẹn bi ifuẹkẹ rẹ ha ne ẹbho nin mhan ne talọ lu emhin.

6. Be mhan ha rẹ sabọ re ekpẹn bi ifuẹkẹ rẹ ne ẹbho ne bha ka mhan ehọ lu emhin yẹ?

⁶ Ẹbho eso ribhọ nan miẹn ghe ele guanọ nin mhan tẹmhọn Osẹnobulua man ele. Sẹyẹ, eso ki wo ha khọẹkẹ mhan. Bhi idia nọn sẹnian, be ọkhẹke nin mhan rẹ ne ele lu emhin yẹ? Jesu yọle ghe nin mhan hẹi re ohu ne ele lu emhin. Ọle da yẹ yọle nin mhan “ha lu emhin esili da ene he [mhan],” “ha nan erọnmhọn nin ene ghunmhun [mhan],” sẹyẹ, nin mhan “yẹ ha bhii ji ene re unun ji [mhan].” (Luk 6:​27, 28) Ahamiẹn mhan mhọnlẹn bhi ọkhọle ghe, emhin zẹle nin ẹbho eso i da guanọ nin ele ka mhan ehọ bhi inẹbho, ọ ki rẹkpa mhan rẹ sabọ ha re ifuẹkẹ ne ele lu emhin beji Jesu tale. Ẹmhọanta nọn ghe, ẹbho eso guanọ nin mhan zobọ bhọ rẹ ha tẹmhọn Osẹnobulua. Ọrẹyiriọ, ọkakale nin ẹbho kuẹlo da bhi azagba-uwa nọnsele, la emhin nọn hi ki rẹ khin nọn re ele kpokpo-egbe, dẹ sabọ re ele miẹn ghe, ele bha guanọ nin ele ne mhan talọ sade mhan guanọ nin mhan ne ele zilo bhi inẹbho. Asabọmiẹn nin mhan rẹ bu ele re bhi ẹghe nin ele bha rẹ ha ghọnghọn zẹle nin ele bha da guanọ nin ele ka mhan ehọ. Ọnọn hi ki rẹ khin nọn sunu, ọkhẹke nin mhan re obọ rẹkhan ebi Baibo tale. Enin yọle ghe “bha re ekpẹn-ekpẹn ha talọ. Bha ji ọta nin bha ta diabe ebale nan re umhẹn ọi. Bha ha lu iriọ, bha ki sabọ re ewanniẹn nọn khẹke nin ọdeọde.” (Kol. 4:6) Ahamiẹn ghe mhan ji ẹmhọn ẹbho nin mhan ne zilo da rẹtẹ mhan, yẹ dọnmhegbe lẹn idia nin ele ye, ọ ki rẹkpa mhan beji a ha da miẹn ghe, mhan bha re ohu ne ele lu emhin aharẹmiẹn ele re ẹkẹ khọ mhan. Asabọmiẹn ọnan bhọ dẹ rẹkpa mhan rẹ man ele emhin nọn ha sabọ rẹkpa ele.

RE BAIBO RẸ HA MAN ELE EMHIN

7. Be Jesu rẹ rẹman yẹ ghe Ọta nọnsi Osẹnobulua ọle rẹ ha man ẹbho emhin? (Jọni 7:​14-16)

⁷ Ọ i yi ebi Jesu mhọn bhi ọkhọle ọle ha man ẹbho le. Ọta nọnsi Osẹnobulua ọle wo ha noo rẹ man ẹbho emhin. Ọle wo ha re Baibo man ẹbho emhin bhi uwedẹ nin ele ha rẹ sabọ lẹn otọ ebi ọle taman ele, yẹ ye ele re. Baibo ji mhan lẹn ghe Jesu wo ha “man ele emhin bii ọria nan re ahu nan, ọ iyi bọsi ene man uhi.” Ọnan “da wo han ene ẹbho ilo”. (Mak 1:22) Ẹbho eso ribhọ ne mun ọkalo bhi oga, nan yẹ manman hẹnmhọnlẹn bhi ẹghe ẹdẹlẹ. Ọta nin ẹbho ne sẹnian tale, ọle ẹbho ne man uhi ha man ẹbho le beji Jesu ribhi ọne otọ nan. Sokpan, Jesu bha lu iriọ. Baibo ọle noo rẹ man ẹbho ẹmhọn Osẹnobulua. Beji a miẹn ghe okhun Jesu da ka nyẹnlẹn, ọle ha rẹ sabọ noo isẹlobhemhin nọnsọle bhi okhun rẹ man ẹbho emhin beji ele ha da ha gẹn ọlẹn. Sokpan, ọle bha lu iriọ. Ọta nọnsi Osẹnobulua ọle wo ha noo rẹ man ẹbho ebi Jehova guanọ bhi obọ ele. (Tie Jọni 7:​14-16.) Ijiẹmhin nọn gbale Jesu wo re ọbhi otọ nin ene rẹkhan ọlẹn.

8. Be Pita rẹ re egbe khọkhọ Jesu yẹ beji ọle ha man ẹbho ẹmhọn Osẹnobulua?

⁸ Ọta nọnsi Osẹnobulua edibo nesi Jesu yẹ wo ha noo rẹ man ẹbho emhin. Bhi ọsi ijiẹmhin, bhi ẹghe nin Pita nin odibo rẹ ha ne ẹbho talọ bhi ukpe Pẹnticọst 33 C.E., Ọta nọnsi Osẹnobulua ọle noo rẹ nin ele zilo. Pita bha yo isiku ne khua. Ọrẹyiriọ, uwedẹ nin ọle rẹ gbotọ ọta akhasẹ kẹkẹ ne munsẹ bhi egbe Jesu fanọan, da wo manman rẹso ẹbho nin ọle ha ne talọ. (Iwẹn. 2:​14-37) Bhi ẹghe nin ọle ki rẹ ne ene ẹbho zilo fo, be ki sunu? “Ene re ọkhọle rebhe miẹn adia nọnsọle ọbhi egbe da mianmẹn. Bhi ọne ukpẹdẹ nin, ebe sẹbhi itue uli ea da deba ele.”— Iwẹn. 2:41.

9. Bezẹle nọn da khẹke nin mhan ha noo Baibo rẹ man ẹbho emhin?

⁹ Baibo ọkpa hi ebe ha sabọ rẹkpa ẹbho rẹ fi iẹnlẹn nọnsele denọ. (Hib. 4:12) Bhiriọ, ọkhẹke nin mhan ha noo Baibo rẹ man ẹbho emhin. Ọta nọnsi Osẹnobulua ọkhẹke nin mhan ha man ẹbho le, ọ i yi ebi mhan mhọn bhi ọkhọle. (2 Tim. 4:2) Proverbs 2:6 yọle: “Jehova tobọle re ẹwanlẹn nin ọria. Unun nọnsọle ilẹn-emhin bi ilẹn-otọ-emhin na vae.” Bhiriọ, ahamiẹn mhan noo Baibo rẹ ne ẹbho talọ, inian ọ diabe ghe mhan re otọ nin Jehova rẹ tobọle ne ele talọ. (Mal. 2:7) Mhan guanọ nin ẹbho lẹn ghe ibhude nin ele ha miẹn bhi Baibo, ọle mhẹn gbera ibhude nọn hi ki rẹ khin nin ọria ha sabọ re nin ele. Obọ Osẹnobulua emhin rebhe ne ribhi Baibo na vae. Ọ dẹ sabọ rẹkpa mhan rẹ ha ga Jehova nọnsẹn, yẹ ghọnghọn bhi iẹnlẹn.—2 Tim. 3:​16, 17.

10. Be mhan ha rẹ sabọ man ẹbho emhin yẹ beji ele ha da lẹn ghe Baibo ebi ele luẹ na vae?

¹⁰ Ahamiẹn uwẹ muegbe ebi uwẹ ha rẹ man ọria Baibo yẹ bhi otọ, dọnmhegbe yẹ muegbe eji uwẹ ha tie man ọlẹn bhi Baibo ọbhi otọ, beji ọ ha da sabọ rẹkpa ọle rẹ lẹn ghe, ebe ribhi Baibo uwẹ man ọle le. Aharẹmiẹn ghe mhan dẹ noo ifoto bi ividio rẹ man ẹbho emhin, ọkhẹke nin mhan man ele le bhi uwedẹ nọn ha rẹman ele ghe Baibo ebi mhan man ele le na vae. Bhiriọ, ahamiẹn uwẹ man ọria Baibo, ha tie ulọnlẹn nọn ha sabọ rẹkpa ọria nin uwẹ man ọle Baibo rẹ lẹn emhin kpataki nin uwẹ man ọle le nọnsẹn, uwẹ ha yẹ rẹkpa ọle rẹ ria eria nyan ọlẹn. Aharẹmiẹn ghe uwẹ dẹ noo ifoto bi ividio rẹ man ọria emhin, ji a miẹn ghe ọria nin uwẹ man ọle emhin lẹn ghe, Baibo hi emhin kpataki nin uwẹ ho nin uwẹ man ọlẹ le na vae. Nin uwẹ rẹ sabọ lu ọnan, ọ bha khẹke nin uwẹ ha talọ gbe, la ha tie eje bunbun bhi Baibo man ọlẹn. Ahamiẹn uwẹ tie eji ọkpa bhi Baibo man ọria nin uwẹ man ọlẹn Baibo, re ẹghe nanlẹn rẹ ria eria dinmhin nyan ọlẹn beji ọle ha da sabọ lẹn otọ ebi uwẹ ho nin uwẹ man ọle le. Asabọmiẹn uwẹ la ọria nin uwẹ man ọlẹn Baibo dẹ kie tie ọne ulọnlẹn bhi Baibo beji ọle ha da sabọ lẹn otọle nọnsẹn. Mhan ha lu iriọ, ọ i yi ebi ifoto, ebe, la ividio tale mhan da ha man ẹbho le, ebi Baibo tale mhan da ha man ele le.—1 Kọr. 2:13.

11-12. (a) Be mhan ha rẹ sabọ rẹman yẹ ghe mhan mhọn iziẹngbe beji mhan rẹ man ọria Baibo? (Iwẹnna 17:​1-4) (Yẹ fẹ ifoto ghe) (b) Emhin nela ẹbho eso bha lẹn rẹji Baibo? Be mhan ha rẹ sabọ rẹkpa ele yẹ?

¹¹ Ẹgheso, ọ dẹ sabọ nọghọ ọria nin mhan man ọle Baibo rẹ rẹọbhi ebi mhan man ọle le. Bhi idia nọn sẹnian, ọkhẹke nin mhan wo ha re iziẹngbe rẹ man ọle emhin. Ranmhude, ọ dẹ sabọ lẹkhẹ nin ẹbho eso rẹ lẹn otọ ebi ele luẹ, yẹ jẹjẹ miẹn ọlẹn ọbhi egbe, sokpan, rẹji ẹbho ebhebhe, ọ i da wo lẹkhẹ nin ele. Ọ dẹ re ele ẹghe ele kue sabọ lẹn otọ ebi a man ele le. Yere ghe, igba ne bunbun Pọl nin odibo tẹmhọn ẹmhọn Osẹnobulua man ibhokhan Ju ne ha ribhi Tẹsẹlonaika. Ọle da wo gbotọ ebe ribhi Baibo fanọan man ele. Akizẹbue, eso bhi ẹwẹ ele da dọ lẹn otọ ebi ọle ha tẹmhọnlẹn.—Tie Iwẹnna 17:​1-4.

¹² Uwedẹ ọbhebhe nin mhan ha rẹ sabọ rẹman ghe, mhan re iziẹngbe man ẹbho emhin hi, mhan ki nọọn ele inọnta, yẹ re otọ nin ele rẹ re ewanniẹn ọbhọ, beji ele ha da sabọ lẹn otọ ebi mhan ho nin mhan man ele le. Dọnmhegbe kaehọ ebi ele taman uwẹ nọnsẹn, beji uwẹ ha da sabọ lẹn ebi ele mhọn bhi ọkhọle. Uwẹ ha ki lu ọnin fo, guanọ eji uwẹ ha tie man ele bhi Baibo nọn ha rẹkpa ele rẹ sabọ lẹn ebi Jehova ghe ebi bha tẹmhọnlẹn yẹ. Lẹn sẹbhọ ghe, ẹbho eso bha sẹ ka miẹn Baibo khẹ, bhiriọ, ele bha lẹn ebe ribhi ẹkẹ ọle. Ahamiẹn ọria nọn sẹnian ọria nin uwẹ man ọlẹn Baibo khin, uwẹ dẹ be sabọ re Baibo nan printi dagbare man ọlẹn? Sẹyẹ, uwẹ dẹ be sabọ re obọle natiọle “Ebi Uwẹ Ha Miẹn Luẹ Bhi Baibo,” bhi eji a ka sẹ bhi Ebenọnkhiale Ọsi Agbọn Ọsọgbọn man ọlẹn, beji ọ ha da sabọ rẹkpa ọle rẹ lẹn ghe emhin kpataki kẹkẹ ribhi ẹkẹ Baibo nin ọle ha sabọ miẹn luẹ? Uwẹ dẹ sabọ tie eji ọkpa la eva man ọne uwẹ man ọlẹn Baibo bhi inọnta nọnzi 15 bhi eji a ka sẹ bhi Baibo, nin uwẹ rẹ rẹkpa ọle rẹ lẹn ghe Baibo dẹ sabọ rẹkpa ọle rẹ ha mhọn eghọnghọn bhi iẹnlẹn. Bhiriọ, ahamiẹn uwẹ rẹkpa ene uwẹ man ọlẹn Baibo rẹ daghe ọle ghe, emhin kpataki ebe ribhi Baibo khin, ọ dẹ sabọ rẹkpa ele rẹ ha lu rẹkhan ebi uwẹ man ele le.

RẸKPA ELE RẸ LẸN JEHOVA

13. Ẹmhọn ọria nela ọkhẹke nin mhan ha tẹmhọnlẹn sade mhan man ọria Baibo? Re ijiẹmhin ọbhọ.

¹³ Emhin nin mhan guanọ nin mhan lu hi, nin mhan rẹ rẹkpa ẹbho ne ka mhan ehọ rẹ lẹn Jehova, yẹ sikẹ ọle. (Jem. 4:8) Mhan dẹ sabọ re ọnan khọkhọ ukpa nin mhan re mhọn nin ọria nin ọle daghe bhi ọsasọn. Ahamiẹn mhan guanọ nin mhan bha ọne ukpa nin ọne ọria rẹ daghe bhi ọsasọn, mhan i da ha bha ọle bhi egbe nọnsẹmhan. Ebi mhan ho nin ọne ọria daghe, ọle mhan ha bha ọne ukpa ọi. Iriọ yẹ nọn, ahamiẹn mhan man ọria Baibo, ọ bha khẹke nin mhan wo ha tẹmhọn egbe mhan man ọlẹn. Ẹmhọn Jehova ọkhẹke nin mhan ha tẹmhọnlẹn nẹ.

14. Be mhan ha lu beji mhan ha da sabọ rẹkpa ẹbho nin mhan ele Baibo rẹ ha lu emhin ne ti Jehova bhọ?

¹⁴ Ahamiẹn uwẹ man ọria Baibo, rẹkpa ọne ọria rẹ hoẹmhọn Jehova, beji ọle ha da sabọ ha mhọn ọne ọhubhudu rẹ ha lu ebe ti Jehova bhọ. (Prov. 27:11) Ọ i yi ranmhude ghe mhan guanọ nin ẹbho nin mhan man ọlẹn Baibo fidenọ dọ kiẹn Esali Jehova ọkpa zẹle nin mhan da man ele Baibo. Ranmhude ghe mhan guanọ nin ele fidenọ dọ ha lu emhin nọn ha re Jehova ha ghọnghọn zẹle nin mhan da man ele Baibo. Bhi ọsi ijiẹmhin, ahamiẹn emhin ribhọ nọn nọghọ ọria nin uwẹ man ọle Baibo rẹ rẹban, nọọn ọle inọnta ne sẹnian: “Bezẹle nin Jehova bha da hoẹmhọn ene emhin nan nin uwẹ lu? Bezẹle nin Jehova ha da yọle nin uwẹ rẹban emhin nọn re uwẹ sọnyẹnmhẹn? Nin Jehova rẹ yọle nin uwẹ rẹban ọne emhin nan, be Jehova rẹ rẹman yẹ ghe ọle hoẹmhọn uwẹ?” Ahamiẹn uwẹ wo ha rẹkpa ọne uwẹ man ọlẹn Baibo rẹ ha ria ẹmhọn Jehova bi ikpẹ nọnsọle, ọ ki rẹkpa ọle rẹ manman daghe ọle ghe, Aba nọn hoẹmhọn mhan Jehova khin. Ọnan dẹ sabọ rẹkpa ọne uwẹ man ọlẹn Baibo rẹ ha nyẹnlẹn bhi uwedẹ nọn ha ti Jehova bhọ.

WO HA LU RE ALO BHI UWEDẸ NIN UWẸ RẸ MAN EMHIN

15. Be uwẹ ha lu beji uwẹ ha da sabọ ha lu re alo bhi uwedẹ nin uwẹ rẹ man emhin?

¹⁵ Ọkhẹke nin uwẹ bhii Jehova nin ọle rẹkpa uwẹ rẹ daghe eji ọkhẹke nin uwẹ da lu re alo bhi uwedẹ nin uwẹ rẹ man ẹbho emhin. (1 Jọni 5:14) Ahamiẹn uwẹ nan erọnmhọn fo, ọkhẹke nin uwẹ lu emhin nin Jehova ha sabọ nan erọnmhọn ọi. Ọnin hi, nin uwẹ rẹ gbehọkotọ bhi ikolo oga, sade Jehova man mhan uwedẹ nin mhan ha rẹ sabọ ha man ẹbho Baibo nọnsẹn. Uwẹ ha yẹ re obọ rẹkhan ebi a man uwẹ le. Uwẹ dẹ sabọ re obhio mhan nọn guẹ ebi a rẹ man ọria emhin nọnsẹn yẹ rẹkhan egbe, sade uwẹ khian dọ man ọria Baibo. Uwẹ ha ki man ọne ọria Baibo fo, uwẹ dẹ sabọ nọọn ọne obhio mhan nin ọle taman uwẹ eji ọkhẹke nin uwẹ da lu re alo. Yere ghe, uwẹ lẹn ebi uwẹ ho nin uwẹ man ọria le, sokpan, ọne uwẹ ho nin uwẹ man ọle emhin bha lẹn ọlẹn. Bhiriọ, dọnmhegbe ria eria nyan ebi emhin nin uwẹ ho nin uwẹ man ọria le ha sabọ dia ọle yẹ bhi egbe. Rẹkpa ọne uwẹ man ọlẹn Baibo rẹ daghe ọle ghe, ẹmhọanta ebi uwẹ man ọle le khin. Ọnan dẹ sabọ re ọle sikẹ Jehova, yẹ re ọle ha ghọnghọn bhi iẹnlẹn.—Ps. 1:​1-3.

16. Bezẹle nọn da khẹke nin mhan wo ha luẹ ebi a rẹ man ẹbho emhin nọnsẹn yẹ?

¹⁶ Emhin ọkpa nọn re mhan ghọnghọn nẹ bhi iẹnlẹn hi, sade mhan man ẹbho ẹmhọn Jehova. Bhi agbọn ọsọgbọn nọn vade, mhan dẹ ha man ẹbho ne bunbun ẹmhọn Jehova. Bhiriọ, ọkhẹke nin mhan wo ha luẹ ebi a rẹ man emhin nọnsẹn yẹ. Nin mhan rẹ sabọ lu iriọ, ọkhẹke nin mhan wo ha rẹman ẹbho ghe mhan hoẹmhọn ele. Nin mhan wo ha noo Ọta nọnsi Osẹnobulua rẹ man ẹbho emhin, yẹ rẹkpa ẹbho rẹ dọ lẹn Jehova.