“Nan Rẹ Ha Sikẹ Osẹnobulua” Mhẹn Mhan Bhi Egbe!

1-2. (a) Be mhan ha lu nin mhan da sabọ deba ọria ha lu ọmọẹ, yẹ manman ha sikẹ ọle? (b) Be mhan ha zilo nyan bhi ọne uhọnmhọn-ọta nan?

UWẸ be mhọn ọmọẹ nin uwẹ bi ọle ko manman sikẹ egbe? Be uwẹ lu nin bha veva ko rẹ sabọ ha lu ọmọẹ? Asabọmiẹn uwẹ da deba ọle ha gbẹghe, uwẹ da yẹ dọ lẹn ọkakale nin ọle kuẹlo da, sẹyẹ, uwẹ da yẹ manman dọ lẹn emhin ne yẹẹ ọle bi emhin ne i yẹẹ ọle. Sẹyẹ, uwẹ da dọ kere ghe ọle manman wo mhọn ikpẹ esili nin uwẹ ho nin uwẹ re egbe khọkhọ. Ọnan da wo dọ manman re uwẹ hoẹmhọn ọmọẹ ẹ.

² Nin uwẹ rẹ sabọ ha yi ọmọẹ ọria, yẹ manman sikẹ ọle, ọ dẹ manman re uwẹ ẹghe. Iriọ yẹ nọn sade mhan ho nin mhan deba Osẹnobulua nin Jehova ha mhọn ikolu nọn ziẹnlẹn. Bhi ọne uhọnmhọn-ọta nan, mhan dẹ zilo nyan ebi mhan ha rẹ sabọ sikẹ Osẹnobulua yẹ, bi elele nin mhan ha miẹn bhọ sade mhan lu iriọ. Bha ji mhan ka zilo nyan ebezẹle nọn da yi emhin nọn mhẹn nin mhan rẹ ha sikẹ Jehova nin Ọmọẹ mhan.

3. Bezẹle nọn da khẹke nin mhan ha ria eria nyan elele nin mhan ha miẹn bhọ sade mhan sikẹ Jehova? Re ijiẹmhin ọbhọ.

³ Edandan i ribhọ si emhin nọn mhẹn nọn nin mhan rẹ ha sikẹ Jehova. Ọkpakinọn, mhan ha ria eria nyan ebi ọ mhẹn sẹ yẹ, ọ dẹ sabọ re ọne ọhubhudu nin mhan rẹ manman ha sikẹ Jehova. (Ps. 63:​6-8) Bhi ọsi ijiẹmhin, mhan lẹnmhin ghe emhin nọn mhẹn nọn nin mhan rẹ ha le ebale esili, lu isasa-egbe, wẹ nọnsẹn, yẹ wọn amẹn nọn bunbun. Ọrẹyiriọ, ẹbho ne bunbun bhọ i manman ria ẹmhọn ene emhin nan, ele i gbẹloghe egbele. Ọkpakinọn, ahamiẹn mhan wo ha ria ẹmhọn elele nin mhan ha miẹn bhọ sade mhan wo ha lu ene emhin nan, ọ dẹ wo rẹkpa mhan rẹ ha lu ele ẹghe rebhe. Iriọ yẹ nọn, asabọmiẹn mhan lẹnmhin ghe mhan ha sikẹ Jehova, ọ mhẹn mhan bhi egbe. Ọkpakinọn, ahamiẹn mhan ria eria nyan elele nin mhan ha miẹn bhọ, ọ dẹ re ọne ọhubhudu nin mhan rẹ ha sikẹ Ọmọẹ mhan nin Jehova.—Ps. 119:​27-30.

4. Be ọria nọn gbẹn ebe ọsi Psalm 73:28 tayẹ?

⁴ Tie Psalm 73:28. Obhokhan Livai ọnọn gbẹn ebe ọsi psalm 73 ha khin. A zẹ ole ba ene so illo bhi uwa oga nọnsi Jehova. Asabọmiẹn ọle sẹ wo ga Jehova bhi ikpe ne bunbun. Ọrẹyiriọ, ọle yẹ lẹnmhin ghe ọkhẹke nin ọle ye egbe ọle bi ẹbho ebhebhe re ghe, emhin nọn mhẹn nọn nan rẹ ha sikẹ Jehova. Bezẹle nọn da yi emhin nọn mhẹn nin mhan rẹ manman dọ lẹn Jehova, yẹ ha ziẹn ikolu nin mhan bi ọle ko mhọnlẹn?

Ọ RẸ MHAN GHỌNGHỌN SADE MHAN “SIKẸ OSẸNOBULUA”

5. (a) Bezẹle nan rẹ manman ha sikẹ Jehova da si eghọnghọn ji mhan? (b) Be ẹwanlẹn nin Jehova re nin mhan ha rẹ sabọ rẹkpa mhan yẹ, yẹ gbega mhan? (Proverbs 2:​6-16)

⁵ Beji mhan ha rẹ manman ha sikẹ Jehova, iriọ mhan ha rẹ ha ghọnghọn. (Ps. 65:4) Emhin ne bunbun zẹle nọn da re mhan ghọnghọn. Bhi ọsi ijiẹmhin, ọ rẹ mhan wanlan sade mhan tie Baibo yẹ re obọ rẹkhan ebi mhan tie bhọ. Emhin nin Jehova man mhan le gbega mhan bhi emhin ne ha sabọ si ikuan-egbe ji mhan. Ọ yẹ rẹkpa mhan nin mhan hẹi dọ lu emhin ne bha gba. (Tie Proverbs 2:​6-16.) Ọnan bhọ zẹle nin Baibo da yọle: “Eghọnghọn hi ọsi ọria nọn mhọn ẹwanlẹn bi ọria nọn sabọ lẹn otọ emhin.”—Prov. 3:13.

6. Be re ọria nọn gbẹn ebe ọsi psalm nan miẹn ghe ọle bha yẹ ha ghọnghọn?

⁶ Bhi ọsi ẹmhọanta, ọ i yi ẹghe rebhe ẹbho ne ga Jehova rẹ ghọnghọn. Ẹghe nin ọria nọn gbẹn ebe ọsi Psalm 73 rẹ munhẹn ha ria eria nọn bha gba, ọle bha yẹ ha ghọnghọn. Ẹkẹ da wo ha khọ ọle ranmhude, ọle da ha riale ghe emhin wo mhẹn nin eria ne bha ji ẹmhọn Osẹnobulua da rẹtẹ ele, ne i re obọ rẹkhan uhi nesi Jehova. Ọle da ji emhin nin ene ẹbho nan mhọn ha sa ọle bhi ẹlo. Ọle da ha riale ghe eria ne khọn okhọn-okhọn, ne yẹ tengbemun wo mhọn emhin nin ele guanọ bhi iẹnlẹn. Sẹyẹ, ele i loya, egbe wo daan ele. (Ps. 73:​3-7, 12) Ọnọn gbẹn ebe ọsi psalm nan da wo ha kpokpo egbe rẹ sẹbhọ ghe, ọle da ha riale ghe elele i ribhọ nan rẹ ha ga Jehova. Ọle bha zẹwẹ ha ghọnghọn hiehie. Ọle bhọ da yọle: “Bhi ọsi ẹmhọanta, ihoho ọ khin nin mẹn rẹ kpe ọkhọle mẹn khia yẹ kpe obọ mẹn khia.”—Ps. 73:13.

7. Be mhan ha lu sade mhan i ghọnghọn? (Yẹ fẹ adudu nọn ribhi odalo ọle ghe.)

⁷ Ọnọn gbẹn ebe ọsi psalm nan bha ji ene emhin ne sunu ji ọle bhi iẹnlẹn gbe ọle ahu sotọ. Okpakinọn, ọle da lu emhin nin ọle rẹ fi iria-eria nọnsọle denọ. Ọle da “nabhi uwa oga nọnsi Osẹnobulua”. Bhi enin, Jehova da rẹkpa ọle rẹ fi iria-eria nọnsọle denọ. (Ps. 73:​17-19) Ahamiẹn emhin ribhọ nọn i re mhan ghọnghọn, Jehova nin Ọmọẹ mhan wo daghe ọle. Mhan ha bhii ọle nin ọle rẹkpa mhan, yẹ miẹn urẹkpa nọnsọle ọbhi egbe nin ọle re Ọta bi agbotu nọnsọle re nin mhan, mhan ki sabọ miẹn ahu rẹ ziẹngbe ọkakale nin mhan kuẹlo da. Aharẹmiẹn mhan manman kpokpo egbe, Jehova dẹ sabọ rẹkpa mhan rẹ de ọkhọle re.—Ps. 94:19.a

MHAN HA SIKẸ OSẸNOBULUA, MHAN KI HA MHỌN IẸNLẸN NỌN MHẸN NIAN, YẸ MHỌN IKHUAẸLOGHE

8. Ahamiẹn mhan sikẹ Osẹnobulua, uwedẹ ebhebhe nela ọ ha rẹ sabọ rẹkpa mhan?

⁸ Ahamien mhan sikẹ Osẹnobulua, ọ dẹ yẹ rẹkpa mhan bhi uwedẹ eva ebhebhe. Ọhẹnhẹn, ọ dẹ rẹkpa mhan rẹ ha nyẹn iẹnlẹn nọn mhẹn. Ọzeva, ọ ki rẹkpa mhan rẹ ha mhọn ikhuaẹloghe rẹji ẹghe odalo. (Jer. 29:11) Bha ji mhan manman zilo nyan ene uwedẹ eva nan.

9. Ahamiẹn mhan sikẹ Jehova, be ọ ha rẹ rẹkpa mhan yẹ?

⁹ Ahamiẹn mhan sikẹ Osẹnobulua, ọ rẹkpa mhan rẹ ha nyẹn iẹnlẹn nọn mhẹn. Ẹbho ne bunbun ẹlẹnan bha rẹọbhọ ghe Osẹnobulua ribhọ, ele bha lẹn ebezẹle nin mhan da ribhi agbọn. Sẹyẹ, ele rẹọbhọ ghe bhi ẹghe odalo, a i da yẹ ha miẹn ọria soso bhi ọne otọ nan. Ọkpakinọn, beji mhan dọ luẹ kere bhi Baibo, mhan rẹọbhọ ghe Osẹnobulua “ribhọ, sẹyẹ, ọle hi ọnọn re ihaosa nin ọrebhe ne gene ho ne ga ọle.” (Hib. 11:6) Ẹlẹnan nian, mhan wo mhọn eghọnghọn bhi iẹnlẹn, ranmhude mhan ga Jehova nin Aba mhan nọn ribhi okhun. Ọnin bhọ zẹle nan da man mhan.—Deut. 10:​12, 13.

10. Beji Psalm 37:29 rẹman, be ẹghe odalo ọsi eria ne mun udu nyan Jehova ha diayẹ?

¹⁰ Emhin nin ẹbho ne bunbun lu ẹlẹnan hi, nin ele rẹ ha yo iwẹnna, biẹ imọn, yẹ koko igho ya khẹ ẹghe odalo. Ele i mhọn ikhuaẹloghe rẹji ẹghe odalo, sẹyẹ, ele i ria ẹmhọn Osẹnobulua. Bhi obọ nọnkẹle, ẹbho nọnsi Jehova mun udu nyan ọlẹn. (Ps. 25:​3-5; 1 Tim. 6:17) Mhan manman wo mun udu nyan Osẹnobulua nin ọmọẹ mhan, mhan yẹ rẹọbhọ ghe ọle dẹ mun ive rebhe nin ọle ve nin mhan sẹ. Ọkpa bhi ene emhin kẹkẹ nin mhan da lu bhi ẹghe odalo hi, nin mhan rẹ ha ga Jehova khian bhi Otọ Ọfubhegbe.—Tie Psalm 37:29.

11. Ahamiẹn mhan sikẹ Osẹnobulua, be ọ dia mhan yẹ bhi egbe? Be ọ dia Jehova yẹ bhi egbe?

¹¹ Nin mhan rẹ ha sikẹ Osẹnobulua mhẹn mhan bhi egbe bhi uwedẹ ne bunbun ọbhebhe. Bhi ọsi ijiẹmhin, Jehova vele ghe ọle dẹ rẹhunmhan eria olukhọ ne fidenọ. (Isa. 1:18) Bhiriọ, ọ bha khẹke nin mhan ji ọkhọle ha gbe mhan asan ranmhude olukhọ nin mhan lu bhi ẹghe nọn gbera. (Ps. 32:​1-5) Mhan ha re Jehova ha ghọnghọn, imhan tobọmhan ki yẹ ha ghọnghọn. (Prov. 23:15) Bhi ọsi ẹmhọanta, elele ne bunbun ebhebhe yẹ wo ribhọ nin mhan ha sabọ miẹn sade mhan sikẹ Osẹnobulua. Bhiriọ, be mhan ha rẹ sabọ ha sikẹ Osẹnobulua yẹ?

EBI MHAN HA RẸ SABỌ “HA SIKẸ OSẸNOBULUA” YẸ

12. Emhin nela uwẹ lu nin uwẹ da manman sikẹ Osẹnobulua?

¹² Ahamiẹn uwẹ mianmẹn fo, ọnan rẹman ghe uwẹ wo ha sikẹ Jehova fo. Uwẹ wo dọ luẹ ẹmhọanta rẹji Osẹnobulua nin Jehova bi Jesu Kristi. Sẹyẹ, uwẹ fidenọ bhi olukhọ nọnsẹ. Rẹ deba ọnin, uwẹ yẹ wo mhọn urẹọbhọ nọn ziẹnlẹn da Osẹnobulua, yẹ dọnmhegbe rẹ lu eka nin uwẹ ha sabọ lu rẹ ha lu ebe ti ọle bhọ. Bhiriọ, ahamiẹn mhan ho nin mhan manman ha sikẹ Osẹnobulua, ọ bha khẹke nin mhan zobọ bhi ene emhin nan.—Kọl. 2:6.

13. Emhin ea nela mhan ha lu ne ha rẹkpa mhan rẹ ha sikẹ Jehova?

¹³ Be ha rẹkpa mhan rẹ sẹyẹ wo ha sikẹ Jehova? (1) Ọkhẹke nin mhan wo ha tie Baibo. Ahamiẹn mhan tie Baibo, ọ i yi nin mhan rẹ gheghe luẹ ẹmhọn Osẹnobulua ọkpa ọkhẹke nin mhan luẹ bhọ, ọ yẹ khẹke nin mhan dọnmhegbe luẹ ebi Osẹnobulua guanọ bhi obọ mhan. Mhan ha yẹ re obọ rẹkhan adia nesọle ne ribhi Baibo. (Ẹfẹ. 5:​15-17) (2) Ọkhẹke nin mhan ha ria eria nyan ene emhin nin Jehova lu nin mhan ne rẹman ghe ọle hoẹmhọn mhan. Mhan ha lu iriọ, ọnan ki rẹkpa mhan rẹ ha ziẹn urẹọbhọ nọnsẹmhan. (3) Ọkhẹke nin mhan wo ha he emhin nin Jehova hele, mhan ha yẹ dọnmhegbe rẹban eria ne wo ha lu ene emhin nin Jehova hele.—Ps. 1:1; 101:3.

14. Beji 1 Kọrint 10:31 rẹman, emhin eso nela mhan ha sabọ ha lu ukpẹdẹ-ukpẹdẹ ne ha ti Jehova bhọ? (Yẹ fẹ ene ifoto ghe.)

¹⁴ Tie 1 Kọrint 10:31. Emhin ẹwanlẹn nọn nin mhan rẹ ha khu ọbhi ene emhin ne ti Jehova bhọ. Nin mhan rẹ ha yo inẹbho bi ikolo oga ọkpa bha sẹ nin mhan rẹ sabọ lu ọnan. Ọkhẹke nin emhin nọn hi ki rẹ khin nin mhan lu bhi iẹnlẹn ha ti Jehova bhọ. Bhi ọsi ijiẹmhin, ahamiẹn mhan ta ẹmhọanta bhi emhin rebhe, yẹ ne emhin nin mhan mhọn rẹ lu ẹsele nin ẹbho, ọ ki re Jehova ha ghọnghọn. (2 Kọr. 8:21; 9:7) Jehova guanọ nin mhan ha rẹman ghe iẹnlẹn ghan bhi ẹlo nọnsẹmhan. Ahamiẹn mhan mhọn ẹwanlẹn bhi ebale nin mhan le, anyọn nin mhan da, yẹ gbẹloghe egbe mhan nọnsẹn, ọ ki rẹ mhan manman ha sikẹ Osẹnobulua nọn re iẹnlẹn nin mhan. Ahamiẹn mhan dọnmhegbe rẹ lu ebe ti Jehova bhọ bhi emhin rebhe nin mhan lu, ọ ki re ọle manman hoẹmhọn mhan.—Luk 16:10.

15. Be Jehova guanọ nin mhan rẹ ha ne ẹbho lu emhin yẹ?

¹⁵ Jehova mhọn ifuẹkẹ da eria ne khiale bi eria ne bha khia. (Mat. 5:45) Ọle yẹ guanọ nin mhan ha lu iriọ da eria rebhe. Bhi ọsi ijiẹmhin, mhan i “re unun ji ọria soso, [la] lu ẹmhọn”, mhan “re ẹkẹ nọn fu . . . ne ọrebhe lu emhin.” (Tai. 3:2) Bhiriọ, mhan i re ẹlo gbe eria a ranmhude ghe ele bha rẹọbhi ebi mhan rẹọ i. (2 Tim. 2:​23-25) Ahamiẹn mhan re ẹkẹ-ẹjẹjẹ ne ọrebhe lu emhin ẹghe rebhe, ọ ki rẹkpa mhan rẹ ha sikẹ Jehova.

MHAN DẸ YẸ SABỌ “SIKẸ OSẸNOBULUA” AHARẸMIẸN MHAN DOBỌ

16. Be emhin dia ọria nọn gbẹn ebe ọsi Psalm 73 yẹ bhi egbe?

¹⁶ A ha ki miẹn ranmhude idobọ nọnsẹ, uwẹ dọ ha riale ghe Jehova bha yẹ hoẹmhọn uwẹ ki? Beji mhan ka zilo ọle, emhin nọn sẹriọ ka sunu ji ọria nọn gbẹn ebe ọsi Psalm 73. Ọle da yọle: “Mẹn da rẹ de sibhi uwedẹ ẹmhọanta re; inian ọ diabe ghe mẹn rẹ ha de.” (Ps. 73:2) Ebi ọle ta rẹman ghe ọle bha ha ghọnghọn hiehie, sẹyẹ ọle bha ha ria eria nọnsẹn. Inian ọle diabe “elanmhẹn nọn imhọn ẹwanlẹn” bhi eji Jehova ye. (Ps. 73:​21, 22) Ọle be ranmhude idobọ nọnsọle ha riale ghe ọsọle wo fo, ghe Jehova bha yẹ hoẹmhọn ọlẹn?

17. (a) Ẹghe nin egbe rẹ lọ ọria nọn gbẹn ọne ebe ọsi psalm nan, be ọle lu yẹ? (b) Be mhan miẹn luẹ bhi okha nọnsọle? (Yẹ fẹ ene ifoto ghe.)

¹⁷ Aharẹmiẹn ọria nọn gbẹn ọne ebe ọsi psalm nan rẹ ha riale ghe Jehova fikekegbe ọle, asabọmiẹn ọle bha riale bue. Ọ diabe ghe, ẹghe nin emhin rẹ dia ọle bhi egbe bhi inian, ọle da dọ kere ghe ọkhẹke nin ọle sikẹ Osẹnobulua. Ọta nin ọle ta wo re ọnan man. Ọle da yọle: “Ejayenan nian, mẹn dẹ wo ha rẹkhan uwẹ [Jehova]. Uwẹ mun mẹn obera mhọnlẹn. Uwẹ dẹ re adia nọnsẹ rẹ ha gbega mẹn. Uwẹ ki sun mẹn sẹbhi eji mẹn ha da miẹn uyi.” (Ps. 73:​23, 24) Ahamiẹn egbe lọ mhan, la ọkhọle gbe mhan asan ranmhude idobọ nọnsẹmhan, ọ yẹ khẹke nin mhan bhii Jehova nin ọle rẹkpa mhan rẹ deziẹn. (Ps. 73:26; 94:18) Aharẹmiẹn mhan lu emhin ebe nọn manman kaka, mhan dẹ yẹ sabọ fikie bu Jehova re, yẹ ha mhọnlẹn bhi ọkhọle ghe ọle dẹ rẹhunmhan mhan. (Ps. 86:5) Ẹghe nọn hi ki rẹ khin nin emhin rẹ gbe mhan ahu sotọ, ọkhẹke nin mhan wo ha sikẹ Osẹnobulua.—Ps. 103:​13, 14.

MHAN DẸ WO “HA SIKẸ OSẸNOBULUA” KHIAN

18. Bezẹle nin mhan ha da sabọ yọle ghe ẹghe i da ha ribhọ nin mhan ha rẹ zobọ bhọ rẹ ha sikẹ Jehova?

¹⁸ Mhan dẹ wo ha luẹ ẹmhọn Jehova, yẹ ha sikẹ ọle rẹ sẹbhi ighegheghe. Ẹghe i ribhọ nin mhan ha rẹ zobọ bhọ. Baibo ji mhan lẹn ghe “mhan ida sabọ lẹn otọ” uwedẹ nesi Jehova, ẹwanlẹn nọnsọle, bi ilẹnmhin nọnsọle fo.—Rom 11:33.

19. Be Psalm 73 ji mhan lẹn rẹji ẹghe odalo?

¹⁹ Psalm 79:13 da yọle: “Imhan nin ẹbho nesẹ, nin ihuan nin uwẹ rẹ kọn, dẹ ha khuẹnmhẹn uwẹ rẹ sẹbhi ighegheghe; sẹyẹ, mhan dẹ ha wewe ẹmhọn ẹn rẹ nabhi ore rẹ sẹbhi ore.” Ahamiẹn uwẹ bha zobọ bhọ rẹ ha sikẹ Osẹnobulua, uwẹ dẹ sabọ ha mhọnlẹn bhi ọkhọle ghe ọle dẹ nan erọnmhọn nin uwẹ rẹ sẹbhi ighegheghe. Uwẹ ki yẹ sabọ yọle: “Osẹnobulua hi udo nọn mun mẹn udu ziẹn, sẹyẹ ọle hi uku nọnsẹmhẹn rẹ dọ sẹbhi ighegheghe.”—Ps. 73:26.