Ọ Manman Mhẹn Mhan Bhi Egbe Sade Mhan Sikẹ Ibhio Mhan!

1-2. Be bhọ emhin nọn manman lu uhọnmhọn-emhin rẹji Jehova? Be ọle guanọ nin mhan lu?

EBI mhan rẹ ne ẹbho lu emhin yẹ, manman wo lu uhọnmhọn-emhin rẹji Jehova. Jesu man mhan le ghe nin mhan hoẹmhọn ibo mhan beji mhan rẹ hoẹmhọn egbe mhan. (Mat. 22:​37-39) Ọnan rẹman ghe mhan dẹ ha mhọn ifuẹkẹ da eria ne bha rẹọbhi ebi mhan rẹọ i. Mhan ha lu iriọ, mhan re egbe khọkhọ Osẹnobulua nọnsẹmhan nọn “ji ovuẹn da zẹ nyan ene mhẹn bi ene imhẹn, yẹ ji amẹn da ha rọlọ nyan eria ne khiale bi eria ne bha khia.”—Mat. 5:45.

² Arẹmiẹn Jehova hoẹmhọn eria rebhe bhi ọne agbọn nan, eria ne lu emhin ne gbale ọle hoẹmhọnlẹn nẹ. (Jọni 14:21) Ọle guanọ nin mhan re egbe khọkhọ ọle. Bhiriọ, ọle taman mhan ghe nin mhan “manman hoẹmhọn” ibhio mhan. (1 Pita 4:8; Rom 12:10) A ha tẹmhọn ahoẹmhọn-egbe nọn sẹriọ, ahoẹmhọn-egbe nin mhan mhọn da azagba-uwa nọnsẹmhan, la imọẹ mhan ne manman sikẹ mhan kẹ nabhi ọkhọle nọnsẹmhan.

3. Be ọkhẹke nin mhan yere rẹji ẹmhọn ahoẹmhọn-egbe?

³ Beji ọ rẹ khẹke nin mhan ha gbe amẹn khakha ebi a kọ beji ọ ha da wanre nọnsẹn, iriọ ọ yẹ rẹ khẹke nin mhan ha wẹnna ọbhi ahoẹmhọn-egbe nin mhan mhọn da ẹbho beji ọ ha da ha ziẹn ọbhọ. Pọl nin odibo da taman ene Kristiẹn yọle: “Bha sẹyẹ wo hoẹmhọn egbe bọsi ibhio.” (Hib. 13:1) Jehova guanọ nin ahoẹmhọn-egbe nin mhan mhọn da eria ha ziẹn ọbhọ. Bhi ọne uhọnmhọn-ọta nan, mhan dẹ zilo nyan ebezẹle nọn da khẹke nin mhan manman ha sikẹ ibhio mhan nin mhan ko ga, bi ebi mhan ha rẹ wo sabọ ha lu iriọ yẹ.

EBEZẸLE NỌN DA KHẸKE NIN MHAN MANMAN HA SIKẸ IBHIO MHAN

4. Beji Psalm 133:1 rẹman, be mhan ha rẹ sabọ ha rẹman ghe okugbe nọn ribhi ẹwẹ mhan ti mhan bhọ? (Yẹ fẹ ene ifoto ghe.)

⁴ Tie Psalm 133:1. Mhan wo rẹọbhi ebi ọria nọn gbẹn ebe ọsi psalm nan tale, ghe mhan ha deba ẹbho ne hoẹmhọn Jehova ha lu ọmọẹ, ọ mhẹnmhin, ọ yẹ “niẹnniẹn.” Ahamiẹn ọria miẹn emhin ẹdẹdẹ, ọ i da yẹ ha ti ọle bhọ sade akizẹbue. Iriọ yẹ nọn, ahamiẹn mhan bha mhọn ẹwan, asabọmiẹn ghe mhan i da yẹ ji okugbe nọn ribhi ẹwẹ mhan ha ti mhan bhọ. Ẹghe rebhe mhan rẹ miẹn ibhio mhan. Asabọmiẹn bhi ẹkẹ uzana ọkpa mhan miẹn ele igba ne bunbun. Be mhan ha rẹ rẹman yẹ ghe, ẹmhọn ele sẹyẹ wo ti mhan bhọ? Oyẹẹ nin mhan mhọn da ibhio mhan dẹ wo ha tuẹn okhun sade mhan re ẹghe ọbhi otọ rẹ ria ẹmhọn ebi ele ghan sẹ yẹ rẹji mhan bi agbotu nọnsi Jehova.

5. Be ahoẹmhọn-egbe nin mhan mhọn da egbe ha rẹ rẹso ẹbho yẹ?

⁵ Oyẹẹ nin mhan rẹman egbe manman wo ti ẹbho eso bhọ ne vae bhi ikolo oga nọnsẹmhan bhi ẹghe ọhẹnhẹn. Ọne oyẹẹ nan re ele rẹọbhọ ghe ele miẹn oga ẹmhọanta. Jesu da yọle: “Ahamiẹn ibha mhọn oyẹẹ bhi ẹwẹ bha, ọrebhe dẹ lẹn ghe, edibo nesẹmhẹn bha khin.” (Jọni 13:35) Bha ji mhan fẹ ijiẹmhin ọsi Chaithra ghe, nọn yo yunivasiti, nọn deba Esali Jehova ha luẹ Baibo. A da tie ọle vae bhi usikoko nọn nẹ ọsi Esali Jehova. Beji ọle ki yo ọsi ukpẹdẹ ọhẹnhẹn fo bhi ọne usikoko nin, ọle da taman ọnọn man ọle Baibo yọle: “Ene biẹ mẹn bha sẹ mun mẹn dede khẹ, ọkpakinọn, bhi usikoko nọnsẹbha nan, igba 52 ẹbho mun mẹn dede bhi ukpẹdẹ ọkpa. Ọ da wo dia mẹn ghe Jehova ha noo ẹbho nesọle rẹ rẹman mẹn ghe ọle hoẹmhọn mẹn. Mẹn ho nin mẹn deba ọne azagba-uwa nọnsi Jehova nan.” Chaithra da lu re alo yẹ mianmẹn bhi ukpe 2024. Bhi ọsi ẹmhọanta, ahamiẹn ẹbho ne vae bhi ikolo nesẹmhan daghe iwẹnna esili nin mhan lu, rẹ dọ sẹbhi oyẹẹ nin mhan mhọn da egbe, ọ rẹso ele rẹ sẹbhọ ghe ele ki ha guanọ nin ele dọ ga Jehova.—Mat. 5:16.

6. Ahamiẹn mhan sikẹ ibhio mhan nin mhan ko ga, be ọ ha rẹ gbega mhan yẹ?

⁶ Ahamiẹn mhan sikẹ ibhio mhan nin mhan ko ga, ọ manman gbega mhan. Pọl da taman ibhio ọle nin ele ko ga yọle: “Bha wo ha re izebhudu nin egbe ukpẹdẹ-ukpẹdẹ, nan hẹi dọ miẹn ghe, olukhọ hiẹ bha yẹ re ọkhọle nọnsẹbha gbin.” (Hib. 3:13) Ahamiẹn emhin rẹ mhan kpokpo egbe rẹ sẹbhọ ghe mhan bha yẹ ha lu ebe gbale, Jehova ki noo obhio mhan nọn lẹn ebi mhan kuẹlo da rẹ rẹkpa mhan. (Ps. 73:​2, 17, 23) Urẹkpa nọn sẹ inian manman mhẹn mhan bhi egbe.

7. Be oyẹẹ bi okugbe rẹ diẹn kugbe yẹ? (Kolose 3:​13, 14)

⁷ Usun ne dọnmhegbe rẹ ha re oyẹẹ man egbe mhan ye, bhiriọ, mhan manman wo miẹn elele ne bunbun. (1 Jọni 4:11) Bhi ọsi ijiẹmhin, oyẹẹ nin mhan mhọn rẹkpa mhan rẹ “ha gbekua nin egbe,” ọ yẹ wo rẹkpa mhan rẹ manman ha mhọn okugbe. (Tie Kolose 3:​13, 14; Ẹfẹ. 4:​2-6) Ranmhude ọnan, mhan manman wo sọnyẹnmhẹn bhi eji mhan da do ikolo oga kẹkẹ. A i miẹn egbọle bhi ọne otọ agbọn nan rebhe.

BHA HA MUN EKPẸN NIN EGBE

8. Be Jehova rẹ rẹkpa mhan yẹ rẹ ha mhọn okugbe?

⁸ Jehova zẹle nin okugbe da sabọ ha ribhi ẹwẹ mhan. Arẹmiẹn ọ bha gba nin mhan fo, mhan sẹyẹ wo mhọn okugbe. (1 Kọr. 12:25) Baibo yọle ghe “Osẹnobulua ki ka man [mhan] le ghe ọkhẹke nin [mhan] hoẹmhọn egbe [mhan].” (1 Tẹsẹ. 4:9) Ebi a tẹmhọnlẹn hi, Jehova hi ọnọn re Ọta nọnsọle man mhan ebi ọkhẹke nin mhan ha lu, nin mhan ha da sabọ ha sikẹ egbe. Ahamiẹn mhan re ẹghe ọbhi otọ rẹ tie Baibo yẹ re obọ rẹkhan ebi mhan tie bhọ, iriọ mhan rẹ luẹ emhin bhi obọ Osẹnobulua. (Hib. 4:12; Jem. 1:25) Ọnan hi emhin nin Esali Jehova wo dọnmhegbe rẹ lu.

9. Be mhan miẹn luẹ bhi Rom 12:​9-13 rẹji nan rẹ ha mun ekpẹn nin egbe?

⁹ Be Ọta nọnsi Osẹnobulua rẹ rẹkpa mhan yẹ rẹ ha sikẹ egbe? Bha ji mhan fẹ ebi Pọl tale rẹji ọne ẹmhọn nan ghe nan gbẹn ọbhi Rom 12:​9-13. (Tie ọle.) Ọle da yọle, “Bha ha mun ọkalo bhi ekpẹn nan mun nin egbe.” Be a re ọnan ta? Ebi a re ọnan ta hi, nin mhan ka ha re oyẹẹ man ibhio mhan. Uwedẹ ne bunbun ribhọ nin mhan ha rẹ sabọ lu ọnan. Eso bhọ hi, nan rẹ ha rẹhunmhan, nan rẹ ha miẹn ẹbho ọbhi egbe, bi nan rẹ ha zẹ emhin bhi obọ. (Ẹfẹ. 4:32) Ọ bha khẹke nin mhan ha khẹ nin obhio mhan ka sikẹ mhan ọkuẹsẹ mhan sikẹ ọle. Ọkhẹke nin mhan mun ọkalo rẹ ha lu iriọ. Mhan ha lu iriọ, ebi Jesu tale ki munsẹ bhi egbe mhan. Ọle da yọle: “Ọria nọn lu ẹsele, ọle ha ghọnghọn gbera ọria nan lu ẹsele nan.”—Iwẹn. 20:35.

10. Be mhan ha rẹ sabọ ha wẹnna kaka yẹ bhi ekpẹn nan mun nin egbe? (Yẹ fẹ ifoto ghe.)

¹⁰ Bhi ọsi ẹmhọanta, beji Pọl taman mhan nin mhan ha mun ọkalo bhi ekpẹn nan mun nin egbe fo, ọle da yẹ taman mhan nin mhan “ha wẹnna kaka”, nin mhan “hẹi ha gbe obọ bhi egbe.” A ha mun ẹsọn nin ọria nọn wẹnna kaka, ọle manman wo lu ọle nọnsẹn. Proverbs 3:​27, 28 da taman mhan yọle: “Hẹi si egbe rẹ ha lu emhin esili nin ẹbho ne khẹke, sade ọ ribhi ahu nọnsẹ rẹ rẹkpa ele.” Bhiriọ, mhan ha daghe ọle ghe ọria guanọ urẹkpa, ẹjẹje mhan rẹ rẹkpa ọle sade mhan dẹ sabọ lu iriọ. Mhan i siegbe re ikeke rẹ rẹkpa ọne ọria, la ha riale ghe ọria ọbhebhe dẹ rẹkpa ọle.—1 Jọni 3:​17, 18.

11. Be ha sabọ rẹkpa mhan rẹ ha sikẹ ibhio mhan?

¹¹ Uwedẹ ọbhebhe nin mhan ha rẹ rẹman ghe mhan mun ekpẹn nin ibhio mhan hi, sade mhan re ẹjẹje rẹhunmhan ele ahamiẹn ele rahiẹ mhan. Ẹfẹsọs 4:26 da yọle: “Hẹi ji ẹkẹ khọ uwẹ sẹbhi ẹghe nin oẹnlẹn ha rẹ defia.” Bezẹle? Ulọnlẹn nọnzi 27 ji mhan lẹn ghe, ahamiẹn mhan yẹ ji ẹkẹ ha khọ mhan, mhan ki ha “re otọ nin Ojuu.” Bhi Baibo, Jehova da taman mhan igba ne bunbun nin mhan ha rẹhunmhan egbe. Kolose 3:13 da taman mhan ghe nin mhan “re ọkhọ rebhe ha rẹhunmhan egbe.” Ahamiẹn mhan rẹhunmhan idobọ ọsi ibhio mhan, ọnan hi uwedẹ ọkpa nọn ha rẹkpa mhan rẹ manman ha sikẹ ele. Ahamiẹn mhan rẹhunmhan ibhio mhan, mhan ki “ha mhọn ọfure bhi ẹwẹ [mhan]”, sẹyẹ, mhan ki sabọ “gbega okugbe nin ẹlinmhin nọn khiale rẹkpa [mhan] rẹ ha mhọnlẹn.” (Ẹfẹ. 4:3) Bhi ọsi ẹmhọanta, ahamiẹn mhan rẹhunmhan, ọ rẹ mhan mhọn okugbe bi ọfure bhi ẹkẹ agbotu.

12. Be Jehova rẹ rẹkpa mhan yẹ rẹ sabọ ha rẹhunmhan ẹbho?

¹² Ọkpakinọn, ọnọghọ mhan ẹgheso rẹ rẹhunmhan eria ne lu mhan emhin ebe. Ahu ẹlinmhin nọn khiale nọnsi Osẹnobulua dẹ sabọ rẹkpa mhan rẹ rẹhunmhan ele. Baibo ki taman mhan fo nin mhan “manman hoẹmhọn egbe [mhan] bọsi ibhio” bi nin mhan “ha wẹnna kaka,” ọ da yẹ yọle: “Ji ẹlinmhin nọn khiale ha re uwẹ sasa.” (Rom 12:11.) Bhiriọ, ẹlinmhin nọn khiale dẹ sabọ rẹkpa mhan rẹ ha re oyẹẹ man ẹbho, yẹ rẹhunmhan ele. Ọnan bhọ zẹle nin mhan da manman bhii Jehova nọn rẹkpa mhan.—Luk 11:13.

“BHA HẸI JI IWAEGBEA HA RIBHI ẸWẸ BHA”

13. Be ha sabọ si iwaegbea re bhi ẹwẹ mhan?

¹³ Unan ẹbho kẹkẹ ribhi agbotu nọnsi Jehova, sẹyẹ, uwedẹ kẹkẹ ele rẹ wanre. (1 Tim. 2:​3, 4) Ranmhude ọnan, uwedẹ kẹkẹ mhan rẹ zẹ emhin eso nin mhan lu. Emhin bii, ukpọn nin mhan yọ, ebi mhan rẹ gbẹloghe egbe, la ebi mhan rẹ re egbe re ahoho. Ahamiẹn mhan bha mhọn ẹwan, ene emhin nan dẹ sabọ si iwaegbea re bhi ẹwẹ mhan. (Rom 14:4; 1 Kọr. 1:10) Ranmhude “Osẹnobulua ki ka man [mhan] le ghe ọkhẹke nin [mhan] hoẹmhọn egbe [mhan],” mhan i rẹman ghe ebi mhan zẹ rẹ lu mhẹn nẹ ọsi ẹbho nekẹle.—Fil. 2:3.

14. Emhin nela ọkhẹke nin mhan dọnmhegbe rẹ ha lu ẹghe rebhe? Bezẹle?

¹⁴ Ahamiẹn mhan re ikoudure nin ibhio mhan yẹ bọn ele okhun ẹghe rebhe, ọ ki rẹkpa mhan beji a ha da miẹn iwaegbea bha ha ribhi ẹkẹ agbotu. (1 Tẹsẹ. 5:11) Bhi ẹgheso nọn gbera nian, ẹbho ne bunbun ne i yẹ sasa bhi oga, la eria nan ne sibhi agbotu re wo fikiere. Mhan gbe obokhian nin ele rebhe! (2 Kọr. 2:8) Bha ji mhan fẹ ebe sunu ji obhio mhan ọkpa ghe. Ọ sẹbhi ikpe igbe nin ọle sibhi oga re, bhi ejayenan nian, ọle ki fikie vae bhi Kindọn Họọ. Ọle da yọle: “Ẹbho da wo re eghọnghọn tuẹ mẹn yẹ su mẹn obọ.” (Iwẹn. 3:19) Be ene emhin nin ene ibhio mhan lu rẹ rẹso ọle yẹ? Ọle da yọle: “Ọ da wo dia mẹn bhi egbe ghe Jehova wo ha rẹkpa mẹn rẹ kie ha ghọnghọn.” Ahamiẹn eria ne sabọ re ikoudure nin ọria mhan khin, Kristi dẹ sabọ noo mhan rẹ re ikoudure nin “[ẹbho] rebhe nin egbe lọle, ne yẹ muno ihẹ ne khua.”—Mat. 11:​28, 29.

15. Uwedẹ ọbhebhe nela mhan ha rẹ sabọ tuẹn okugbe nọn ribhi ẹwẹ mhan okhun? (Yẹ fẹ ifoto ghe.)

¹⁵ Uwedẹ ọbhebhe nin mhan ha rẹ sabọ ha tuẹn okugbe nọn ribhi ẹwẹ mhan okhun hi, ọta nin mhan ta. Job 12:11 da yọle: “Ọ ibe yi ehọ dọnmhẹn ọta fẹghe Beji olanmhẹn rẹ dọnmhẹn ebale fẹghe?” Beji ọria nọn guẹ rẹ nyẹn ebale rẹ dọnmhẹn ebale nin ọle nyẹn fẹghe si ọne ebale mhẹn bhi unun ọkuẹsẹ ọle gha ọle nin ẹbho, iriọ ọ yẹ rẹ khẹke nin mhan ha ria eria nyan ebi mhan ho nin mhan ta ọkuẹsẹ mhan tale dagbare. (Ps. 141:3) Ebi mhan khu ọi hi, nin ọta nin mhan ta sibhi unun re ha yi ebe ha sabọ “rẹkpa ene kaehọ.”—Ẹfẹ. 4:29.

16. Hela ọ manman khẹke nin ele ji ọta nin ele ta ha ko ẹbho udu re?

¹⁶ Ọkhẹke nin ene ọdọ bi enebiọmọn manman dọnmhegbe rẹ ji ọta nin ele ta ha yi ọta nọn ha sabọ ko ọria udu re. (Kol. 3:​19, 21; Tai. 2:4) Ọ yẹ khẹke nin ene ewanlẹn re ọta nin ele ta rẹ ha ko ihuan nọnsi Jehova udu re. (Isa. 32:​1, 2; Gal. 6:1) Ebe ọsi proverb ji mhan lẹn ghe: “Ọ manman wo mhẹn sade ọria ta ọta bhi ẹghe nọn khẹke!”—Prov. 15:23.

BHA RE ẸKẸATA BI EMHIN NIN BHA LU RẸ HA RE OYẸẸ MAN

17. Be mhan ha rẹ rẹman yẹ ghe oyẹẹ ọsaje mhan mhọn da ibhio mhan?

¹⁷ Jọni nin odibo da re ọne ibhude nan nin mhan, ghe nin mhan “hẹi ji oyẹẹ nin mhan mhọn ha yi ọsi ukpunun. Sokpan, [nin] mhan re ẹkẹata bi emhin nin mhan lu rẹ ha re ọle man.” (1 Jọni 3:18) Ọkhẹke nin mhan ji oyẹẹ nin mhan mhọn da ibhio mhan ha yi oyẹẹ ọsaje. Be mhan ha rẹ sabọ lu ọnan yẹ? Beji mhan ha rẹ deba ibhio mhan ha gbẹghe kugbe, mhan ki manman ha sikẹ egbe, bhiriọ, oyẹẹ nin mhan mhọn da egbe ki manman ha ziẹn ọbhọ. Bhiriọ, ọkhẹke nin mhan dọnmhegbe noo isẹhoa nọn hi ki rẹ khin nin mhan mhọn rẹ deba ibhio mhan ha gbẹghe bhi ikolo oga bi inẹbho. Guanọ ẹghe rẹ ha rẹnẹ ji ibhio ẹ. Mhan ha lu iriọ, mhan ki rẹman ghe “Osẹnobulua ki ka man [mhan] le ghe ọkhẹke nin [mhan] hoẹmhọn egbe [mhan].” (1 Tẹsẹ. 4:9) Sẹyẹ, mhan ki dọ ha daghe “ebi ọ rẹ manman mhẹn yẹ, bi ebi ọ rẹ manman niẹnniẹn yẹ, nin ibhio rẹ ha nyẹnlẹn kugbe bhi ọfure!”—Ps. 133:1.