Hẹi Riia Ẹghe A Rẹ Mianmẹn

1. Emhin esili nela zẹle nọn da khẹke nin uwẹ mianmẹn?

UWẸ be hoẹmhọn Osẹnobulua nin Jehova nọn lu emhin esili rebhe nin uwẹ rẹ dọ sẹbhi iẹnlẹn nin uwẹ mhọnlẹn? Uwẹ be ho nin uwẹ rẹman ọlẹn ghe uwẹ hoẹmhọnlẹn? Uwedẹ nọn mhẹn nẹ nin uwẹ ha rẹ sabọ lu ọnan hi, nin uwẹ rẹ re egbe guẹ nanlẹn, yẹ mianmẹn. Ene emhin nan ha sabọ re uwẹ deba azagba-uwa nọnsi Jehova. Uwẹ ha lu ọnan, Jehova nin Aba ẹ bi Ọmọẹ ẹ dẹ gbega uwẹ, yẹ gbẹloghe uwẹ, ranmhude uwẹ ki kiẹn ọsọle. (Ps. 73:24; Isa. 43:​1, 2) Sẹyẹ, uwẹ ha re egbe guẹ nin Jehova yẹ mianmẹn, uwẹ ki ha mhọn ọne isẹhọa rẹ nyẹnlẹn bhi ighegheghe.—1 Pita 3:21.

2. Be mhan ha zilo nyan bhi ọne uhọnmhọn-ọta nan?

² Emhin be ribhọ nọn si uwẹ re ikeke rẹ mianmẹn? Ahamiẹn ọ ribhọ, lẹn sẹbhọ ghe ọ i yi uwẹ ọkpa ribhi ọne idia nan. Eria ne bunbun sẹ wo fi emhin denọ bhi iẹnlẹn nọnsele yẹ fi uwedẹ nin ele rẹ ria eria denọ, beji ele ha da sabọ sẹ eria ne ha sabọ mianmẹn. Ele wo ha re eghọnghọn bi ọyaya rẹ ga Jehova nian. Be uwẹ ha sabọ miẹn luẹ bhi ijiẹmhin ọsi eria ne mianmẹn bhi ore nin ọhẹnhẹn? Bha ji mhan zilo nyan ọnọghọ nin ele kuẹlo da, bi ebi mhan ha sabọ miẹn luẹ bhọ.

IBHOKHAN SAMERIA DA MIANMẸN

3. Be bhọ emhin eso nọn khẹke nin ibhokhan Sameria fidenọ beji ele ha da sabọ mianmẹn?

³ Bhi ẹghe nọnsi Jesu, ibhokhan Sameria ha mhọn oga nin ele ga. Ene bunbun bhi ẹwẹ ele da ha nyẹnlẹn bhi agbaẹbho ọsi Shikẹm bi Sameria ne ribhi obọ ọsi nọt bhi Judia bhi ọne ẹghenin. Ọkuẹsẹ ene ibhokhan Sameria sabọ mianmẹn, ọkhẹke nin ele miẹn Ọta rebhe nọnsi Osẹnobulua ọbhi egbe, yẹ manman lẹn otọle nọnsẹn. Ibhokhan Sameria da rẹọbhọ ghe ebe ọsi Genesis rẹ sẹbhi Deuteronomy ọkpa nabhi obọ Osẹnobulua vae, ele da yẹ rẹọbhọ ghe asabọmiẹn ebe ọsi Joshua yẹ deba. Ibhokhan Sameria yẹ rẹọbhọ ghe ọne Mezaya nan ve ive ọle dẹ vae ranmhude a gbẹn ọlẹn ọbhi Deuteronomy 18:​18, 19. (Jọni 4:25) Nin ele da sabọ mianmẹn, ọ da khẹke nin ele rẹọbhọ ghe Jesu hi ọne Mezaya. Iriọ “ibhokhan Sameria ne bunbun” wo lu. (Jọni 4:39) Asabọmiẹn eso bhi ẹwẹ ele wo manman dọnmhegbe rẹ khọn ọne ọkhọle nan rẹ zọn ọria nọn ha ribhi ẹwẹ ibhokhan Sameria bi ibhokhan Ju.—Luk 9:​52-54.

4. Beji Iwẹnna 8:​5, 6, 14 rẹman, be eso bhi ibhokhan Sameria rẹ lu emhin yẹ bhi ẹghe nin Filip rẹ ha tẹmhọn Osẹnobulua man ele?

⁴ Be rẹkpa ibhokhan Sameria rẹ sabọ mianmẹn? Ẹghe nin Filip ki rẹ tẹmhọn Kristi man ibhokhan Sameria fo, eso bhi ẹwẹ ele da “rẹọbhi ọta nọnsi Osẹnobulua.” (Tie Iwẹnna 8:​5, 6, 14.) Arẹmiẹn obhokhan Ju Filip ha khin, ele da yẹ wo ka ọle ehọ. Asabọmiẹn ele yẹ ye ulọnlẹn eso re bhi Baibo nọn rẹman ghe Osẹnobulua i zọn ọria. (Deut. 10:​17-19) Ele da wo gbehọkotọ bhi ebi Filip ha ta rẹji Kristi. Ele da yẹ wo rẹọbhọ ghe Osẹnobulua hi ọnọn je Filip ji ele. Filip da wo ha lu emhin ọhan-ilo ne bunbun. Ọle da re egbe daan ẹbho, yẹ khu ẹlinmhin-ebe sibhi ele egbe re.—Iwẹn. 8:7.

5. Emhin nela uwẹ miẹn luẹ bhi ijiẹmhin ọsi ibhokhan Sameria?

⁵ Ibhokhan Sameria ha rẹ sabọ yọle ghe ele i da ka Filip ehọ ranmhude obhokhan Ju ọle khin. La ranmhude a bha sẹ ka man ele emhin nin Filip ha man ele le khẹ. Sokpan, ele bha lu iriọ. Ibhokhan Sameria bha riia ẹghe a rẹ mianmẹn beji ele dọ kere ghe ẹmhọanta Filip ha man ele le. Baibo yọle: “Filip ki dọ tẹmhọn Agbejele nọnsi Osẹnobulua bi elin nọnsi Jesu Kristi man ele, ele da rẹọbhọ. Ele da yẹ mianmẹn, ene ikpea bi ene ikhuo.” (Iwẹn. 8:12) Uwẹ be rẹọbhọ ghe ẹmhọanta Ọta nọnsi Osẹnobulua khin? Uwẹ be rẹọbhọ ghe Esali Jehova i zọn ọria, sẹyẹ, ele re oyẹẹ man nin Jesu yọle nin Kristiẹn ọsaje ha rẹman? (Jọni 13:35) Bhiriọ, hẹi ha mun ofẹn rẹ mianmẹn, ha mhọnlẹn bhi ọkhọle ghe Jehova dẹ nan erọnmhọn nin uwẹ

6. Be ijiẹmhin ọsi Ruben ha rẹ sabọ rẹkpa uwẹ yẹ?

⁶ Azagba-uwa nin ọrebhe da ga Jehova Ruben nọn nyẹnlẹn bhi Germany nan wanre. Ọkpakinọn, beji ọle ribhi usẹn, ọle da ha mhọn edandan si Osẹnobulua gene ribhọ. Be ọle rẹ sabọ khọn ọne iria-eria nan yẹ? Beji ọle dọ kere ghe ọle bha manman lẹn otọ ọne ẹmhọn nọnsẹn, ọle da zẹ nin ọle rẹ dọ luẹ ẹmhọnlẹn. Ọle da yọle: “Bhi iluẹmhin Baibo nọnsẹmhẹn, mẹn da dọ guanọ ẹmhọanta nọn gene ribhọ. Igba ne bunbun mẹn luẹ uhọnmhọn-ọta nọn zilo nyan ọne iman-emhin ghe emhin rebhe tobele zegbere.” Ọle da tie ọne ebe nọn mhọn uhọnmhọn-ọta nọn yọle, Is There a Creator Who Cares About You? Ọne ebe da wo manman rẹkpa Ruben rẹ ziẹn urẹọbhọ nin ọle mhọn da Osẹnobulua. Ọle ki da taman egbọle yọle: ‘Gene-gene! Jehova ribhọ.’ Ẹghe nin Ruben rẹ rẹnẹ sẹbhi Bẹtẹ nọn ke okhun nẹ ọsi Esali Jehova, ọle da wo kie dọ manman hoẹmhọn ọkugbe nọn ribhi ẹwẹ Esali Jehova bhi ọne otọ agbọn nan rebhe. Ẹghe nin Ruben ki rẹ fikie diọbhi Germany, ọle da mianmẹn beji ọle ribhi ikpe 17. Ahamiẹn uwẹ mhọn edandan rẹji ebi uwẹ rẹọ i, dọ guanọ otọle nọnsẹn bhi ebe nesẹmhan. Ahamiẹn mhan manman lẹn otọ ebi mhan rẹọ i nọnsẹn, mhan i da ha mhọn edandan. (Ẹfẹ. 4:​13, 14) Beji uwẹ ha rẹ ha daghe oyẹẹ bi ọkugbe nọn ribhi ẹwẹ Esali Jehova bhi ọne otọ agbọn nan rebhe, rẹ dọ sẹbhi agbotu nin uwẹ ye, uwẹ ki wo dọ manman hoẹmhọn ibhio mhan rebhe.

SỌL NIN OBHI TASỌS DA MIANMẸN

7. Iria-eria nela ọkhẹke nin Sọl fidenọ?

⁷ Bha ji mhan fẹ ijiẹmhin ọsi Sọl nin obhi Tasọs ghe. Ọle wo lẹn uhi ọsi ibhokhan Ju nọnsẹn, sẹyẹ, a da yẹ wo manman ha hẹnmhọn ọlẹn bhi ẹwẹ ene ibhokhan Ju. (Gal. 1:​13, 14; Fil. 3:5) Bhi ọne ẹghenin, ibhokhan Ju ne bunbun wo rẹọbhọ ghe eria ne de sibhi oga re ekhẹn Kristiẹn khin. Ranmhude ọnan, Sọl da wo manman ha kpokpo ele. Ọle da rẹ ha riale ghe iho nọnsi Osẹnobulua ọle lu. (Iwẹn. 8:3; 9:​1, 2; 26:​9-11) Ọkhẹke nin Sọl ha mhọnlẹn bhi ọkhọle ghe ọle dẹ miẹn ekpokpo bhi egbe sade ọle mianmẹn dọ kiẹn Kristiẹn.

8. (a) Be rẹkpa Sọl rẹ sabọ mianmẹn? (b) Beji Iwẹnna 22:​12-16 rẹman, be Ananayas rẹ rẹkpa Sọl yẹ? (Yẹ fẹ ifoto ghe.)

⁸ Be rẹkpa Sọl rẹ sabọ mianmẹn? Ẹghe nin Jesu rẹ na bhi okhun nin Sọl talọ, ẹfua nọn nabhi okhun bha nyan ọlẹn da ru ọle ẹlo. (Iwẹn. 9:​3-9) Ọle da ha fi azinmhin rẹ na bhi ẹkẹ ikpẹdẹ ea. Edandan i ribhọ ghe ọle yẹ wo ria eria nyan ebe sunu ji ọle. Bhi ọsi ẹmhọanta, Sọl da dọ rẹọbhọ ghe Jesu hi ọne Mezaya, sẹyẹ, ghe eria ne rẹkhan ọlẹn, ele gene ga oga ẹmhọanta. Asabọmiẹn Sọl yẹ wo kiẹgbe nin ọle rẹ deba gbe Stivin a! (Iwẹn. 22:20) Beji ene ikpẹdẹ ea nin Sọl rẹ fi azinmhin ki gba, Ananayas nin odibo da bu ọle re, tan ọle ẹlo a, yẹ taman ọlẹn nin ọle hẹi riia ẹghe a rẹ mianmẹn. (Tie Iwẹnna 22:​12-16.) Sọl da degbere ka Ananayas ehọ, yẹ gene dọ mianmẹn.—Iwẹn. 9:​17, 18.

9. Emhin nela mhan ha sabọ miẹn luẹ bhi obọ Sọl?

⁹ Emhin ne bunbun ribhọ nin mhan ha sabọ miẹn luẹ bhi obọ Sọl. Ọle ha rẹ sabọ ji ẹhio, la ofẹn eria re ọle miẹn ghe ọle bha mianmẹn. Ọkpakinọn, ọle bha lu iriọ. Sọl da wo degbere, fi emhin denọ bhi iẹnlẹn nọnsọle beji ọle ha da sabọ ha rẹkhan Kristi. (Iwẹn. 26:​14, 19) Sọl da wo muegbe rẹ ha yi Kristiẹn arẹmiẹn ọle lẹnmhin ghe a dẹ kpokpo ọle. (Iwẹn. 9:​15, 16; 20:​22, 23) Ọle ki mianmẹn fo, ọle da wo ha mun udu nyan Jehova nọn rẹkpa ọle rẹ ziẹngbe ọkakale nọn hi ki rẹ khin. (2 Kọr. 4:​7-10) Uwẹ ha mianmẹn yẹ dọ kiẹn ọkpa bhi Esali Jehova, asabọmiẹn uwẹ dẹ yẹ kuẹlo da ọkakale, la emhin nọn ha dọnmhẹn urẹọbhọ nọnsẹ. Ọkpakinọn uwẹ dẹ miẹn urẹkpa. Ha mhọnlẹn bhi ọkhọle ghe Osẹnobulua bi Kristi dẹ rẹkpa uwẹ.—Fil. 4:13.

10. Be ijiẹmhin ọsi Anna ha rẹ sabọ rẹkpa uwẹ yẹ?

¹⁰ Obọ ọsi ist bhi Europe Anna da wanre. Ẹghe nin inẹn ọlẹn ki rẹ mianmẹn fo, Anna da munhẹn ha luẹ Baibo beji ọle ribhi ikpe 9. Aba ọle hi ọnọn re otọ nanlẹn rẹ ha luẹ Baibo. Bhi ọne ẹghe nan, uwa ọkpa Anna, ene biẹ Anna bi ẹgbẹ-uwa nọnsele da ko nyẹnlẹn. Beji ẹgbẹ-uwa nọnsi Anna ki họn ghe Anna munhẹn ha luẹ Baibo, ọ bha re ele ha ghọnghọn hiehie. Ele da ha ghe ọle bii emhin ẹkhọle nin ọria rẹ sibhi otuẹ nin azagba-uwa nọnsọle yo re diọbhi otuẹ ọbhebhe. Ẹghe nin Anna ki rẹ ha ribhi ikpe 12, ọle da bu aba ọle dọ taman ọlẹn nọn re otọ nanlẹn rẹ mianmẹn. Aba ọle da ha guanọ nin ọle lẹn si Anna tobọle zẹ nin ọle rẹ mianmẹn, la si ọria sua ọle ọbhọ rẹ lu iriọ. Ọle da wanniẹn aba ọle yọle, “Mẹn hoẹmhọn Jehova.” Bhiriọ, aba ọle da re otọ nanlẹn rẹ mianmẹn. Ẹghe nin ọle ki rẹ mianmẹn fo, ẹbho bhi ẹgbẹ-uwa nọnsọle da yẹ wo ha re obọ oya mun ọlẹn. Ọria ọkpa bhi ẹgbẹ-uwa nọnsọle da taman ọlẹn yọle: “Ahamiẹn uwẹ dọ ha nyẹn iẹnlẹn esankan yẹ ha sin isiga, ọle ha mhẹn nẹ nin uwẹ rẹ dọ kiẹn ọkpa bhi Esali Jehova.” Be rẹkpa Anna rẹ sabọ ziẹngbe ene ọkakale nan rebhe? Ọle da yọle: “Jehova da rẹkpa mẹn rẹ deziẹn, sẹyẹ, inẹn mẹn bi aba mẹn da yẹ wo manman rẹkpa mẹn.” Anna da gbẹn ẹghe kẹkẹ nin Jehova sẹ rẹ rẹkpa ọle ọbhi ebe. Ẹghe-ẹghe ọle rẹ dọ ha fẹ ọne ebe ghe beji a ha da miẹn ghe, ọle bha ye ene uwedẹ kẹkẹ a nin Jehova sẹ rẹ rẹkpa ọle. Ahamiẹn ofẹn mun uwẹ ghe a dẹ kpokpo uwẹ, yere ghe Jehova dẹ yẹ rẹkpa uwẹ.—Hib. 13:6.

KỌNILIỌS DA MIANMẸN

11. Be ha rẹ sabọ re Kọniliọs ha siegbe re ikeke rẹ mianmẹn?

¹¹ Mhan dẹ yẹ sabọ miẹn emhin kpataki luẹ bhi ijiẹmhin ọsi Kọniliọs. Ọle hi ọnọn ha yi ọwanlẹn ọsi eyokhọnlẹn ọsi Romu ne bun sẹbhi 100. (Iwẹn. 10:1) Ranmhude ọnan, asabọmiẹn a wo manman lẹn ọlẹn bhi idunmhun nin ọle ye, bi bhi ẹwẹ ene eyokhọnlẹn. Ọle wo “manman lu ẹsele nin ẹbho.” (Iwẹn. 10:2) Jehova da je Pita nin odibo nin ọle dọ wewe ọne ọta nọn mhẹn man ọlẹn. Ihe nin Kọniliọs ha ye be re ọle ha siegbe re ikeke rẹ mianmẹn?

12. Be rẹkpa Kọniliọs rẹ sabọ mianmẹn?

¹² Be rẹkpa Kọniliọs rẹ sabọ mianmẹn? Mhan tie ọle bhi Baibo ghe “ọne okpea nan bi azagba-uwa nọnsọle wo mun ofẹn Osẹnobulua.” Ọle wo ha nan erọnmhọn ji Osẹnobulua ẹghe-ẹghe. (Iwẹn. 10:2) Ẹghe nin Pita ki rẹ ta ọne ọta nọn mhẹn man Kọniliọs, ọle bi azagba-uwa nọnsọle da wo miẹn Kristi ọbhi egbe yẹ re ẹjẹje mianmẹn. (Iwẹn. 10:​47, 48) Kọniliọs wo muegbe rẹ fi emhin nọn hi ki rẹ khin denọ bhi iẹnlẹn, beji ọle bi azagba-uwa nọnsọle ha da sabọ ga Jehova.—Josh. 24:15; Iwẹn. 10:​24, 33.

13. Emhin nela uwẹ miẹn luẹ bhi obọ Kọniliọs?

¹³ Bọsi Sọl, Kọniliọs bha ji ihe nin ọle ye re ọle miẹn ghe ọle bha kiẹn Kristiẹn. Ọ be khẹke nin uwẹ fi emhin eso denọ bhi iẹnlẹn beji uwẹ ha da sabọ mianmẹn? Ahamiẹn iriọ nọn, Jehova dẹ rẹkpa uwẹ. Ọle dẹ wo nan erọnmhọn nin uwẹ sade uwẹ wo muegbe rẹ ha re obọ rẹkhan uhi nesọle ne ribhi Baibo beji uwẹ ha da sabọ ga ọle.

14. Be ijiẹmhin ọsi Tsuyoshi ha rẹ sabọ rẹkpa uwẹ yẹ?

¹⁴ Tsuyoshi nọn nyẹnlẹn bhi Japan, da fi emhin denọ bhi iwẹnna nin ọle ha lu beji ọle ha da sabọ sẹ ọria nọn ha mianmẹn. Ọle hi ọnọn zẹ sikẹ hẹdmasta nọn gbẹloghe isiku ọkpa nan manman lẹn, nan da man ẹbho ebi a rẹ mhanmhan aroro yẹ. Ọne hẹdmasta hi ọnọn mhanmhan aroro nin ẹbho noo sade ele re ọria nọn yu tọ. Ọle yẹ deba bhi iluemhin kẹkẹ ọsi Buddha. Ọkpakinọn, ahamiẹn ọle bha sabọ yo dọ lu ene emhin nan, Tsuyoshi nọn zẹ sikẹ ọle ki dọ rẹkpa ọle. Ọkpakinọn, ẹghe nin Tsuyoshi ki rẹ dọ luẹ ẹmhọanta rẹji ẹmhọn uu, ọle da dọ kere ghe ọle i da sabọ mianmẹn sade ọle sẹyẹ wo ha lu ene iluemhin nan kẹkẹ. Bhiriọ, ọle ki da muegbe rẹ rẹban ene iluemhin rebhe. (2 Kọr. 6:​15, 16) Tsuyoshi da deba ọne hẹdmasta zilo ọne ẹmhọn. Be ki nabhọre? Tsuyoshi da yẹ sabọ ha lu iwẹnna nọnsọle, ọkpakinọn, ọle bha yẹ ha deba bhi ene iluemhin. Ọ ki ribhi ukpe ọkpa nin ọle munhẹn ha luẹ Baibo, ọle da mianmẹn.a Ahamiẹn ghe uwẹ dẹ fi emhin eso denọ bhi iwẹnna nọnsẹ beji uwẹ ha da sabọ ha lu ebe ti Osẹnobulua bhọ, ha mhọnlẹn bhi ọkhọle ghe ọle dẹ ne ebi uwẹ bi azagba-uwa nọnsẹ guanọ nin uwẹ.—Ps. 127:2; Mat. 6:33.

IBHOKHAN KỌRINT DA MIANMẸN

15. Be ha rẹ sabọ re ọle nọghọ ibhokhan Kọrint rẹ mianmẹn?

¹⁵ Ibhokhan Kọrint bhi ẹghe ẹdẹlẹ wo ha khu ọbhi afe bi ua, yẹ nyẹn iẹnlẹn esankan. Ẹbho ne bunbun ne nyẹnlẹn bhi enin wo ha lu emhin ne i yẹẹ Osẹnobulua. Ranmhude uwedẹ nin ele rẹ ha lu emhin bhi enin ẹghenin, ọ dẹ wo re ọle nọghọ ẹbho rẹ ha ga Jehova. Ọrẹyiriọ, ẹghe nin Pọl nin odibo rẹ vae bhi ọne agbaẹbho nin ọle dọ tẹmhọn Kristi man ele, ene “ibhokhan Kọrint ne bunbun ne họn ọne ọta nọn mhẹn da rẹọbhọ yẹ mianmẹn.” (Iwẹn. 18:​7-11) Sẹyẹ, Jesu Kristi da zegbere man Pọl bhi imianlo yẹ taman ọlẹn yọle: “Mẹn sẹyẹ mhọn ẹbho ne bunbun bhi ọne agbaẹbho nan.” Bhiriọ, Pọl da sẹyẹ wo ha tẹmhọn Osẹnobulua bhi enin rẹ nabhi ukpe ọkpa bi ukhiọnmhẹn.

16. Be rẹkpa ibhokhan Kọrint eso rẹ sabọ khọn ọnọghọ nọnsele beji ele ha da sabọ mianmẹn? (2 Kọrint 10:​4, 5)

¹⁶ Be rẹkpa ibhokhan Kọrint rẹ sabọ mianmẹn? (Tie 2 Kọrint 10:​4, 5.) Ọta nọnsi Osẹnobulua bi ahu ẹlinmhin nọn khiale nọnsọle manman rẹkpa ele rẹ sabọ fi emhin denọ bhi iẹnlẹn. (Hib. 4:12) Ene ibhokhan Kọrint ne miẹn ọne ọta nọn mhẹn rẹji Kristi ọbhi egbe, da sabọ rẹban ene emhin kẹkẹ ne i mhẹn nin ele rẹ ha lu. Emhin bii, nan rẹ ha da anyọn gbe egbe, nan rẹ ha ra, nin okpea rẹ ha ne okpea nowẹ, la nin okhuo rẹ ha ne okhuo nowẹ.—1 Kọr. 6:​9-11.b

17. Be uwẹ miẹn luẹ bhi obọ ibhokhan Kọrint?

¹⁷ Arẹmiẹn eso bhi ibhokhan Kọrint manman dijiẹ bhi emhin ebe nin ele ha lu, ele bha ha riale ghe ele i da sabọ fidenọ dọ kiẹn Kristiẹn. Ele da manman wẹnna kaka beji ele ha da sabọ ha ribhi ọne odẹ nọn dia kekeke nọn ha re ele miẹn iẹnlẹn ọsi ighegheghe. (Mat. 7:​13, 14) Ọ be nọghọ uwẹ rẹ fi emhin nọn i mhẹn nin uwẹ lu denọ beji uwẹ ha da sabọ mianmẹn? Hẹi ji egbe lọ uwẹ rẹ ha dọnmhegbe rẹ fidenọ! Bhii Jehova nin ọle re ahu ẹlinmhin nọn khiale nọnsọle rẹkpa uwẹ, beji uwẹ ha da sabọ rẹban ọne ọkhọle nan rẹ lu emhin ebe.

18. Be ijiẹmhin ọsi Monika ha rẹ sabọ rẹkpa uwẹ yẹ?

¹⁸ Monika nọn nyẹnlẹn bhi Georgia wo manman wẹnna kaka rẹ rẹban ọta esankan nin ọle ha ta, bi ifimu ne i mhẹn nin ọle ha ghe beji ọle ha da sabọ sẹ ọria nọn ha mianmẹn. Ọle da yọle: “Ọkuẹsẹ mẹn mianmẹn, erọnmhọn nin mẹn ha nan ji Jehova hi ebe rẹkpa mẹn rẹ sabọ fidenọ. Jehova lẹnmhin ghe mẹn ho nin mẹn ha lu ebe gbale, bhiriọ, ọle da wo ha rẹkpa mẹn yẹ dia mẹn.” Monika ki ribhi ikpe 16, ọle da mianmẹn. Emhin ne i mhẹn be ribhọ nin uwẹ lu nọn khẹke nin uwẹ rẹban beji uwẹ ha da sabọ ha ga Jehova nọnsẹn? Ahamiẹn ọ ribhọ, wo ha bhii Jehova nọn rẹkpa uwẹ rẹ sabọ fidenọ. Jehova manman wo re ẹlinmhin nọn khiale nonsọle nin ọria.—Jọni 3:34.

URẸỌBHỌ DẸ RẸKPA UWẸ RẸ KHỌN ỌNỌGHỌ

19. Be ha rẹkpa uwẹ rẹ sabọ khọn ọnọghọ nọn hi ki rẹ khin nọn kaka bii udo? (Yẹ fẹ ifoto ghe.)

¹⁹ Ha mhọnlẹn bhi ọkhọle ghe Jehova hoẹmhọn uwẹ, sẹyẹ, ọle guanọ nin uwẹ deba azagba-uwa nọnsọle aharẹmiẹn uwẹ ribhi idia nọn si uwẹ re ikeke rẹ mianmẹn. Jesu da taman eso bhi edibo nesọle bhi ore nin ọhẹnhẹn yọle: “Ahamiẹn ibha mhọn urẹọbhọ nọn kpọnọ sẹ bii ikpẹ mọstad, ibha dẹ sabọ taman ọne oke nan, ‘Sibhi enan re, ha khian enin,’ ọ ki gene ha khian, a ida miẹn emhin nin ibha ida sabọ lu.” (Mat. 17:20) Ọ bha sẹ manman buegbe nin ene ẹbho nan nin Jesu ha ne talọ munhẹn ha rẹkhan ọlẹn. Bhiriọ, urẹọbhọ nọnsele bha sẹ manman deziẹn. Ọkpakinọn, Jesu da ji ele lẹn ghe, ele ha manman ha mhọn urẹọbhọ, Jehova dẹ rẹkpa ele rẹ sabọ khọn ọnọghọ nọn hi ki rẹ khin nọn kaka bii udo. Jehova dẹ yẹ sabọ rẹkpa uwẹ rẹ lu iriọ!

20. Be ijiẹmhin ọsi Kristiẹn bhi ẹghe ẹdẹlẹ bi bhi ẹghe nọnsẹmhan ẹlẹnan, nan tẹmhọnlẹn bhi ọne ọkhẹughe nan ha rẹ rẹkpa uwẹ yẹ?

²⁰ Ahamiẹn uwẹ dọ kere ghe emhin ribhọ nọn si uwẹ re ikeke rẹ mianmẹn, hẹi riia ẹghe a rẹ lu eka nin uwẹ ha sabọ lu rẹ khọnlẹn miotọ. Ji ijiẹmhin ọsi Kristiẹn bhi ẹghe ẹdẹlẹ, bi bhi ẹghe nọnsẹmhan ẹlẹnan re ikoudure bi ahu nin uwẹ. Ji ijiẹmhin nọnsele re ọne izebhudu nin uwẹ rẹ muegbe rẹ re egbe guẹ nin Jehova, yẹ mianmẹn. Ọnan hi emhin nọn mhẹn nẹ nin uwẹ ha sabọ zẹ rẹ lu!