Hẹi Ha Khu Ọsi Egbe Ẹ Ọkpa Beji Ẹbho Ne Bunbun Lu Ẹlẹnan

ẸBHO ne bunbun ẹlẹnan riale ghe emhin eso ribhọ nọn khẹke nin ele ọkpa ha mhọnlẹn, ele ho nan ha lu ele nọnsẹn gbera ẹbho nekẹle. Uwẹ sẹ ka miẹn ẹbho ne sẹnian khẹ? Aharẹmiẹn a lu ele nọnsẹn, ele ki yẹ ha riale ghe ọkhẹke nan manman ha lu ele nọnsẹn gbera emhin nan lu nin ele. Ebho ne ria eria bhi uwedẹ nọn sẹnian, ọsi egbe ele ọkpa ele khu ọi, ele i ji ebi ele mhọn khọn ele. Baibo yọle ghe, iriọ ẹbho da rẹ ha lu emhin bhi ẹghe ọkike ọsi ọne agbọn nan.—2 Tim. 3:2.

Bhi ọsi ẹmhọanta, ọ i yi ẹlẹnan a munhẹn ha miẹn ẹbho ne khu ọbhi ọsi egbe ele ọkpa. Bhi ọsi ijiẹmhin, Adam bi Ivi da ha guanọ nin ele tobele zẹ ebe mhẹn bi ebe i mhẹn nin egbe ele, ọnan da si iloya ji mhan rebhe. Ikpe ne bunbun ki gbera, Uzaya nin Ojie ọsi Juda da ha riale ghe ọkhẹke nin ọle dọ tuẹ emhin nọn vin-ohin bhi uwa oga nọnsi Jehova, sokpan, ọ i yi emhin nọn gbale nin ọle rẹ lu iriọ. (2 Chron. 26:​18, 19) Iriọ ọ yẹ ha khin rẹji ibhokhan Farisi bi Sadusi. Ele da ha riale ghe ọkhẹke nin Jehova ha lu ele nọnsẹn gbera ẹbho nekẹle ranmhude ghe imọn nesi Ebraham ele khin.—Mat. 3:9.

Ẹbho ne khu ọbhi ọsi egbe ele ọkpa, ne yẹ tẹngbemun wo nẹga mhan ẹlẹnan. Uwedẹ nin ele rẹ lu emhin dẹ sabọ rẹso mhan. (Gal. 5:26) Mhan sabọ rẹ dọ ha riale ghe ọkhẹke nan ha lu mhan nọnsẹn gbera ẹbho nekẹle, la emhin eso ribhọ nọn khẹke nin mhan ha mhọnlẹn. Be ha rẹkpa mhan rẹ sabọ rẹban iria-eria nọn sẹnian? Ọkhẹke nin mhan ka lẹn ebi Jehova ghe ọne ẹmhọn nan yẹ. Adia eva bhi Baibo dẹ rẹkpa mhan.

Jehova ọnọn khẹke nọn taman mhan ebe khẹke mhan. Fẹ emhin eso ghe nin ọle yọle ghe ọkhẹke mhan.

• Bhi azagba-uwa, Jehova guanọ nin okhuo ha mun ekpẹn nin ọdọ ọle, sẹyẹ, ọne ọdọ ki yẹ ha hoẹmhọn okhuo ọle. (Ẹfẹ. 5:33) Jehova guanọ nin okhuo bi ọdọ ko ha re oyẹẹ man egbe ele, nin ele hẹi re ẹlo ọbhi ọria ọbhebhe. (1 Kọr. 7:3) Sẹyẹ, ọkhẹke nin imọn ha hẹnmhọn nin ene biẹ ele, ọ yẹ khẹke nin enebiọmọn ha hoẹmhọn imọn nọnsele yẹ gbẹloghe ele.—2 Kọr. 12:14; Ẹfẹ. 6:2.

• Jehova guanọ nin mhan ha mun ekpẹn nin ene ewanlẹn ne wo ha wẹnna kaka bhi agbotu. (1 Tẹsẹ. 5:12) Ọrẹyiriọ, ene ewanlẹn i mhọn ọne ahu rẹ ha zẹ nin ibhio ele bhi agbotu ebi ele ha lu bi ebi ele i da lu.—1 Pita 5:​2, 3.

• Jehova re otọ nin ene gbẹloghe rẹ ha miẹn ẹbho nin ele gbẹloghe igho uhọnmhọn, ọle da yẹ yọle nin ẹbho ha mun ekpẹn nin ele.—Rom 13:​1, 6, 7.

Jehova re oyẹẹ ne emhin nin mhan gbera beji mhan rẹ guanọ ọlẹn. Ranmhude eria olukhọ mhan khin, ọ rẹ khẹke nin mhan yu. (Rom 6:23) Ọrẹyiriọ, Jehova wo nan erọnmhọn ne bunbun nin mhan ranmhude oyẹẹ nọn i beghe nin ọle mhọn da mhan. (Ps. 103:​10, 11) Ọ i yi ranmhude ghe erọnmhọn nin ọle nan nin mhan khẹke mhan zẹle nin ọle da nanlẹn nin mhan, oyẹẹ bi ẹkẹ-ẹjẹjẹ nin ọle mhọn da mhan zẹle.—Rom 12:​6-8; Ẹfẹ. 2:8.

BE HA RẸKPA MHAN NIN MHAN HẸI HA KHU ỌBHI ỌSI EGBE MHAN ỌKPA, LA HA RIALE IMHAN MHẸN NẸ ẸBHO NEKẸLE?

Hẹi ha ria eria bhi uwedẹ nin ẹbho bhi ọne agbọn nan rẹ ria eria. Ahamiẹn mhan bha mhọn ẹwan, mhan sabọ rẹ munhẹn ha riale ghe imhan ọkhẹke nan ha lu nọnsẹn gbera ẹbho nekẹle, mhan bhọ i da lẹn. Ọ mhọn ẹghe ọkpa nin Jesu rẹ gbokha nọn rẹman ghe, ọ kẹ wo lẹkhẹ nin ọria rẹ re inian ha ria eria. Bhi ọne okha, ọle da tẹmhọn ẹbho ne wẹnna bhi ugbo ọsi okpea ọkpa ne ka nan ha ele dinariọs ọkpa, beji ele ha da re uri-ẹdẹ rebhe wẹnna. Akizẹbue, ọnọn nyan ọne ugbo da guanọ ẹbho ebhebhe nin ele dọ deba bhi ọne iwẹnna. Ọsemuan ki re, ọle da ha ọrebhe igho ọkpa, rẹ dọ sẹbhi ẹbho ne wẹnna bhi uriagogo ọkpa sẹsẹ. Ẹbho ne ka mun ọne iwẹnna hẹn da ha riale ghe ebeanlẹn ele dẹ ha ele igho nọn kpọnọ nẹ, ranmhude ghe ele lu ọne iwẹnna nẹ. (Mat. 20:​1-16) Jesu da re ọne okha nan rẹ man edibo nesọle le ghe, nin ele ha ji ebi Jehova re nin ele khọn ele.

Ha gbe ekhuẹnmhẹn, hẹi re ẹlo ọbhọ ghe ẹbho dẹ ne emhin nin uwẹ guanọ nin uwẹ. (1 Tẹsẹ. 5:18) Re egbe khọkhọ Pọl nin odibo nọn bha ha nọọn emhin bhi obọ ibhio ọle bhi Kọrint, arẹmiẹn ọle mhọn ọne ahu rẹ lu iriọ. (1 Kọr. 9:​11-14) Ọkhẹke nin mhan ji emhin nan lu nin mhan ha ti mhan bhọ, mhan i da ha nọọn emhin bhi obọ ẹbho.

Ha mhọn idegbere. Ahamiẹn ọria ghe egbọle bii okpọria, ọle sabọ rẹ dọ ha riale ghe ọkhẹke nan ha lu ọle nọnsẹn gbera beji ọkhẹke. Ọkpakinọn, ahamiẹn mhan mhọn idegbere, ọ ki rẹkpa mhan rẹ rẹban iria-eria nọn sẹnian.

Daniẹl nin akhasẹ wo re ijiẹmhin esili ọbhi otọ rẹji nan rẹ ha mhọn idegbere. Azagba-uwa nan wo manman hẹnmhọnlẹn ọle na vae, ọle wo manman mhọn-ose, sẹyẹ, ọle wo lẹn ebe. Rẹ deba ọnin, ọle wo manman guẹ iwẹnna ne bunbun. Ene emhin nan rebhe ha rẹ sabọ re ọle ha riale ghe, uwedẹ kẹkẹ nan rẹ lu ọle nọnsẹn bi isẹhoa kẹkẹ nin ọle miẹn wo khẹke ọle. (Dan. 1:​3, 4, 19, 20) Ọkpakinọn, Daniẹl bha lu iriọ, ọle wo ha mhọn idegbere. Ọne ikpẹ esili nan nin ọle ha mhọnlẹn da re ọle ghan bhi ẹlo nọnsi Jehova.—Dan. 2:30; 10:​11, 12.

Ọkhẹke nin mhan rẹban ọne ọkhọle nan rẹ khu ọbhi ọsi egbe ọria ọkpa nọn wo vuọn ọne agbọn nan ẹlẹnan. Ọkpakinọn, bha ji mhan wo ha ji emhin nọn hi ki rẹ khin nin Jehova re ẹkẹ-ẹjẹjẹ lu nin mhan ha ti mhan bhọ.