33 JEHOADA
Ọle Da Gbega Ojie Nin Jehova Zẹ
OKPIA nọn ki dọmanlẹn Jehoada ha khin; ọrẹyiriọ, ọle sẹyẹ wo mhọn ahu. Ọle da wo ha miẹnsọn ne bunbun bhi oga nọnsi Jehova, yẹ mhọn ọhubhudu rẹ ha lu ebe gbale. Jehoada hi ojohẹn bhi uwa oga nọnsi Osẹnobulua nọn ha ribhi Jerusalẹm. Bhiriọ, ẹsọn nọnsọle nọn, nin ọle rẹ rẹkpa ene ẹbho rẹ ha ga Jehova bhi uwedẹ nọn gbale. Ọkpakinọn, ọ bha lẹkhẹ nanlẹn, ranmhude, ẹbho ne bunbun wo ha ga ẹbọ yẹ lu emhin ebe.
Okhuo ọkpa natiọle Atalaya re ẹbho ne bunbun ha lu emhin ebe ẹghenin. Ọria ebe ọne okhuo nan khin. Ehab nin Ojie bi okhuo ọle nin Jezibẹl ne ka rẹ ha gbẹloghe bhi otọ Izrẹl biẹ Atalaya. Ele wo lu emhin ebe rẹ sẹbhọ ghe, Jehova da yọle ghe ọle dẹ fuẹn ọrebhe a ne na bhi ulin-uwa nọnsele vae. Arẹmiẹn ojie ọsi Juda hi ọdọ Atalaya, oga ẹmhọanta bha ha ti ọle bhọ. Ẹghe nin ọdọ ọle ki rẹ yu, ọmokpia nọnsọle da munhẹn ha gbẹloghe. Ọkpakinọn, Jehova da gbe ọle a. Bhiriọ, Atalaya da re egbọle kiẹn ojie, arẹmiẹn ikpia ọkpa Jehova zẹ ne ha yi ojie, sẹyẹ, ulin-uwa ọsi Devid ọle da zẹ ele. Beji a da miẹn ghe ọria soso bha nanlẹn hinmhin ihe ọsi ojie nin ọle re egbọle kiẹn, ọle da munhẹn ha gbono ọrebhe a nin ojie rẹ khẹke. Ọle bhọ da yọle nan gbono eyẹ nesọle a, ranmhude, ọkpa bhi ẹwẹ ele dẹ sabọ dọ kiẹn ojie ọsi Izrẹl.
Ojohẹn bi okhuo ọle da mun iẹnlẹn nọnsele ọbhi okhẹnan beji ele ha da sabọ gbega Jehoash bhi obọ Atalaya nin ọria ebe
Jehoada da re okhuo natiọle Jehoshiba, nan yẹ tiọle Jehoshabiat. Ọria nọn manman mhọn izebhudu ọne okhuo nan khin. Ulin-uwa ọsi ojie ọle yẹ na vae. Jehoada bi okhuo ọle nin Jehoshiba bha re otọ nin Atalaya rẹ gbono imikpia rebhe a ne na bhi ulin-uwa ọsi Devid vae. Ele lẹn ive nin Jehova ve, ghe, ọria dẹ na bhi ulin-uwa ọsi Devid vae nọn ha gbẹloghe bhi ighegheghe! (2 Sam. 7:12, 13) Bhiriọ, Jehoshiba da gbega ọmokpia ọkpa nan biẹ bhi ulin-uwa ọsi Devid. Ọne ọmọn bha sẹ sẹbhi ukpe ọkpa. Ọle da re izebhudu do mun ọne ọmọn sibhi ẹguale ọsi ọnojie re. Ọle da mun ọne ọmọn bi okhuo nọn ha gbẹloghe ọle bu ọdọ ọle nin Jehoada. Jehoada bi okhuo ọle da mun ọne ọmọn he bhi ẹkẹ ugha ọkpa nọn ha ribhi ẹkẹ uwa oga.
Jehoash a tie ọne ọmọn nin ele gbega. Bhi ẹkẹ ikpe ehan, Jehoada da wo ha gbẹloghe ọne ọmọn bhi ẹkẹ uwa oga ọsi Osẹnobulua. Ene ikpe ehan nan bha zẹwẹ lẹkhẹ hiehie, ranmhude, Atalaya ha lẹn ebi Jehoada bi okhuo ọle lu, uu ele ha miẹn bhọ. Ikpe ehan ki gbera nin ele rẹ re ọne ọmọn nẹhe, Jehoada da gbo re izebhudu lu emhin ọbhebhe. Ọle da taman ene ediọn isẹn ne sẹyẹ sun rẹkhan Jehova ghe, obhokhan okpia ọkpa ribhọ nọn na bhi ulin-uwa ọsi Devid vae, nọn khẹke nọn ha yi ojie ọsi Izrẹl. Ọle da taman ele nin ele ne eyokhọnlẹn ne bun sẹbhi 500 vae bhi ọne uwa oga beji ele ha da gbega ọle. Ene eyokhọnlẹn da ne emhin okhọnlẹn mhọn yẹ nẹga ọne obhokhan okpia beji Jehoada rẹ ha re ọle kiẹn ojie. Ranmhude eghọnghọn nin ibhokhan Izrẹl ha ye, ele da ha so yẹ gbabọ. Ẹghe nin Atalaya ki rẹ họn ebe sunu, ọle da re ẹjẹje runẹ ha khian ọne uwa oga.
Ọle ki sẹbhi ọne uwa oga, ọle da kere ghe, ele re Jehoash kiẹn ojie. Bhiriọ, ọle da ha dọnmhegbe nin ọle rẹ si ozughu ọbhọ. Ọle da reso yọle: “Eku khọnan! Eku khọnan!”—arẹmiẹn ọle tobọle bhọ lu eku nin ọle rẹ re egbọle kiẹn ojie. Ahamiẹn ọle riale ghe ẹbho dẹ deba ọle si ozughu ọbhọ, egbọle ọle hiẹ riọ. Ofẹn bha zẹwẹ mun Jehoada. Ọle da taman ene ediọn nin ele mun Atalaya ha khian ole. Ele da wo gene lu iriọ. Ele ki mun ọlẹn sẹbhi ole, ele da gbe ọle a. Jehova bhọ ka yọle ghe, a dẹ fuẹn ọrebhe a ne na bhi ulin-uwa ọsi Ehab vae. (2 Ki. 9:8) Asabọmiẹn ghe Atalaya hi ọria ọkike nọn na bhi ulin-uwa ọsi Ehab vae nọn khẹke nan gbe a.
Ẹghe nin Atalaya rẹ yu fo, Jehoada da lu emhin kpataki ọbhebhe. Ọle da rẹkpa ọnojie bi ene ẹbho rẹ ve ive ji Jehova ghe ele dẹ ha sun rẹkhan ọlẹn. Ọle da dunmhun uwa nin ẹbho da ga Beel sotọ, ye gbe ohẹn ọsi Beel a. Jehoada ki lu ọnan fo, ọle da dọnmhegbe nin ọle rẹ rẹkpa Jehoash beji ọle ha da sabọ ha yi ojie nọn mhẹn, nọn yẹ sun rẹkhan Jehova. Rẹ dọ sẹbhi ukpẹdẹ nin Jehoada yu, ọle wo ha rẹkpa Jehoash nin ojie rẹ ha sun rẹkhan Osẹnobulua. Ikpe 130 Jehoada ha ye ẹghe nin ọle rẹ yu. A da re Jehoada tọ bhi eji a da re ijie ne gbẹloghe Jerusalẹm tọ. Ekpẹn nọn khua wo khọnan, ranmhude, a i re ojohẹn tọ bhi eji a da re ene ijie tọ.
Ọ ba bhi egbe a ghe, ẹghe nin Jehoada rẹ yu, Jehoash da fikekegbe Jehova. Ọle da munhẹn ha rẹkhan ekhaẹmhọn ọsi Juda. Ọle da deba ele ha ga ẹbọ, yẹ si ibhokhan Izrẹl ọbhọ rẹ ha lu iriọ. Akhasẹ nesi Jehova rẹ ha re adia nanlẹn, ọle bha fi ehọ ele bhọ. Okpia ọkpa nọn yẹ re izebhudu re adia nin Jehoash, ọle hi ọmọn ọsi Jehoada natiọle Zẹkaraya. Ọle da nọọn ene ẹbho ebezẹle nin ele da ha gbobọrauhi nesi Jehova. Ọnan da re ohu re Jehoash rẹ sẹbhọ ghe, ọle da yọle nan gbe Zẹkaraya a! Ọrẹyiriọ, Zẹkaraya da sẹyẹ wo ha re izebhudu man rẹ dọ sẹbhi ukpẹdẹ nin ọle yu. Iriọ aba ọle nin Jehoada yẹ lu. Ikpe ne bunbun ki gbera, Jesu Kristi da yọle ghe, okpia nọn khiale, ọle Zẹkaraya khin. Ọnan rẹman ghe, ẹbho ne re izebhudu sun rẹkhan Jehova, ọle i ye ele a, iriọ Jesu yẹ lu.
Tie ọne okha bhi Baibo:
2 Kings 11:1-21; 12:1, 2
2 Chronicles 22:10-12; 23:1-21; 24:1, 2, 7, 15-22
Inọnta:
Uwedẹ nela Jehoada rẹ re izebhudu man?
Manman Guanọ Otọle
1. “Ene gbega ọnojie” ne rẹkpa Jehoada rẹ re Jehoash kiẹn ojie, hela ele khin? (2 Ki. 11:4, 19; it “Ene Gbega Ọnojie”)
2. Bezẹle nin Jehoada da mun ebe nan khili nin Uhi nọnsi Jehova ye ọbhi uhọnmhọn ọsi Jehoash? (2 Ki. 11:12, ftn.; w91 2/1 31 ¶5-6) 1
Ifoto 1
3. Bezẹle nin Jehoash da je ẹbho nin ele dọ hẹnhẹn uwa oga nọnsi Jehova? (2 Chron. 24:4-7, 11-14; it “Jehoash” Nin 1 ¶5)
4. Ọmọn nọnsi Jehoada Zẹkaraya khin. Bezẹle nin Jesu da tiọle “ọmọn nọnsi Barakaya”? (“ọmọn nọnsi Barakaya” study note nọn ribhi Mat. 23:35, nwtsty)
Ria Eria Nyan Emhin Nin Uwẹ Luẹle
Asabọmiẹn ikpe 100, ọle Jehoada ha ye ẹghe nin ọle rẹ re Jehoash nẹko. Be ijiẹmhin nọnsọle ha rẹ sabọ re izebhudu nin ibhio mhan yẹ ne ki dọmanlẹn? (Ps. 92:12, 14) 2
Ifoto 2
Ẹghe nin Jehoash rẹ ha ka Jehoada ehọ, ọle da ha lu ebe gbale. Be elasẹre ha miẹn luẹ bhi ọnan?
Uwedẹ nela uwẹ ha rẹ sabọ re egbe khọkhọ Jehoada bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Jehoada le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Be ibhokhan ha miẹn luẹ bhi obọ Jehoash rẹji nan rẹ ha re ẹwanlẹn zẹ imọẹ?
“Jehoash Da Fikekegbe Jehova Ranmhude Ikolu Nọn I Mhẹn” (w09 4/1 24-25)
Be imhan ha sabọ miẹn luẹ bhi ijiẹmhin ọsi Jehoada rẹji nan rẹ ha ze emhin bhi obọ rẹ rẹkpa bhi oga nọn khiale?
“Ọ Ti Jehova Bhọ Sade Mhan Ze Emhin Bhi Obọ” (w05 11/1 26-27)