Eyokhọnlẹn Ne Bunbun Nesi Jehova

Bẹnhedad nin ojie ọsi Siria da wo ha mun okhọnlẹn bu ibhokhan Izrẹl. Ẹghe nọn hi ki rẹ khin nin ọle rẹ mun okhọnlẹn vade, Ẹlaisha nin akhasẹ ki taman ojie ọsi Izrẹl, bhiriọ, ọle ki sabọ nẹgbe. Bẹnhedad da ha guanọ nin ọle do Ẹlaisha mun. Ọle da dọ lẹn kere ghe, Ẹlaisha ribhi agbaẹbho ọsi Dotan. Bhiriọ, ọle da je eyokhọnlẹn ọsi Siria ha khian enin, beji ele ha da mun ọlẹn.

Eyokhọnlẹn ọsi Siria da vae bhi Dotan bhi ọsasọn. Beji ẹdẹ ki we, ọguọmhandia nọnsi Ẹlaisha da dagbare, yẹ daghe ọle ghe eyokhọnlẹn ọsi Siria gba ijerebhe bhi ọne agbaẹbho. Ofẹn da ha mun ọlẹn, sẹyẹ, ọle da reso yọle: ‘Ẹlaisha, be mhan ha lu yẹ?’ Ẹlaisha da taman ọlẹn yọle: ‘Ene ri mhan bhi ikeke bun nẹ ene ri ele bhi ikeke.’ Bhi ọne ẹghenin, Jehova da tan ẹlo ọsi ọguọmhandia ọsi Ẹlaisha a. Ọle da daghe ọle ghe, akasi bi awẹnẹwẹnẹ ne gian bii eranlẹn vuọn ijerebhe bhi ene oke ne ribhi ọne agbaẹbho.

Ẹghe nin ene eyokhọnlẹn ki rẹ ha guanọ nin ele mun Ẹlaisha, Ẹlaisha da bhii Jehova yọle: ‘Jehova, huẹan ru ele ẹlo.’ Osukpa, ene eyokhọnlẹn bha yẹ lẹn eji ele ye, arẹmiẹn ẹlo nọnsele sẹyẹ taan. Ẹlaisha da taman ene eyokhọlẹn yọle: ‘Ọnan i yi ọne agbaẹbho nin bha khian. Bha rẹkhan mẹn, nin mẹn dọ man bha ọne okpea nin bha guanọ.’ Ele da rẹkhan ọlẹn ha khian Sameria, nin agbaẹbho nin ojie ọsi Izrẹl da nyẹnlẹn.

Ọkuẹsẹ ibhokhan Siria lẹn eji ele ye, ele ki sẹbhi uwa ọsi ọnojie fo. Ojie ọsi Izrẹl da nọọn Ẹlaisha yọle: ‘Mẹn be gbono ele a?’ Ẹlaisha be noo ọne isẹhoa nan rẹ gbono ene ẹbho a ne ha guanọ ne kuan ọlẹn? Eye. Ẹlaisha da yọle: ‘Hẹi gbono ele a. Re ebale nin ele le, uwẹ ha ji ele kpanọ.’ Bhiriọ, ọne ojie da manman re ebale nin ele le, yẹ je ele ha khian uwa.