28 ESA
Ọle Da Re Iẹnlẹn Nọnsọle Rebhe Ga Jehova
Ọ DA wo han Esa nin Ojie ilo nin ọle rẹ daghe eyokhọnlẹn ne bunbun ọsi Ẹtiopia bhi otọ Juda. Ele rebhe wo muegbe nin ele rẹ ne Esa khọnlẹn. Jehova ka wo je ẹbho nesọle ha khian okhọnlẹn igba ne bunbun. Sokpan, ije soso i ribhi Baibo nọn rẹman ghe ele sẹ ka khọn eghian ele ne bun sẹriọ khẹ. Eyokhọnlẹn ọsi Ẹtiopia bun sẹbhi ẹbo ọkpa (1,000,000). Ọkpakinọn, eyokhọnlẹn ọsi Esa bha bun sẹriọ. Ebe sẹbhi itue 600,000 eyọkhọnlẹn nesọle khin. Be Esa ha rẹ sabọ re izebhudu gbega ẹbho nesọle yẹ bhi obọ ene eria nan?
Ọnan i yi ẹghe ọhẹnhẹn nọn da khẹke nin Esa re izebhudu man. Ikpe igbe ne gbera ọkuẹsẹ ọne ẹghe nan nin ọle rẹ munhẹn ha gbẹloghe, Esa da wo lu emhin nọn rẹman ghe, ọle wo diabe Devid nin aba ọle nin ẹdẹlẹ. Bii Devid, Esa da ha guanọ nin ọle lu ebe ti Jehova bhọ. Esa da degbere, yẹ re ehọ ọbhi ebi Odẹd bi ọmọn nọnsi Odẹd natiọle Azaraya taman ọlẹn. Akhasẹ nọnsi Jehova ele veva ha khin. Rẹ na bhi ẹghe nin Solomọn nin Ojie rẹ fikekegbe Jehova ha ga ẹbọ, ẹbho ne bunbun da ha lu emhin ebe yẹ ga ẹbọ. Bhiriọ, Esa da re izebhudu fi emhin eso denọ. Bhi ọsi ijiẹmhin, ọle da dunmhun ene ẹbọ a nin ene ẹbho ha ga, bi ene aluẹbọ ne ha ribhi Juda.
Esa da yẹ re ọkpẹnlẹn ọbhi emhin ebe nin azagba-uwa nọnsọle ha lu. Ihe ọsi ẹsọn bhi Juda, ọle odede ọle nin Meaka ha ye. Ọle da man ẹbọ bhi otọ Juda. Asabọmiẹn ilọnmhọn oghẹ ele lu rẹ ga ọne ẹbọ nan. Ọrẹyiriọ, Esa bha ji oyẹẹ nin ọle mhọn da azagba-uwa nọnsọle da re ọle miẹn ghe ọle bha yẹ sun rẹkhan Jehova. Ọle da re odede ọle sibhi ihe ọsi ẹsọn nin ọle ha ye re, yẹ dunmhun ọne ẹbọ a. Ranmhude Esa wo ha lu ebe ti Jehova bhọ, Osẹnobulua da ji ọfure da ha ribhi otọ Juda bhi ikpe igbe. Ejayenan nian, ibhokhan Ẹtiopia mun okhọn bu Esa re bhi Juda. Be Jehova rẹ rẹkpa Esa yẹ?
Esa nin Ojie da kuẹlo da eyokhọnkẹn ne bunbun. Ọnan hi eyokhọnlẹn ne bun nẹ nan tẹmhọn ọlẹn bhi Baibo
Ẹghe nin Esa rẹ daghe eyokhọnlẹn ọsi Ẹtiopia ne bun sẹbhi ẹbo ọkpa ne mun okhọn bu ọle, ọle da re ẹjẹje nan erọnmhọn ji Jehova. Ria ebi ọ ha dia eyokhọnlẹn ọsi Esa bhi egbe yẹ ẹghe nin Esa rẹ ha nan erọnmhọn yọle: “Eo Jehova, ọ i yi emhin soso bhi ẹlo nọnsẹ si eria nin uwẹ guanọ nin uwẹ rẹkpa bunmhin la si ele mhọn ahu. Eo Jehova nin Osẹnobulua nọnsẹmhan, huẹan rẹkpa mhan, uwẹ mhan mun udu tẹ. Elin nọnsẹ mhan mun udu tẹ rẹ mun okhọnlẹn bu ene usun ẹbho nan. Eo Jehova, uwẹ hi Osẹnobulua nọnsẹmhan. Hẹi ji obọ ọsi eria ọkhọnkhan ke okhun gbera obọ nọnsẹ.” Ọne erọnmhọn nan nin ọle re ọkhọle rebhe nan dẹ wo manman ti Jehova bhọ. Osẹnobulua da daghe ọle ghe, Esa yẹ wo diabe Jonatan nin ọmọn nọnsi Sọl nin Ojie. Ene ikpia nan veva lẹnmhin ghe Jevova dẹ wo rẹkpa ele aharẹmiẹn ele bun la ele bha bun. (1 Sam. 14:6) Gene-gene, ahamiẹn Jehova ribhi ibo nọnsẹmhan, mhan dẹ wo ha khọn miotọ!
Esa da sun eyokhọnlẹn nesọle ha khian ọne okhọnlẹn. Be bhọ ki sunu? Baibo da ji mhan lẹn ghe, Jehova da fuẹn eyokhọnlẹn oṣi Ẹtiopia a. A bha miẹn ọkpa bhi ẹwẹ ele nọn miuhọnmhọn.
Ọnan ki sunu fo, Esa da wo ha rẹkpa ibhokhan Juda rẹ ha re oga nọn khiale ji Jehova. Ene bunbun bhi ulin-uwa igbe ọsi Izrẹl ne ha nyẹnlẹn bhi obọ ọsi nọt, da diọbhi obọ ọsi saot bhi Juda, beji ele ha da sabọ ha ga Jehova bhi uwa oga nọnsọle bhi Jerusalẹm. Esa da si ene ẹbho rebhe koko bhi Juda. Bhi enin, ele da ve ghe Jehova ọkpa ele ha sun rẹkhan.
Ọkpakinọn, mhan lẹnmhin ghe Esa wo dobọ igba ne bunbun. Ẹghe nin ojie ọsi Izrẹl rẹ ha guanọ nin ọle mun okhọn bu Juda, Esa bha bhii Jehova nin ọle rẹkpa ọle. Ọle da re igho bhii ojie ọsi Siria nọn rẹkpa ọle khọn ojie ọsi Izrẹl. Ẹghe nin Jehova rẹ je akhasẹ nọnsọle natiọle Hanenai nin ọle dọ re adia nin Esa, ohu da wo manman re Esa, bhiriọ, ọle da mun ọne akhasẹ khue bhi ighan. Ẹghe nin Esa ki rẹ dọmanlẹn, ọle da wo manman ha khọnmhọn. Ọkpakinọn, ọle bha bu Jehova nin ọle rẹkpa ọle. Ọle da bu ene ọbo nin ele re egbe daan ọlẹn. Ọ diabe ghe, beji ẹghe ki rẹ ha khian, Esa bha yẹ ha mhọn urẹọbhọ nin ọle rẹ ka ha mhọn khẹ.
Ikpe 41 Esa rẹ gbẹloghe otọ Juda. Baibo da ta ọne ẹmhọn nan rẹji ọle. Ọ da yọle: “Ọrẹyiriọ, ọkhọle rebhe Esa wo rẹ rẹkhan Jehova bhi ẹdagbọn iẹnlẹn nọnsọle rebhe.” Ọnan rẹman ghe, Aba nọn mhọn itohan Jehova khin. Ọne okha ọsi Esa nan wo rẹman ghe, Jehova hoẹmhọn eria ne hoẹmhọn ọlẹn. Ọ yẹ rẹkpa mhan rẹ lẹn ghe, ọ bha khẹke nin mhan ye emhin nin Jehova lu nin mhan an. Beji mhan rẹ ga Jehova yẹ daghe emhin nin ọle lu nin mhan, urẹọbhọ bi izebhudu nọnsẹmhan ki ha ziẹn ọbhọ!
Tie ọne okha bhi Baibo:
1 Kings 15:8-24
2 Chronicles 14:1–16:14
Inọnta:
Uwedẹ nela Esa rẹ re izebhudu man?
Manman Guanọ Otọle
1. Odede Esa da mun ẹbọ gbọ nin ele rẹ ha ga osẹ natiọle Asherah. Be ene guanọ otọ emhin fẹghe dọ guanọ kere nọn rẹman ghe ibhokhan Izrẹl ne fikekegbe Osẹnobulua gene ha ga ọne osẹ nan? (1 Ki. 15:12, 13; w08 6/1 10 ¶1-5) 1
Ifoto 1: Esa da re odede ọle sibhi ihe nọn khua nin ọle rẹ ha ye re, yẹ dunmhun ẹbọ nọnsọle a
Ifoto 1: Esa da re odede ọle sibhi ihe nin ọle rẹ ha ye re, yẹ dunmhun ẹbọ nọnsọle a
2. Họla hi ọmọn ọsi Hanenai nin akhasẹ? Be ọle rẹ re egbe khọkhọ aba ọle yẹ bhi izebhudu nin ọle rẹman? (2 Ch 19:2; it “Hanenai” Nọnzi 2)
3. Arẹmiẹn Esa dobọ igba ne bunbun, be ọle lu nin ọle rẹ rẹman ghe “ọkhọle rebhe [ọle] wo rẹ rẹkhan Jehova”? (1 Ki. 15:14; w17.03 19 ¶5-6)
4. Nan rẹ ha re eranlẹn tuẹ olinmhin a i yi emhin nin ibhokhan Izrẹl kẹ ha lu. Ọkpakinọn, beji 2 Chronicles 16:14 rẹman, emhin nela a tuẹ a ẹghe nan rẹ ha re Esa tọ? (w05 12/1 20 ¶5)
Ria Eria Nyan Emhin Nin Uwẹ Luẹle
Uwedẹ nin Azaraya nin akhasẹ rẹ ne Esa talọ, da re Esa rẹkpa ọrebhe bhi Juda rẹ ha ga Jehova bhi uwedẹ nọn gbale. Uwẹ dẹ be sabọ ta ọta nọn ha re izebhudu nin ẹbho ebhebhe? 2
Ifoto 2
Esa da mun udu nyan Jehova. Ọnan zẹle nin ọle da sabọ khọn eyokhọnlẹn ne bunbun miotọ. Akizẹbue, ọle da mun udu nyan eria nin ele rẹkpa ọle rẹ khọn eyokhọnlẹn ne bha bun. Be ọnan man mhan le rẹji nan rẹ ha mun udu nyan Jehova bhi emhin rebhe nin mhan lu? (Prov. 3:5, 6)
Be uwẹ ha rẹ sabọ rẹ egbe khọkhọ Esa yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Esa le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Ahamiẹn agbaẹbho nan bha da de idobolo ọbhi iwẹnna oga ọsi Esali Jehova uwẹ da nyẹnlẹn, be uwẹ ha rẹ sabọ noo ẹghe nọnsẹ nọnsẹn yẹ beji Esa lu?
Fẹ ebi ijiẹmhin ọsi Esa ha rẹ sabọ rẹkpa mhan yẹ ahamiẹn ọ nọghọ mhan rẹ sun rẹkhan Jehova.
“Uwẹ Dẹ Miẹn Elele Bhi Emhin Rebhe Nin Uwẹ Lu” (w12 8/15 8-10)