27 MẸFIBOSHẸT
Ọle Bha Ha Kiẹgbe Ranmhude Ọnọghọ Nin Ọle Kuẹlo Da
EYẸ ọsi Sọl nin Ojie, ọle Mẹfiboshẹt khin. Jonatan hi elin aba ọle. Jonatan wo re izebhudu man yẹ sun rẹkhan Jehova. Ikpe isẹn Mẹfiboshẹt ha ye beji ọle munhẹn ha kuẹlo da ọkakale bhi iẹnlẹn. Aba ọle nọn khua da gbe egbọle a ẹghe nan rẹ kuan ọlẹn bhi okhọnlẹn. Ọne okhọn aba ọle nin Jonatan da yẹ yu. Ẹghe nin okhuo nọn gbẹloghe Mẹfiboshẹt rẹ họn ebe sunu ji Sọl bi Jonatan, ofẹn da ha mun ọlẹn. Ọle da ha riale ghe ene ẹbho dẹ yẹ dọ gbe Mẹfiboshẹt a. Bhiriọ, ọle da mun Mẹfiboshẹt rẹ nẹgbe. Ẹghe nin ọle rẹ ha re Mẹfiboshẹt nẹ khian, Mẹfiboshẹt da de khuẹn oẹ a. Ọnan zẹle nin ọle da kiẹn akhun.
Mẹfiboshẹt bha ha kiẹgbe ranmhude ebe sunu ji ọle. Okpia ọkpa natiọle Mekiya da wo ha gbẹloghe ọle. Obhokhan Izrẹl ọne okpia nan khin. Akizẹbue, Devid nin Ojie da yere ghe ọle ve ive nin Jonatan ghe ọle dẹ gbẹloghe ọrebhe ne ribhi azagba-uwa nọnsọle. (1 Sam. 20:14-17) Bhiriọ, Devid da je nan re Mẹfiboshẹt ji ọle.
Ofẹn da ha mun Mẹfiboshẹt, ranmhude, Sọl nin aba ọle nọn khua bha lu Devid nọnsẹn. Ọle sabọ ha riale si Devid ki guanọ nin ọle gbe ọle a. Ọrẹyiriọ, ọle da sẹyẹ ha bu Devid nin ojie. Devid da wo re ifuẹkẹ nanlẹn talọ yẹ mun emhin uku ọsi Sọl nanlẹn. Ọle da taman ọlẹn yọle: “Uwẹ dẹ wo ha deba mẹn le ebale bhi uke itebu nọnsẹmhẹn.” Ọnan da re Mẹfiboshẹt manman ha ghọnghọn. Ọle da nọọn one ojie ebezẹle nin ọle da re iriọ mun ekpẹn nanlẹn, arẹmiẹn ọle bha sẹ ọria nan ha lu ẹsele nọn sẹ iriọ nan. Ọle bhọ da re egbe ọle khọkhọ awa nọn yu!
Egbe obhokhan Mẹfiboshẹt rẹ kiẹn akhun, sẹyẹ, aba ọle nin Jonatan bi aba ọle nọn khua nin Sọl da yu bhi okhọnlẹn, akizẹbue, ẹbho da hiẹ ọle yẹ lu ọle khọlọ
Akizẹbue, Mẹfiboshẹt da gbo kuẹlo da ọkakale ọbhebhe. Ọmọn nọnsi Devid natiọle Absalọm da ha guanọ nin ọle gbe Devid nin aba ọle a, yẹ re egbe ọle kiẹn ojie. Ẹbho ne bunbun da wo re obọ ọle bhọ. Bhiriọ, Devid da nẹgbe sibhi Jerusalẹm re. Ọguọmhandia nọnsi Mẹfiboshẹt natiọle Zaiba da zẹ Mẹfiboshẹt obọ bhi Jerusalẹm yẹ rẹkhan Devid. Mẹfiboshẹt bha sabọ rẹkhan Devid. Ọrẹyiriọ, ọle da lu emhin nin ọle rẹ rẹman ghe ọle sun rẹkhan Devid, sẹyẹ, ghe, ebe sunu ji Devid manman ba ọle bhi egbe. Ọle da zẹ eto-agban nọnsọle obọ. Ọnan a rẹ lẹn okpia nọn lu akhiẹ ẹghenin bhi otọ Izrẹl. Ẹghe nin Absalọm ki rẹ yu, Devid da fikie vae bhi Jerusalẹm bhi ọfure. Ọkpakinọn, ẹmhọn Mẹfiboshẹt bha yẹ ha ti ọle bhọ hiehie. Bezẹle?
Zaiba da bha Mẹfiboshẹt ohoghe. Ẹghe nin Zaiba rẹ ne emhin ji Devid, ọle da taman Devid ghe Mẹfiboshẹt deba Absalọm. Sẹyẹ, ọle da yọle ghe, ranmhude Mẹfiboshẹt guanọ nin ọle re egbọle kiẹn ojie zẹle nin ọle da debhi Jerusalẹm a. Ria ebi ọ ha dia Devid bhi egbe yẹ ẹghe nin Zaiba rẹ ta ọnan man ọlẹn. Ọkuẹsẹ ọne ẹghe nan, ọmọn nọnsọle nin Absalọm bi Ahitofẹ nin ọmọẹ ọle nin ọle manman gbaẹkẹ ọle, nọn yẹ re ibhude nanlẹn, wo la hiẹ ọle fo. Asabọmiẹn ọnan zẹle nin ọle da rẹọbhi ebi Zaiba taman ọlẹn. Ọle da yọle ghe, emhin uku rebhe ọsi Sọl nan rẹ mun nin Mẹfiboshẹt, nan mun nin Zaiba.
Ẹghe nin Mẹfiboshẹt rẹ họn ohoghe nin Zaiba bha ọle le, ọle da bu ọne ojie nin ọle dọ taman ọlẹn emhin nọn gene sunu. Devid da nọọn Mẹfiboshẹt ebezẹle nin ọle bha da sibhi Jerusalẹm re rẹkhan ọlẹn. Mẹfiboshẹt da taman Devid ghe, ranmhude oẹ nọnsọle nọn i ji ọle rẹ khian zẹle nin ọle bha da sabọ sibhi Jerusalẹm re. Ọle da yẹ ji Devid lẹn ghe ọle bha lẹn ẹghe nin Zaiba rẹ zẹ ọle obọ kpanọ. Asabọmiẹn Devid da daghe ọle ghe Mẹfiboshẹt zẹ eto-agban nọnsọle obọ. Ọnan da wo rẹman ghe Mẹfiboshẹt wo ha lu akhiẹ ẹghe nin ene emhin nan rẹbhe rẹ ha sunu ji Devid. Ọ da yẹ rẹman ghe Mẹfiboshẹt bha ha guanọ nin ọle re egbọle kiẹn ojie. Ọrẹyiriọ, Devid da sẹyẹ wo ha khọẹkẹ. Ọle da gbọta Mẹfiboshẹt bhi unun beji ọle ha nanlẹn talọ. Ọkpakinọn, emhin uku nin Devid rẹ miẹn ọle le, ọle da mun fikie nanlẹn, sokpan, ọ i yi erebhe ọle mun nanlẹn. Ọle da gha ọne emhin uku ọsi Sọl nin Mẹfiboshẹt bi Zaiba.
Ria ẹmhọn ebi ọ ha dia Mẹfiboshẹt bhi egbe yẹ ẹghe nin Devid rẹ yọle nin Mẹfiboshẹt deba ọguọmhandia nọnsọle nọn bha ọle ohoghe gha emhin uku nọnsọle. Ọnan ha wo rẹ sabọ re ẹkẹ khọ Mẹfiboshẹt. Ọkpakinọn, ọle bha lu iriọ. (Deut. 19:18, 19) Arẹmiẹn a bha lu ọle nọnsẹn, ọle bha ha khọẹkẹ la ha lu eghian. Ranmhude izebhudu nin ọle ha mhọnlẹn, ọle zẹle nin ọle bha da ne ene emhin nan lu ọle ọbhi ọkhọle. Ọle da dọnmhegbe rẹhunmhan ele yẹ deba ele ha ribhi ọfure.
Mẹfiboshẹt da re ekpẹn wanniẹn Devid yọle: “Ji [Zaiba] mun ọne otọ rebhe, beji a miẹn ghe ebeanlẹn mẹn nin ojie fikie vae bhi uwa nọnsọle bhi ọfure.” Ọnan rẹman ghe, okpia nọn mhọn idegbere Mẹfiboshẹt khin. Ẹmhọn Devid nin Jehova zẹle nọn ha gbẹloghe, ọle ha ria ẹmhọnlẹn. Arẹmiẹn a bha ọle ohoghe, yẹ gbe ọle miẹn ọlẹn emhin uku nọnsọle, ọle da sẹyẹ wo ha ghọnghọn, yẹ ga Osẹnobulua. Ẹmhọanta nọn ghe Mẹfiboshẹt i yi ọkpa bhi eyọkhọnlẹn, ọkpakinọn, izebhudu nin ọle rẹman gbera ọsi eyokhọnlẹn ne bunbun!
Tie ọne okha bhi Baibo:
2 Samuel 4:4; 9:1-13; 16:1-4; 19:24-30
Inọnta:
Uwedẹ nela Mẹfiboshẹt rẹ re izebhudu man?
Manman Guanọ Otọle
1. Ọkuẹsẹ Devid je nan re Mẹfiboshẹt bu ọle re, uwa ọsi Mekiya ọle da ha nyẹnlẹn. Emhin ọbhebhe nela rẹman ghe okpia nọn mhọn asun-rẹkhan nọn yẹ miẹn ẹbho ọbhi egbe Mekiya khin? (2 Sam. 9:3, 4; it “Mekiya” Nọnzi 2)
2. Bezẹle nin Mẹfiboshẹt da re egbọle khọkhọ “awa nọn yu”? (2 Sam. 9:8; it “Awa” ¶5) 1
PhotoStock-Israel/Photodisc via Getty Images
Ifoto 1: Bhi ẹghe ẹdẹlẹ, ibhokhan Izrẹl wo ha ghe awa bii elanmhẹn ne bha khia ne le emhin nọn hi ki rẹ khin nin ele miẹn
3. Be imhan rẹ lẹn yẹ ghe Mẹfiboshẹt bha ha mhọnlẹn bhi ọkhọle nin ọle rẹ re egbọle kiẹn ojie? (w02 2/15 14 ¶11, ftn.) 2
Ifoto 2: Emhin nela asabọmiẹn Jonatan man ọmọn nọnsọle le rẹji ọria nin Jehova zẹ nọn ha yi ojie?
4. Be Jehova rẹ nan erọnmhọn nin Mẹfiboshẹt yẹ bhi ẹghe nin emhin nan tẹmhọnlẹn bhi ọne okha nan rẹ sunu fo? (it “Mẹfiboshẹt” Nọnzi 2 ¶3)
Ria Eria Nyan Emhin Nin Uwẹ Luẹle
Ibhio mhan ne bunbun sabọ ha kuẹlo da ọnọghọ nin ibhio mhan nekẹle bhi agbotu bha lẹn otọle fo. Be ele ha sabọ miẹn luẹ bhi obọ Mẹfiboshẹt?
A wo tẹmhọn ọkpa man Devid, ọle da wo rẹọbhọ. Ọle da ne emhin uku nọnsi Mẹfiboshẹt nin Zaiba. Bezẹle nọn i da yi emhin ẹwanlẹn nin mhan rẹ wo re ẹjẹje ha talọ ọbhi ẹmhọn nin mhan bha lẹn otọle fo? 3
Ifoto 3
Be uwẹ ha rẹ sabọ re egbe khọkhọ Mẹfiboshẹt yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Mẹfiboshẹt le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Fẹ ebi mhan ha rẹ sabọ re egbe khọkhọ Mẹfiboshẹt yẹ ahamiẹn mhan riale ghe a lu mhan khọlọ.
Ebi Ele Rẹ Khu Ọbhi Ọfure Yẹ, Yẹ Miẹn Ọlẹn—Mephibosheth (3:25)
Ahamiẹn obhokhan riale ghe ẹbho nekẹle bha hoẹmhọn ọlẹn, be ene biẹ ọle ha rẹ sabọ noo okha ọsi Mẹfiboshẹt rẹ rẹkpa ọle yẹ?
“A Be Sẹ Ka Ne Uwẹ Lu Emhin Bii Ọriọbhe Khẹ?” (w11 6/1 26-27)