11 MOZIS
Ọle Da “Bu Fero”
MOZIS wo dọ fidenọ nian. Asabọmiẹn ọle bhọ bha yẹ ha riale ghe, ọle Jehova ha noo rẹ hinmhin ibhokhan Izrẹl bhi igbọn nin ele ye bhi otọ Ijipt. Bhi ejayenan nian, ikpe 80 ọle ki ye, sẹyẹ, ọle mhọn amhẹn bi imọn eva. Ọle ki wo mhọn idegbere nian. Bhi ene ikpe ẹgbọ-eva nin ọle noo rẹ ha re ihuan ọsi oruan ọlẹn kọn bhi otọ Midian nọn ka amẹn an, ọle rẹ luẹ ebi a rẹ re ọne ikpẹ nan man yẹ.
Jehova wo daghe ebi Mozis rẹ gene fidenọ yẹ. Ẹdọkpa, beji Jehova ha da sabọ ne Mozis talọ, ọle da lu ọle nin ẹwẹ igbẹn ha to bhi Oke Ọsi Horẹb (Sanai). Ọkpakinọn, ọne ẹwẹ igbẹn bha to a. Mozis ki sikẹ ọne ẹwẹ igbẹn, Jehova da noo ẹhi nọnsọle rẹ ne Mozis talọ bhi ẹkẹ ọne eranlẹn. Osẹnobulua da taman Mozis nin ọle fikie diọbhi Ijipt dọ miẹn ẹbho nesọle fan! Beji a ha da miẹn ofẹn bha ha mun Mozis, Jehova da taman ọlẹn yọle: “Mẹn Dẹ Kiẹn Ebi Mẹn Guanọ Nin Mẹn Kiẹn.” Ọkpa bhi emhin kpataki nan re elin nọnsi Jehova ta khọnan. Ọnan rẹman ghe Jehova dẹ sabọ lu emhin nọn hi ki rẹ khin nọn khẹke rẹ hinmhin ẹbho nesọle, yẹ re ele kiẹn udede agbaẹbho. Sẹyẹ, ọle dẹ sabọ miẹn ẹbho nesọle fan bhi obọ ẹbho ne denyẹnyẹn ele.
Arẹmiẹn Jehova ta ọnan man Mozis, ọle da yẹ ha siegbe re ikeke. Ọle da ha riale ghe ọle i da sabọ miẹn ọne ẹsọn nan, sẹyẹ, ọle i da sabọ ne Fero talọ. Jehova da lu emhin ọhan-ilo rẹ rẹkpa ọle rẹ lẹn ghe, ọle dẹ sabọ miẹn ọne ẹsọn. Ọle da re ahu nin Mozis rẹ sabọ lu emhin ọhan-ilo. Ọnan ẹghe ọhẹnhẹn bhi Baibo nin Jehova rẹ re ahu nin ọria rẹ sabọ lu emhin ọhan-ilo. Sẹyẹ, Jehova da taman Erọn nọn rẹkhan Mozis beji ọle ha da rẹkpa ọle ha talọ. Bhi ọkike ọle, Mozis da ka nin Jehova rẹ noo ọle. Ọle da kiẹn Ọnanzẹle—okpea nin Jehova zẹle nọn ha miẹn ibhokhan Izrẹl fan.—Hib. 11:26.
Mozis bi Erọn da ki fikie diọbhi Ijipt dọ ne Fero talọ. Ọkpakinọn, Fero bha ka ele ehọ. Ọnan da wo manman re ohu re ọle. Nin ọle rẹ fan ibhokhan Izrẹl fia, ọle da kie hian ẹsọn ba ele ẹsọn! Bhiriọ, Jehova da je Mozis fikie bu Fero, nin ọle dọ taman ọlẹn oya ọhẹnhẹn nin ọle ha re nin ibhokhan Ijipt le. Ebi Jehova ta da gene sunu! Ẹdẹ Ọsi Nai da kiẹn aranlẹn. Arẹmiẹn ọnan sunu, Fero bha ji ibhokhan Izrẹl da kpanọ. Jehova da wo ha ji Mozis bu Fero nin ọle dọ taman ọlẹn emhin nin ọle ha kie gbo lu rẹ re oya nin ibhokhan Ijipt le. Ẹghe nọn hi ki rẹ khin nin Jehova rẹ je Mozis bu Fero, ọle ki wo re izebhudu ha khian. Ọkpakinọn, okpẹhio bha ji Fero da re ehọ bhi ẹmhọn nọnsi Jehova. Emhin ọhẹnhẹn rẹ sẹbhi ọne ọzea nin Jehova lu rẹ re oya nin ibhokhan Ijipt le, yẹ wo sẹ ibhokhan Izrẹl bhi egbe. Ọkpakinọn rẹ na bhi ọne ọzenẹn rẹ ha khian, ibhokhan Ijipt ọkpa ọ ki ha sunu je.
Ene oya kẹkẹ nin Jehova re nin ibhokhan Ijipt le, da rẹman ghe ihoho osẹ nesele khin. Sẹyẹ ghe, Fero bi ikpia nesọle ne lu ilọnmhọn idunan i mhọn ahu. Ọrẹyiriọ, Fero bha fi ọkhọle denọ. Ọle bha ka ji ibhokhan Izrẹl da kpanọ. Oya nọnzi isinlin nin Jehova rẹ nin ibhokhan Ijipt le da re ijerebhe so ebiuki a bhi eji ele ye, ọkpakinọn, ẹfua da ha ribhi eji ibhokhan Izrẹl ye. Ọnan ki sunu fo, Fero da ka nin ibhokhan Izrẹl rẹ kpanọ. Ọkpakinọn, ọ bha bue, ọle da fi ọkhọle denọ. Ọle da sekha nin Mozis ghe, ọle ha kie dọnmhẹn vae bhi eji ọle ye, uu ọle da miẹn bhọ.
Ojie nọn mhọn ahu nẹ bhi ọne otọ nan ẹghenin nọn yẹ fi bhi ẹlo Fero ha khin. Ọrẹyiriọ, ọ da khẹke nin Mozis bu ọle igba ne bunbun
Ọnan ki sunu fo, Jehova da re oya nọn kike nin ibhokhan Ijipt le. Ọle da gbono imọndiọn ọsi ibhokhan Ijipt rebhe a ne yi imikpia rẹ dọ sẹbhi ọmọndiọn ọsi elanmhẹn nesele. Ọmọndiọn ọsi Fero bhọ da yẹ yu. Ọnan da wo re egbe lọ Fero. Bhiriọ, ọle da tie Mozis nin ọle vae. Jehova da ki taman Mozis nin ọle bu Fero. Mozis ki sẹbhi enin, Fero da taman ọlẹn nin ọle ne ibhokhan Izrẹl kpanọ, sẹyẹ, nin Mozis nan erọnmhọn nanlẹn. Bhi ọkike ọle, ibhokhan Izrẹl da miuhọnmhọn bhi igbọn nan ha re ele lu bhi otọ Ijipt! Ele da ki miẹn isẹhoa rẹ sibhi otọ Ijipt re. (Ex. 12:40, 41) Beji ele ha kpanọ, usun ẹbho kẹkẹ da rẹkhan ele. Asabọmiẹn ibhokhan Ijipt bun nẹ bhi ẹwẹ ele. Ọ bha bue gbe, Fero da gbo fi ọkhọle denọ. Ọle da si eyokhọnlẹn nesọle koko rẹ khu rẹkhan ibhokhan Izrẹl!
Beji Mozis bi ibhokhan Izrẹl ki sẹbhi Okpẹdẹ Nọn Gian, ọ da diabe ghe ele i da yẹ sabọ gbera enin. Bhiriọ, ofẹn da wo ha mun ele. Ọkpakinọn, Mozis da bhii Jehova nin ọle rẹkpa ele. Jehova da wanniẹn erọnmhọn nọnsi Mozis. Ọle da lu emhin ọhan-ilo nan bha sẹ ka miẹn egbọle khẹ rẹ ne otọ ha vade. Ọle da wa ọne Okpẹdẹ Nọn Gian yi eva. Bhiriọ, ibhokhan Izrẹl da sabọ na ọle gbera. Fero ki daghe ọle ghe ibhokhan Izrẹl gene khian, ọle bi eyokhọnlẹn nesọle da kie manman khu rẹkhan ele. Ọkpakinọn, ibhokhan Izrẹl ki fan ọne okpẹdẹ ra fo diọbhi obọ nọnkẹle, Jehova da lu ọle nin ọne okpẹdẹ nọn rẹ ka wa a kie kugbe. Ọne okpẹdẹ da fuẹn ibhokhan Ijipt rebhe a ne nabhi ẹkẹ ọle ha khu ibhokhan Izrẹl khian. Iriọ eyokhọnlẹn ne mhọn ahu nẹ bhi ọne agbọn nan ẹghenin rẹ fuẹn an!
Mozis bha yelea ghẹdẹ ene emhin ọhan-ilo nan ne sunu. Ọ da wo kie manman ziẹn urẹọbhọ nọnsọle. Mozis da wo ha sun ẹbho nesi Osẹnobulua yẹ gbẹloghe ele rẹ dọ sẹbhi ẹghe nin ọle rẹ yu, beji ọle ribhi ikpe 120. Ikpe 40 ọle sun ele na. Ọle da wo ha re urẹọbhọ, oyẹẹ, bi izebhudu man. Ikpẹ esili khenan ne khẹke nin mhan ha mhọnlẹn.
Tie ọne okha bhi Baibo:
Exodus 2:15–5:23; 7:1–11:10; 12:29-41; 13:17–14:31
Deuteronomy 29:2, 3; 34:5-7
Inọnta:
Be Mozis rẹ re izebhudu man yẹ bhi ọne ẹghe nan bhi iẹnlẹn nọnsọle?
Manman Guanọ Otọle
1. A bha lẹn elin ọsi Fero nan tẹmhọnlẹn bhi ọne okha nan, sẹyẹ, a bha sẹ miẹn ebe ọsi ibhokhan Ijipt soso nọn tẹmhọn ebi ibhokhan Izrẹl rẹ sibhi otọ Ijipt re yẹ. Ọrẹyiriọ, bezẹle nin mhan ha da sabọ rẹọbhọ ghe ebi Baibo talẹ bhi ẹmhọn ọne okha nan, ẹmhọanta nọn? (g04 4/8 7 ¶4–9 ¶1)
2. Bezẹle nin ẹbho da ha mun ofẹn Fero? (w14 4/15 8 ¶1) 1
PRISMA ARCHIVO/Alamy Stock Photo
Ifoto 1: Amanzẹ ọsi Fero nọn ki dọ ha gbẹloghe, ọle ribhi ọne egbe uwa nan
3. Be ene oya igbe nin Osẹnobulua rẹ nin ibhokhan Ijipt le rẹ rẹman yẹ ghe ihoho ene osẹ ọsi Ijipt khin? (it “Osẹ Kẹkẹ Bhi Ijipt” ¶24-26)
4. Be rẹman ghe Jehova gene wa Okpẹdẹ Nọn Gian yi eva? Sẹyẹ, be ibhokhan Izrẹl ne na ọne ẹdẹ gbera bun sẹ yẹ? (it “Exodus” ¶46-51) 2
Ifoto 2: Okpẹdẹ Nọn Gian khọnan. A sabọ na bhi Sinai daghe ọle. Asabọmiẹn ọne okpẹdẹ nan ibhokhan Izrẹl fan gbera
Ria Eria Nyan Emhin Nin Uwẹ Luẹle
Be okha ọsi Mozis ha rẹ sabọ rẹkpa mhan yẹ sade mhan riale ghe mhan i da sabọ miẹnsọn nin Jehova mun nin mhan? (Ex. 4:10; 7:6, 7)
Erọn da rẹkpa Mozis rẹ sabọ re izebhudu miẹnsọn nan mun nanlẹn. Be mhan ha rẹ sabọ rẹkpa ibhio mhan nin mhan ko ga yẹ ẹlẹnan? (Ex. 4:14-16) 3
Ifoto 3
Be mhan ha rẹ sabọ re egbe khọkhọ Mozis yẹ bhi uwedẹ nin ọle rẹ re izebhudu man bhi ọne okha nan?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Mozis le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Fẹ ebi elin nọnsi Jehova mundia nan ha rẹ sabọ rẹkpa ibhokhan rẹ ha mhọn izebhudu yẹ.
Be ene isẹlobhemhin kẹkẹ nin Mozis miẹn man ọle le rẹji ikpẹ nesi Jehova?