10 MOZIS
Ọle Da Zẹ Emhin Nọn Mhẹn Rẹ Lu
Ọ I YI ene biẹ Mozis hẹ ọle Mozis nan ha tie ọle le. Sokpan ọmokhuo ọsi Fero nọn bẹ ọle wanre hẹ ọle ọne elin. Ebi ọne elin mundia nan hi, “Ọne a hinmhin re dagbare bhi ẹkẹ amẹn.” Ẹkẹ amẹn, ọle ọmokhuo ọsi Fero da hinmhin Mozis re dagbare. Ọnan zẹle nin ọle bhọ da hẹ ọle ọne elin. Ọ da ha mhọnlẹn bhi ọkhọle ghe Mozis ha wanre, ọ dẹ kiẹn okpọria bhi ẹguale nọnsi aba ọle. Ọ da yẹ wo ha ti ọle bhọ rẹ daghe Mozis yo uwa-ebe nan họn ẹmhọn ọlẹn nẹ. Baibo da yọle: “A da man Mozis ilẹnmhin rebhe ọsi ibhokhan Ijipt.”
Ọle da wanre dọ kiẹn okpọria. Baibo da yọle: “Ọta nin ọle ta bi emhin nin ọle lu da wo re ọnan man.” Ọle rẹ wo ha mhọn ọne isẹhoa nin ọle rẹ khu bhi afe bi ua, nin ọle rẹ ha mhọn ahu, bi nin ọle rẹ re emhin rebhe nin ọle mhọn bhi otọ Ijipt rẹ ha sọnyẹnmhẹn. Sokpan, Mozis lẹnmhin ghe iẹnlẹn nọn sẹriọ i da sabọ re ọle sikẹ Jehova. Ọ da khẹke nin Mozis zẹ ebi ọle ha lu. Bhiriọ, be ọle ha ki re iẹnlẹn nọnsọle lu nian?
Ẹghe nin Mozis rẹ ha ribhi ikpe 40, ọle da zẹ ebi ọle ha re iẹnlẹn nọnsọle lu. Baibo da taman mhan ghe: “Urẹọbhọ nin Mozis ha mhọnlẹn, ọle zẹle nin ọle bha da ka nan ha tiọle ọmọn ọsi ọmokhuo nọnsi Fero, beji ọle wanre fo. Ọle da zẹ nin ọle rẹ deba ẹbho nesi Osẹnobulua loya. Ọle bha guanọ ọlẹnlẹnbhegbe ọsi obhi ẹghe khere nan miẹn bhi olukhọ.” Ọle da zẹ emhin nọn mhẹn rẹ lu. Ọne emhin nin ọle zẹ rẹ lu da rẹman ghe ọle mhọn urẹọbhọ bi izebhudu. Ọkpakinọn, ọle da dobọ ẹgheso.
Mozis da ha ghe ibhokhan Izrẹl bii ibhio ọle. Ọle da yẹ ha guanọ nin ọle rẹkpa ele ranmhude uwedẹ nan rẹ ha lu ele khọlọ. Ẹdọkpa, ọle da dọ fẹghe ebi ibhio ọle rẹ ha loya yẹ. Ọle da daghe obhokhan Ijipt ọkpa gbe obhokhan Izrẹl ọkpa. Asabọmiẹn ọnọn gha ẹsọn nin ele ọne obhokhan Ijipt nan khin. Mozis be taman ọne obhokhan Ijipt nin ọle hẹi yẹ gbe ọne obhokhan Izrẹl? Mhan bha lẹn. Ọnọn hi ki rẹ khin nọn sunu, Mozis “da baba eje rebhe fẹghe” si ọle dẹ miẹn ọria soso nọn ha hinmhin ọne obhokhan Izrẹl nan ha gbe. Ọkpakinọn, ọle bha miẹn ọria soso. Bhiriọ, Mozis da zẹ nin ọle rẹ tobọle hinmhin ọlẹn. “Ọle da gbe ọne obhokhan Ijipt a.” Ebi ọle rẹ ha guanọ nin ọle lu be khọnan? La ohu re ọle nin ọle da re riọ fi ọne okpia emhin nin ọne okpia da yu? Baibo bha taman mhan. Ọnọn hi ki rẹ khin nọn re Mozis lu iriọ, Mozis lẹnmhin ghe ẹmhọn ọle na i. Bhiriọ, ọle da mun ekuegbe ọsi ọne okpia he bhi ẹkẹ ekẹn.
Ẹdẹ ki we, ọle da gbo dagbare. Ọle da daghe ibhokhan Izrẹl eva ne ha khọnlẹn. Bhiriọ, ọle da dọnmhegbe nin ọle rẹ mun ele bhi okhọnlẹn. Ọkpakinọn, ọkpa bhi ọne obhokhan Izrẹl da ta ọta nọn re ofẹn mun Mozis. Ọle da yọle: “Họla re uwẹ kiẹn ojie bi ọbhohiẹn nọnsẹmhan? Uwẹ be guanọ nin uwẹ gbe mẹn an beji uwẹ rẹ gbe ọne obhokhan Ijipt a?” Bhi ọne ẹghe nan, Mozis da lẹn ghe ẹbho lẹn ebi ọle lu. Ofẹn da wo manman ha mun ọlẹn.
Emhin bha ha khian bhi uwedẹ nin Mozis rẹ ha guanọ ọle. Be ọle bhọ rẹ ha guanọ? Baibo da taman mhan ghe: “Ọle da rẹ ha riale ghe, ibhokhan Izrẹl dẹ riale ghe, Osẹnobulua je ọle nọn dọ miẹn ele fan, ọkpakinọn, ele bha ghe ọle iriọ.” Ọ diabe Mozis rẹọbhọ ghe Osẹnobulua zẹ ọle nin ọle miẹn ibhokhan Izrẹl fan bhi igbọn nin ele ha ye bhi otọ Ijipt. Ọkpakinọn, Mozis bha lẹn ghe, ẹghe nin Jehova ha rẹ hinmhin ẹbho nesọle bha sẹ sẹ. Sẹyẹ, ọle bha yẹ mun ọkhọle ọbhọ ghe ibhokhan Izrẹl dẹ lu emhin bhi uwedẹ nin ele rẹ lu emhin. Ibhokhan Izrẹl bha gbaẹkẹ Mozis nọn wanre bhi ẹguale ọsi Fero.
Mozis dẹ be zẹ nin ọle rẹ khu ọbhi afe yẹ ha yi okpọria, la ọle dẹ be rẹkpa ẹbho nesi Jehova?
Mozis da ha riale ghe ọle muegbe nin ọle rẹ sun ibhokhan Izrẹl sibhi oto Ijipt re. Ọkpakinọn, emhin ne bunbun ribhọ nọn rẹman ghe ọle bha sẹ muegbe. Jehova lẹnmhin ghe emhin eso ribhọ nọn khẹke nin Mozis luẹ. Ẹmhọanta nọn ghe ọle mhọn izebhudu. Ọle yẹ mhọn ahu. Sẹyẹ, ọta nin ọle ta rẹman ghe ọria nin ofẹn i mun ọle khin. Ọkpakinọn, ọ da khẹke nin ọle ha mhọn ikpẹ ebhebhe nin Jehova manman guanọ bhi egbọle. Ọne ikpẹ hi ẹkẹ-omẹnhiẹn. Ranmhude ọle ka re ohu gbe obhokhan Ijipt a. Ọ bha sẹ bue gbe Fero da lẹn ghe ọle gbe ọria a.
Fero bha zẹwẹ nọọn Mozis ebe sunu, ọle da ha guanọ nin ọle gbe ọle a. Bhiriọ, Mozis da nẹgbe sibhi otọ Ijipt re. Ọle bha lẹn ebe ha ki sunu ji ọle. Ọle da zẹ afe bi ua obọ, bi emhin rebhe nin ọle rẹ ha sọnyẹnmhẹn bhi otọ Ijipt. Ọne ẹghe nan ọ rẹ khẹke nin ọle rẹ manman re izebhudu man. Mozis da re izebhudu sibhi ẹguale ọsi Fero re ha khian otọ Midian nọn manman ree. Ọle da dọ ha nyẹnlẹn bhi agbaẹbho nọn i yi ọsọle bhi ikpe ne bunbun. Ọle dẹ be sabọ fi unan ọria nin ọle khin denọ? Ọle dẹ be ha mhọn ẹkẹ-omẹnhiẹn bi idegbere beji Jehova rẹ guanọ ọle? Bha ji mhan fẹ ọle ghe.
Tie ọne okha bhi Baibo:
Exodus 2:11-22
Inọnta:
Uwedẹ nela Mozis rẹ re izebhudu man bhi ọne ẹghe nan bhi iẹnlẹn nọnsọle?
Manman Guanọ Otọle
1. Emhin nela a gua otọle kere nọn rẹman ghe ibhokhan Izrẹl gene ha yi igbọn bhi otọ Ijipt beji Baibo tale? (w20.03 30) 1
Courtesy Brooklyn Museum, gift of Theodora Wilbour
Ifoto 1: Obọkpa bhi ebe nan gbẹn elin ọsi igbọn ne ha wẹnna bhi Ijipt ọ i, elin ọsi igbọn ne bun gbera 40 a miẹn bhi ọne ebe. Ọnan rẹman ghe ibhokhan Izrẹl gene ha yi igbọn bhi Ijipt
2. Be Mozis luẹ bhi obọ ene biẹ ọle? Sẹyẹ, be ọle luẹle bhi otọ Ijipt? (Iwẹn. 7:22; w02 6/15 10 ¶2-5)
3. Be ibhokhan Ijipt rẹ re ẹbho nesele ne yu tọ yẹ? Be ọ ha sabọ dia ibhokhan Ijipt bhi egbe yẹ bhi ẹghe nin Mozis rẹ gbe obhokhan Ijipt ọkpa a yẹ mun ekuegbe nọnsọle he bhi ẹkẹ ekẹn? (it “Ijipt, Ibhokhan Ijipt” ¶28) 2
Ifoto 2: Ekuegbe ọsi obhokhan Ijipt
4. Mozis da nẹgbe ha khian otọ Midian. Emhin nela ibhokhan Midian lu nin ibhokhan Izrẹl yẹ lu? (it “Midian” Nọnzi 2 ¶1-2)
Ria Eria Nyan Emhin Nin Uwẹ Luẹle
Be ijiẹmhin ọsi Mozis man uwẹ le rẹji ohu nọn kẹ re ọria?
Be elasẹre ha sabọ miẹn luẹ bhi obọ Mozis rẹji ebe gbale nin ele ha re iẹnlẹn nọnsele lu? 3
Ifoto 3
Uwedẹ ọbhebhe nela uwẹ ha rẹ re egbe khọkhọ Mozis bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Mozis le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Bhi ọne ividio nan, mhan dẹ daghe ebi mhan ha rẹ sabọ re egbe khọkhọ Mozis yẹ bhi uwedẹ nin ọle rẹ zegbere rẹ wẹnna nin Jehova.
Re Egbe Khọkhọ Ene Mhọn Urẹọbhọ, Ọ Iyi Ene Imhọn Urẹọbhọ—Moses, Ọ Iyi Pharaoh (2:27)
Mozis da fikekegbe afe bi ua beji ọle ha da sabọ ga Jehova. Uwẹ dẹ be sabọ lu emhin nọn dia iriọ ẹlẹnan?