7 JEKỌP
Ọle Da Re Izebhudu Gbega Azagba-uwa Nọnsọle
Ọ KI kẹ khere nin Jekọp rẹ yu, ọle da tẹmhọn ebi iẹnlẹn nọnsọle diayẹ. Ọle da yọle “Ikpe nin mẹn sẹ gbe bha agbọn bha miẹn eji ọ sẹ, sokpan, ọbalọ yẹ wo rẹkhan ọlẹn.” (Gen. 47:9) Ọle wo gene kuẹlo da ọkakale bhi iẹnlẹn nọnsọle! Bhi ẹghe nin ọle rẹ ha ribhi usẹn, obhio ọle nin okpia da ha guanọ nin ọle gbe ọle a. Bhiriọ, ọle da nẹ sibhi uwa re ha khian Heran. Bhi Heran, ọle da miẹn okhuo ọkpa natiọle Rechẹ. Ọle da wo hoẹmhọn ọlẹn, yẹ ha guanọ nin ọle re ọle bhi amhẹn. Ọkpakinọn, Leban nin aba Rechẹ da hiẹ ọle. Lia nin ọmọndiọn nọnsọle ọle ka re nanlẹn bhi amhẹn, ọkuẹsẹ ọle dọ re Rechẹ nanlẹn. Bhiriọ, Jekọp da ki ha mhọn ikhuo eva—ene ikhuo veva da wo ha ne egbe van. Ikpe ne bunbun Jekọp rẹ wẹnna nin Leban. Ọkpakinọn, ẹghe-ẹghe Leban rẹ ha lu ọle eku. Arẹmiẹn Jekọp kuẹlo da ene ọkakale nan rebhe, ọle da sẹyẹ ha mhọn izebhudu, urẹọbhọ bi iziẹngbe.
Ẹdọkpa, Jehova da taman Jekọp ghe ẹghe sẹ nin ọle ha rẹ sibhi Heran re ha khian uwa nọnsọle bhi Kenan. Ọnan i da lẹkhẹ nin Jekọp rẹ lu, ranmhude, Leban mhọn ẹlobhiamhin. Sẹyẹ, ọle rẹọbhọ ghe emhin rebhe nin Jekọp mhọnlẹn, ọle nyan ọlen. Jekọp ki da taman Rechẹ bi Lia ebi Leban lu ọle le, bi ebi Jehova taman ọlẹn. Bhiriọ, ọle bi azagba-uwa nọnsọle da nẹgbe. Ẹghe nin Leban ki rẹ lẹn kere ghe Jekọp nẹgbe, ọle bi ikpia nesọle da khu rẹkhan ele. Ọle ki khu ele kere, ọle da wo ha ne Jekọp van ranmhude nin Jekọp bha rẹ taman ọlẹn ọkuẹsẹ ọle kpanọ. Leban bhọ da taman Jekọp ghe, ọle mhọn ọne ahu nin ọle rẹ kuan ọlẹn. Ọkpakinọn, Jekọp da wo re izebhudu ta ebe ri ọle bhi ọkhọle. Ọle da ji Leban lẹn ghe ọle wo nanlẹn lu emhin bhi uwedẹ nọn bha gba, yẹ lu ọle eku bhi ikpe ne bunbun. Ọrẹyiriọ, Jekọp da yẹ ha guanọ nin ele ko ha ribhi ọfure. Ọkuẹsẹ ele zẹ egbe obọ, ele da yọle ghe ele dẹ mun ẹmhọn fia.
Be rẹkpa Jekọp rẹ sabọ deba ẹbho bhi azagba-uwa nọnsọle ne ha khọẹkẹ ọle khu ọbhi ọfure, yẹ rẹ ne ẹhi daan?
Ọkakale nin Jekọp ha ye bha sẹ fo. Obhio ọle nin Isọ bhọ bu ọle vade. Bhi ikpe ne bunbun ne gbera, Rebeka nin inẹn ọlẹn ka taman ọlẹn ghe Isọ nin obhio ọle guanọ nọn gbe ọle a. Isọ wo rẹọbhọ ghe Jekọp re eku miẹn ọlẹn emhin nọn rẹ khẹke nọn sẹ ọle obọ bhi obọ aba ọle. Bhi ejayenan nian, Jekọp guanọ nin ọle bi obhio ọle ko re ẹmhọn i nọnsẹn. Jekọp da dọ lẹn kere ghe, Isọ bi ikpia nesọle ne bun sẹbhi 400 bu ọle bi azagba-uwa nọnsọle vade. Bhiriọ, Jekọp da je eguọmhandia nesọle nin ele bu Isọ. Sẹyẹ, ọle da ne emhin nin ele, nin ele rẹ lu ẹsele nin Isọ. Ọnan dẹ be re ọkhọle nọnsi Isọ lọre? Baibo ji mhan lẹn ghe, bhi ọne ẹghe nan: “Ofẹn da wo ha mun Jekọp. Ọle da yẹ ha kpokpo egbe.” Ọkpakinọn, emhin ọhan-ilo da sunu.
Bhi ọsasọn bhi ọne ukpẹdẹ nin, beji Jekọp ọkpa ha ribhi ọsọle, Jekọp da daghe ọria nin ọle bha lẹn. Ẹhi nọnsi Jehova ọne ọria ha khin. Jekọp ki lẹn ghe ọne ẹhi dẹ sabọ nan erọnmhọn nanlẹn, ọle da re izebhudu nanlẹn ha daan bhi ẹkẹ uriagogo ne bunbun. Arẹmiẹn ọne ẹhi manman mhọn ahu nẹ Jekọp, sẹyẹ, ikpe 97 ọle ha ye bhi ọne ẹghe nan, ọle bha ka zẹ ọne ẹhi obọ. Ọle da wo rẹtẹ, rẹ sẹbhọ ghe, ọle bhọ da ha viẹ. (Hos. 12:4) Jekọp lẹn ebi erọnmhọn nọnsi Jehova lu uhọnmhọn-emhin sẹ yẹ, bhiriọ, ọle da situa beji ọ ha da sẹ ọle obọ. Beji ẹdẹ ki fẹkẹ ha gbanọan, ọne ẹhi da re obọ so ako-uguẹ nọn ri Jekọp bhi akun. Bhiriọ, ọne uguẹ da sibhi ako nọnsọle re. Ọrẹyiriọ, Jekọp da sẹyẹ si rẹkhan ọne ẹhi. Bhi ọkike ọle, ọne ẹhi da nan erọnmhọn nanlẹn. Ọle da ji ọle lẹn ghe Izrẹl a ki da ha tie ọle.
Oẹ Jekọp ki do fikie bu azagba-uwa nọnsọle. Bhi ukpọwala, Jekọp da daghe Isọ bi ikpia 400 nesọle bu ọle vade. Jekọp ọkpa da khian bu ele. Beji ọle ki rẹ ha sikẹ Isọ, ọle da deuhọnmhọnre nanlẹn igba ihinlọn. Bhiriọ, Isọ da runẹ bu ọle. Ọkpakinọn, ọle bha re emhin okhọn soso mhọnlẹn. Ọle da taan ọbọ nọnsọle a rẹ dede Jekọp! Amẹn eviẹ da si ele veva bhi ẹlo re. Ene emhin nin Jekọp rẹ lu ẹsele nin Isọ bi uwedẹ nin ọle rẹ degbere nanlẹn, da re ọkhọle nọnsi Isọ lọre. Asabọmiẹn izebhudu nin Jekọp rẹman yẹ wo ti ọle bhọ. Jekọp ki da sabọ deba obhio ọle ha ribhi ọfure.
Oẹ Jekọp ki wo ha do rẹ dọ sẹbhi ukpẹdẹ uu nọnsọle. Ọle yẹ wo kuẹlo da ọkakale ebhebhe ne bunbun. Ọkpakinọn, ẹghe bha ha ribhọ nin ọle rẹ ha kiẹ egbe ghe ọle hẹnmhọn nin Jehova la nin ọle rẹ ne ọne ẹhi daan. Ikpe ne bunbun ki gbera, ive nin Jehova ve nanlẹn ghe Izrẹl dẹ kiẹn udede agbaẹbho, da gene munsẹ. (Gen. 28:14) Rẹ deba ọnin, Baibo bhọ yẹ tie Jehova “Osẹnobulua ọsi Jekọp.” (Ex. 3:6) Jesu tobọle bhọ yẹ noo ene ọta nan. Ọle da yọle, “Osẹnobulua ọsi ene nyẹnlẹn ọle [Jehova] khin, ọ iyi ọsi ene yu. Ranmhude, bhi ẹlo nọnsọle, ele rebhe sẹyẹ nyẹnlẹn.” (Luk 20:37, 38) Bhiriọ, Osẹnobulua dẹ riọ Jekọp kpanọ. Bhi agbọn ọsọgbọn, ọle dẹ wo ha nyẹnlẹn khian. Sẹyẹ, ọle i da yẹ ha mhọn ọbalọ soso bhi iẹnlẹn. Ọle ki wo ha sọnyẹnmhẹn khian!
Tie ọne okha bhi Baibo:
Genesis 27:41-45; 31:1-29, 36-55; 32:1–33:16
Inọnta:
Uwedẹ nela Jekọp rẹ re izebhudu man?
Manman Guanọ Otọle
1. Bezẹle nin Jehova da lu ọle nin ihe ọsi ọmọndiọn nọn khẹke Isọ sẹ Jekọp obọ? (w03 10/15 29 ¶2)
2. Be Jehova rẹman Jekọp bhi ebhohiẹ? Be ọnan rẹkpa ọle rẹ lẹn? (w03 10/15 28 ¶3–29 ¶1) 1
Ifoto 1
3. Be re Jekọp rẹọbhọ ghe ọle dẹ miẹn erọnmhọn bhi obọ ọne ẹhi? (w03 10/15 31 ¶1) 2
Ifoto 2
4. Be Jekọp lu nin ọle rẹ gbega azagba-uwa nọnsọle nin ele hẹi deba ibhokhan Kenan ha muobọ? (w95 9/15 21 ¶4, ftn.)
Ria Eria Nyan Emhin Nin Uwẹ Luẹle
Jekọp lẹn sẹ ghe ẹsọn nọnsọle nọn nin ọle rẹ gbeloghe ihuan nesi Leban. (Gen. 31:38-40) Be ene ewanlẹn ẹlẹnan ha rẹ rẹman yẹ ghe ẹmhọn ihuan nesi Jehova ne yi ibhio ele nin ele ko ga rẹtẹ ele? 3
Ifoto 3
Ẹghe nin ofẹn rẹ ha mun Jekọp, ọle da nan erọnmhọn ji Jehova. (Gen. 32:6-12) Be uwẹ miẹn luẹ bhi obọ Jekọp rẹji erọnmhọn nan nan?
Be uwẹ ha rẹ sabọ re egbe khọkhọ Jekọp yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Jekọp le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Be mhan ha rẹ sabọ re egbe khọkhọ Jekọp yẹ sade mhan dọ lẹn kere ghe mhan rahiẹ obhio mhan nin mhan ko ga?
Noo ọne ifoto nan rẹ gbokha ne ribhi Baibo rẹ man azagba-uwa nọnsẹ ẹmhọn Jekọp.