8 JOSẸF
Ọle Bha De Ọbhi Edọnmhẹn
BEJI Josẹf ha wanre, aba ọle nin Jekọp bi Jehova da wo manman hoẹmhọn ọlẹn yẹ ha re ẹlo esili ghe ọle. Ọkpakinọn, ọnin bha rẹman ghe Josẹf bha zẹwẹ miẹn ọkakale bhi iẹnlẹn. Ibhio ọle da he ọle. Ranmhude Josẹf hi ọmọn nin Jekọp ha lu nọnsẹn gbera imọn nesọle nekẹle, ibhio ọle da ha mhọn ikhu da ọle yẹ khọẹkẹ ọle. Ẹkẹ da wo kie manman ha khọ ele bhi ẹghe nin Jehova rẹ rẹman Josẹf bhi ebhohiẹ ghe, ẹdọkpa ibhio ọle dẹ deuhọnmhọnre nanlẹn.
Ẹdọkpa, Beji Josẹf ribhi ikpe 17, aba ọle da je ọle, nin ọle dọ fẹ ibhio ọle ghe bhi eji ele da re ihuan kọn. Ikpẹdẹ ne bunbun ọle gbe bhi odẹ ọle kuẹ sẹbhi enin. Ọle ki sẹbhi eji ele ye, ele da gua mun ọlẹn, yẹ mun ọlẹn fi fiọbhi omin nin amẹn i ye. Ele da lu sẹbhọ ghe, ọle rẹ ha bhii ele, ele bha zẹwẹ fi ehọ ọle bhọ. Arẹmiẹn ele ka re mhanmhanlẹn nin ele rẹ gbe ọle a, ele da fi ọkhọle denọ. Ele da khiẹn ọlẹn nin ẹbho ne do ẹki ne ha gbera bhi enin. Ele ki sẹ uwa, ele da taman Jekọp ghe, elanmhẹn ẹwẹ gbe Josẹf nin ọle manman hoẹmhọnlẹn an. Bhi ọsi ẹmhọanta, elanmhẹn bha gbe Josẹf le. Ene ikpia nan khiẹn ọlẹn nan, da mun ọlen ha khian otọ Ijipt. Bhi enin, ele da khiẹn ọlẹn bọsi igbọn nin Pọtifa nọn wẹnna bhi eguale ọsi Fero.
Ọ ha wo rẹ lẹkhẹ nin Jọsẹf rẹ ha riale ghe, ọsọle wo fo sẹsẹsẹ. Ọkpakinọn, ọle bha lu iriọ. Ọle da wo ha mhọn izebhudu yẹ ha lu eka nin ọle ha sabọ lu. Ọnan bhọ zẹle nin Baibo da yọle ghe, “Jehova ne ọle dia.” Jehova da lu ọle nin emhin rebhe nin Josẹf lu ha kiọnlẹn nanlẹn. Pọtifa da mun emhin rebhe ne ribhi uwa nọnsọle ọle bhi obọ, nin ọle ha gbẹloghe.
Ọkpakinọn, ọle dẹ kẹ kuẹlo da ọkakale. Josẹf da wanre kiẹn okpea nin egbe gba nan, nọn yẹ mhọnse. Ranmhude ọnan, okhuo Pọtifa bha ka re ẹlo si Josẹf bhi egbe re. Ọle bhọ da ji Josẹf lẹn ghe ẹmhọn ọlẹn ti ọle bhọ. Ọle da taman Josẹf yọle: “Ne mẹn nowẹ.” Be Josẹf ha ki lu yẹ nian? Azagba-uwa nọnsọle bhọ i ribhi enin, sẹyẹ, igbọn nin ebeanlẹn noo rẹ lu ebe ghọn ọlẹn Josẹf khin. Ọne okhuo nan mhọn ọne ahu nọn rẹ sabọ re iẹnlẹn khan Josẹf. Ọkpakinọn, Josẹf dẹ be ka nanlẹn? La, ọle dẹ be ha mhọn ọne izebhudu rẹ yọle eye?
Josẹf lẹn ghe, okhuo Pọtifa dẹ sabọ re iẹnlẹn khan ọlẹn, be rẹkpa ọle rẹ sabọ miẹn ghe ọle bha lu ebi okhuo Pọtifa guanọ?
Baibo ji mhan lẹn ghe, “ọle da he.” Josẹf da taman ọne okhuo ghe ọle i da lu emhin nọn sẹriọ da ọdọ ọle nọn manman gbaẹkẹ ọle. Rẹ deba ọnin, Josẹf da ta ene ọta kpataki nan, ọle da yọle: “Be imẹn ha rẹ lu ọne akhailu nan yẹ, yẹ gene rahiẹ Osẹnobulua?” Oyẹẹ nin Josẹf ha mhọn da aba ọle nin Jehova, ọle zẹle nin ọle da sabọ re izebhudu yọle, eye. Ọkpakinọn, okhuo Pọtifa bha ka zẹ Josẹf obọ. Ukpẹdẹ-ukpẹdẹ ọle rẹ wo ha taman Josẹf nọn nanlẹn nowẹ. Ẹdọkpa, beji ọ ha kẹ ọle bi Josẹf ọkpa bhi uwa, ọle da so obọ Josẹf bhi ukpọn yẹ ha yọle: “Ne mẹn nowẹ!” Josẹf da ban ukpọn nọnsọle ọne okhuo bhi obọ yẹ nẹgbe. Ọkpakinọn, okhuo Potifa da re ọne ukpọn mhọn bhi obọ. Ọdọ ọle ki vae, ọle da re ọne ukpọn man ọlẹn, yẹ yọle ghe Josẹf rẹ ha ho nin ọle re idu-idu nanlẹn nowẹ. Ọnan da wo manman re ohu re Pọtifa, bhiriọ, ọle da mun Josẹf ọbhi ighan.
Ighan nan mun Josẹf ọ i wo so ebiuki a. Ẹghe ribhọ nan rẹ mun oẹ nọnsọle ọbhi aban yẹ re ẹlọnmhọn gbanọ urulu nọnsọle. (Ps. 105:17, 18) Josẹf dẹ sabọ ha riale ghe ọsọle wo fo. Jehova be fikekegbe Josẹf? Eye! Ẹghe i ribhọ nin Josẹf rẹ zobọ bhọ rẹ ha mun udu nyan Osẹnobulua. Jehova da nan erọnmhọn nanlẹn. Ọ bha sẹ bue gbe, ọwanlẹn nọn gbẹloghe ọne ighan da re Josẹf ọbhi ihe ọsi ọria nọn gbẹloghe onighan rebhe. Josẹf da wo ha wẹnna kaka bhi ọne ighan nan mun ọlẹn i. Ọle da yẹ wo re izebhudu ha ziẹngbe beji ukpe rẹ ha gbera.
Ranmhude urẹọbhọ bi izebhudu nin Josẹf ha mhọnlẹn, Jehova bha fikekegbe ọle. Akizẹbue, Jehova da re ebe ha sunu bhi ẹghe odalo man Fero bhi ebhohiẹ, yẹ rẹkpa Josẹf rẹ sabọ tare ebi ọne ebhohiẹ mundia nan. Josẹf da taman Fero ghe, bhi ẹkẹ ikpe ihinlọn, ebale dẹ wo kpọfiara, sokpan bhi ikpe ihinlọn ne ha rẹkhan ọlẹn, ukhunmhun ki ha fi. Ọle da yẹ taman Fero ebi ele ha rẹ muegbe ọbhi otọ khẹ ọne ukhunmhun yẹ. Ebi Josẹf ta da wo manman ha ti Fero bhọ. Bhiriọ, ọle da mun ọne ẹsọn Josẹf bhi obọ, nan rẹ koko ebale ọbhi otọ khẹ ukhunmhun nọn vade. Fero da re Josẹf ọbhi udede ihe bhi ọne agbaẹbho. Ọle hi ọnọn ki ha zẹ sikẹ Fero. Ranmhude ọnan, Josẹf da sabọ hinmhin ibhokhan Ijipt bi azagba-uwa nọnsọle bhi ọne ukhunmhun. Ẹghe nin ibhio Josẹf rẹ vae bhi Ijipt dọ dẹ ebale, ele da deuhọnmhọnre nin Josẹf, sokpan, ele bha lẹn ghe obhio ele nin khere nọn. Ọne ebhohiẹ nin Jehova rẹman Josẹf beji ọle ribhi obhokhan, da munsẹ. Ibhio ọle da yẹ rẹman ghe ele fidenọ, ghe eria esili ele ki khin nian. Josẹf nin ele ka rẹ ha khọẹkẹ ọle, ọle ki dọ hinmhin ele, aba ele bi imọn nesele. Ranmhude izebhudu bi urẹọbhọ nin Josẹf ha mhọnlẹn, ọle zẹle nin ọnan da sabọ sunu.
Tie ọne okha bhi Baibo:
Genesis 37:1-36; 39:1-23; 41:1–45:28
Inọnta:
Uwedẹ nela Josẹf rẹ re izebhudu man?
Manman Guanọ Otọle
1. Be mhan miẹn nọn rẹman ghe ebi a tale rẹji Josẹf bhi Ijipt ẹmhọanta nọn? (g 11/10 15 ¶2)
2. Be Josẹf rẹ lẹn yẹ ghe, nan rẹ ne okhuo ọria nowẹ “akhailu” nọn? (Gen. 39:9; w22.08 26 ¶2)
3. Bezẹle nin Jehova da ji Josẹf da ha ribhi ihe kpataki bhi otọ Ijipt? (w96 5/1 11 ¶4) 1
Ifoto 1
4. Arẹmiẹn Josẹf ribhi ikpe 110, be rẹman ghe urẹọbhọ nọnsọle bha beghe? (Gen. 50:25, 26; w07 6/1 28 ¶10-11) 2
Ifoto 2
Ria Eria Nyan Emhin Nin Uwẹ Luẹle
Be uwedẹ nin Josẹf rẹ ne ibhio ọle lu emhin, man uwẹ le rẹji ebi ọkhẹke nin uwẹ rẹ lu emhin yẹ sade ibhio ẹ nin ibha ko ga lu uwẹ khọlọ? (Gen. 45:4, 5; 50:19-21)
Arẹmiẹn eji Josẹf ye wo manman ree bhi eji azagba-uwa nọnsọle ye, ọle da sẹyẹ sun rẹkhan Jehova. Be mhan ha rẹ sabọ re egbe khọkhọ ọle yẹ sade mhan . . .
ribhi isiku? 3
Ifoto 3
khian ẹbho? 4
Ifoto 4
noo ifoni la Kọmputa? 5
Ifoto 5
Be uwẹ ha rẹ sabọ re egbe khọkhọ Josẹf yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Josẹf le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Arẹmiẹn Jehova bha lu ọle nin ọkakale hẹi sẹ Josẹf bhi egbe, ọle yẹ wo rẹkpa ọle rẹ ziẹngbe ele. Fẹ ebi Jehova ha yẹ rẹ rẹkpa uwẹ yẹ.
Be ibhokhan ha rẹ sabọ re egbe khọkhọ Josẹf yẹ, sade ẹbho bha lu ele nọnsẹn?