Họla Jobu Ha Khin?

Okpea ọkpa nọn ga Jehova da ha nyẹnlẹn bhi agbaẹbho ọsi Ọz. Elin ọlẹn hi Jobu. Ọle wo manman fe, sẹyẹ, ọle mhọn azagba-uwa nọn kpọnọ. Ọle mhọn ẹkẹ-ẹjẹjẹ. Iriọ ọle yẹ rẹ rẹkpa ẹbho ne i mhọn emhin, ikhuo nin ọdọ ele yulu bi imọn ne i yẹ mhọn aba bi inẹn. Ranmhude Jobu wo lu emhin ne mhẹn ki be rẹman ghe ọle i da ha mhọn ọnọghọ hiehie?

Jobu bha lẹn ghe Esu fẹkẹ ha ghe ọle. Jehova da taman Esu yọle: ‘Uwẹ daghe Jobu nin ọguọmhandia nọnsẹmhẹn, nin ọria soso i ribhọ nọn diabe ọle bhi otọ agbọn rebhe? Ọle wo ka mhẹn ehọ yẹ lu emhin esili.’ Esu da ki wanniẹn ọlẹn yọle: ‘Ẹmhọanta nọn. Ranmhude uwẹ gbega ọle, uwẹ nan erọnmhọn nanlẹn, sẹyẹ uwẹ rẹkpa ọle rẹ ha mhọn otọ nọn manman kpọnọ bi elanmhẹn ne bunbun zẹle ọle ka uwẹ ehọ. Uwẹ ha miẹn ọlẹn ene emhin nan rebhe, ọle i da yẹ ha ga uwẹ.’ Jehova da ki taman ọlẹn yọle: ‘Uwẹ sabọ rẹ dọnmhẹn Jobu, ọkpakinọn, hẹi gbe ọle a.’ Bezẹle nin Jehova da re otọ nin Esu rẹ dọnmhẹn Jobu? Ọle rẹọbhọ ghe Jobu i da zẹ ọle obọ.

Esu da ki re ọkakale kẹkẹ rẹ dọnmhẹn Jobu. Ọhẹnhẹn, ọle da lu ọle nin ibhokhan Siba dọ ra ẹmena bi jaki nesọle. Ọle da re eranlẹn rẹ gbono ihuan nesi Jobu rebhe a. Usun ọbhebhe ne yi ibhokhan Kadia, da dọ ra kẹtẹkẹtẹ nesọle. A da gbono eguọmhandia nesọle a ne rẹ ha gbẹloghe ene elanmhẹn. Ebe kie sunu bhọ ki khọ nẹ. Ẹghe nin imọn nesi Jobu rẹ ha lu iluemhin, uwa nin ele da ha lu ọle da siẹn gbe ele, bhiriọ, ele rebhe da yu. Ọnan da wo manman ba Jobu bhi egbe, ọrẹyiriọ, ọle da sẹyẹ wo ha ga Jehova.

Esu da sẹyẹ muegbe nin ọle rẹ mun ọkakale ọbhebhe gbe Jobu, bhiriọ ọle da lu ọle nin itẹ vuọn ọlẹn egbe rebhe. Egbe da wo manman ha ba Jobu. Ọle bha lẹn ebezẹle nin ene emhin nan rebhe da ha sunu ji ọle. Ọrẹyiriọ, Jobu da sẹyẹ wo ha ga Jehova. Osẹnobulua da daghe ebi Jobu rẹ ha sun rẹkhan ọlẹn yẹ, ọnan da wo re Jehova ha ghọnghọn.

Esu da gbo je ikpea ea bu Jobu nin ele dọ dọnmhẹn ọlẹn. Ele da taman Jobu yọle: ‘Asabọmiẹn uwẹ lu emhin ebe yẹ re ọle nẹko, ọle zẹle nin Osẹnobulua da ha re oya nin uwẹ.’ Jobu da yọle: ‘Mẹn bha lu emhin ebe soso.’ Ọrẹyiriọ, Jobu da munhẹn ha riale ghe, Jehova hi ọnọn si ọkakale nin ọle ye, sẹyẹ, ọle da yọle ghe Osẹnobulua bha lu ọle nọnsẹn.

Usẹn okpea natiọle Ẹlaihu da wo huẹan ha ka ele ehọ beji ele ha talọ. Ọle da ki taman ele yọle: ‘Ebi ibha rebhe ta bha gba. Jehova kpọnọ gbe, mhan i da sabọ lẹn emhin rebhe nin ọle lu. Ẹghe i ribhọ nin ọle ha rẹ lu emhin ebe. Ọle daghe emhin rebhe, yẹ rẹkpa ẹbho bhi ọnọghọ nin ele ye.’

Jehova da ki taman Jobu yọle: ‘Ji uwẹ ha ye bhi ẹghe nin mẹn rẹ man otọ bi okhun? Bezẹle nin uwẹ da yọle mẹn bha lu nọnsẹn? Uwẹ wo ha talọ, sokpan, uwẹ bha lẹn ebezẹle nin ene emhin nan da ha sunu.’ Jobu da daghe ọle ghe ọle bha lu nọnsẹn, bhiriọ ọle da yọle: ‘Mẹn bha lu nọnsẹn. Mẹn sẹ wo họn ẹmhọn uwẹ khẹ, sokpan, mẹn ki gene dọ lẹn uwẹ nian. Emhin soso i ribhọ nin uwẹ i sabọ lu. Huẹan wowo, hẹi van ranmhude ebi mẹn tale.’

Esu ki dọnmhẹn Jobu fo, Jehova da re egbe dan ọlẹn bhi emianmhẹn nin ọle ha khọnmhọn, yẹ rẹkpa ọle rẹ ha mhọn emhin ne bun gbera emhin nin ọle ka ha mhọnlẹn. Jobu da wo manman tọ yẹ ha ghọnghọn bhi iẹnlẹn. Jehova da nan erọnmhọn nin Jobu ranmhude nin Jobu rẹ hẹnmhọn nanlẹn arẹmiẹn emhin bha lẹkhẹ nanlẹn. Uwẹ dẹ be lu bii Jobu, yẹ wo ha ga Jehova aharẹmiẹn uwẹ loya?