Jehova Bha Ye Josẹf A

Ẹghe nin Josẹf rẹ ha ribhi ighan, Fero nin ojie ọsi Ijipt da bhohiẹ, ọria soso bha sabọ taman ọlẹn ebi ọne ebhohiẹ mundia nan. Ọkpa bhi eguọmhandia nesi Fero da taman ọlẹn ghe, Josẹf dẹ sabọ taman ọlẹn ebi ọne ebhohiẹ mundia nan. Bhiriọ, Fero da jẹje je nan re Josẹf re.

Fero da nọọn ọlẹn yọle: ‘Uwẹ dẹ sabọ taman mẹn ebi ọne ebhohiẹ mundia nan?’ Josẹf da taman Fero yọle: ‘Ebale dẹ wo manman ha ribhi Ijipt bhi ẹkẹ ikpe ihinlọn, sokpan, bhi ikpe ihinlọn ne ha rẹkhan ọlẹn ebale i da ha ribhọ. Zẹ ọria nọn mhọn ẹwanlẹn, nin ọle ha ne ebale ya, beji a da miẹn ghe ohanmhẹn bha gbono ẹbho nesẹ a.’ Fero da yọle: ‘Uwẹ mẹn zẹle! Uwẹ dẹ ha yi ọria ọzeva nọn kpọnọ nẹ bhi Ijipt!’ Be Josẹf rẹ lẹn ebi ebhohiẹ ọsi Fero mundia nan? Jehova rẹkpa Josẹf rẹ lẹn.

Bhi ẹkẹ ikpe ihinlọn, Josẹf da wo ha ne ebale ya. Ọnan ki sunu fo, ukhunmhun da munhẹn ha fi beji Josẹf gene ka ta. Ẹbho da ha na bhi ije rebhe vae dọ ha dẹ ebale bhi obọ ọsi Josẹf. Aba ọle nin Jekọp ki họn ghe ebale ribhi otọ Ijipt, ọle da je imikpea igbe nesọle nin ele dọ dẹ ebale re bhi enin.

Imọn nesi Jekọp ki sẹbhi eji Josẹf ye, ọle da wo re osukpa lẹn ele. Sokpan, ene ibhio ọle bha lẹn ghe Josẹf nọn. Ele da deuhọnmhọnre nin Josẹf beji ọle bhohiẹ bhi eghe nin ọle rẹ ha ribhi obhokhan. Josẹf da ha guanọ nin ọle lẹn si ibhio ọle fidenọ. Ọle da taman ele yọle: ‘Ibha dọ baba agbaẹbho nọnsẹmhan fẹghe. Ibha guanọ nin ibha lẹn eji ọ da wẹghẹ.’ Ele da yọle: ‘Eye! Imikpea 12 mhan khin, otọ Kenan mhan na vae. Ọkpa bhi obhio mhan yu, ọnọn kotọ bhi ẹwẹ mhan nin aba mhan bhi uwa.’ Josẹf da ki yọle: ‘Bha dọ re ọne obhio bha nọn kotọ ji mẹn. Bha ha re ọle re, mẹn ki rẹọbhi ebi bha tale.’ Bhiriọ, ele da fikie bu aba ele bhi uwa.

Ebale nọnsele ki gbo fo, Jakọp da je imọn nesọle fikie Ijipt. Bhi ọne ẹghe nan, ele da re Bẹnjamin nin obhio ele nọn kotọ rẹkhan egbe. Josẹf da ha ho nin ọle dọnmhẹn ibhio ọle, bhiriọ, ọle da re ukpu isiliva nọnsọle ọbhi ẹkẹ ẹkpa ọsi Bẹnjamin nan muno ebale ọi. Ọle ki da yọle ghe ibhio ọle do ọle ukpu re. Ẹghe nin eguọmhandia nesi Josẹf ki rẹ miẹn ọne ukpu bhi ẹkẹ ẹkpa ọsi Bẹnjamin, ọ da wo han ibhio ọle ilo. Ele da bhii Josẹf nin ọle zẹ Bẹnjamin obọ, sokpan, nin ọle re oya nin ele.

Josẹf da ki lẹn ghe, ibhio ọle fidenọ. Josẹf bha yẹ sabọ mun egbe ọle mhọn. Bhiriọ, ọle da gbe eviẹ a. Ọle da yọle: ‘Imẹn hi Josẹf, nin obhio bha. Aba mẹn be yẹ ribhi agbọn?’ Ọnan da wo han ibhio ọle ilo. Josẹf da taman ele yọle: ‘Bha hẹi ji ebi bha lu mẹn le ha ba bha bhi egbe. Osẹnobulua je mẹn re bhi enan, nin imẹn hinmhin bha. Bhi ejayenan nian, bha jẹje dọ re aba mẹn re.’

Ele da fikiẹ uwa dọ taman aba ele emhin eghọnghọn nọn sunu, yẹ mun ọlẹn ha khian otọ Ijipt. Ọ reele nin Josẹf bi aba ọle ki miẹn egbe. Bhi ọne ẹghe nan nian, ele da miẹn isẹhoa rẹ kie ha nyẹnlẹn kugbe.