Mozis Da Zẹ Nin Ọle Rẹ Ga Jehova

Bhi otọ Ijipt, a da ha tie azagba-uwa ọsi Jekọp ibhokan Izrẹl. Ẹghe nin Jekọp bi Josẹf rẹ yu fo, Fero ọbhebhe da munhẹn ha gbẹloghe. Ofẹn da ha mun ọlẹn ghe ibhokhan Izrẹl dẹ mhọn ahu gbera ibhokhan Ijipt. Ranmhude ọnan, ọne Fero da re ibhokhan Izrẹl kiẹn igbọn. Ọle da re ele ha manọn ekẹn nan rẹ bọn uwa, yẹ re ele ha miẹn ẹsọn nọn kaka bhi ugbo. Sokpan, beji ene ibhokhan Ijipt rẹ ha re ibhokhan Izrẹl rẹ wẹnna kaka, iriọ ene ibhokhan Izrẹl rẹ ha bun ọbhọ. Ọnan da wo re ẹkẹ ha khọ Fero, bhiriọ ọle da yọle ghe ibhokhan Izrẹl ha biẹ ọmokpea nan ha gbono ele a. Ria ẹmhọn ebe ọnan ha rẹ ha re ofẹn mun ibhokhan Izrẹl yẹ?

Okhuo ọkpa ribhọ natiọle Jokẹbẹd, obhokhan Izrẹl ọle ha khin. Ọle da biẹ ọmọn okpea nọn wo manman mhọn-ose. Ọle da ha guanọ nin ọle gbega ọne ọmọn, bhiriọ, ọle da mun ọlẹn ọbhi ẹkẹ okhua, yẹ mun ọlẹn he bhi ẹkẹ ilumhun bhi egbegbe Ẹdẹ Nai. Obhio ọne ọmọn nin okhuo natiọle Meriam, da mundia bhi egbe-egbe ọne ẹdẹ ha khẹ ebi ha sunu ji ọle.

Ọmokhuo ọsi Fero ki vae dọ khọa bhi ọne ẹdẹ, ọle da daghe ọne okhua. Ọle da kere ghe ọmọn viẹ bhi ẹkẹ ọle. Ọhan ọne ọmọn da wo ha to ọle. Meriam da nọọn ọlẹn yọle: ‘Mẹn be dọ guanọ okhuo nọn ha ne uwẹ gbẹlọghe ọne ọmọn?’ Ọmọn ọsi Fero ki yọle ehe, Meriam da dọ datie inẹn ọlẹn nin Jokẹbẹd re. Ọmọn ọsi Fero da ki taman Jokẹbẹd yọle: ‘Mun ọne ọmọn nin uwẹ dọ gbẹloghe ọle, imẹn dẹ ha uwẹ osa.’

Ẹghe nin ọne ọmọn ki rẹ wanre, Jokẹbẹd da re ọle bu ọmokhuo ọsi Fero. Ọle da hẹ ọle Mozis, yẹ ha gbẹloghe ọle bii ọmọn nọnsọle. A da wo bẹẹ Mozis wanre bii ọmọn ọsi ojie, bhiriọ, ebi ọ hi ki rẹ khin nin ọle guanọ dẹ sẹ ọle obọ. Ọrẹyiriọ, Mozis bha ye Jehova a. Ọle wo lẹn ghe obhokhan Izrẹl ọle khin, ghe ọle i yi obhokhan Ijipt. Bhiriọ, ọle da zẹ nin ọle rẹ ga Jehova.

Ẹghe nin Mozis ki rẹ ha ribhi ikpe 40, ọle da ha guanọ nin ọle rẹkpa ẹbhọ nesọle. Ẹdọkpa, Mozis da daghe ọle ghe obhokhan Ijipt gbe obhokhan Izrẹl, bhiriọ, ọle da gbe ọne obhokhan Ijipt rẹ sẹbhọ ghe ọne obhokhan Ijipt da yu. Mozis da re ekẹn gue ọle. Fero ki họn ebe sunu, ọle da ha guanọ nin ọle gbe Mozis a. Ọkpakinọn, Mozis da nẹgbe ha khian otọ Midian. Jehova da ha gbẹloghe ọle bhi enin.