Itan

 2 Ọ mundia bhi eje yoyo bhi egbe odẹ,

Bi adanenẹn ha sotie ẹbho.

 3 Ọ ki sibhi enin re, ọ da diọbhi eji ene igeti ye nan da nabhi ọne agbaẹbho,

Bhi enin, ọle da ha sotie ẹbho yọle:

 4 “Ẹbholo, ibha mẹn sotie;

Ibha rebhe mẹn ne talọ.

 5 Ibha ne bha lẹn eji a ye, bha dọ luẹ ebi a rẹ re ẹwanlẹn lu emhin yẹ;

Ibha nin uhuki, bha dọ luẹ ebi bha ha rẹ ha mhọn ilẹn-otọ-emhin yẹ.

 6 Bha ka mẹn ehọ, ranmhude ebe lu uhọnmhọn-emhin mẹn tẹmhọnlẹn,

Ọta nin mẹn ta wo gba;

 7 Ẹmhọanta mẹn wo taman bha riọ,

Ọ i yẹẹ mẹn rẹ re unun mẹn ha bha ohoghe.

 9 Ele rebhe wo dia bhi ẹlo ọsi eria ne mhọn ilẹn-otọ-emhin

Ele yẹ wo gba bhi ẹlo ọsi eria ne mhọn ilẹnmhin.

10 Uwẹ ha miẹn adia nọnsẹmhẹn ọbhi egbe, ọle ha mhẹn gbera ghe, uwẹ dọ ha mhọn isiliva,

Sẹyẹ, uwẹ da ha mhọn ilẹnmhin nọnsẹmhẹn, ọle ha mhẹn gbera ghe, uwẹ mhọn igolu nọn ki sẹ mhẹn nẹ,

11 Ranmhude ẹwanlẹn mhẹn gbera ivie;*

Emhin ne ghanlẹn soso i ribhọ nọn lu uhọnmhọn-emhin gbera ọle.

12 Imẹn nin ẹwanlẹn re ẹwanlẹn lu emhin;

Imẹn mhọn ilẹnmhin, imẹn yẹ sabọ ria eria nọnsẹn.

14 Imẹn mhọn ibhude nọn mhẹn, bi ẹwanlẹn nọn ha sabọ rẹkpa ẹ;

Imẹn mhọn ilẹn-otọ-emhin bi ahu.

15 Imẹn zẹle nin ene ijie da sabọ gbẹloghe nọnsẹn,

Sẹyẹ, imẹn zẹle nin ene ribhi ihe da sabọ gbuhi nọn gbale.

16 Imẹn rẹkpa ene ekhaẹmhọn rẹ gbẹloghe nọnsẹn,

Sẹyẹ, imẹn zẹle nin ene ribhi ihe da sabọ bhuohiẹn nọn gbale.

17 Ene hoẹmhọn mẹn, ele mẹn hoẹmhọn ọlẹn,

Ene guanọ imẹn dẹ miẹn imẹn.

18 Imẹn mhọn ẹfe bi uyi,

Ẹfe bi ua nọn ha tọ, bi ibhuohiẹn nọn gbale ribhi obọ nọnsẹmhẹn.

19 Ebi uwẹ ha miẹn bhi obọ mẹn, ọle mhẹn gbera igolu—igolu nọn ki sẹ mhẹn nẹ,

Sẹyẹ, ọ ghan gbera isiliva nọn ki sẹ mhẹn nẹ.

20 Ebe gbale ọkpa mẹn wo lu,

Imẹn i bhuohiẹn eku;

21 Imẹn dẹ re ẹfe bi ua nin ene hoẹmhọn mẹn,

Imẹn ki re ọle vuọn uwa nin ele da ne emhin ya.

22 Imẹn Jehova rẹ munhẹn ha man emhin,

Tee, imẹn ọle ka wo man rẹ na otọ a de.

23 Rẹ na otọ a de, ọle a rẹ re imẹn ọbhi ihe,

Ehe, bhi ẹghe ọhẹnhẹn, bhi ẹghe nan bhọ bha sẹ rẹ man ọne otọ nan.

24 Bhi ẹghe nan rẹ man mẹn, a bhọ bha sẹ man okpẹdẹ,

Bi ije kẹkẹ nin amẹn da nẹ dagbare.

25 Ọkuẹsẹ a man ene oke ne yoyo bi ene ikuẹkuẹ oke,

Imẹn bhọ ki ka ha ribhọ fo.

26 Ọkuẹsẹ ọle man ọne otọ nan, la udu-ekẹn nin ọle ka man

Bi ene ilunmhun, imẹn bhọ ki ka ha ribhọ fo.

27 Imẹn wo ha ribhi enin ẹghe nin ọle rẹ man* okhun bi emhin ne ribhọ;

Sẹyẹ, imẹn yẹ ha ribhi enin ẹghe nin ọle rẹ vin ughu na bhi eji okpẹdẹ bi okhun da ke egbe re.*

28 Imẹn yẹ ha ribhi enin ẹghe nin ọle rẹ man ene adudu amẹn ne ribhi ideghedeghe,

Bi ẹghe nin ọle rẹ man ene okpamẹn.

29 Imẹn yẹ ha ribhi enin ẹghe nin ọle rẹ taman ọne okpẹdẹ eji ọ ha nẹ sẹ,

Bi ẹghe nin ọle rẹ muno ene ikazi ọsi ọne otọ nan gbọ,

30 Bhi ene ẹghe nan rebhe, imẹn da wo deba ọle ha wẹnna bọsi ọria nọn manman guẹ iwẹnna.

Ukpẹdẹ-ukpẹdẹ ẹmhọn mẹn rẹ wo ha ti ọle bhọ;

Imẹn da wo ha ghọnghọn bhi eji ọle ye ẹghe rebhe;

31 Ọne otọ nin ọle man nin eria da wo re imẹn ha ghọnghọn,

Ẹmhọn eria ne ribhọ da wo manman ha ti mẹn bhọ.

32 Imọn nesẹmhẹn, bha ka mẹn ehọ,

Ranmhude ene re obọ rẹkhan adia nesẹmhẹn dẹ ha ghọnghọn.

33 Bha re ehọ ọbhi adia, beji bha ha da ha wanlan,

Hẹi re ẹlo gbe ọle a hiehie.

34 Eghọnghọn hi ọsi ọria nọn wo ha ka mẹn ehọ;

Ukpẹdẹ-ukpẹdẹ ọria nọn dia iriọ rẹ kẹ vae bhi ununro nọnsẹmhẹn,

Ọle ki wo mundia ha khẹ mẹn;

35 Ọria nọn guanọ mẹn dẹ miẹn iẹnlẹn,

Sẹyẹ, ẹmhọn ọlẹn ki ha ti Jehova bhọ.

36 Ene bha ka mẹn ehọ dẹ miẹn ikuan-egbe,

Sẹyẹ, uu ghọn ene he mẹn.”