Itan
7 Ọmọn nọnsẹmhẹn, re obọ rẹkhan ebi mẹn taman uwẹ,
Uwẹ ha yẹ ne uhi nesẹmhẹn ya bhi ọkhọle.
2 Re obọ rẹkhan adia nesẹmhẹn beji uwẹ ha da ha ribhọ;
Gbega uhi nin mẹn gbe nin uwẹ beji uwẹ rẹ gbega ọmẹnlo nọnsẹ.
3 Ha ye ele re ẹghe rebhe bọsi emhin nin uwẹ gba ọbhi obọ;
Uwẹ ha yẹ kọ ele ọbhi ọkhọle nọnsẹ.
4 Taman ẹwanlẹn yọle: “Obhio mẹn nin okhuo uwẹ khin,”
Uwẹ ha yẹ tie ilẹn-otọ-emhin “obhio mẹn.”
5 Uwẹ ha lu iriọ, ele ki gbega ẹ bhi obọ ọne okhuo nọn sankan an,*
Beji a ha da miẹn ọle bha re ọta nọnsọle lẹlẹ uwẹ ọbhi emhin ebe.
6 Beji mẹn ribhi uwa mẹn,
Imẹn da na bhi windo ha ghe olele,
7 Imẹn da ha ghe usẹn ibhokhan eso ne bha lẹn eji a ye,
Imẹn ki zẹ ghe ele, mẹn da daghe usẹn obhokhan ọkpa bhi ẹwẹ ele nọn i mhọn ẹwanlẹn.
8 Ọle da re gbera diọbhi uwedẹ nan na diọbhi uwa ọsi ọne okhuo nọn sankan an,
Ọle ki zẹ khian, ọle da van obọ diọbhi uwa ọsi ọne okhuo.
9 Ọsemuan ọle rẹ khian ọne okhian nan,
Bhi ẹghe nin ebi rẹ fẹkẹ ha lo.
10 Imẹn da daghe okhuo ọkpa khian bu ọle re,
Ọle da muegbe bii agbilẹ, ẹlo ọle bha lọre bhi uhọnmhọn.
11 Ọle sabọ wo tue unun; ọle da wo ha talọ fiara-fiara.
A i gbo miẹn ọlẹn bhi uwa.
12 Ọle sabọ rẹ deba uwẹ ha ribhi enan nian, ọkuẹsẹ uwẹ lẹn ebe sunu, uwẹ ki ke ọle re bhi ije ebhebhe,*
Ẹkhokho ọkpa a da miẹn ọlẹn.
13 Ọle da gba ọne usẹn okpia mun mhọn yẹ mun ọle unun fiofio;
Ọle da lu ẹlo kpai bhi uhọnmhọn yẹ taman ọlẹn yọle:
14 “Imẹn sha zẹ izọese ọsi ọfure.
Imẹn mun ive nesẹmhẹn sẹ ẹlẹnan.
15 Ọnan bhọ zẹle nin mẹn da bu ẹ re,
Nin mẹn da guanọ ẹ yẹ miẹn ẹn!
16 Imẹn re ukpọn ne mhọnse rẹ wa ibẹd nọnsẹmhẹn fo,
Otọ Ijipt a da ne ene ukpọn linẹn re.
17 Imẹn fie emhin nọn viohin nan re mai,* alo,* bi sinamọn* lu ọbhi ibẹd* nọnsẹmhẹn.
18 Vae nin mhan dọ re oyẹẹ man egbe sẹbhi ikhọnlẹn rẹ sẹ ẹdẹwe;
Ji mhan dọ ne egbe nowẹ,
19 Ọdọ mẹn i ribhi uwa
Ọle khian ẹbho nọn manman ree.
20 Ọle mun ẹkpa igho rẹkhan egbe,
Uki bha da gba fo, ọle i da vae.”
21 Ọle da wo hiẹ ọle.
Ọle da re ọta nọnsọle rẹ lẹlẹ ọle ọbhi emhin ebe.
22 Ọle da wo re osukpa rẹkhan ọlẹn bii ẹmena nan mun khian eji a ha da gbe ọle a,
Tee, bọsi uhuki nan khian la khan ọbhi aban, yẹ re oya nan,
23 Bhi ọkike ọle, a da re ufẹnmhẹn rẹ ha ọle bhi ibẹn;
Ọle bha lẹn ghe, ebi ọle lu nan dẹ gbe ọle uhọnmhọn, beji afianmhẹn nọn re ẹjẹje nabhi ufi nan ke khẹ ọle rẹ re uhọnmhọn fia.
24 Imọn nesẹmhẹn, bha ka mẹn ehọ;
Bha re ehọ ọbhi ebi mẹn taman ibha.
25 Hẹi ji ọne okhuo lẹlẹ uwẹ ọbhi emhin ebe.
Hẹi rẹkhan ọlẹn,
26 Ranmhude, ẹbho ne bunbun sẹ wo re uhọnmhọn ọbhọ bhi obọ ọle,
Tee, ẹbho nin ọle sẹ gbono a i yi abhiẹ.*
27 Idin* ẹbho ne yo uwa nọnsọle da ke egbe ele re;
Tee, uu ele miẹn bhọ.