Itan
9 Ẹwanlẹn ọsaje bọn uwa nọnsọle fo;
Ọle fi ikazi ihinlọn ba bhi ọne uwa.
2 Ọle gbe elanmhẹn nọnsọle mun ọbhi otọ fo;
Ọle re emhin gua anyọn nọnsọle;
Ọle muno ebale ọbhi uke itebu nọnsọle.
3 Ọle je eguọmhandia nesọle nin ikhuo dagbare
Nin ele diọbhi eje yoyo bhi ọne agbaẹbho dọ ha sotie ẹbho yọle:
4 “Ọria nọn hi ki rẹ khin nọn bha lẹn eji a ye vae bhi enan.”
Ọle* da ha taman ẹbho ne i wanlan yọle:
5 “Bha vae, bha dọ le ebale nọnsẹmhẹn.
Bha yẹ deba mẹn da anyọn nin mẹn re emhin gua.
6 Bha hẹi yẹ lu emhin bii eria ne bha lẹn eji a ye, beji bha ha da ha nyẹnlẹn;
Bha wo ha lu emhin bii eria ne wanlan.”
7 Ọnọn re adia nin ọria nọn i miẹn adia ọbhi egbe, dẹ miẹn ẹkhọle bhọ,
Sẹyẹ, ọria nọn hi ki rẹ khin nọn gbuhi nin ọria ebe, dẹ miẹn ọbalọ bhọ.
8 Hẹi re adia nin ọria nọn i miẹn adia ọbhi egbe, nin ọle hẹi ha khọẹkẹ ẹ.
Sokpan gbuhi nin ọria nọn wanlan, ọle ki hoẹmhọn ẹn.
9 Uwẹ ha man ọria nọn wanlan emhin, ọle ki manman ha wanlan.
Sẹyẹ, uwẹ ha man ọria esili emhin, ọle ki manman ha mhọn ilẹnmhin.
10 Ọria dẹ munhẹn ha wanlan sade ọle mun ofẹn Jehova,
Sẹyẹ, ọria nọn mhọn ilẹnmhin ọsi Ọnọn Khia Nẹ, ọle hi ọria nọn mhọn ilẹn-otọ-emhin.
11 Imẹn dẹ hian ikpẹdẹ ne bunbun ba ikpẹdẹ nesẹ,
Sẹyẹ, imẹn ki hian ikpe ne bunbun ba iẹnlẹn nọnsẹ.
12 Uwẹ da ha wanlan, egbe ẹ uwẹ lu nọnsẹn,
Ọkpakinọn, ahamiẹn ọria nọn i miẹn adia ọbhi egbe uwẹ khin, uwẹ ọkpa ki loya nọn ha nabhọre.
13 Okhuo nọn i wanlan sabọ wo tue unun.
Ọle bha lẹn emhin soso, sẹyẹ, emhin soso i ri ọle bhi uhọnmhọn.
14 Ọle ki re aga dotua bhi ununro ọsi uwa nọnsọle,
Nọn ribhi eje yoyo bhi ọne agbaẹbho,
15 Ọle ki na bhi enin ha sotie ẹbho ne gbera,
Ehe, ẹbho ne khian ọsele. Ọle ki ha yọle:
16 “Ọria nọn hi ki rẹ khin nọn bha lẹn eji a ye vae bhi enan.”
Ọle* da ha taman ẹbho ne i wanlan yọle:
17 “Amẹn nan do wọn mhẹn bhi unun,
Sẹyẹ, ebale nan le bhi ẹkhokho mhẹn bhi unun.”