Itan
5 Ọmọn nọnsẹmhẹn, re ehọ ọbhi ọta ẹwanlẹn nọnsẹmhẹn.
Uwẹ ha gbehọkotọ nọnsẹn beji uwẹ ha da sabọ lẹn ikikẹ bhi ebe mhẹn bi ebe i mhẹn,
2 Bhiriọ, uwẹ ki sabọ ha ria eria nọnsẹn
Sẹyẹ, ọta ne si ẹ bhi unun re ki rẹman ghe uwẹ mhọn ilẹnmhin nọn gbale.
3 Ọta ọsi okhuo nọn sankan an* mhẹn bhi ehọ, beji amẹn-ẹlọn rẹ mhẹn bhi unun,
Sẹyẹ, ọta nọnsọle lọ bhi egbe gbera abhili nan rẹ gbo.
4 Bhi ọkike ọle, ene lu rẹkhan ebi ọle tale ki dọ kere ghe, inian ọne okhuo riala bii alobi*
Sẹyẹ, unun nọnsọle mun bii agbada nan fan bhi obọ veva.
5 Uu a miẹn bhi uwedẹ nọnsọle.
Ọnọn rẹkhan uwedẹ nọnsọle, dẹ ke egbọle re bhi Idin.*
6 Ẹmhọn iẹnlẹn bha rẹtẹ ọle.
Ọle bibi yulu a,* ọle bha lẹn eji ọle ye.
7 Imọn nesẹmhẹn, bha ka mẹn ehọ
Bha hẹi re obọ gbera ebi mẹn taman bha.
8 Re egbe nẹ bhi eji ọle ye;
Hẹi sikẹ ununro nọnsọle hiehie,
9 Nin uwẹ hẹi dọ mun ekpẹn nọnsẹ fia
La re ẹdagbọn iẹnlẹn nọnsẹ rẹ loya;
10 Sẹyẹ, nan hẹi dọ miẹn ghe uwẹ miẹnsọn kua nin ẹrẹle*
La ene bha sẹ eji uwẹ da miẹnsọn, ele ki dọ le elele nọn ribhọ.
11 Ahamiẹn uwẹ bha lu iriọ, uwẹ dẹ re egbe ọmanlẹn rẹ lu akhiẹ
Ẹghe nan ha rẹ miẹn ghe egbe i yẹ ri uwẹ bhọ, nin ahu ha rẹ fo uwẹ bhọ
12 Ẹghenin, uwẹ ki yọle: “A ka rẹ taman mẹn, sokpan imẹn bha ki re ehọ ọbhi ude!
Imẹn bha miẹn adia nan re nin mẹn ọbhi egbe!
13 Imẹn bha re ehọ ọbhi ebi eria ne ha man mẹn emhin ta,
Imẹn bha ji uhi nin ele gbe da na mẹn bhi ehọ.
14 Eo! Mẹn gbe egbe a sẹsẹsẹ,
Mẹn gbe egbe a bhi isira ẹbho hoho.”
15 Ha wọn bhi amẹn nọn ribhi okodo* nọnsẹ ọkpa
Ehe, amẹn nọn sẹn an nọn ribhi omin nọnsẹ.
16 Uwẹ dẹ be dọ ha gha amẹn nọnsẹ nin ẹbho bhi ughe,
La dọ ha gha ọle nin ẹbho bhi ogbakha?
17 Okhuo ẹ ọkpa uwẹ ha deba gha ọle,
Hẹi deba ọria ọbhebhe gha ọle.
18 Imẹn bhii nin amẹn nọn ribhi okodo nọnsẹ ha mhẹn,
Imẹn yẹ bhii nin uwẹ deba okhuo nin uwẹ re egbe usẹn re ha ghọnghọn,
19 Obhi ẹruẹ* nọn mhọnse ọle khin, obhi elanmhẹn nan la biẹ.
Ji inyẹnlẹn nọnsọle ha re egbe mun uwẹ ẹghe rebhe.
Sẹyẹ, ji oyẹẹ nọnsọle wo re uwẹ ha ghọnghọn.
20 Bhiriọ, ọmọn nọnsẹmhẹn, ọ bha khẹke nin uwẹ ji ẹmhọn okhuo nọn sankan an ha vẹ uwẹ bhi uhọnmhọn,
La nin uwẹ dọ dede ọne okhuo nọn miẹn okan yẹ gba ọle mun mhọn.
21 Jehova daghe uwedẹ nin ẹbho rebhe rẹ lu emhin;
Ọle fẹ emhin rebhe nin ele lu ghe.
22 Emhin ebe nin ọria ebe lu dẹ mun ọlẹn bii ufi,
Sẹyẹ, ọ ki gbanọ ọle beji a rẹ re uri gba emhin re ọbhi otọ.
23 Ọle dẹ re uhọnmhọn bhọ, ranmhude nin ọle bha rẹ re ehọ bhi ude
Sẹyẹ, ọ ki ha bibi khian ranmhude nin ọle rẹ ha gbe uhuki.