Itan
4 Imọn nesẹmhẹn, bha re ehọ bhi adia nọnsi aba bha;
Bha kaehọ nọnsẹn beji bha ha da ha mhọn ilẹn-otọ-emhin,
2 Ranmhude, adia nọn gbale imẹn ha re nin bha;
Bha hẹi re obọ gbera uhi nin mẹn gbe nin bha.*
3 Ọmọn esili mẹn ha khin rẹji aba mẹn,
Sẹyẹ, inẹn mẹn wo manman hoẹmhọn mẹn.
4 Aba mẹn da man imẹn emhin, yẹ taman mẹn yọle: “Ji ebi mẹn man uwẹ le ha ribhi ọkhọle nọnsẹ.
Re obọ rẹkhan adia nesẹmhẹn nin uwẹ da tọ.
5 Ha mhọn ẹwanlẹn, ha mhọn ilẹn-otọ-emhin.
Hẹi ye ene emhin nin mẹn taman uwẹ a, wo ha re obọ rẹkhan ele.
6 Ahamiẹn uwẹ mhọn ẹwanlẹn, ọ ki gbega ẹ.
Hoẹmhọn ọlẹn, ọ dẹ gbega uwẹ.
7 Ẹwanlẹn hi ebe lu uhọnmhọn-emhin nẹ, bhiriọ, ha mhọn ẹwanlẹn,
Sẹyẹ, rẹ deba emhin rebhe nin uwẹ da ha mhọn, dọnmhegbe rẹ ha mhọn ilẹn-otọ-emhin.
8 Manman ji ẹwanlẹn ghan bhi ẹlo nọnsẹ, ọ dẹ tuẹn uwẹ okhun.
Uwẹ ha miẹn ọlẹn ọbhi egbe, ọ ki mun ekpẹn uwẹ ọbhi egbe.
9 Ọ dẹ re uwẹ ha mhọnse bii ọria nọn mun ukparu nan re aroro do yọ;
Ọ dẹ re uwẹ ha mhọnse beji ukparu-ojie rẹ re ojie mhọnse.”
10 Ka mẹn ehọ, ọmọn nọnsẹmhẹn, uwẹ ha yẹ miẹn adia nesẹmhẹn ọbhi egbe,
Bhiriọ, uwẹ ki tọ.
11 Imẹn dẹ man uwẹ emhin, beji uwẹ ha da ha mhọn ẹwanlẹn;
Imẹn ki yẹ man uwẹ emhin beji uwẹ ha da ha lu ebe gbale.
12 Uwẹ i da dua oẹ sade uwẹ khian;
Sẹyẹ, uwẹ a ha runẹ, uwẹ i da dere.
13 Re ehọ bhi ude;* hẹi re obọ gbera ele a.
Mun ọlẹn mhọn nọnsẹn, ranmhude, ọ dẹ re iẹnlẹn nin uwẹ.
14 Hẹi rẹkhan eria ebe khian,
La nin uwẹ re egbe khọkhọ uwedẹ nin ele rẹ lu emhin.
15 Rẹban ele, hẹi ka ele ehọ;
Re egbe nẹ bhi uwedẹ nọnsele, uwẹ ha rẹkhan uwedẹ ọbhebhe.
16 Ele i sabọ wẹ sade ele bha sẹ lu emhin ebe.
Ele i miẹn owe bhi ẹlo sade ele bha sẹ lu ọria ọkhọlọ.
17 Emhin ebe nin ele lu ele rẹ le ebale,
Sẹyẹ, okhọn bi ugbele ele rẹ miẹn ebi ele rẹ da anyọn.
18 Inian uwedẹ ọsi ẹbho ne lu ebe gbale diabe ẹfua nọn zegbere sade ẹdẹ we de
Ọ ki fẹkẹ ha gbanọn an khere-khere, rẹ dọ sẹbhi ẹghe nin ijerebhe ha rẹ gbanọn an sẹsẹsẹ bhi ọsodanmhẹn.
19 Inian eria ebe diabe ẹbho ne khian bhi uwedẹ nọn so ebiuki a;
Ele i daghe ebe muno ele gbe a.
20 Ọmọn nọnsẹmhẹn, re ehọ ọbhi ọta nọnsẹmhẹn,
Uwẹ ha gbehọkotọ nọnsẹn bhi ebi mẹn taman uwẹ.
21 Wo ha ye ele re;
Kọ ele bhi ọkhọle nọnsẹ,
22 Ranmhude, e dẹ re iẹnlẹn nin ẹbho ne miẹn ọlẹn ọbhi egbe
Sẹyẹ, e ki re egbedanmhin nin ele.
24 Hẹi re unun nọnsẹ ha bha ohoghe,
Sẹyẹ, hẹi ha zẹ eku.
25 Wo ha ghe eji uwẹ khian,
Ehe, mun ẹlo ọbhi eji uwẹ khian.
26 Ne emhin ne ha de uwẹ idobolo sibhi uwedẹ re,*
Uwẹ ha lu iriọ, emhin soso i da dua uwẹ oẹ.
27 Hẹi diọbhi obera la obọ agobọ.
Re egbe nẹ bhi emhin ebe.