Itan
3 Ọmọn nọnsẹmhẹn, hẹi ye emhin* nin mẹn man uwẹ le a,
Huẹan re obọ rẹkhan adia nesẹmhẹn,
2 Ranmhude, uwẹ ha lu iriọ, uwẹ ki tọ,
Uwẹ ki khae, sẹyẹ, ọfure ki kiẹn ọsuwẹ.
3 Wo ha re ahoẹmhọn-egbe nọn i beghe man, uwẹ ha yẹ wo ha ta ẹmhọanta.
Sẹn ele bhi urulu bii ileghe;
Uwẹ ha yẹ kọ ele ọbhi ọkhọle nọnsẹ.
4 Uwẹ ha lu iriọ, Osẹnobulua bi eria ki ha re ẹlo esili ghe uwẹ
Rẹ deba ọnin, ele ki ha ghe uwẹ bii ọria nọn mhọn ilẹn-otọ-emhin.
5 Re ọkhọle nọnsẹ rebhe rẹ mun udu nyan Jehova,
Hẹi mun udu nyan ẹwanlẹn nọnsẹ.
6 Ji Osẹnobulua da ha dia uwẹ bhi ebi uwẹ lu rebhe,
Bhiriọ, ebi uwẹ lu ki kiọnlẹn.
7 Hẹi ha riale ghe uwẹ wanlan nẹ.
Ha mun ofẹn Jehova, uwẹ ha re obọ sibhi emhin ebe re.
8 Uwẹ ha lu iriọ, egbe ki daan ẹn
Sẹyẹ, uwẹ* ki rolo a.
9 Re emhin ne ghanlẹn nesẹ rẹ khuẹnmhẹn Jehova,
Rẹ sẹbhi emhin ọhẹnhẹn nesẹ;*
10 Uwẹ ha lu iriọ, ebale ki vuọn kua bhi uwa nin uwẹ da ne ebale ya,
Sẹyẹ, anyọn ọsọgbọn i da ka bhi eji uwẹ da koko anyọn.
11 Ọmọn nọnsẹmhẹn, hẹi re ẹlo gbe adia nọnsi Jehova a,
Hẹi ha khọẹkẹ sade ọle gbe uwẹ bhi esankan,
12 Ranmhude, ẹbho nin Jehova hoẹmhọnlẹn, ele ọle gbe bhi esankan,
Beji aba rẹ gbe ọmọn nin ọle hoẹmhọnlẹn bhi esankan.
13 Ọria nọn mhọn ẹwanlẹn dẹ ha ghọnghọn
Iriọ yẹ nọn rẹji ọria nọn mhọn ilẹn-otọ-emhin;
14 Nin ọria rẹ ha mhọn ẹwanlẹn mhẹn gbera nin ọria rẹ ha mhọn isiliva,
Sẹyẹ, nin ọria rẹ miẹn ọlẹn bhi elele mhẹn gbera nin ọria rẹ ha mhọn igolu.
15 Ọle ghan nẹ ivie;
Emhin soso i ribhọ nin uwẹ guanọ nọn ghan sẹ bii ọle.
16 Uwẹ a ha mhọn ẹwanlẹn, uwẹ ki tọ;
Uwẹ ki yẹ ha mhọn afe bi uyi.
17 Uwẹ a ha mhọn ẹwanlẹn, uwẹ ki ha ghọnghọn,
Sẹyẹ, uwẹ ki ha mhọn ọfure bhi iẹnlẹn nọnsẹ.
18 Oran ọsi iẹnlẹn, ọle ẹwanlẹn khin, ẹbho ne mhọn ọlẹn, dẹ ha nyẹnlẹn,
Sẹyẹ, ele ki wo ha ghọnghọn.
19 Ẹwanlẹn Jehova rẹ man otọ ọbhi eji ọle manlẹn ọi nọn ha ye.
Sẹyẹ, ẹwanlẹn ọle rẹ man okhun ọbhi eji ọle manlẹn ọi nọn ha ye.
20 Ẹwanlẹn nọnsọle ọle rẹ wa ọne okpẹdẹ yi eva
Ọne ẹwanlẹn ọle yẹ rẹ lu ọle nin ebhu ha bhu.
21 Ọmọn nọnsẹmhẹn, hẹi yele ene emhin nan* an.
Gbega ẹwanlẹn ọsaje, uwẹ ha yẹ ha ria eria nọnsẹn;
22 Ele dẹ re iẹnlẹn nin uwẹ,
Sẹyẹ, ele ki diabe ileghe ne mhọnse nin uwẹ sẹn ọbhi urulu;
23 Bhiriọ, ẹbe i da ruan ẹn,
Sẹyẹ, uwẹ i da dua oẹ.
24 Uwẹ i da ha babegbe sade uwẹ nowẹ;
Uwẹ ha nowẹ, uwẹ ki wẹ sotọ.
25 Emhin soso i da ha re ukpudu hian uwẹ,
La nin uwẹ ha mun ofẹn emhin-ọhanabẹ nọn ha sunu ji eria ebe.
26 Ranmhude, Jehova dẹ ha yi ọne uwẹ re udu tẹ;
Ọle i da ji uwẹ da dere.
27 Rẹkpa ẹbho ne guanọ urẹkpa
Sade uwẹ mhọn ebi ele guanọ;*
Hẹi si ele akhaẹn.
28 Bhiriọ, ahamiẹn uwẹ mhọn ebi ibo ẹ guanọ, wo re nanlẹn,
Hẹi taman ọlẹn yọle: “Yo nin uwẹ vae, imẹn dẹ re nin uwẹ akhọ.”
29 Hẹi mhanmhan emhin ebe khẹ ibo ẹ
nọn i babegbe bhi obọ ẹ.
30 Hẹi wo gheghe dotua ha ne ọria van
Sade ọle bha lu uwẹ emhin ebe soso.
31 Hẹi ji uwedẹ ọsi ọria nọn khọn okhọn-okhọn ha yẹẹ ẹ
La nin uwẹ re egbe khọkhọ ọle bhi uwedẹ soso,
32 Ranmhude, Jehova he ọria nọn lu emhin ebe,
Ọkpakinọn, ọria nọn lu emhin esili ọle ne mun obọ.
33 Jehova nan erọnmhọn ọbhi uwa ọsi ọria nọn lu ebe gbale,
Sokpan, azagba-uwa ne lu ebe i mhẹn, ọle fi ele unun.
34 Osẹnobulua dẹ re ẹkhọle lu eria ne re ẹbho zọojiẹ,
Ọkpakinọn, ọle dẹ lu ẹbho ne mhọn idegbere nọnsẹn.
35 A dẹ mun ekpẹn nin ọria nọn wanlan,
Ọkpakinọn, ọria nọn i wanlan dẹ miẹn ẹkhọle bhi egbe.