Itan
2 Ọmọn nọnsẹmhẹn, re obọ rẹkhan ebi mẹn taman uwẹ,
Uwẹ ha yẹ ne uhi nesẹmhẹn ya bhi ọkhọle.
2 Ha re ehọ ọbhi ọta ẹwanlẹn,
Uwẹ ha yẹ tan ọkhọle a, beji uwẹ ha da sabọ lẹn ikikẹ bhi ebe mhẹn bi ebe i mhẹn;
3 Wo ha bhii nan rẹkpa uwẹ rẹ ha mhọn ilẹn-otọ-emhin
Bi nan rẹkpa uwẹ rẹ ha mhọn ẹwanlẹn;*
4 Wo ha guanọ ọlẹn beji a rẹ guanọ isiliva,
Yẹ wo ha guanọ ọlẹn beji a rẹ guanọ emhin ne ghanlẹn;
5 Uwẹ ha lu ene emhin nan, uwẹ ki lẹn ebi a re ọle ta nan rẹ ha mun ofẹn Jehova,
Sẹyẹ, uwẹ ki dọ ha mhọn ilẹnmhin nọnsi Osẹnobulua.
6 Ranmhude, Jehova tobọle hi ọnọn re ẹwanlẹn nin ọria;
Unun nọnsọle ilẹnmhin bi ilẹn-otọ-emhin* na vae.
7 Obọ Osẹnobulua a da miẹn ẹwanlẹn ọsaje. Ọle re nin eria nin uwedẹ nọnsele diale;
Ugue ọle khin rẹji ẹbho ne wo ha ga ọle.
8 Ọle gbẹloghe uwedẹ iẹnlẹn ọsi ẹbho ne lu ebe gbale,
Ọle dẹ gbẹloghe iẹnlẹn ọsi eria ne sun rẹkhan ọlẹn.
9 Sẹyẹ, uwẹ ki lẹn ebi a re ọle ta nan rẹ ha lu ebe gbale, ebe diale, bi ebe khẹke,
Uwẹ bhọ ki lẹn emhin rebhe ne mhẹn.
10 Ahamiẹn uwẹ dọ ha wanlan,
Nin ilẹnmhin da munhẹn ha ti uwẹ bhọ,
11 Uwẹ ki sabọ ha ria eria nọnsẹn, sẹyẹ, ọ ki ha gbega ẹ,
Rẹ deba ọnin, ilẹn-otọ-emhin ki ha gbega ẹ,
12 Ele ki miẹn uwẹ fan bhi uwedẹ nọn i mhẹn,
Yẹ hinmhin uwẹ bhi obọ ọria nọn ta ọta ne bha gba,
13 E dẹ hinmhin uwẹ bhi obọ eria ne sibhi uwedẹ ẹfua re
Dọ ha khian bhi uwedẹ ebiuki,
14 E dẹ hinmhin uwẹ bhi obọ eria nin emhin ebe ti ele bhọ,
Eria ne ghọnghọn ọbhi ọkhọlọ,
15 E dẹ hinmhin uwẹ bhi obọ eria nin obọ nọnsele bha khia
Bi bhi obọ eria nin ẹmhọanta i ri ele bhi unun.
16 Ẹwanlẹn dẹ gbega uwẹ bhi obọ ọne okhuo nọn sankan an,*
Ọ dẹ gbega uwẹ nin ọne okhuo hẹi re ọta nọnsọle lẹlẹ uwẹ ọbhi emhin ebe.
17 Ọne okhuo da zẹ ọdọ ọle obọ, ọdọ nin ọle re egbe usẹn bọ
Yẹ fikekegbe akovẹn nọnsi Osẹnobulua;
18 Uwedẹ nan na diọbhi isọle dẹ re ọria ke egbe ọle re bhi ẹkẹ idin,
Ehe, uwedẹ nesọle dẹ re ọria ke egbe ọle re bhi ẹwẹ ẹbho ne yuno.
19 Ọria i ribhọ nọn nanlẹn nowẹ nọn ha miuhọnmhọn rẹ kiere,
Ele i da yẹ ha nyẹnlẹn.
20 Bhiriọ, rẹkhan uwedẹ ọsi eria ne mhẹn,
Uwẹ ha yẹ debhi uwedẹ ọsi ẹbho ne lu ebe gbale a,
21 Ranmhude, eria ne wo ha lu ebe gbale ọkpa ha nyẹnlẹn bhi ọne otọ nan,
Sẹyẹ, eria nin okan i ne dẹ wo ha ribhọ rẹ ha khian.
22 Ọkpakinọn, a dẹ fuẹn eria ne i mhẹn sibhi ọne otọ nan re,
Sẹyẹ, a ki gbono eria ebe rebhe a.