Itan
1 Solomọn nin ojie ọsi Izrẹl nin ọmọn nọnsi Devid, ọle kpa ene itan nan:
2 Ene itan nan dẹ sabọ re ẹwanlẹn nin ọria, yẹ dia ọria;
E dẹ sabọ rẹkpa ọria rẹ lẹn ọta ẹwanlẹn;
3 E dẹ man uwẹ emhin beji uwẹ ha da ha mhọn ilẹn-otọ-emhin,
Ha lu ebe gbale, ha zẹ emhin nọn mhẹn, yẹ ha bhuohiẹn nọn gbale;
4 E dẹ rẹkpa ọria nọn i wanlan rẹ ha wanlan;
E dẹ rẹkpa usẹn obhokhan rẹ ha mhọn ilẹnmhin, yẹ sabọ ha ria eria nọnsẹn.
5 Ọria nọn wanlan gbehọkotọ beji ọle ha da luẹ emhin ne bunbun;
Okpia nọn mhọn ilẹn-otọ-emhin miẹn adia nọn gbale* ọbhi egbe
6 Ọria nọn sẹ iriọ ki lẹn otọ itan bi ọta ne bha lẹkhẹ nan rẹ lẹn otọle,
Ọle ki lẹn ọta nin eria ne wanlan tale, bi ido nọnsele.
7 Ọria dẹ munhẹn ha mhọn ilẹnmhin sade ọle mun ofẹn Jehova.
Eria ne i mhọn ẹwanlẹn i re ehọ ọbhi ude bi ọta ẹwanlẹn.
9 Ene adia nan dẹ diabe ukparu-ojie nọn mhọnse bhi uhọnmhọn nọnsẹ
Bi ileghe nọn mhọnse bhi urulu nọnsẹ.
10 Ọmọn nọnsẹmhẹn, ahamiẹn eria ebe ho nin ele lẹlẹ uwẹ ọbhi emhin ebe, hẹi ka.
11 Ele sabọ taman uwẹ yọle: “Rẹkhan mhan.
Ji mhan dọ rẹkhẹ ẹbho bhi uwedẹ, yẹ gbe ele a.
Mhan ki gheghe rẹko khẹ ẹbho ne bha lu mhan emhin soso.
12 Mhan ki so ele lọlọ beji Idin* rẹ so ọria lọlọ,
Ehe, mhan ki gbe ele khuelo sẹsẹsẹ, beji a rẹ re ọria tọ bhi idin.
13 Mhan ki gbe ele miẹn ele emhin ne ghanlẹn nesele;
Mhan ki hẹ ene emhin diọbhi uwa nọnsẹmhan.
14 Dọ deba mhan,
Mhan dẹ gha ene emhin nin mhan ha do mun ẹlo-ẹlo.”*
15 Ọmọn nọnsẹmhẹn, hẹi rẹkhan ele.
Re egbe nẹ bhi eji ele ye,
16 Okhian kẹ ele rẹ dọ lu emhin ebe;
Ọ ghọn ele rẹ dọ gbugbele.
17 Ẹghe ọria gheghe riia sade ọle sira afianmhẹn ha ruẹ ufi khẹ ọle.
18 Ọnin zẹle nin ele da rẹko khẹ ọria nin ele ho nin ele gbe a;
Ehe, ele rẹko khẹ ẹbho beji ele ha da gbono ele a.
19 Inian ẹbho ne do ẹki eku rẹ lu emhin,
Ọne ẹki eku nin ele do nan, dẹ miẹn ele uhọnmhọn.*
20 Ẹwanlẹn ọsaje so dagbare bhi ughe.
Ọ wo ha so dagbare bhi ogbakha.
21 Ọ so dagbare bhi egbe ukhuo nin ẹbho da na-yọ-na-re.
Bhi odalo ene igeti ọsi ọne agbaẹbho, ọ da ha so yọle:
22 “Ibha ne bha lẹn eji a ye, ẹdẹla bha ha munhẹn dọ hoẹmhọn ilẹnmhin?
Ibha ne re ẹbho zọojiẹ, ẹghela bha ha rẹ zobọ bhọ rẹ ha re ẹbho zọojiẹ?
Ibha ne i mhọn ẹwanlẹn, ẹghela ilẹnmhin ha rẹ munhẹn ha ti bha bhọ?
23 Ibha ha miẹn adia nọnsẹmhẹn ọbhi egbe,
Imẹn ki biri ẹlinmhin nọnsẹmhẹn nyan bha;
Imẹn ki yẹ rẹkpa bha rẹ lẹn ọta nọnsẹmhẹn.
24 Ọkpakinọn, imẹn rẹ tie bha, ibha bha wanniẹn mẹn,
Arẹmiẹn mẹn niẹn obọ a nin mẹn rẹ rẹkpa bha, ibha bha fi ehọ mẹn bhọ,
25 Ibha da re ẹlo gbe adia nesẹmhẹn rebhe a,
Sẹyẹ, ibha bha ka re ehọ ọbhi ibhude nin mẹn re nin bha.
26 Ranmhude ọnan, imẹn dẹ yẹ jiẹ bha sade ẹbe ruan bha;
Imẹn ki rẹ bha zọojiẹ sade emhin nin bha mun ofẹn ọlẹn sunu ji bha,
27 Ehe, ẹghe nin emhin nin bha mun ofẹn ọlẹn ha rẹ dekhun bha bọsi efi,
Ẹghe nin emhin ebe ha rẹ ruan bha bọsi okpahoho,
Bi ẹghe nin ọbalọ bi ọkakale ha rẹ dekhun bha.
28 Ele ha sotie mẹn bhi ọne ẹghe nin, imẹn i da wanniẹn ele;
Ele ki wo ha guanọ mẹn, sokpan, ele i da miẹn mẹn,
29 Ranmhude ilẹnmhin i ti ele bhọ,
Sẹyẹ, ele bha muegbe nin ele rẹ mun ofẹn Jehova.
30 Ele bha ka miẹn adia nọnsẹmhẹn ọbhi egbe;
Ele da re ẹlo gbe ibhude nọnsẹmhẹn an.
31 Bhiriọ, ele ki le oya nọn ha na bhi emhin nin ele lu re,*
Sẹyẹ, ele ki re uhọnmhọn hẹ emhin ebe rebhe nin ele rẹ ha mhanmhan.
32 Iwobhuhọnmhọn ọsi eria ne bha lẹn eji a yẹ, dẹ miẹn ele uhọnmhọn,
Ọria nọn i mhọn ẹwanlẹn dẹ miẹn ugbekhuelo, ranmhude nin ọle rẹ lu emhin beji ọle sabọ.*
33 Ọkpakinọn, ọria nọn wo ha ka mẹn ehọ, dẹ ha nyẹnlẹn bhi ọfure
Emhin ebe ne sunu i da ha re ofẹn mun ọlẹn.”