„Börn eru gjöf frá Jehóva“

HEFUR þú fengið gjöf sem var þér mjög kær? Kannski fékkstu hana frá einhverjum sem þér þykir innilega vænt um. Hvað gerirðu við þessa gjöf? Þú ferð örugglega mjög vel með hana.

Í Biblíunni eru börn kölluð „gjöf frá Jehóva“. (Sálm. 127:3) Kristnir foreldrar líta á börnin sín sem dýrmæta gjöf frá föður sínum á himnum og vilja gera allt sem í þeirra valdi stendur til að vernda þau og annast vel, bæði líkamlega, tilfinningalega og andlega.

Því miður álíta sumir foreldrar nú á dögum börnin sín ekki vera gjöf frá Guði. (Jes. 49:15; 2. Tím. 3:1–3) Aðrir reyna allt sem þeir geta til að annast börnin sín en það reynist þeim erfitt af ýmsum ástæðum. Hvers vegna reynist foreldrum erfitt að hugsa um börnin sín? Hvers væntir Jehóva af foreldrum? Og hvernig geta kristnir foreldrar alið upp börnin sín þannig að þau verði fullorðnir hamingjusamir einstaklingar?

ÞAÐ SEM REYNIR Á

• Samfélagið og þrýstingur frá fjölskyldunni. Sums staðar í heiminum njóta foreldrar sem eiga mörg börn meiri virðingar í samfélaginu. Þar geta hjón fundið fyrir þrýstingi frá fjölskyldu eða nágrönnum til að eignast mörg börn – ef til vill fleiri en þau geta annast.

• Áhyggjur af framtíðinni. Í sumum löndum er ungbarnadauði algengur vegna vannæringar, sjúkdóma og takmarkaðrar heilsugæslu og sum hjón eignast mörg börn til að tryggja að í það minnsta sum þeirra nái fullorðinsaldri. Aðrir kjósa að eignast mörg börn til að sjá til þess að einhver annist þau í ellinni. Þetta er sérstaklega áberandi í löndum þar sem yfirvöld sjá öldruðum ekki fyrir aðstoð.

• Ákvörðun um fjölskyldustærð. Á sumum svæðum hafa hjón takmarkaðan aðgang að getnaðarvörnum. Aðrir óttast aukaverkanir getnaðarvarna af lágum gæðum sem þeim stendur til boða. Og enn aðrir hafa ekki efni á að nota getnaðarvarnir.a

HVERS VÆNTIR JEHÓVA AF FORELDRUM?

Sjáið börnunum fyrir því sem þau þurfa. Jehóva treystir foreldrum til að sjá efnislega fyrir ólögráða börnum sínum. Hann væntir þess að þeir séu tilbúnir að leggja hart að sér til að sjá þeim fyrir fæði, klæði og húsnæði. Jehóva ætlast líka til að foreldrar mennti börnin sín. Kristnir foreldrar senda börnin sín ekki einfaldlega í heimavistarskóla. Þeir sjá heldur til þess að börnin þeirra búi hjá þeim á meðan þau vaxa úr grasi svo þau fái þá menntun og athygli sem þau þarfnast til að finna fyrir öryggi og ást. En Jehóva er raunsær og ætlast ekki til að foreldrar séu efnaðir. Hann valdi duglega en fátæka foreldra til að ala ástkæran son sinn upp. – Matt. 13:55, 56; Lúk. 2:24.

Meginregla Biblíunnar: „Ef einhver sér ekki fyrir sínum nánustu, sérstaklega fjölskyldu sinni, hefur hann afneitað trúnni og er verri en vantrúaður.“ – 1. Tím. 5:8.

Jehóva skilur að foreldrar geta þurft á hjálp að halda þegar þeir eldast. Að sjá til þess að foreldrar fái þá hjálp sem þeir þarfnast þegar þeir eldast er ein leið fyrir börn til að heiðra foreldra sína. (2. Mós. 20:12; 1. Tím. 5:4) En það gleður Jehóva þegar foreldrar hugsa fyrst og fremst um hvernig þeir annast börnin sín en ekki hvernig börnin gætu annast þá. – 2. Kor. 12:14.

Hjálpið börnunum ykkar að kynnast Jehóva. Kristnir foreldrar bera líka þá ábyrgð að kenna börnum sínum að elska Jehóva og tilbiðja hann. Hann álítur það nauðsynlegan hluta af uppeldi barnanna. – 5. Mós. 6:6, 7.

Meginregla Biblíunnar: „Alið [börnin ykkar] upp með því að aga þau og leiðbeina þeim eins og Jehóva vill.“ – Ef. 6:4.

JEHÓVA VILL HJÁLPA ÞÉR

Skipuleggið. Hugleiðið aðstæður ykkar vandlega ef þið viljið eignast börn. Hafið þið ráð á að fæða, klæða og mennta mörg börn? Ef þið hafið það ekki skuluð þið ákveða hversu mörg börn þið viljið eignast þannig að þið getið séð hverju barni fyrir því sem Jehóva væntir. Jehóva skilur að sjálfsögðu að það fer ekki allt í lífinu eins og maður ætlar sér. (Préd. 9:11) En hann blessar viðleitni ykkar til að vera foreldrar sem gleðja hann.

Meginreglur Biblíunnar: „Áform hins iðna leiða til góðs en fljótfærni steypir í fátækt.“ – Orðskv. 21:5.

„Ef einhver ykkar vill byggja turn, sest hann þá ekki fyrst niður og reiknar kostnaðinn til að kanna hvort hann hafi efni á að fullgera hann?“ – Lúk. 14:28.

Hafið Jehóva í fyrsta sæti í fjölskyldunni. Gerið tilbeiðsluna á Jehóva það mikilvægasta í lífi fjölskyldunnar. Ef þið eigið þegar börn verið þá ákveðin í að leiðbeina hverju og einu þeirra að elska Jehóva. Hjálpið þeim að fylgjast með og læra á safnaðarsamkomum. Hafið fjölskyldunám í hverri viku. Þjálfið börnin ykkar í boðuninni. Látið ekki ábyrgð ykkar í hendur eldri barna ykkar eða annarra ættingja. Það krefst tíma og erfiðis að kenna börnunum að elska Jehóva en launin eru mikil.

Meginregla Biblíunnar: „Ekkert gleður mig meira en að heyra að börnin mín gangi á vegi sannleikans.“ – 3. Jóh. 4.b

Treystið á Jehóva. Hvort sem þið eruð að hugsa um að eignast börn eða eigið þegar börn skuluð þið treysta að það sem Jehóva væntir af ykkur sem foreldrar sé mikilvægara en menning eða siðir þar sem þið búið.

Ef þið kjósið að takmarka fjölda barna sem þið eignist getið þið treyst því að Jehóva sjái fyrir þörfum ykkar í ellinni. Látið ekki undan þrýstingi til að líta á börn sem „tryggingu í ellinni“. Þið þurfið aldrei að óttast að vera yfirgefin. Jehóva hefur lofað að annast ykkur og hann stendur alltaf við loforð sín. – Jós. 23:14.

Meginreglur Biblíunnar: „Treystu Jehóva af öllu hjarta og reiddu þig ekki á eigin vitsmuni. Hafðu hann alltaf með í ráðum, þá mun hann greiða götu þína.“ – Orðskv. 3:5, 6.

„Eitt sinn var ég ungur og nú er ég gamall en aldrei hef ég séð réttlátan mann yfirgefinn né börn hans leita sér matar.“ – Sálm. 37:25.

„Einbeitið ykkur því fyrst og fremst að ríki Guðs og réttlæti, þá fáið þið allt hitt að auki.“ – Matt. 6:33.

Börn eru dýrmæt gjöf sem Jehóva hefur treyst foreldrum fyrir. Jehóva hlýtur að vera glaður þegar þjónar hans standa undir því trausti. Þeir sjá fyrir líkamlegum, tilfinningalegum og andlegum þörfum barna sinna, ákveða hversu mörg börn þeir ætla að eignast og setja kröfur Guðs framar menningu eða siðum á svæðinu. Með þessu sýna kristnir foreldrar að þeir elska börnin sín innilega og líta á þau sem „gjöf frá Jehóva“.