Hve ólíkur ert þú heiminum?

„Hrein og flekklaus guðrækni fyrir Guði og föður er þetta, að . . . varðveita sjálfan sig óflekkaðan af heiminum.“ — Jakobsbréfið 1:27.

1, 2. Hver sagði að kristnir menn yrðu ólíkir heiminu? Hvers vegn ættu vottar Jehóva að búast við að vera öðruvísi en heimurinn?

ÞAÐ var Jesús sem fyrstur sagði að kristnir menn mættu ekki vera hluti af heiminum. (Jóhannes 15:19) Og í bæn til föður síns nóttina áður en hann dó sagði hann: „Ég hef gefið þeim orð þitt, og heimurinn hataði þá, af því að þeir eru ekki af heiminum.“ Andartaki síðan endurtók hann: „Þeir eru ekki af heiminum, eins og ég er ekki af heiminum.“ — Jóhannes 17:14, 16.

² Flest trúfélög kristna heimsins gera enga tilraun til að fara eftir þessum orðum. Vottar Jehóva gera sér hins vegar grein fyrir að kristnir menn nú á dögum eiga ekki um annað að velja en að halda sér aðgreindum frá heiminum. Þeir vita að Satan er höfðingi þessa heims. (Jóhannes 14:30; 1. Jóhannesarbréf 5:19) Ef þeir væru hluti af heiminum væru þeir undir áhrifum Satans. Jakob aðvaraði: „Hver sem því vill vera vinur heimsins, hann gjörir sig að óvini Guðs.“ (Jakobsbréfið 4:4) Við ættum því að búast við að vera öðruvísi.

3. Hvað gerir votta Jehóva ólíka þeim sem eru í kringum þá?

³ En hvernig eru vottar Jehóva öðruvísi? Jesús sagði að kristnir menn yrðu ekki látnir hverfa úr heiminum að líkamanum til. (Jóhannes 17:15) Og vottar Jehóva búa í bæjarfélögum hans og flestir þeirra ganga í hjónaband og eignast börn eins og allir aðrir. Þeir þurfa líka að finna sér atvinnu, glíma við verðbólguna og greiða skatta. Samt eru þeir öðruvísi. Í grein um þá sagði ritstjóri trúmálasíðu í bandarísku dagblaði hverja hann héldi vera ástæðuna fyrir því. Hann sagði: „Það sem skilur milli vottanna og flestra gagnrýnenda þeirra er kannski það að allt líf þeirra — hvernig þeir verja tíma sínum og með hverjum — snýst algerlega um trú þeirra.“ Þetta er hárrétt! Vottar Jehóva eru fullkomlega vígðir og helgaðir Jehóva Guði. Þeir trúa fyrirheitum hans í Biblíunni og taka mjög alvarlega öll boð Guðs til sín. (1. Jóhannesarbréf 5:3) Það gerir þá ólíka öðrum.

4. Hvað gerir það erfitt að vera aðgreindur frá heiminum? Hvað ættu því öll okkar að gera af og til?

⁴ Það er samt sem áður hvorki vinsælt né auðvelt að halda sér þannig aðgreindum. Hin daglega þvingun til að láta undan er mjög sterk. Flest okkar hafa eðlislæga löngun til að vera ekki of ólík öllum öðrum. Þegar upp koma deilumál varðandi hlutleysi þarf sterka sannfæringu til að vera ólíkur öðrum og hlýða boðum Jehóva. (Postulasagan 5:29; 15:28, 29) Það er því hyggilegt af sérhverjum einstaklingi að grandskoða sjálfan sig af og til í því skyni að kanna hvernig honum gangi að halda sér aðgreindum frá heiminum. — 2. Korintubréf 13:5.

Kostgæfir í þjónustunni á akrinum

5. (a) Hvað hafa sumir sagt um kostgæfni votta Jehóva í prédikunarstarfinu? (b) Nefnið nokkrar meginreglur Biblíunnar sem fá votta Jehóva til að vera kostgæfir í þessu starfi.

⁵ Vottar Jehóva eru til dæmis vel kunnir fyrir kostgæfni sína í að prédika. Það gerir þá sannarlega ólíka öðrum. Sumir virða þá fyrir það en öðrum er skapraun að því. Trúboðar frá vissum kristniboðssamtökum skýra frá því að hvert sem þeir fari í heiminum hitti þeir fyrir heimamenn sem eru athafnasamir vottar um Jehóva! „Ef talað er mjög lengi við einhvern . . . trúboða einhvers staðar úr heiminum um staðbundnar aðstæður heyrast vottar Jehóva nefndir,“ segir í einu af ritum þeirra. Hvers vegna eru vottarnir svona kostgæfir í þessu starfi? Ásstæðan er sú að prédikun fagnaðarerindisins er vilji Guðs og kennimerki sannkristins manns. (Matteus 28:19, 20; Efesusbréfið 6:14, 15; Opinberunarbókin 22:17) Núna er þessi prédikun votta Jehóva opinber tjáning um hollustu þeirra við ríki Guðs og löngun til að hjálpa öðrum að dýrka Jehóva. — Jesaja 2:2-4; Matteus 24:14.

6. Hvaða spurninga ættum við að spyrja okkur til að grandskoða tilfinningar okkar gegnvart því að prédika fagnaðarerindið um ríkið?

⁶ Hversu þýðingarmikið er prédikunarstarfið? Í heiminum finnst flestum það þýðingarmeira en iðkun trúarinnar að sjá sér farborða eða jafnvel stunda afþreyingu. (2. Tímóteusarbréf 3:4; 1. Jóhannesarbréf 2:16) En Páll skrifaði Tímóteusi: „Haf gát á sjálfum þér og fræðslunni. Ver stöðugur við þetta. Þegar þú gjörir það, muntu bæði gjöra sjálfan þig hólpinn og áheyrendur þína.“ (1. Tímóteusarbréf 4:16) Ert þú þessarar skoðunar? Manst þú líka eftir aðvörun Péturs postula þess efnis að þú eigir að ‚hugfesta návist dags Jehóva‘? (2. Pétursbréf 3:12, NW) Ef svo er veist þú að prédikun fagnaðarerindisins um ríkið er mjög áriðandi. Það getur komið þér til að breyta á ýmsa vegu sem þykja undarlegir í augum annarra en votta.

7. Hvaða skref hafa margir stigið í sambandi við prédikunarstarfið? Hvers vegna?

⁷ Til dæmis tók John, sem var skólakennari í Ghana, Ritninguna alvarlega. Hann sagði því upp starfi sínu til að verja meiri tíma í að segja nágrönnum sínum frá Guðsríki. Brian, enskur drengur, fórnaði tækifæri sínu til að ganga í háskóla til að geta orðið prédikari í fullu starfi og Eva, bandarísk stúlka, hætti háskólanámi eftir fáeinar annir af sömu orsökum. Voru þessi ungmenni óraunsæ eða einhverjir kjánar? Í rauninni var það sem þau gerðu skynsamlegt og rökrétt í hugum hvers manns sem tekur Biblíuna alvarlega. Í stað þess að stefna framtíð sinni í hættu voru þau að vinna að því að tryggja sér góða framtíð. Eins og Páll sagði hefur starfið, sem þau völdu sér, í för með sér hjálpræði, ‚bæði fyrir þau og áheyrendur þeirra.‘ — 1. Tímóteusarbréf 4:16.

Hegðun sem er ólík

8. Hvaða meginregla í Hebreabréfinu 1:9 stuðlar líka að því að gera votta Jehóva öðruvísi?

⁸ Hér kemur önnur meginregla sem gerir kristna menn ólíka heiminum: „Þú hefur elskað réttlæti og hatað ranglæti.“ (Hebreabréfið 1:9) Þarna er verið að ávarpa Jesú Krist en vottum Jehóva er ljóst að þessi orð setja kristnum mönnum líka ákveðinn staðal. (1. Pétursbréf 2:21) Við verðum að elska það sem Guð segir vera rétt og hata það sem hann segir vera rangt.

9. (a) Nefnið nokkrar tegundir ranglætisverka. (b) Hvernig eru viðhorf kristna safnaðarins til ranglætis ólík heiminum?

⁹ Páll postuli taldi upp sumt af því ranglæti sem er í heiminum. „Hvorki munu saurlífismenn né skurðgoðadýrkendur, hórkarlar né kynvillingar, þjófar né ásælnir, drykkjumenn, lastmálir né ræningjar Guðs ríki erfa.“ (1. Korintubréf 6:9, 10) Heimur nútímans er gróflega undanlátssamur, einkum í siðferðismálum. En staðlar Biblíunnar eru ófrávíkjanlegir. Biblían segir að fari einhver kristinn maður út í siðlausa breytni beri að hjálpa honum á kærleiksríkan hátt að breyta vegum sínum. (Galatabréfið 6:1; Jakobsbréfið 5:19, 20) Ef hann neitar að breyta um stefnu ættu kristnir menn að sniðganga hann. — 1. Korintubréf 5:9-13.

10. Hvers vegna verða vottar Jehóva að vernda sig gegn löglausum verkum?

¹⁰ Sumir hafa komið með þá ásökun að slíkt sé kærleikslaust eða ofstækisfullt. Þeir aðhyllast hin frjálslyndu viðhorf heimsins. Ert þú sömu skoðunar eða gerir þú þér ljóst að slík afstaða ber miklu frekar vott um hatur á röngu verki syndarans en skort á kærleika til hans? Skilur þú að kristni söfnuðurinn verður að taka þessa afstöðu ef hann á að halda áfram að vera kristinn? Jakob sagði: „Í augum Guðs kemur hrein og lýtalaus trú fram í því að óhreinka sig ekki í samskiptum sínum við heiminn.“ (Jakobsbréfið 1:27, Lifandi orð) Hvernig gæti hópur manna fullyrt að hann iðkaði sanna trú ef hann léti óhreinka sig af alvarlegri synd?

11. Hvernig hafa staðlar kristninnar áhrif á málfar kristins manns?

¹¹ Hatur kristins manns á hinu illa gengur lengra. Biblían segir: „Frillulífi og óhreinleiki yfirleitt eða ágirnd á ekki einu sinni að nefnast á nafn meðal yðar. Svo hæfir heilögum. Ekki heldur svívirðilegt hjal eða ósæmandi spé.“ (Efesusbréfið 5:3, 4) Sannir kristnir menn eru því þekktir meðal þeirra sem þeir umgangast fyrir að vera ekki grófir í tali, segja ekki klúra brandara, hafa ekki lostafulla ánægju af að ræða það sem óhreint er. Hreinn hugur og hreint tal verður æ sjaldgæfara.

12. Hvernig eru vottar Jehóva ólíkir heiminum í sambandi við skemmtun?

¹² Vottar Jehóva eru jafnvel ólíkir öðrum þar sem skemmtun á í hlut. Þar eð „allur heimurinn er á valdi hins vonda“ hafa þeir lært að vera varkárir í sambandi við þá skemmtun sem heimurinn býður upp á. (1. Jóhannesarbréf 5:19) Þeir forðast algerlega hina mörgu samkvæmisleiki, tímarit, kvikmyndir, tónlist og sjónvarpsþætti sem snúast um djöflatrú eða klám eða innihalda ofbeldi sem lýsir sjúklegum kvalalosta. Þeir eru líka á verði gegn svokallaðri fjölskylduskemmtun sem ýtir undir siðlausar hugmyndir eða undanlátsemi sem kristnir menn geta ekki lagt blessun sína yfir. (1. Korintubréf 15:33) Enginn sem tekur Biblíuna alvarlega leitar sér skemmtunar í því sem ætti ekki einu sinni að nefnast á nafn meðal kristinna manna.

13. Er það þröngsýni að setja okkur slík takmörk í sambandi við skemmtun? Gefið skýringu.

¹³ Er þetta þín skoðun eða finnst þér slík sjónarmið gera votta Jehóva þröngsýna og gefna fyrir höft og hömlur? Ef svo er skalt þú hugleiða þetta: Þegar í ljós kemur að ákveðin tegund matvæla er menguð og hún er samstundis tekin úr umferð kvarta neytendur ekki undan að frelsi þeirra sé skert fyrst þeir geta ekki lengur keypt vöruna. Þess í stað eru þeir þakklátir að þeir skuli verndaðir fyrir matareitrun. Vottar Jehóva kvarta ekki heldur undan að frelsi þeirra sé með einhverjum hætti skert þegar þeim er bent á hversu mengað og óhreint mikið af skemmtiefni heimsins er. Þess í stað er það þeim léttir að þeim skuli hlíft við þeirri hættu sem stafar af slíkri mengun.

Þeir elska hver annan

14. Hvaða eiginleika sagði Jesús myndu gera samfélag kristinna manna ólíkt umheiminum?

¹⁴ Annað merki um að kristnir menn séu aðgreindir frá heiminum kemur fram í því sem Jesús sagði fylgjendum sínum kvöldið áður en hann dó: „Á því munu allir þekkja, að þér eruð mínir lærisveinar, ef þér berið elsku hver til annars.“ (Jóhannes 13:35) Hvers vegna myndi kærleikur vera tákn fyrir þá sem standa fyrir utan? Vegna þess að á heildina litið er svo komið í heiminum sem Páll sagði: „Mennirnir verða sérgóðir, fégjarnir, . . . kærleikslausir.“ (2. Tímóteusarbréf 3:2, 3) Í slíku umhverfi hlyti heilt samfélag manna um allan hnöttinn, sem elska hver annan, að vera einstakt. Slíkt bræðralag ríkir meðal votta Jehóva. — 1. Pétursbréf 2:17.

15. Nefnið nokkrar kringumstæður þar sem vottar Jehóva hafa tækifæri til að sýna hver öðrum kærleika?

¹⁵ Þessi kærleikur er mjög áberandi og er oft nefndur af öðrum þegar vottarnir koma saman á mót sín. Þegar umfangsmiklar náttúruhamfarir verða eru vottarnir fljótir á vettvang með hjálpargögn fyrir bræður sína. Og innan safnaðarins sýna sannkristnir menn hver öðrum kærleika og umhyggju. Jafnvel þegar samskiptavandamál koma upp leggja þeir sig fram um að ‚umbera hver annan og fyrirgefa hver öðrum.‘ — Kólossubréfið 3:12-14.

Þeir hneyksla ekki hver annan

16. (a) Hvaða aðstæður var Páll að ræða um sem gáfu kristnum mönnum á fyrstu öld gott tækifæri til að sýna hversu djúpur kærileikur þeirra hver til annars væri? (b) Hvaða meginreglu útskýrði hann sem heimfæra má á marga vegu núna?

¹⁶ Slíkur kærleikur gerir vottana ólíka öðrum á annan veg. Margt manna hugsar mikið um réttindi sín og verndar þau með kjafti og klóm. Páll postuli setti okkur hins vegar ólíkan mælikvarða: „Keppum þess vegna eftir því, sem til friðarins heyrir og til hinnar sameiginlegu uppbygginar.“ (Rómverjabréfið 14:19) Páll var þarna að ræða um vandamál sem þá var í sambandi við mat. Kristnum mönnum var, ólíkt Gyðingum undir móselögmálinu, frjálst að eta hvað sem þeir vildu svo lengi sem þeir kynnu sér hóf. Sumum höfðu hins vegar frá barnæsku þótt sumar fæðutegundir ógeðfelldar og hneyksluðust við að sjá kristna bræður sína neyta þeirra. Stóðu þessir kristnu menn fastir á rétti sínum til að borða hvað sem þeir vildu, óháð því hvað öðrum fannst? Ekki ef þeir fylgdu heilræðum Páls. Hann sagði: „Það er rétt að eta hvorki kjöt né drekka vín né gjöra neitt, sem bróðir þinn steytir sig á.“ (Rómverjabréfið 14:21) Sannarlega kærleiksrík heilræði! Kemur þú auga á hvernig það getur verið okkur leiðbeining á ýmsum öðrum sviðum?

17, 18. (a) HVernig má heimfæra meginregluna í Rómverjabréfinu 14:21 í sambandi við áfenga drykki? (b) Hvernig má heimfæra hana á klæðaburð? (c) Á hvaða öðrum sviðum heldur þú að það muni hjálpa okkur að sýna hver öðrum kærleika að fara eftir þessari sömu meginreglu?

¹⁷ Til dæmis leyfir Biblían kristnum mönnum að neyta áfengra drykkja í hófi. (1. Tímóteusarbréf 3:8; 5:23) En sumir eru viðkvæmir þegar sterkir drykkir eiga í hlut. Aðrir eru ekki vanir þeim eða kunna ekki að neyta þeirra í hófi. Ef þú værir í samkvæmi með einhverjum slíkum, myndir þú reyna að þvinga hann til að drekka áfengi með þér? Myndir þú ekki frekar láta vera að drekka áfengi til að valda honum ekki erfiðleikum?

¹⁸ Tökum annað dæmi: klæðaburð. Biblían lýsir því ekki hvers konar fötum kristnir menn eigi að klæðast þótt hún segi að þau eigi að vera snyrtileg og lýsa háttvísi. (1. Tímóteusarbréf 2:9) Flest lönd hafa ákveðnar siðareglur um það hvaða klæðnaður sé viðeigandi og hver ekki. Oftast bjóða þessar siðareglur upp á eðlilega fjölbreytni, en sé vikið mjög frá þeim þykir það bera vott um sjálfshyggju, gjálífi eða sérvisku. Kristnir menn, bæði karlar og konur, verða að hafa þetta í huga. Ert þú fús til að takmarka frelsi þitt í sambandi við klæðaburð sakir fagnaðarerindisins, svo og til að hneyksla ekki bræður þína?

19-21. (a) Hvers vegna leggja vottar Jehóva sig fram um að halda sér aðgreindum frá heiminum? (b) Á hvaða öðru sviði verðum við að kappkosta að vera aðgreindir frá heiminum?

¹⁹ Já, Jesús hafði rétt fyrir sér þegar hann sagði að kristnir menn væru „ekki af heiminum.“ (Jóhannes 17:16) Hvað varðar prédikun fagnaðarerindisins, að vísa á bug því sem illt er, elska og sýna umhyggju hver öðrum eru vottar Jehóva sannarlega frábrugðnir öðrum. Þessi aðgreining er vottunum til blessunar, ekki síst vegna þess að hún verndar þá fyrir mörgum þeirra vandamála sem þjaka heim nútímans.

²⁰ Kannt þú að meta þessa aðgreiningu frá heiminum og ræktar þú hana í lífi þínu? Mundu að vottar Jehóva yrðu líkari heiminum, sem á sér Satan djöfullinn að guði, ef þeir væru ekki svona aðgreindir frá honum. (2. Korintubréf 4:4) Þeir myndu missa sinn augljósa stimpil sem „heilög þjóð“ og myndi ekki takast að halda sér ‚óflekkuðum af heiminum.‘ Þeir myndu ekki lengur hafa ‚hreina og lýtalausa trú í augum Guðs.‘ (Jakobsbréfið 1:27; Lifandi orð; 1. Pétursbréf 1:14-16) Ef þú kemst að raun um að þú óskar þess að þú gætir verið líkari heiminum skalt þú muna eftir varnaðarorðunum í Jakobsbréfinu 4:4.

²¹ Páll postuli spáði því að annað einkenni myndi ráða lögum og lofum í heimi nútímans. Hann sagði að menn myndu verða „fégjarnir.“ (2. Tímóteusarbréf 3:1, 2) Eins og hann spáði er eftirsóknin eftir peningum svo sterkt afl núna að hjá mörgum hefur hún meiri áhrif en nokkuð annað. Eru kristnir menn ólíkir í þessu efni einnig? Er mögulegt að komast af í heimi nútímans án þess að vera ‚fégjarn‘? Við munum ræða það í greininni sem fer á eftir.

Manst þú?

◻ Hvers vegna ætti kristinn maður að búast við að vera ólíkur heiminum?

◻ Hvaða ritningargreinar hjálpa vottum Jehóva að sjá prédikunarstarfið í réttu ljósi?

◻ Á hvaða mismunandi vegu gerir heimfærsla Hebreabréfsins 1:9 votta Jehóva ólíka heiminum?

◻ Hvaða áhrif hefur það á breytni þeirra að fylgja meginreglunni í Rómverjabréfinu 14:21?