Abril

Tapno mabenepisiarantayo iti lasag ken dara ni Jesus, masapul nga ipakitatayo a mamatitayo iti subbot. (Efe. 1:7) Dagidiay dinakamat ni Jesus kas ‘sabsabali a karnero’ ket saan, ken rumbeng a saan a mangan iti tinapay ken uminum iti arak bayat ti tinawen a Pangrabii ti Apo. (Juan 10:16) Ngem mabenepisiaranda latta iti lasag ken dara ni Jesu-Kristo. Maaramidda dayta no ipakitada a mamatida iti subbot nga impaay ni Jesus ken kadagiti nakaskasdaaw a banag a nagbalin a posible gapu iti dayta. (Juan 6:53) Dagidiay met masapul a makiraman ipakitada a pasetda iti baro a tulag ken adda namnamada a makipagturay iti nailangitan a Pagarian. No kasta, karamantayo man kadagiti dinutokan ti espiritu wenno iti sabsabali a karnero, masapul a natibker ti pammatitayo iti subbot tapno magun-odantayo ti biag nga agnanayon. w24.12 13 ¶14, 16

Bayat ti Pangrabii ti Apo, impasa ni Jesus kadagiti apostolna ti tinapay nga awan lebadurana. Imbagana nga isimbolo dayta ti bagina. Kalpasanna, intedna kadakuada ti arak sa imbagana nga isimbolo dayta ti “dara ti tulag.” (Mar. 14:22-25; Luc. 22:20; 1 Cor. 11:24) Inawaganna dayta iti “baro a tulag.” Dagidiay laeng makipagturay ken Jesus “iti Pagarian ti Dios” ti karaman iti dayta a tulag. (Heb. 8:6, 10; 9:15) Ti imbaga ni Jesus bayat ti Pangrabii ti Apo ket agaplikar iti “bassit nga ipastoran.” Dagiti matalek nga apostol a kaduana bayat ti Pangrabii ti Apo ket isu dagiti immuna a paset dayta a grupo. Isudanto ti kakadua ni Jesus idiay langit. w24.12 11 ¶9-10

Ni Jesus ket natraidor, naaresto, napagsasawan, napadpadakes, nasentensiaan, ken naparparigat pay ketdi. Impan dagiti soldado iti pangpapatayanda kenkuana ket inlansada iti kayo. Simamatalek nga inibturan ni Jesus ti nakaro nga ut-ot ken panagsagaba. Ngem nakarkaro pay nga ut-ot ken saem ti narikna ni Amana bayat a makitkitana ti nakaro a panagrigat ti Anakna. Ay-ayaten ni Jehova ti Anakna. Ngem apay ngarud nga impalubosna nga agsagaba ken matay? Gapu ta ay-ayatennatayo. Ti panangted ni Jesus iti biagna ti kadakkelan nga ebidensia nga ay-ayatennaka la unay ni Jehova. Intedna ti dungdungnguenna nga Anak, ken inibturanna ti nakasasaem a nariknana tapno alawennaka manipud iti basol ken ipapatay. (1 Juan 4:9, 10) Wen, kayatna a tulongan ti tunggal maysa kadatayo a naan-anay a mangparmek iti basol! w24.08 6 ¶13-14

Lallalo a maawatantayo nga ay-ayatennatayo la unay ni Jehova no panunotentayo ti saem a nariknana idi impaayna ti subbot. Imbaga ni Satanas nga awan kano ti adipen ti Dios nga agtalinaed a matalek Kenkuana no agsagaba. Tapno paneknekan ni Jehova nga ulbod ni Satanas, impalubosna nga agsagaba ni Jesus sakbay a matay. (Job 2:1-5) Nakita ni Jehova ti panangumsi dagiti bumusbusor a lider ti relihion ken Jesus, ti panangsaplit kenkuana dagiti soldado, ken ti panangilansada kenkuana iti kayo. Nakita met ni Jehova ti panagsagaba ti patpatgenna nga Anak iti nakaut-ut-ot nga ipapatay. (Mat. 27:28-31, 39) Adda pannakabalin ni Jehova a manglapped iti dayta. (Mat. 27:42, 43) Ngem no bimmallaet ti Dios, saan koma a naibayad ti subbot ken saantayo a naaddaan iti namnama. Isu nga impalubos ni Jehova nga agsagaba ti Anakna agingga a napugsat ti maudi nga angesna. w25.01 22 ¶7

Idi Nisan 16, 33 C.E., permi ti liday ken buteng dagiti adalan ni Jesus. Dua kadakuada ti pimmanaw iti Jerusalem sa napanda idiay Emmaus. Adda lalaki a saanda nga am-ammo nga immasideg ken nakipagna kadakuada. Inyestoriada kenkuana a maup-upayda iti napasamak ken Jesus. Idi kuan, adda imbaga ti lalaki a didanto pulos malipatan. Inlawlawagna “manipud kadagiti insurat ni Moises ken ti amin a Propeta” no apay a masapul nga agsagaba ken matay ti Mesias. Idi agangay, nakadanon dagitoy a tallo a lalaki idiay Emmaus. Nailasinda a ti dida am-ammo a lalaki ket ti napagungaren a ni Jesus! (Luc. 24:13-35) Iti maudi a 40 nga aldaw ni Jesus ditoy daga, namin-adu a nagparang kadagiti adalanna. Pinaregta ni Jesus dagiti adalanna a maladladingitan ken mabutbuteng. Gapu iti dayta, nagbalinda a naragsak ken natured a mangikasaba ken mangisuro iti naimbag a damag maipapan iti Pagarian. w24.10 12 ¶1-3

Iti panaglabas ti tiempo, nateural a dumakkel ti maysa nga ubing ket agbalin nga adulto. Ngem saan nga automatiko nga agbalin a nataengan iti naespirituan ti maysa a Kristiano. Kas pagarigan, inawat dagiti Kristiano idiay Corinto ti naimbag a damag, nagpabautisarda, immawatda iti nasantuan nga espiritu, ken nagunggonaanda kadagiti insuro ni apostol Pablo. (Ara. 18:8-11) Ngem sumagmamano a tawen kalpasan ti bautismoda, adu latta ti saan a rimmang-ay iti naespirituan. (1 Cor. 3:2) Tapno agmataengantayo, masapul a kayattayo nga umuna ti agmataengan. Dagidiay “awanan kapadasan” kaykayatda ti agtalinaed nga ubbing iti naespirituan isu a saanda a rumang-ay. (Prov. 1:22) Ditay kayat ti agbalin a kas kadagidiay adulton ngem agdepdependeda pay laeng kadagiti nagannakda no agdesisionda. Imbes ketdi, kayattayo a datayo a mismo ti mangibaklay iti responsabilidadtayo a rumang-ay iti naespirituan. No ikagkagumaam pay laeng ti rumang-ay, ikararagmo ken Jehova nga ikkannaka ‘iti tarigagay ken iti pannakabalin a mangaramid iti amin a banag a pakaragsakanna.’—Fil. 2:13. w24.04 4 ¶9-10

Ipakaammo kadatayo ni Jehova ti mariknana no maipapan iti panangukomna kadagiti tattao. (Ezek. 33:11) Saan a dagus a dadaelen ni Jehova dagiti tattao nga awanen ti namnamada a mapagungar, malaksid no adda nagsayaat a rason nga aramidenna dayta. Ngamin, aglaplapusanan ti asina ken ipakpakitana ti asi agingga a posible. Siasino dagiti ammotayo a saan a mapagungar? Adda sumagmamano a dinakamat ti Biblia. Kas pagarigan, iti imbaga ni Jesus, maawatantayo a saan a mapagungar ni Judas Iscariote. (Mar. 14:21; kitaen met ti study note ti John 17:12.) Ammo idi ni Judas a ti aramidenna ket maikontra ken Jehova a Dios ken ni Jesus. Ngem inggagarana latta nga inaramid dayta. (Kitaen dagiti study note ti Mark 3:29.) Imbaga met ni Jesus a dadduma kadagiti lider ti relihion a bimmusor kenkuana ket matay nga awanen ti namnamada a mapagungar. (Mat. 23:33; kitaen ti “the man” nga study note ti John 19:11) Impakdaar met ni Pablo a saan a mapagungar dagiti di agbabbabawi nga apostata.—Heb. 6:4-8; 10:29. w24.05 4 ¶10-11

No agtalinaedtayo a nasinged ken Jehova, awan ti maaramid ni Satanas a permanente a mangdangran kadatayo. (1 Juan 3:8) Iti baro a lubong, itultuloyto a protektaran ni Jehova dagiti matalek a gagayyemna, saan laeng nga iti naespirituan a pannakadangran no di ket uray pay ken patay. (Apoc. 21:4) Talaga a nagsayaat a pribilehio ti agbalin a sangaili ni Jehova iti toldana! Gapu iti dayta, maaddaantayo iti nasinged a pannakigayyem kenkuana nga agpaut iti agnanayon. (Ezek. 37:27) Ania koma ti masapul nga aramidentayo no kayattayo ti agtultuloy a sangaili ni Jehova? No naimbitaranka iti balay ti maysa a tao, sigurado a kayatmo nga ammuen no ania ti eks-ekspektarenna kenka. Kasta met, sigurado a kayattayo nga ammuen dagiti kayat ni Jehova nga aramiden dagiti mayat nga agtultuloy a sangaili iti toldana. Gapu ta ay-ayatentayo ni Jehova, kayattayo nga aramiden ti amin a kabaelantayo ‘tapno naan-anay a maparagsaktayo.’ (Col. 1:10) Ditay koma liplipatan ti kinasiasinona, ken kanayon koma a nauneg ti panagraemtayo kenkuana. No nauneg ti panagraemtayo kenkuana, maliklikantayo nga aramiden ti aniaman a kagurana. Sigurado a kayattayo ti ‘agbalin a naemma iti pannakipagnatayo’ iti Diostayo.—Mik. 6:8. w24.06 4 ¶8-9

Kiniddaw ni Jehova ken Abraham nga idatonna ti mismo nga anakna a ni Isaac. Dayta la ketdi ti kasasaeman nga aramiden ni Abraham. Ngem nagtulnog ken Jehova. Idi patayen koman ni Abraham ti anakna, linapdan ti Dios. Ngem adda nagpateg nga isuro dayta a pasamak para iti amin a tattao nga addaan pammati. Situtulok nga indaton ni Jehova ti ipatpategna nga Anak. Talaga nga ay-ayaten unay ni Jehova dagiti tattao. (Gen. 22:1-18) Ginasut a tawen kalpasanna, nangted ni Jehova iti Linteg kadagiti Israelita. Imbilinna nga agdatonda kadagiti animal tapno mapakawan dagiti basolda. (Lev. 4:27-29; 17:11) Dagita a daton ti mangipakita wenno mangipatuldo a mangipaay ni Jehova iti nasaysayaat a daton, a naan-anay a mangisalakan iti amin a tattao manipud iti basol. Imbaga ti Dios kadagiti propetana nga isuratda ti maipapan iti naikari a kaputotan. Inlawlawagda a ti naikari a kaputotan, ti nagbalin nga espesial nga Anak ti Dios, ket agsagaba ken mapapatay tapno ti amin a tattao a pakairamanam ket maisalakan manipud iti basol ken ipapatay!—Isa. 53:1-12. w24.08 4 ¶7-8

No agbasbasaka iti Biblia, siguraduem a panunoten no kasanom a mayaplikar ti nabasam. Bayat a basbasaem ti maysa a paset ti Sao ti Dios, isaludsodmo iti bagim, ‘Kasanok a mayaplikar daytoy nga impormasion ita wenno iti masanguanan?’ Kas pagarigan, ipapantayo a basbasaem ti 1 Tesalonica 5:17, 18. Kalpasan a binasam dagita a dua a bersikulo, mabalinmo ti agsardeng ken agpanunot no kasano kasansan ken kapasnek ti panagkararagmo. Kasta met, mabalinmo a panunoten dagiti banag a pagyamyamanam. Baka adda tallo nga espesipiko a banag a napanunotmo a pagyamyamanam ken Jehova. Uray sumagmamano la a minuto a pinanunotmo dagiti nasursurom iti Biblia, mabalin a makatulongen dayta tapno agbalinka a managdengngeg ken managtungpal iti Sao ti Dios. Bayat nga inaldaw nga iyap-aplikarmo dagiti mabasbasam iti Biblia, agbalinkanto a nasaysayaat nga adipen ni Jehova iti panaglabas ti tiempo. w24.09 4-5 ¶9-10

Pinarsuanatayo ni Jehova nga agbalin a naragragsak no mangtedtayo ngem no umawattayo. Nagmayat ti riknatayo no matulongantayo dagiti kapammatiantayo ken naragsaktayo no iyebkasda ti apresasionda. Ngem agyamanda man wenno saan iti inaramidtayo, naragsaktayo latta ta ammotayo nga inaramidtayo ti umiso. Laglagipem nga aniaman ti maipaaymo, “kabaelannaka nga ikkan ni Jehova iti ad-adu ngem iti dayta.” (2 Cron. 25:9) Saantayto pulos a maartapan ti kinaparabur ni Jehova! Ken ti kasayaatan a gunggona a maawattayo ket ti gunggona nga ipaay ni Jehova. Determinadotayo ngarud koma nga agtultuloy a mangtulad iti naparabur a nailangitan nga Amatayo. w24.09 31 ¶20-21

Ni Jehova ket naasi ken mannakipagrikna. (Sal. 103:13; Isa. 49:15) Addaan iti empatia; no masaktantayo, masaktan met ti riknana. (Zac. 2:8) Tultulongannatayo nga umasideg kenkuana tapno agbalintayo a gagayyemna. (Sal. 25:14; Ara. 17:27) Napakumbaba met; “agdumog tapno kitaenna ti langit ken ti daga, bangonenna ti nanumo manipud iti tapok.” (Sal. 113:6, 7) Gapu kadagita a rason, kayattayo la ketdi nga ipadayag ti naindaklan a Diostayo! Ipadayagtayo ni Jehova gapu ta kayattayo a maam-ammo isuna dagiti tattao. Adu ti saan a makaammo iti kinapudno maipapan ken Jehova. Apay? Binulsek ngamin ni Satanas ti panunotda babaen ti panangiwarasna kadagiti nakaro a kinaulbod maipapan ken Jehova. (2 Cor. 4:4) Ipappapati ni Satanas kadagiti tattao a ni Jehova ket managibales, saan a maseknan kadatayo, ken isu ti makinggapuanan iti adu a panagrigat dagiti tattao. Ngem ammotayo ti kinapudno maipapan iti Diostayo! Pribilehiotayo nga ipakaammo ti kinasiasino ni Jehova tapno maipadayagtayo isuna.—Isa. 43:10. w25.01 3 ¶6-7

Idi umuna a siglo, uray no perpekto ken adu a milagro ti inaramid ni Jesus nga Anak ti Dios, sinugsogan ni Satanas ti dadduma a tattao a mangiwaras iti adu a kinaulbod maipapan ken Jesus. Kas pagarigan, imbaga dagiti lider ti relihion a ti pannakabalin ni Jesus a mangparuar kadagiti demonio ket inted “ti panguluen dagiti demonio.” (Mar. 3:22) Idi nabista ni Jesus, inakusaran dagiti lider ti relihion nga agsasao iti maibusor iti Dios. Gapuna, sinugsoganda dagiti tattao a kiddawenda a mapapatay ni Jesus. (Mat. 27:20) Idi agangay, idi inkasaba dagiti pasurot ni Jesus ti naimbag a damag, dagiti bumusbusor “sinugsogan ken inimpluensiaanda dagiti tattao” a mangidadanes kadagidiay a Kristiano. (Ara. 14:2, 19) Maipapan iti Aramid 14:2, kuna Ti Pagwanawanan a Disiembre 1, 1998: “Saan a napnek dagiti bumusbusor a Judio iti panangilaksidda a mismo iti mensahe, isu a nangiwayatda iti kampania a pammadakes, a sinugsoganda dagiti amin a Gentil a bumusor kadagiti Kristiano.” Agingga ita, ‘al-allilawenna pay laeng ti intero a mapagnaedan a daga.’ w24.04 11 ¶15-16

Ti namnama ti maysa a tao nga agbiag nga agnanayon ket saan a nakadepende no kaano a matay. Ni Jehova ti perpekto nga Ukom—kanayon a nalinteg dagiti desisionna ken naibatay iti hustisia. (Sal. 33:4, 5) Makapagtalektayo a “ti Ukom ti intero a daga” aramidennanto ti umiso. Rasonable met a panunotentayo a ti namnama ti maysa a tao nga agbiag nga agnanayon ket saan a nakadepende no sadino ti pagnanaedanna. Imposible nga automatiko nga ibilang ni Jehova ti minilion a tattao kas “kalding” gapu laeng ta agnanaedda kadagiti lugar a saan a pulos nadanon ti mensahe ti Pagarian. (Mat. 25:46) No maseknantayo kadagita a tattao, lallalo pay a maseknan kadakuada ti nalinteg nga Ukom ti intero a daga. Saantayo nga ammo no kasanonto nga imaniobra ni Jehova dagiti pasamak bayat ti dakkel a rigat. Nalabit dadduma kadagita a tattao ti maaddaanto iti gundaway a mangipakita babaen ti aramid nga adda pammatida ken Jehova inton ipakaammona ti nasantuan a naganna iti amin a nasion.—Ezek. 38:16. w24.05 12 ¶14-15

Kayat la unay dagiti Saksi ni Jehova ti agtitinnulong. (2 Cor. 8:4) Ngem no dadduma, kasapulanda ti tured tapno maaramidda dayta. Kas pagarigan, no adda gubat, ammo dagiti panglakayen a kasapulan dagiti kapammatianda ti pammaregta, suporta, ken uray ti naespirituan ken material a tulong. Isu a nupay agpeggad ti biagda, aramidenda ti amin a kabaelanda a tumulong ta ipatpategda ti arban. Kadagiti napeggad a kasasaad, nagpateg nga agtalinaedtayo nga agkaykaysa. Agtulnogka kadagiti instruksion ti sanga nga opisina iti pagilianyo. (Heb. 13:17) Masapul a regular a repasuen dagiti panglakayen dagiti instruksion maipapan iti panagsagana ken dagiti masapul nga aramiden no adda didigra iti lugarda. (1 Cor. 14:33, 40) Agbalin a natured ngem naannad. (Prov. 22:3) Agpanunotka sakbay nga agtignayka. Siguraduem a natalgedka agingga a posible. Agpannuray ken Jehova. Matulongannaka tapno natalgedka a tumulong kadakuada. w24.07 4 ¶8; 5 ¶11

Am-ammo ni David ni Jehova ken agpampannuray Kenkuana. Nagpaarayat ken Jehova idi kayat a patayen dagiti kabusorna, a pakairamanan ni Ari Saul. Sinungbatan ti Dios ti kararagna ken insalakanna isu nga imbaga ni David: “Sibibiag ni Jehova!” (Sal. 18:46) Ania ti kayatna a sawen? Sigun iti maysa a reperensia, impakita ni David nga agtaltalek ken Jehova “kas ti sibibiag a Dios a kanayon a tumultulong kadagiti adipenna.” Wen, napaneknekan a mismo ni David a sibibiag ti Diosna, isu a naparegta nga agtultuloy nga agserbi ken mangidaydayaw ken Jehova. (Sal. 18:28, 29, 49) No kombinsidotayo a ni Jehova ti sibibiag a Dios, makapagserbitayo a sireregta. Maibturantayo dagiti suot ken inspiradotayo a mangitultuloy a mangaramid iti amin a kabaelantayo nga agserbi kenkuana. Determinadotayo met nga agtalinaed a nasinged ken Jehova. w24.06 20-21 ¶3-4

Ania ti masursurotayo iti imbaga ni apostol Pablo kadagiti taga-Tesalonica? No adda mangngegtayo a maikontra iti naammuantayo iti Biblia, wenno no adda agdindinamag nga estoria, usarentayo koma ti pannakatarustayo. Iti dati a Soviet Union, adda inwaras dagiti bumusbusor kadatayo a surat a kasla naggapu iti sangalubongan a hedkuarter. Pinaregta dayta a surat ti dadduma a kakabsat a mangbukelda iti sabali nga organisasion. Kasla agpaypayso dayta a surat, ngem saan a naallilaw dagiti matalek a kakabsat. Nabigbigda a ti mensahe ti surat ket maikontra iti naisuro kadakuada. Ita, us-usaren no dadduma dagiti kabusortayo ti Internet wenno ti social media a mangallilaw ken mamagsisina kadatayo. Imbes a dagus a “patien[tayo] ti tunggal pannursuro a kasla naggapu iti Dios,” maprotektarantayo ti bagitayo no panunotentayo a naimbag no ti mangmangngeg wenno ti mabasbasatayo ket maitunos kadagiti kinapudno a naammuantayon.—2 Tes. 2:2; 1 Juan 4:1. w24.07 12 ¶14-15

Ti kapatgan a desision nga aramiden ti maysa a tao ket ti panangidedikarna iti bagina ken Jehova ken ti panagbalinna a paset ti pamilia dagiti agdaydayaw kenkuana. Dayta ti kayat ni Jehova nga aramiden ti amin. Apay? Kayatna nga agbalinda a gagayyemna ken agbiagda iti agnanayon. (Deut. 30:19, 20; Gal. 6:7, 8) Nupay kasta, saan a piliten ni Jehova ti asinoman nga agserbi kenkuana. Ik-ikkanna ti tunggal indibidual iti wayawaya nga agdesision no ania ti aramidenna. Ania ti mapasamak iti maysa a bautisado a Kristiano no suksukirenna ti linteg ti Dios ken agar-aramid iti nadagsen a basol? No saan nga agbabawi, masapul a maikkat iti kongregasion. (1 Cor. 5:13) Ngem mangnamnama latta ni Jehova nga agsublinto Kenkuana ti nakabasol. Kinapudnona, dayta ti napateg a rason nga intedna ti subbot—tapno mapakawan dagiti agbabbabawi a nakabasol. Nakadungdungngo a Dios ni Jehova, ken ipakpakaasina kadagiti nakabasol nga agbabawida.—Zac. 1:3; Roma 2:4; Sant. 4:8. w24.08 14 ¶1-2

Idi inaramid ni apostol Juan ti maikatlo a suratna, adda dagiti mangiwarwaras iti ulbod a pannursuro ken mamagsisina kadagiti kakabsat. Ngem adda dagiti nagtultuloy a ‘magna iti kinapudno.’ Nagtulnogda ken Jehova ken ‘nagtultuloyda a magna maitunos kadagiti bilinna.’ (2 Juan 4, 6) Dagitoy a matalek a Kristiano nangyegda la ketdi iti ragsak ken Juan ken uray ken Jehova a mismo. (Prov. 27:11) Ania ti masursurotayo? No kanayontayo a matalek ken Jehova, naragsaktayo. (1 Juan 5:3) Kas pagarigan, naragsaktayo ta ammotayo a maparparagsaktayo ni Jehova. Maragragsakan met ni Jehova no makitkitana a lablabanantayo dagiti sulisog ti lubong ken agtultulnogtayo kadagiti bilinna. Naragsak met dagiti anghel idiay langit. (Luc. 15:10) Maragsakantayo met a makakita iti tunggal maysa nga agtaltalinaed a matalek. (2 Tes. 1:4) Inton madadael ti lubong ni Satanas, nakaragragsaktayto met ta nakapagtalinaedtayo a matalek ken Jehova. w24.11 12 ¶17-18

Kasano kabayag nga obserbaram ti kursonadam sakbay nga armem? No dagus nga ipudnom ti rikriknam kenkuana, mabalin a panunotenna a darasudoska. (Prov. 29:20) Iti sabali a bangir, no nabayag unay sakbay nga ipudnom ti riknam, mabalin a panunotenna a nakapuy ti panagdesdesisionmo, lalo no nadlawnan a kursonadam isuna. (Ecl. 11:4) Laglagipem, sakbay nga ipudnom ti riknam, saan a kasapulan a siguradokan nga isuna ti pakasaram. Ngem masapul a siguraduem a nakasaganakan a mangasawa ken ti kursonadam ket posible a nasayaat a pakiasawaan. Ngem ania ti aramidem no nadlawmo a kayatnaka ti maysa? No saanmo a kayat isuna, masapul a nalawag a makita dayta iti panagtigtignaymo. Kakaasi met no ipariknam a posible nga agbalin a dakayo idinto ta adayo met gayam a mapasamak dayta.—Efe. 4:25. w24.05 22-23 ¶9-10

Dagiti laeng napudno ken matalek a dinutokan ti espiritu ti “maalanto” ken awaten ni Jesus iti nailangitan a Pagarian. Ti asinoman a dinutokan ti espiritu a saan nga agtalinaed a nakariing ken alerto iti naespirituan ket saanto a karaman ‘kadagiti pinili’ ni Jesus. (Mat. 24:31) Ngem amin nga adipen ti Dios, aniaman ti namnamada, ket masapul nga ipangagda ti pakdaar ni Jesus nga agtultuloyda nga agbantay ken matalek. Am-ammotayo unay ni Jehova isu nga agtalektayo nga umiso ti amin nga aramidenna. Ditay pakadanagan no agingga ita ket agpilpili pay laeng kadagiti matalek a tattao a dutokanna iti nasantuan nga espirituna. Lagipentayo ti ilustrasion ni Jesus maipapan kadagiti nagtrabaho iti kaubasan iti agarup alas singko ti malem. (Mat. 20:1-16) Agpada laeng ti sueldo dagiti naudi a nangrugi nga agtrabaho ken dagiti nasapsapa a nangrugi. Kasta met, kaanoman ti pannakapili dagiti dinutokan ti espiritu, awatendanto ti nailangitan a gunggonada no la ketdi ta agtalinaedda a matalek. w24.09 24 ¶15-17

Nangipakita ni Jesus iti perpekto nga ulidan iti panangibtur iti kinaawan hustisia. Saan a patas ti panangtrato kenkuana ti adu a tattao, agraman ti pamiliana. Imbaga dagiti di manamati a kabagianna a nadadaelen ti panunotna. Inakusaran met dagiti lider ti relihion a naggapu kano kadagiti demonio ti pannakabalinna. Kasta met a pinagang-angawan, pinarparigat, sa idi agangay, pinatay dagiti Romano a soldado. (Mar. 3:21, 22; 14:55; 15:16-20, 35-37) Inibturan ni Jesus amin dagita a kinaawan hustisia ken di pulos nagibales. Ania ti masursurotayo iti ulidanna? (1 Ped. 2:21-23) Nangipakita ni Jesus iti perpekto nga ulidan a surotentayo no maipapan iti panangibtur iti kinaawan hustisia. Ammona no kaano nga agulimek ken no kaano nga agsao. (Mat. 26:62-64) Saanna a sinungbatan ti amin a pammadakesda kenkuana. (Mat. 11:19) Saanna met nga ininsulto wenno pinangtaan dagiti bumusbusor. w24.11 4-5 ¶9-10

Imadyinem nga inikkam ti maysa nga ipatpategmo iti espesial a regalo a saan la a napintas no di ket mausarna pay. Madismayaka la ketdi no naammuam a basta indulinna lattan dayta ken saannan nga impateg! Ngem sigurado a maragsakanka no makitam nga us-usarenna dayta ken agyamyaman kenka. Ania ti punto? Inted ni Jehova ti Anakna para kadatayo. Maragsakan la ketdi ni Jehova no ipakitatayo nga agyamyamantayo kenkuana gapu iti dayta a nagpateg a regalona ken iti ayatna a nangtignay kenkuana a mangipaay iti subbot! (Juan 3:16; Roma 5:7, 8) Ngem iti panaglabas dagiti tawen, baka mangrugin a bumaaw ti apresasiontayo iti subbot. No mapasamak dayta, kas man la indulintayo lattan ti nagpintas a regalo ti Dios kadatayo isu a ditayon makita wenno malagip pay dayta. Tapno saan a mapasamak dayta, masapul a regular a panunotentayo ti inaramid ti Dios ken ni Kristo para kadatayo. w25.01 26 ¶1-2

Ti brother a makualipikar kas panglakayen ket saan a baro a manamati. Nupay saan a kasapulan nga adu a tawenen a bautisadoka, masapul nga aglabas pay ti tiempo tapno agbalinka a nataengan iti naespirituan. Sakbay a maapointaranka kas panglakayen, masapul a kas ken Jesus, ipakpakitam a napakumbabaka ken kontentoka nga agur-uray iti aniaman nga asaynment nga ited kenka ni Jehova. (Mat. 20:23; Fil. 2:5-8) Pampaneknekam a napudnoka no agmatalekka ken Jehova, agbiagka a maitunos kadagiti nalinteg a pagalagadanna, ken no surotem dagiti instruksion ti organisasionna. Nalawag nga ibaga ti Kasuratan a dagiti manangaywan ket masapul a kualipikado a mangisuro. Kayat kadi a sawen dayta a masapul a nakalalaingka nga agpalawag? Saan. Saan nga amin a panglakayen ket nakalalaing nga agpalawag. Ngem mabalin nga epektiboda iti ministerio ken iti panag-shepherding. w24.11 23-24 ¶14-15

No adda mabasam iti Biblia a saanmo unay a maawatan, ag-research-ka. Ket iti intero nga agmalem, utobem dagiti naammuam ken nasursurom maipapan ken Jehova, iti Anakna, ken iti ayatda para kenka. (Sal. 119:97, ftn.) Dika koma maupay no awan ti mabirokam a baro wenno makapainteres nga impormasion kada agbasa wenno ag-research-ka. Panunotem nga agbirbirokka iti balitok. Nakaan-anus dagiti agbirbirok iti balitok. Adu nga oras wenno aldaw pay ketdi ti busbosenda nga agbirok iti nagbassit a balitok. Ngem porsegidoda ta uray nagbassit ti mabirokanda a balitok, napateg dayta kadakuada. Nupay kasta, adayo a napatpateg ti tunggal gameng a makalitayo iti Biblia! (Prov. 8:10) Isu nga agan-anuska ken itultuloymo a suroten ti eskediulmo iti panagbasa iti Biblia.—Sal. 1:2. w25.01 25 ¶14-15

Namnamaen ni Jehova a nakasaganatayo a mangpakawan kadagidiay nangpasakit kadatayo (Sal. 86:5; Luc. 17:4; Efe. 4:32) Mabalin a masaktantayo unay iti ibaga wenno aramiden kadatayo ti maysa a tao, nangruna no nasinged a gayyemtayo isuna wenno kapamiliatayo. (Sal. 55:12-14) No dadduma, mariknatayo a kas man la adda nangduyok kadatayo a nakasaktan ti riknatayo. (Prov. 12:18) Baka baybay-antayo lattan ti nasaktan a riknatayo. Ngem no kasta ti aramidentayo, kas man la binaybay-antayo a nakaduyok lattan kadatayo ti kutsilio. Iti umasping a pamay-an, ditay manamnama nga umimbag ti nasaktan a riknatayo no basta baybay-antayo lattan dayta. No adda nangpasakit kadatayo, baka ti damo a reaksiontayo ket makaungettayo. Kuna ti Biblia a mabalin a makapungtottayo. Ngem impakdaarna a ditay koma ipalubos nga agung-ungettayo lattan. (Sal. 4:4; Efe. 4:26) Apay? Ngamin, manmano a nasayaat ti resulta ti panagunget. (Sant. 1:20) Laglagipentayo a ti panagunget ket maysa a reaksion, ngem ti agtultuloy a panagunget ket maysa a desision. w25.02 15 ¶4-6

Iti maysa nga ilustrasion ni Jesus, impakitana a ti tao nga agur-urnong iti kuarta, ngem saan a “nabaknang iti imatang ti Dios,” ket maibilang a maag. (Luc. 12:16-21) Awan ti makaammo no ania ti mapasamak kadatayo inton bigat. (Prov. 23:4, 5; Sant. 4:13-15) Imbaga met ni Jesus nga amin a mayat nga agbalin a pasurotna ket masapul a nakasagana a “mangpanaw” iti amin a sanikuada. (Luc. 14:33) Kasta ti napasamak kadagiti Kristiano idiay Judea idi umuna a siglo, ngem nagtalinaedda latta a naragsak. (Heb. 10:34) Iti kaaldawantayo, adu a kakabsat ti naawanan iti trabaho gapu ta awan ti sinuportaranda a partido ti politika. (Apoc. 13:16, 17) Ania ti nakatulong kadakuada a mangaramid iti dayta? Naan-anay a nagtalekda iti kari ni Jehova: “Saankanto a pulos panawan ken saankanto a pulos baybay-an.” (Heb. 13:5) Isu nga aramidentayo ti amin a kabaelantayo nga agplano para kadagiti kasapulantayo iti masanguanan. Ket no bilang addanto dagiti mapasamak a ditay ninamnama, naan-anay nga agtalektayo a tulongannatayo ni Jehova. w25.03 29 ¶13-14

Ammo ni Jehova a ditay kabaelan ti agmataengan iti naespirituan a bukbukodtayo. Nakasagana dagiti agserserbi a papastor ken mannursuro iti kongregasion Kristiano a tumulong kadatayo tapno “agbalintayo a nataengan” iti naespirituan, “a kas iti kinanataengan ti Kristo.” (Efe. 4:11-13) Ipapaay met ni Jehova ti nasantuan nga espirituna tapno maadda kadatayo “ti panunot ni Kristo.” (1 Cor. 2:14-16) Kanayonanna, impaisurat ti Dios ti uppat nga ebanghelio tapno maammuantayo no kasano a nagpanunot, nagsao, ken nagtignay ni Jesus bayat ti ministeriona ditoy daga. No tuladem ti panagpampanunot ken panagtigtignay ni Jesus, maragpatmo ti kalatmo nga agmataengan iti naespirituan. Ngem tapno agmataengantayo, masapul a saan laeng a dagiti “pagdamdamuan a doktrina maipapan iti Kristo,” wenno dagiti kangrunaan a pannursuro ti ammotayo. w24.04 4-5 ¶11-12

Inaldaw a masapul nga agaramidtayo kadagiti desision. Dadduma ket medio nalaka nga aramiden, kas koma no ania ti pammigatmo, wenno no ania nga oras a maturogka. Ngem adda dagiti bambanag a narigat a desisionan. Mabalin nga apektaranda ti salun-at, kinaragsaktayo, dagiti ipatpategtayo, wenno ti panagdaydayawtayo. Kayattayo ti makaaramid kadagiti desision a pagsayaatantayo ken ti pamiliatayo. Kangrunaanna, kayattayo a dagiti desisiontayo ket mangparagsak ken Jehova. (Roma 12:1, 2) Ti napateg a banag a masapul nga aramidem tapno makaaramidka iti nasayaat a desision ket ammuem dagiti impormasion. Apay a napateg dayta? Imadyinem ti maysa a pasiente a napan nagpadoktor gapu iti nakaro a sakit. Basta la kadin agdesision ti doktor no ania nga agas ti itedna a dina man la eksamenen wenno pagsaludsodan ti pasiente? Sigurado a saan. Nasaysayaat met dagiti maaramidmo a desision no ikabilangam nga umuna dagiti impormasion nga agaplikar iti situasionmo. w25.01 14 ¶1-3

Ania ti ammotayo maipapan iti asi ni Jehova? Kasanona nga impakita a “saanna a kayat a madadael ti asinoman”? (2 Ped. 3:9) Kitaentayo ti asina iti dadduma a nakaaramid iti nadagsen a basol. Agsasaruno dagiti inaramid ni Ari David a nakaro a basol, a pakairamanan ti pannakikamalala ken panangpapatay. Ngem nagbabawi ni David, isu a kinaasian ken pinakawan ni Jehova. (2 Sam. 12:1-12) Nagadu ti nakadakdakes nga inaramid ni Ari Manases iti dandani intero a panagbiagna. Ngem uray nakadakdakes dagiti inaramid ni Manases, nagbabawi. Isu a kinaasian ken pinakawan ni Jehova. (2 Cron. 33:9-16) Ipalagip dagita a pagarigan nga ipakita ni Jehova ti asi no adda makitana a rason nga aramidenna dayta. Pagungarenna dagiti kasta a klase ti tattao gapu ta naamirisda a nakaaramidda kadagiti nadagsen a basol ken nagbabawida. w24.05 4 ¶12