Mayo

Kalpasan nga insalakan ni Jehova ti ilina iti pannakaadipenda idi idiay Egipto, nangdutok kadagiti papadi nga agserbi iti tabernakulo. Dinutokanna dagiti Levita a mangasikaso iti dadduma a trabaho iti dayta a nasantuan a toldana. Ngem kayatna kadi a sawen a gapu ta agserserbida iti tabernakulo, wenno aggigianda iti asideg dayta, ket nasaysayaaten ti panangaywan ni Jehova kadakuada ngem iti dadduma? Saan! Saan a manangidumduma ni Jehova. Ti tunggal Israelita ket posible nga agbalin a nasinged a gayyem ni Jehova. Kas pagarigan, sinigurado ni Jehova a makita ti intero a nasion ti sinan-adigi nga ulep ken sinan-adigi nga apuy iti ngatuen ti tabernakulo. (Ex.40:38) No mangrugin nga umakar ti sinan-adigi nga ulep, makita dayta uray dagiti adda iti kaadaywan a tolda manipud iti tabernakulo. Gapu iti dayta, adda gundawayda nga agempake, mangkupin kadagiti toldada, ken makikadua iti nasion a pumanaw. (Num. 9:15-23) Kasta met laeng ita. Sadinoman ti ayantayo ditoy daga, magunggonaantayo iti nadungngo ken naan-anay a panangaywan ken panangsalaknib ni Jehova. w24.06 4 ¶10-12

Agpegpeggad ti biag ni David. Determinado ti anakna a ni Absalom a mangpapatay kenkuana tapno isuna ti agbalin nga ari. (2 Sam. 15:12, 13) Masapul a dagus a pumanaw ni David iti Jerusalem! Bayat a pumampanaw dagiti adipenna, napanunot ni David a masapul nga adda agbati tapno maammuanda ti sumaruno a plano ni Absalom. Ni Zadok ken ti dadduma pay a papadi ket pinagsublina ngarud iti siudad tapno agserbi kas espia. (2 Sam. 15:27-29) Masapul nga agan-annadda. Nagpatulong ni David kada Zadok ken Husai, a matalek a gagayyemna, tapno agballigi ti planona. (2 Sam. 15:32-37) Sinurot ni Husai ti plano ni David. Nagpammarang ni Husai a supsuportaranna ni Absalom ken nangirekomenda iti estratehia no kasanoda a darupen ni David. Ngem saan nga ammo ni Absalom a makatulong dayta a balakad ken David tapno masaganaanna ti irarautda. Kalpasanna, impakaammo ni Husai kada Zadok ken Abiatar ti imbalakadna ken Absalom. (2 Sam. 17:8-16) Siniguradoda a maipakaammo dayta ken David tapno maprotektaran isuna.—2 Sam. 17:21, 22. w24.07 4-5 ¶9-10

Dadduma nga adipen ni Jehova ket sidsidiren latta ti konsiensiada gapu kadagiti naaramidanda a basol sakbay man wenno kalpasan ti panagbautisarda. Ngem nasayaat a laglagipentayo nga impaay ni Jehova ti subbot gapu ta ay-ayatennatayo unay. Sigurado a kayatna nga awatentayo ti sagutna. Ipasigurado ni Jehova a kalpasan a ‘nakilinnawagtayon’ kenkuana, saannan nga isingir kadatayo dagiti basoltayo. Anian a yamantayo ta saanen a lagipen ti nadungngo nga Amatayo a ni Jehova dagiti naaramidantayo a basol! Kasta met a dina pulos lipaten dagiti nasayaat a naaramidantayo. (Sal. 103:9, 12; Heb. 6:10) No sidsidirennaka latta ti konsiensiam uray no nagbabawyamon dagiti naaramidam a basol, ikagumaam ti agpokus iti agdama ken iti masanguanan imbes nga iti napalabas. Saanmon a maisubli ti napalabas. Ngem mabalinmo nga idaydayaw ken maparagsak ni Jehova iti agdama a kasasaadmo. Kanayon met a panunotem ti nagsayaat a masakbayan nga inkarina kenka. w24.10 8 ¶8-9

No agbasbasaka iti Biblia, baka maupayka no dadduma gapu ta makitam a nagadu ti masapul a parang-ayem wenno balbaliwam. Kas pagarigan: Ita nga aldaw, nabasam iti Biblia a masapul a saanka a mangipakita iti paboritismo. (Sant. 2:1-8) Nakitam a mapasayaatmo pay ti panangtratom iti dadduma isu nga adda dagiti inkeddengmo a balbaliwan. Kabigatanna, nabasam a kasapulan a kontrolem ti panagsasaom. (Sant. 3:1-12) Naamirismo a medio negatibo ti panagsasaom no dadduma. Isu a nagdesisionka nga agbalinka a mas positibo ken makaparegta. Iti sumaruno nga aldaw, nabasam ti pakdaar maipapan iti saan a pannakigayyem iti daytoy a lubong. (Sant. 4:4-12) Nabigbigmo a masapul nga agbalinka a naan-annad iti panangpilim kadagiti paglinglingayan. Ngem iti maikapat nga aldaw, baka naupaykan gapu ta nagadu gayam ti masapul a balbaliwam. Saanka koma a maupay. Laglagipem a ti panangisuot iti “baro a personalidad” ket agtultuloy a proseso. w24.09 5-6 ¶11-12

Ammo ni Jesus a ti kapatgan ket ti panangmatmat ni Jehova iti bambanag. Nagtalek a solbarento ni Jehova ti amin a kinaawan hustisia iti umiso a tiempo. No saan a patas ti pannakatratotayo, matuladtayo ni Jesus babaen ti panangkontroltayo iti panagsasaotayo. Baka nasaysayaat a baybay-antayo lattan dayta no saan met a nakaro. Wenno agulimektayo lattan tapno ditay makaibaga iti mangpakaro iti situasion. (Ecl. 3:7; Sant. 1:19, 20) Ngem adda dagiti tiempo a masapul nga agsaotayo tapno idepensatayo ti maysa a makapaspasar iti kinaawan hustisia, wenno no masapul nga idepensatayo ti kinapudno. (Ara. 6:1, 2) Ngem no agsaotayo, nadayawtayo latta koma ken ikagumaantayo ti agbalin a kalmado. Matuladtayo met ni Jesus no italektayo ti bagitayo iti “Daydiay mangukom a sililinteg.”—1 Ped. 3:15. w24.11 5-6 ¶10-12

Maragsakantayo unay no agbabawi ti nakabasol! (Luc. 15:7) Asino ti maidaydayaw? Dagiti kadi panglakayen? Lagipentayo ti insurat ni apostol Pablo maipapan kadagiti nakabasol: “Bareng no palubosan ida ti Dios nga agbabawi.” (2 Tim. 2:25) Isu a ni Jehova, saan a ti asinoman a tao, ti tumultulong iti maysa a Kristiano a mangbalbaliw iti panunot ken kababalinna. Inlawlawag ni Pablo nga adda dagiti nasayaat a mapasamak no agbabawi ti nakabasol. Ad-adda nga umuneg ti pannakatarusna iti kinapudno, makapagpanunot a siuumiso, ken ammonanton a lisian dagiti silo ni Satanas. No agbabawi ti nakabasol, iyurnos ti komite ti panag-shepherding iti nakabasol tapno agtultuloy a maawatna ti tulong a kasapulanna. Iti kasta, malabananna ti sulisog ni Satanas ken maaramidna ti umiso.—Heb. 12:12, 13. w24.08 23 ¶14-15

Interesado laeng dagiti tattao a pinakan ni Jesus iti panangpennek iti pisikal a kasapulan ken tarigagayda. Kasano a kasta? Iti simmaruno nga aldaw, nakitada a nakapanawen ni Jesus ken dagiti apostolna. Isu a naglugan dagiti tattao iti dadduma a bangka a naggapu iti Tiberias a mapan idiay Capernaum tapno birokenda ni Jesus. (Juan 6:22-24) Ngem napanda kadi tapno ad-adu pay ti maammuanda maipapan iti Pagarian? Saan. Mas interesadoda iti pisikal a taraon. Kasanotayo nga ammo? Kitaentayo ti napasamak idi nabirokanda ni Jesus iti asideg ti Capernaum. Prangka nga imbaga ni Jesus kadakuada a ti panggepda nga immay ket tapno laeng mapennek ti pisikal a kasapulanda. Imbagana a ‘nabsogda iti tinapay a kinnanda,’ ngem dayta ket “madadael a taraon.” Imparegtana kadakuada nga agtrabahoda “para iti agpaut a taraon a mangted iti biag nga agnanayon.” (Juan 6:26, 27) Imbaga ni Jesus nga ited ti Amana dayta a taraon. w24.12 5 ¶8-9

Tapno agbalinka a mas epektibo a mannursuro, masapul nga ibataymo iti Sao ti Dios dagiti palawag ken balakadmo. Tapno maaramidmo dayta, masapul a gagetam nga adalen ti Biblia ken dagiti publikasiontayo. (Prov. 15:28) Bayat nga agad-adalka, siputam ti panangilawlawag dagiti publikasiontayo kadagiti teksto tapno siuumiso a mailawlawagmo met dagita. Ken no mangisursuroka, ikagumaam a danonen ti puso dagiti dumdumngeg kenka. Rumang-ayka kas mannursuro no agpatulongka kadagiti eksperiensiado a panglakayen ken no iyaplikarmo dagiti suhestionda. (1 Tim. 5:17) Dagiti panglakayen ket masapul a ‘kabaelanda ti mangparegta’ kadagiti kakabsat. Ngem masapul met a mangbalakadda no dadduma wenno ‘mangtubngarda’ pay ketdi. Aniaman kadagita ti aramidenda, masapul a kanayon a nasingpet dagiti panglakayen. No naalumamay ken naayatka, ken naibatay iti Sao ti Dios dagiti isursurom, agbalinka nga epektibo ta tultuladem ti Naindaklan a Mannursuro a ni Jesus.—Mat. 11:28-30; 2 Tim. 2:24. w24.11 24 ¶16

Maipadayagtayo ni Jehova babaen kadagiti ibagbagatayo maipapan kenkuana. Mayaw-awis kadagiti adipen ni Jehova: “Kantaanyo ni Jehova,” “idaydayawyo ti naganna,” “iwaragawagyo ti naimbag a damag ti panangisalakanna,” ken “ipakaammoyo ti dayagna kadagiti nasion.” (Sal. 96:1-3) Pamay-an amin dagita a maipadayagtayo ti nailangitan nga Amatayo. (Ara. 4:29) Maipadayagtayo ni Jehova babaen kadagiti napateg a bambanagtayo. Kanayon nga ar-aramiden dayta dagiti pudno nga agdaydayaw iti Dios tapno maipadayagda ni Jehova. (Prov. 3:9) Kas pagarigan, timmulong dagiti Israelita iti panagibangon ken panangmantener iti templo. (2 Ar. 12:4, 5; 1 Cron. 29:3-9) Dadduma nga adalan ni Kristo ti ‘nangusar kadagiti sanikuada’ iti panagserbida kenkuana ken kadagiti apostolna. (Luc. 8:1-3) Timmulong met dagiti Kristiano idi umuna a siglo iti panangipaay iti ayuda kadagiti kapammatianda. (Ara. 11:27-29) Ita, maipadayagtayo met ni Jehova babaen kadagiti boluntario a donasiontayo. w25.01 4 ¶8; 5 ¶11

Ania ti nakatulong ken Cornelio nga agpabautisar? Mabasatayo nga isu ket “managbuteng iti Dios agraman ti sangakabbalayanna.” Nagtultuloy met a nagpakpakaasi iti Dios. (Ara. 10:2) Idi impakaammo ni Pedro ti naimbag a damag ken Cornelio, naaddaanda a sangapamiliaan iti pammati ken Kristo ket dagus a nagpabautisarda. (Ara. 10:47, 48) Saan a pulos nagpangadua ni Cornelio a mangaramid kadagiti kasapulan a panagbalbaliw tapno makapagdaydayawda ken Jehova a sangapamiliaan. (Jos. 24:15; Ara. 10:24, 33) Saan nga impalubos ni Cornelio a ti posisionna ti manglapped kenkuana nga agbalin a Kristiano. Masapul kadi a mangaramidka kadagiti dadakkel a panagbalbaliw iti biagmo tapno makualipikarka a mabautisaran? No kasta, laglagipem a ni Jehova ti Katulongam. Bendisionanna ti determinasionmo a mangyaplikar kadagiti prinsipio ti Biblia tapno makapagserbika kenkuana. w25.03 5 ¶12-13

No makangngegka kadagiti negatibo nga estoria maipapan iti organisasion wenno kadagiti kakabsat a mangidadaulo, laglagipem no kasano a trinato dagiti kabusor ti Dios ni Jesus ken dagiti adalanna idi umuna siglo. Ita, ti ili ni Jehova ket maidaddadanes ken mapadpadakes kas iti impadto ti Biblia. (Mat. 5:11, 12) Saantayo a maallilaw kadagiti ulbod nga estoria no ammotayo ti pagtataudanna ken no dagus nga agtignaytayo. Ania ti masapul nga aramidentayo? Laksidem dagiti ulbod nga estoria. Nalawag ti instruksion ni apostol Pablo no adda mangngegtayo nga ulbod nga estoria. Imbagana ken Timoteo: “Balakadam ti dadduma a saanda . . . a denggen dagiti ulbod nga estoria” ken “laksidem dagiti ulbod nga estoria.” (1 Tim. 1:3, 4) Laksidentayo dagiti ulbod nga estoria ta ammotayo ti pagtataudan dagita nga impormasion. Dumngegtayo laeng iti “nasayaat a sasao” ti kinapudno.—2 Tim. 1:13. w24.04 11 ¶16; 13 ¶17

Agtalinaedtayo a naikaykaysa kadagiti napudno ken Jehova. Kayat ti Dios nga agkaykaysatayo nga agkakabsat a mangidaydayaw kenkuana. Agtultuloytayo nga agkaykaysa no itultuloytayo a petpetan ti kinapudno. Asinoman nga agiwarwaras iti aniaman a damag a maikontra iti kinapudno, pagsisinaenna ti kongregasion. Isu a pakpakdaarannatayo ti Dios a ‘liklikantayo ida.’ Ta no saan, mayadayotayo iti kinapudno. (Roma 16:17) No mailasintayo ti kinapudno ken mapetpetantayo a naimbag dayta, agtalinaedtayo a nasinged ken Jehova ken kanayon a nabileg ti pammatitayo. (Efe. 4:15, 16) Saantayo a maallilaw kadagiti ulbod a pannursuro ken propaganda ni Satanas, ken agtalinaedtayo met a natalged inton dakkel a rigat ta aywanannatayto ni Jehova. Itultuloytay ngarud a petpetan a naimbag ti kinapudno, ‘ket addanto kadatayo ti Dios ti talna.’—Fil. 4:8, 9. w24.07 13 ¶16-17

Nagpokus ni Jesus iti panangtulongna kadagiti tattao a maup-upay gapu iti kinamanagbasolda. Inawisna ida nga agbalin a pasurotna. Ammo ni Jesus a ti basol ti ramut ti amin a problema ti amin a tattao. Gapu iti dayta, tinulonganna dagiti agdindinamag a managbasol. Nangusar iti ilustrasion, sa inlawlawagna: “Dagiti masakit ti agkasapulan iti doktor, saan a dagiti nasalun-at.” Imbagana pay: “Immayak tapno ayabak dagiti managbasol, saan a dagiti nalinteg.” (Mat. 9:12, 13) Kasta ti inaramid ni Jesus. Adda idi babai a nagsangit. Uray la nabasa dagiti saka ni Jesus gapu kadagiti lua dayta a babai, ngem pinunasanna dagita babaen ti buokna. Siaalumamay a kinasarita ni Jesus ket pinakawanna dagiti basol dayta a babai. (Luc. 7:37-50) Adda met dagiti napateg a kinapudno nga insuro ni Jesus iti maysa a Samaritana nga immay agsakdo iti bubon, uray no ammona nga immoral dayta a babai. (Juan 4:7, 17-19, 25, 26) Ni Jesus ket inikkan pay ketdi ti Dios iti pannakabalin a mamagpatingga iti ipapatay nga isu ti resulta ti basol. Kasano? Pinagungar ni Jesus dagiti tattao—lallaki ken babbai, ubbing ken adulto.—Mat. 11:5. w24.08 4 ¶9-10

Kasano nga ipadayag ni Jehova ti naganna iti asidegen a masanguanan? Babaen kadagiti panangukomna. Asidegen a dadaelenna ti Babilonia a Dakkel a mangibabain iti nasantuan a naganna. (Apoc. 17:5, 16; 19:1, 2) Dadduma a makasaksi iti pannakadadael ti Babilonia a Dakkel ket posible a makikaduanto kadatayo iti pudno a panagdaydayaw. Kamaudiananna, inton Armagedon, dadaelento ni Jehova ti intero a sistema ni Satanas. Ikkatennanto ti amin a mangbusbusor ken mangpadpadakes iti naganna. Ngem isalakannanto ti amin a mangay-ayat, mangipampannakkel, ken mangipadpadayag kenkuana. (Mar. 8:38; 2 Tes. 1:6-10) Inton malpas ti maudi a pannubok kalpasan ti Sangaribu a Tawen a Panagturay ni Kristo, naan-anayton a nasantipikar ni Jehova ti naganna. (Apoc. 20:7-10) Iti dayta a tiempo, “mapnonto ti daga iti pannakaammo iti dayag ni Jehova kas iti pannakapunno ti baybay iti danum.” (Hab. 2:14) Makaparagsakto la ketdi inton ti amin a sibibiag iteddan ken Jehova ti dayag a maikari iti naganna! w25.01 7 ¶15-16

Ania ti makatulong kadagiti Hebreo a Kristiano a mangibtur iti pannakaidadanes a pakaipaspasanguanda? Ammo ni apostol Pablo a masapul nga umiso ti panangmatmatda kadagiti pakasuotanda. Inlawlawagna ngarud a mabalin nga ipalubos ti Dios a masubok ti pammatida kas paset ti pannakasanayda. Ti kasta a pannakasanay ket makatulong tapno masursuro ken mapasayaatda dagiti kualidad a mangparagsak ken Jehova. No agpokus dagiti Hebreo a Kristiano iti nasayaat a resulta dagiti pakasuotanda, nalaklakada nga agibtur. (Heb. 12:11) Pinaregta ni Pablo dagiti Hebreo a Kristiano a papigsaenda ti pakinakemda ken saanda a sumuko a mangsango kadagiti pakasuotanda. Ammo unay ni Pablo ti ibagbagana maipapan iti daytoy a banag. Kas dati a manangidadanes kadagiti Kristiano, ammona no kasano karigat ti mapaspasaranda. Ammona met no kasano nga ibturan ti pannakaidadanes. Ngamin, napasaranna a mismo ti agduduma a kita ti ibubusor idi nagbalin a Kristiano.—2 Cor. 11:23-25. w24.09 12-13 ¶16-17

Kada lumabas ti maysa nga aldaw, lallalo met a masapul nga iyapuratayo ti mangasaba. Apay? Ngamin, bumasbassiten ti nabati nga oras. Kitaentayo ti impakpakauna ni Jesus maipapan iti trabaho a panangasaba iti maudi nga al-aldaw kas nairekord iti Marcos 13:10. Iti met salaysay ni Mateo, imbaga ni Jesus a maikaskasaba ti naimbag a damag iti intero a daga sakbay “ti panungpalan.” (Mat. 24:14) Ti panungpalan ket tumukoy iti naan-anay a panagpatingga ti dakes a sistema ni Satanas. Addan ti inkeddeng ni Jehova nga “aldaw ken oras” a mapasamak dayta. (Mat. 24:36; Ara. 1:7) Iti tunggal aldaw nga aglabas, umas-asideg met dayta a tiempo. (Roma 13:11) Isu a masapul nga itultuloytayo ti mangasaba agingga iti panungpalan. Bayat a pampanunotentayo ti ministeriotayo, nasayaat no isaludsodtayo iti bagitayo: Apay a mangaskasabatayo? Ti simple a sungbat ket gapu iti ayat. No mangaskasabatayo, ipakpakitatayo ti ayattayo—ayat para iti naimbag a damag, ayat para kadagiti tattao, ken kapatgan iti amin, ayat para ken Jehova ken iti naganna. w24.05 14-15 ¶2-3

Nagannak, paregtaenyo ti anakyo nga agpanunot maipapan kadagiti nakaskasdaaw a parsua ni Jehova. No magmagnakayo iti parke wenno addakayo iti hardin, iturongyo ti atension ti anakyo kadagiti makapainteres a sukog (shape) wenno pattern a makita iti nakaparsuaan. Apay? Ebidensia dagita nga adda nakasirsirib a nangdisenio kadagita. Kas pagarigan, adu a banag iti nakaparsuaan ti agpapada nga agkawikaw wenno spiral ti pattern wenno disenioda, kas iti dadduma a galaxy, shell iti baybay, bulong ti mulmula, ken ti tengnga ti sabong ti sunflower. Adun a tawen nga ad-adalen dayta dagiti sientista. Inlawlawag ti sientista a ni Nicola Fameli a no bilangem ti kaadu ti spiral iti maysa a banag, makitam nga adda pattern ti bilangda. Maaw-awagan dayta iti Fibonacci sequence. w24.12 16 ¶7

Nagbiag da Moises, David, ken Juan iti nagduduma a panawen ken kasasaad a naiduma kadatayo. Ngem adu ti pagpapadaantayo. Nagserbida iti pudno a Dios, ket kastatayo met. Kas kadakuada, agkarkararag, agpampannuray, ken agpapaiwanwantayo ken Jehova. Kas kadagitoy a matalek a lallaki, agtalektayo nga aglaplapusanan ti bendision ni Jehova kadatayo no agtulnogtayo kenkuana. Ipangagtay ngarud ti pammakada a sasao dagitoy a lallaki babaen ti panagtulnogtayo kadagiti bilin ni Jehova. Iti kasta, talaga nga agballigi ti amin nga aramidentayo. Agbiagtayto ket ‘pagbalinennanto a napaut’ dayta, wen, iti agnanayon! Nakaragragsaktayto met ta ammotayo a maparparagsaktayo ti nadungngo a nailangitan nga Amatayo a mangtungtungpal kadagiti karina iti nakaskasdaaw unay a pamay-an.—Efe. 3:20. w24.11 13 ¶20-21

Idi umuna a siglo, adda dagiti kakabsat a lallaki a nadutokan kas ministerial nga adipen. (1 Tim. 3:8) Agparang nga isuda ti tinukoy ni apostol Pablo iti tekstotayo ita nga aldaw a “tumultulong iti sabsabali.” Posible ngarud nga isuda ti nangaramid iti dadduma a napateg a trabaho tapno makapagpokus dagiti panglakayen iti panangisuro ken panangipastor. Kas pagarigan, posible a timmulong dagiti ministerial nga adipen iti panagaramid kadagiti kopia ti Kasuratan wenno iti panaggatang kadagiti materiales a nausar iti panagkopia kadagita. Kitaentayo ti dadduma a napateg nga ar-aramiden dagiti ministerial nga adipen a makatulong iti kongregasionyo. (1 Ped. 4:10) Mabalin a maikkan ti dadduma kadakuada iti annongen a mangasikaso iti accounts ti kongregasion, rekord dagiti teritoria, wenno iti panagorder kadagiti publikasion nga usaren dagiti kakabsat. Adda met dagiti ag-operate iti audio ken video, agserbi kas attendant, wenno tumulong iti panangmantener iti Kingdom Hall. Napateg amin dagita tapno agbalin nga organisado ti kongregasion.—1 Cor. 14:40. w24.10 19 ¶4-5

Maibturantayo ti aniaman a suot, dadakkel man wenno babassit, no laglagipentayo a sibibiag ni Jehova ken kanayon a nakasagana a tumulong kadatayo. Ngamin, isu ti Mannakabalin-amin ken maipaayannatayo iti bileg nga agibtur. Naan-anay ngarud a makapagtalektayo a tulongannatayo a mangsango kadagiti pakasuotan. Bayat a makitkitatayo a tultulongannatayo ni Jehova kadagiti babbabassit a pakasuotan, kombinsidotayo a tulongannatayto met kadagiti daddadakkel a pakasuotan. Kitaentayo ti dua a kapadasan ni Ari David isu a bimmileg ti panagtalekna ken Jehova. Idi agtutubo pay ni David, ipaspastoranna ti arban ni tatangna. Maysa nga aldaw, adda leon nga immay ket intarayna ti maysa a karnero. Idi agangay, kasta met laeng ti inaramid ti maysa nga oso. Kadagita a dua a pasamak, situtured a kinamat ni David ti leon ken ti oso isu a nasalbarna dagiti karnero. Ngem saanna a pinanunot a naaramidna dagita iti bukodna a pigsa. Ammona a ni Jehova ti nangted kenkuana iti bileg a mangaramid iti dayta. (1 Sam. 17:34-37) Kanayon a pinampanunot ni David dagita, isu a bimmileg ti panagtalekna nga aniaman ti mapasamak iti masanguanan, itultuloy isuna a pabilgen ti sibibiag a Diosna. w24.06 21 ¶5-6

Ipapantayo a naawiska iti maysa a gathering. Mapanka kadi? No saanmo nga am-ammo ti nangawis kenka wenno dagiti implanona para iti gathering, masapul nga isaludsodmo dagitoy: “Sadino ken kaano a maangay ti gathering? Kasano kaadu a tattao ti mapan? Siasino ti makinresponsabilidad kadagiti mapasamak sadiay? Siasino dagiti mapan? Ania dagiti naiplano a maaramid? Addanto kadi maidasar nga arak?” Makatulong dagiti sungbat kadagita a saludsod tapno makaaramidka iti nainsiriban a desision. Kalpasan a naammuam dagiti impormasion, panunotem a naimbag ti amin nga anggulo ti situasion. Kas pagarigan, kasanon no maammuam nga adda dagiti mapan iti gathering a saan a mangsursurot kadagiti prinsipio ti Biblia? Wenno addanto ti maidasar nga arak ngem awan ti naikkan iti responsabilidad a mangsigurado nga awanto ti mabartek? Posible kadi a dayta a gathering ket agtinnagto a nalabes a panagragragsak? (1 Ped. 4:3) No nakitamon ti amin nga anggulo ti situasion, nalaklakakan a makaaramid iti nasayaat a desision. w25.01 15 ¶4-5

Gapu iti subbot, mabalin a punasen ni Jehova ti basol dagiti agbabbabawi. Deskribiren ti Biblia ti aramidenna. Ti mansa a kolor eskarlata wenno krimson ket nakarigrigat nga ikkaten iti bado. Ngem babaen daytoy nga ilustrasion, ipaspasigurado kadatayo ni Jehova a dagiti basoltayo ket mabalin a mapapuraw agingga a saantayon a makita ti mansa wenno ti basol. Dagiti basoltayo ket kas iti ‘utang.’ (Mat. 6:12; Luc. 11:4) Isu a kada agbasoltayo ken Jehova, kas man la mailumlumlomtayo iti utang. Dumakkel a dumakkel dayta nga utang! Ngem no pakawanennatayo ni Jehova, arigna kanselarenna dagiti utangtayo. Saanna a singiren dagiti basoltayo a pinakawannan. No kasano a permi ti ragsak ti tao a nakanselar ti utangna, nakaragragsaktayo met no pakawanennatayo ni Jehova! w25.02 9-10 ¶9-10

Inton nataenganen dagiti nagannak, baka kasapulandanto ti tulong dagiti annakda no maipapan iti pinansial ken dadduma pay a banag. Ket adu nga annak ti maragsakan a mangaramid iti kasta. (1 Tim. 5:4) Ngem ammo dagiti Kristiano a nagannak a naragragsakda nga amang no tulonganda dagiti annakda nga agserbi ken Jehova, imbes a padakkelenda ida a ti panggepda ket addanto mangsustento kadakuada inton nataengandan. (3 Juan 4) Bayat nga isursuroyo dagiti annakyo no kasanoda a masuportaran ti bagida iti pinansial inton adultodan, ipakitayo babaen ti ulidanyo nga agtaltalekkayo ken Jehova. Uray ubingda pay laeng, isuroyon kadakuada ti pateg ti kinagaget. (Prov. 29:21; Efe. 4:28) Bayat a dumakdakkelda, tulonganyo ida nga agadal a naimbag iti eskuelaan. Nasayaat no ag-research dagiti Kristiano a nagannak kadagiti prinsipio ti Biblia a makatulong kadagiti annakda nga agdesision no kasanoda nga usaren a naimbag ti edukasionda. Makatulong dayta kadagiti annak tapno masuportaranda ti bagida ken tapno ad-adunto ti tiempoda a mangasaba, wenno makapagpayunirdanto pay ketdi. w25.03 30-31 ¶15-16

Mabasatayo iti Isaias kapitulo 65 ti panangiladawan ni Jehova no anianto ti kasasaad dagiti agnaed iti naespirituan a paraiso. Ti damo a kaitungpalan dayta a padto ket idi 537 B.C.E. Iti dayta a tiempo, nawayawayaan dagiti nagbabawi a Judio iti pannakaadipenda iti Babilonia ket nakasublida iti dagada. Binendisionan ni Jehova ti ilina ken tinulonganna ida a mangpapintas manen iti nadadael a siudad ti Jerusalem. Tinulonganna met ida a mangibangon manen iti templo, ti sentro ti pudno a panagdaydayaw iti Israel. (Isa. 51:11; Zac. 8:3) Ti maikadua a kaitungpalan ti padto ni Isaias ket nangrugi idi 1919 C.E., idi nawayawayaan dagiti agdaydayaw ken Jehova iti panawentayo iti pannakaadipenda iti Babilonia a Dakkel. Kalpasanna, in-inut a limmawa ti naespirituan a paraiso iti intero a daga. Nakaipasdek dagiti naregta nga agibumbunannag iti Pagarian iti adu a kongregasion ken naipakitada dagiti Nakristianuan a kualidad. Dagiti dati a naranggas ken immoral ti biagda ‘insuotdan ti baro a personalidad a pinarsua ti Dios maitunos iti pagayatanna.’ w24.04 20-21 ¶3-4

Iti dadduma a kultura, dagiti nagannak wenno dadduma nga adulto ti mangpili iti pakiasawaan dagiti single a kabagianda. Iti dadduma a lugar, dagiti kapamilia wenno gagayyem ti single ti mangbirok iti nasayaat a pakiasawaanna sada iyurnos ti panagkitada tapno maammuanda no kayatda ti maysa ken maysa. No sika ti makiddaw a mangyurnos iti panagarem wenno panagasawa, agpada nga ikabilangam dagiti kayat ken kasapulanda a dua. No nakabirokkan, ikagumaam nga ammuen ti adu nga impormasion maipapan iti dayta a tao tapno maammuam ti personalidad, kualidad, ken kangrunaan iti amin, ti espiritualidadna. Napatpateg nga amang ti nadekket a relasionna ken Jehova ngem iti kuarta, edukasion, wenno iti kasasaad ti biagna. Nupay kasta, laglagipem nga isuda a dua ti mangaramid iti pinal a desision no kayatdanto ti agkasar wenno saan. w24.05 23 ¶11

Matulongantayo ti agnobio no panunotentayo a naimbag ti ibaga wenno saantayo nga ibaga. Baka masapul nga agteppeltayo no dadduma. (Prov. 12:18) Kas pagarigan, baka excited-tayo unay a mangipadamag maipapan iti baro nga agnobio. Ngem baka kayatda met nga isuda ti mangipadamag iti dayta. Saantayo koma a pagtsitsismisan wenno uyawen ida maipapan kadagiti personal a banag. (Prov. 20:19; Roma 14:10; 1 Tes. 4:11) Baka saanda met a maapresiar dagiti komento wenno saludsod a mangiparikna a masapul nga agkasardan. Kasano ngay no nagdesision ti agnobio nga agsinadan? Ditay koma makibiang wenno pabasolen ti maysa kadakuada. (1 Ped. 44:15) No nagdesision ti agnobio nga agsinadan, saan a kayat a sawen a saan a nagballigi ti panagnobioda. Masansan nga ipakita laeng dayta a naibanag ti panggep ti panagnobioda—dayta ti nakatulong kadakuada nga agaramid iti nasayaat a desision. Ngem siempre, nasakit latta dayta kadakuada. Agpanunottayo ngarud koma kadagiti pamay-an a matulongantayo ida. w24.05 31 ¶15-16

Maysa kadagiti karirigatan a pakasuotan ket no ti maysa a kapamiliam wenno nadekket a gayyemmo panawanna ni Jehova. (Sal. 78:40) No nadekdekket ti relasionmo iti dayta a tao, mabalin a mas marigatanka a mangakseptar ken mangibtur iti napasamak. No adda kasta a nasaem a kapadasam, mapabilegka la ketdi iti kinamatalek ni Zadok. Nagtalinaed a matalek ken Jehova uray no saan a nagmatalek ti nasinged a gayyemna a ni Abiatar. Napasamak dayta idi lakay ken matmatayen ni David. Pinadas ti anakna a ni Adonias nga agawen ti kinaari uray no ni Solomon ti kayat ni Jehova nga agbalin nga ari. (1 Cron. 22:9, 10) Pinili ni Abiatar a suportaran ni Adonias. (1 Ar. 1:5-8) Ipakita dayta nga inaramid ni Abiatar a saan a matalek kada David ken Zadok ken uray ken Jehova! Nasurok a 40 a tawen a nagkatrabahuan da Zadok ken Abiatar kas papadi!—2 Sam. 8:17; 15:29; 19:11-14. w24.07 6 ¶14-15

Masiguradotayo a pagsayaatantayo no itultuloytayo a labanan dagiti pagkapuyantayo. Mabalin nga adda ‘temporario a ragsak’ a maited ti basol, ngem naragragsaktayo nga amang no surotentayo dagiti pagalagadan ni Jehova. (Heb. 11:25; Sal. 19:8) Ngamin, nadiseniotayo a mangaramid iti pagayatanna. (Gen. 1:27) Isu a no agbiagtayo maitunos iti pagayatan ni Jehova, maaddaantayo iti nadalus a konsiensia ken agbiagtayto iti agnanayon. (1 Tim. 6:12; 2 Tim. 1:3; Jud. 20, 21) Agpayso a “nakapuy ti lasag.” (Mat. 26:41) Ngem saanna a kayat a sawen nga awanen ti maaramidantayo kadagiti pagkapuyantayo. Nakasagana ni Jehova a mangipaay iti bileg a kasapulantayo. (2 Cor. 4:7) Nupay kasta, laglagipem a ti bileg nga ipaay ti Dios ket ti bileg a nalablabes ngem iti gagangay. Masapul nga usarentay nga umuna ti gagangay a bileg—ti inaldaw a panagreggettayo a manglaban kadagiti pagkapuyantayo. Responsabilidadtayo dayta. Sungbatan ni Jehova dagiti kararagtayo a maaddaan iti ad-adu pay a bileg no kasapulantayo dayta. (1 Cor. 10:13) Wen, iti tulong ni Jehova, maitultuloytayo ti agannad tapno ditay masulisog. w24.07 19 ¶19-21

Insurat ni apostol Pablo dagita a sasao para iti padana a panglakayen a ni Timoteo maipapan iti panangtaming iti kaso dagidiay “mangyugali iti basol.” Ania ti kayatna a sawen? Idi insuratna dagiti sasao a “sanguanan ti amin,” saanna met ketdi a tuktukoyen ti intero a kongregasion. Ti tuktukoyenna ket ti amin a nakaammon iti basol, kas koma dagiti nakasaksi wenno dagiti nangibagaan ti nakabasol iti naaramidanna. Isuda laeng ngarud ti pangibagaan dagiti panglakayen a natamingen ti kaso ken nailintegen ti nakabasol. No dadduma, mabalin nga adu iti kongregasion ti nakaammo maipapan iti naaramid a nadagsen a basol wenno mabalin a maammuanto met laeng dayta inton agangay. Kadagita a situasion, ti sasao a “sanguanan ti amin” ket agaplikar iti intero a kongregasion. Isu a maysa a panglakayen ti mangipakaammo iti kongregasion a natubngar ti maysa a kabsat. Apay? Imbaga ni Pablo: Dayta ket “pakdaar iti dadduma” tapno saanda a makaaramid iti nadagsen a basol. w24.08 23-24 ¶16-17

Masapul nga itultuloytayo ti nagaget a panagserbitayo ken Jehova agingga iti panungpalan. Masapul nga agtalinaed a managbantay dagiti dinutokan ti espiritu tapno ‘alaento’ ida ni Jesus idiay langit. (Mat. 24:40) Magagaranda unayen iti “pannakaurnong[da] a sangsangkamaysa” a kadua ni Jesus idiay langit. Kalpasan ti Armagedon, agbalindanto a nobia ni Jesus iti kasar ti Kordero. (2 Tes. 2:1) Nakaas-asidegen ti aldaw ti panangukom. Ngem awan ti rumbeng a pagbutngantayo. No agtalinaedtayo a matalek, ipaayto ti nailangitan nga Amatayo “ti bileg a nalablabes ngem iti gagangay.” Iti kasta, ‘malasatantayo amin dagitoy ken makapagtakdertayo iti sanguanan ti Anak ti tao.’ (2 Cor. 4:7; Luc. 21:36) Idiay man langit wenno ditoy daga ti namnamatayo, maparagsaktayo ti Amatayo no ipangagtayo ti pakdaar kadagiti ilustrasion ni Jesus. Gapu iti nagpaiduma a kinaimbag ni Jehova, dagiti nagantayo ket ‘maisuratto iti libro’ ti biag.—Dan. 12:1; Apoc. 3:5. w24.09 24-25 ¶19-20

Malabanam dagiti panagduaduam iti tulong ti Sao ti Dios. Kasano? Panunotem dagiti nagsayaat nga adda kenka, agraman dagiti bendision ni Jehova. Laglagipem nga awan dagita kadagiti saan nga agserserbi kenkuana. Para kadakuada, ti nanam-ay a biag ita ti kapatgan ta awan metten ti namnamada para iti masanguanan. Ngem para kenka, adayo a nasaysayaat dagiti bendision nga ikarkari ni Jehova ngem iti mapanunotmo ita. (Sal. 145:16) Panunotem met daytoy: Siguradoka kadi a nasaysayaat koma ti biagmo ita no sabali dagiti inaramidmo a desision? Maysa a banag ti sigurado: Dagidiay mangaramid kadagiti desision gapu ta ay-ayatenda ti Dios ken ti padada a tattao ket saanto a pulos maikapis iti aniaman a talaga a mangparagsak unay iti biag. w24.10 27 ¶12-13